Ravenga Meitaki me Takinokinoia Tatou

1-2. Eaa ta te tangata ka rave me takinokinoia ratou e eaa ta tatou ka uriuri i teia atikara?

TE NOO nei tatou ki roto i tetai ao kino. Te takinokinoia nei te tangata no te au tumu tukeke mei te putaua, to ratou enua, to ratou akaraanga e ta ratou au peu. Te taitaia nei te tangata no te noinoi moni a te aronga ona mirioni e te au arataki kavamani. No reira, kua riro ta ratou takinokinoanga i te akatupu i te mamae kia tatou e tetai ke.

² E maata te tangata te riri nei no te mea kua takinokinoia ratou. Inangaro te katoatoa kia akonoia ratou ma te ’au. No reira, ka tauta tetai pae i te takore i te au manamanata i to ratou enua. Ka tata ratou i te au pepa patoianga, ka marō e ka turuturu i te au arataki poritiki tei taputou i te takore i te au manamanata. Ei au Kerititiano, kua apiiia tatou e “kare [tatou] i to teianei ao” e te irinaki na te Patireia o Iehova e takore takiri i te au takinokinoanga. (Ioa. 17:16) Inara, ka riri rai tatou me kite tatou i tetai ke e takinokinoia ra. Penei ka akamanako tatou: ‘Eaa taku ka rave me tupu ake te reira? E apinga ainei tetai ka rauka iaku i te rave i teia taime?’ Ei pau i teia nga uianga, ka uriuri tatou i to Iehova manako e to Iesu me takinokinoia tetai.

RIKARIKA A IEHOVA E IESU ME TAKINOKINOIA TE TANGATA

3. Eaa te tumu ka riri ei tatou me takinokinoia? (Isaia 5:7)

³ Akakite mai te Pipiria i te tumu ka riri ei tatou me takinokinoia. Te akamārama maira te reira e kua anga a Iehova ia tatou i tona tu e tona “inangaro i te tuatua-tika e te tuatua-tau.” (Sala. 33:5; Gene. 1:26) Kare aia e takino i te tangata e kare katoa aia e inangaro kia takino tatou i tetai ke! (Deu. 32:​3, 4; Mika 6:8; Zeka. 7:9) Ei akaraanga, i te tuatau o Isaia kua akarongo a Iehova i “te aue” a to Iseraela e takinokinoia ra. (E tatau ia Isaia 5:7.) Kua akautunga a Iehova i te aronga tei patoi i tana au Ture e tei takinokino i tetai ke.—Isa. 5:​5, 13.

4. Eaa to Iesu manako me takinokinoia tetai tangata? (Akara katoa i te tutu.)

⁴ Mei ia Iehova rai e akaperepere ana a Iesu i te tu tau e te rikarika ra i te tu tika kore. Ia Iesu e tutu aere ra, kua kite atu aia i tetai tangata kua amingi tona rima. Kua tangi a Iesu iaia e kua rapakau i tona rima. Inara, kua riri te au arataki akonoanga i tana i rave. No te mea, kua aati a Iesu i te ture Sabati. Kare ratou i akamanako ana e kua meitaki te rima o teia tangata. Eaa to Iesu manako i to ratou tu? Kua “kinokino [aia] i te mārokiakiaanga o to ratou ngakau.”—Mare. 3:​1-6.

5. Eaa tatou kare e riri ua rai me takinokinoia tetai?

⁵ E makitakita ana a Iehova e Iesu me takinokinoia tetai ke, no reira kare i te mea tarevake me riri katoa tatou. (Ephe. 4:26) Inara, e akamaara kare e rauka ia tatou i te takore i te tu tika kore. Me riri ua rai tatou, ka tupu te maki e te taitaia kia tatou. (Sala. 37:​1, 8; Iako. 1:20) No reira, eaa ta tatou ka rave me takinokinoia tatou? Ka apii tatou mei te akaraanga o Iesu.

TA IESU I RAVE NO TE TU TIKA KORE

6. Akapeea te tangata te takinokinoia anga i to Iesu tuatau? (Akara katoa i te tutu.)

⁶ Kua kite ana a Iesu i te tangata i te takinokinoia anga. Kite aia i te au arataki akonoanga e akateiaa ra i te oraanga o te tangata na roto i ta ratou au ture. (Mata. 23:​2-4) E kua kite katoa aia i te au tutara o Roma e takinokino ra i te tangata. Maata te au ngati Iuda tei inangaro kia akarangatiraia ratou mei to Roma. Tei tupu, kua akanoo ratou i tetai pupu kia tamaki atu i to Roma. Inara, kare a Iesu i turuturu ana i teia e kua vai takake ua aia. No reira, te kiteanga a Iesu e kua inangaro te tangata i te akariro iaia ei ariki, kua akaruke a Iesu ia ratou.—Ioa. 6:15.

7-8. Eaa a Iesu i kore ei e takore i te au manamanata iaia i te enua? (Ioane 18:36)

⁷ Kare a Iesu i piri atu ki te au angaanga poritiki kia takore i te au manamanata. Eaa te tumu? Kua kite aia kare e rauka i te tangata i te akatere ia ratou uaorai. (Sala. 146:3; Iere. 10:23) E kare katoa e rauka i te takore i te tumu o te kino. Te tutara nei a Satani te Tiaporo i teia ao e te akatupu nei aia i te kino. (Ioa. 8:44; Ephe. 2:2) No to tatou tu apa, kare katoa e rauka i te au tangata meitaki i te takore i te au manamanata.—Kohe. 7:20.

⁸ Kite a Iesu e na te Patireia o te Atua e takore takiri i te au manamanata. No reira aia i angaanga pakari ei i te ‘tutu aere i te tuatua meitaki i te basileia o te Atua.’ (Luka 8:1) Kua akapapu aia ki te aronga “tei pongi, e tei kaki i te tuatua-tika” e kare e roa atu ana ka ope te takinokinoanga. (Mata. 5:6; Luka 18:​7, 8) Inara ka tupu teia, kare na roto i te kavamani a te tangata mari ra na roto i te Patireia o te Atua, no te mea “kare to teianei ao [i to te Atua] basileia.”—E tatau ia Ioane 18:36.

ARU I TE AKARAANGA O IESU ME TAKINOKINOIA

9. Eaa i papu ei ia koe e na te Patireia o te Atua e takore i te au takinokinoanga?

⁹ Tei roto tatou i te “tuatau openga,” no reira e maata atu te au manamanata kare i aite ki to Iesu tuatau. Te akatupu nei rai a Satani e te aronga kino i te au takinokinoanga. (2 Timo. 3:​1-5, 13; Apo. 12:12) Mei ia Iesu, kite tatou na te Patireia o te Atua e takore i te au tu tika kore. Te turuturu nei tatou i te Patireia o te Atua, kare tatou e piri atu ki te au patoi anga e tetai au mea te ka akatupu i te au kino. Akamanako i te akaraanga o te tuaine ko Stacy.a Mua ake ka apii ei aia i te tuatua mou, e piri ana a Stacy ki tetai pupu e patoi ra i te au tu tika kore. Inara, kua ekoko aia i tana e rave ra. Karanga aia: “Kua manako au penei kare au e turuturu ana i te tua meitaki. Teianei te turuturu nei au i te Patireia o te Atua, papu iaku e tei te tua meitaki au. No reira, ka takore a Iehova i te au takinokinoanga.”—Sala. 72:​1, 4.

10. Ia Mataio 5:​43-48, eaa tatou kare e piri atu ki te au pupu e akakino ra i te kavamani? (Akara katoa i te tutu.)

¹⁰ Maata te tangata tei piri atu ki te au pupu e akakino ra i te kavamani. Ka riri tetai pae, ka patoi i te ture e ka takinokino i tetai ke. Kare a Iesu i apii ana ia tatou kia pera. (Ephe. 4:31) Karanga a Jeffrey: “Kua kite au me patoi te tangata i te kavamani, ka tupu te riri, ka vavai e ka keia ratou i te au apinga e ka tamamae atu i tetai ke.” Inara, kua apii a Iesu kia aroa atu tatou i te tangata noatu me patoi e me takino ratou ia tatou. (E tatau ia Mataio 5:​43-48.) No reira, kia aru meitaki tatou i to Iesu akaraanga.

11. Eaa i ngatā ai ia tatou i te aru i te akaraanga o Iesu kia vai takake mei teia ao?

¹¹ Noatu ka ngatā ia tatou i te aru i te akaraanga o Iesu, kua kite ra tatou e na te Patireia o te Atua e takore i te au takinokinoanga. Akamanako ana ia Janiya, tei akavaavaaia no te tuke i tona pakiri. Karanga aia: “Kua riri au, e kua inangaro au i te tamamae i te aronga tei akakino mai iaku. No reira, kua piri atu au ki tetai pupu tangata tei akavaavaa katoaia. Iaku, penei na te reira e tamarū i toku riri.” Inara, kua anoanoia a Janiya kia taui i tona manako. Karanga aia, “Kua irinaki au ki ta te tangata tuatua e kare ki ta Iehova. Tei tupu, kua akaruke au i teia pupu patoi.” Me takinokinoia tatou e tetai ke, eiaa e riri mari ra e akakoromaki e kia kore e piri atu ki teianei ao.—Ioa. 15:19.

12. Eaa tatou ka matakite ei i ta tatou ka tatau, akarongo e ka akara?

¹² Eaa te ka tamarū ia tatou me takinokinoia? Kia matakite i ta tatou ka tatau, akarongo e ka akara. I runga i te social media, e maata te nuti tei akakiteia kia tamataku i te tangata e te akakino ra i te kavamani. Akakite te aronga tata nuti i to ratou manako e kare ko te au mea tei tupu. I tetai taime te tano ra te reira inara, ka vai rai te au manamanata. Me pou ua to tatou taime ki te au nuti ka taitaia, maromaroa e ka riri tatou. (Mase. 24:10) Penei ka akamutu tatou i te tuku i te Patireia o te Atua na mua e ka ngaropoina e na te reira e takore i te au manamanata.

13. Akapeea te tatau Pipiria i te au rā me tauturu ia tatou me takinokinoia?

¹³ Ka tauturu te tatau e te akamanako oonu i te Pipiria ia tatou me takinokinoia. Kua taitaia tetai tuaine ko Alia, te kite anga aia i tetai aronga e takinokino ra i tetai ke. Kua riri aia no te mea kare ratou i akautungaia. Ui aia: “Irinaki ainei au e ka takore a Iehova i te au manamanata? I te reira taime, kua tatau au ia Iobu 34:​22-29. Kua akamaara teia au irava iaku e te kite ra a Iehova i te au mea e tupu ra. Ko Iehova anake te akava tau e nana e akatikatika i te au manamanata.” Noatu ra, ia tatou e tapapa ra i te Patireia o te Atua kia akatupu i te ’au, eaa ta tatou ka rave i teianei?

TA TATOU KA RAVE I TEIANEI ME TAKINOKINOIA

14. Eaa ta tatou ka rave i teianei me takinokinoia? (Kolosa 3:​10, 11)

¹⁴ Kare e rauka ia tatou i te akatere i te tangata me takinokino ratou i tetai ke, inara ka rauka ia tatou i te akaari i te tu meitaki. Mei ta tatou i uriuri, ka aru tatou i te akaraanga o Iesu na te akaari anga i te aroa. No reira, ka takinga meitaki tatou i te tangata e te aronga tei takinokino mai ia tatou. (Mata. 7:12; Roma 12:17) Ka mareka a Iehova me pera tatou.—E tatau ia Kolosa 3:​10, 11.

15. Akapeea tatou me tauturu i te tangata no runga ia Iehova?

¹⁵ Te apiianga i te tangata no runga ia Iehova, e ravenga meitaki ïa no te tauturu ia ratou. Eaa tatou i tuatua akapera ai? Me apii tatou i te tangata kia “kite ia Iehova” e kia akamareka iaia, ka taui ratou i to ratou oraanga e kia akaari i te tu takinga meitaki e te aroa. (Isa. 11:​6, 7, 9) I mua ake ka apii ei i te tuatua mou, kua piri tetai tangata ko Jemal i tetai pupu tei patoi atu i te kavamani. Karanga aia: “Kare e rauka ia koe i te māro i te tangata kia taui, inara me apii ratou i te Pipiria, ka taui ratou. Ko tera tei tupu kiaku.” Kua akakeuia a Jemal kia kore e piri atu ki tera pupu patoi. No reira, me apii tatou i te Pipiria ki te tangata, ka tauturu te reira ia ratou kia kore e takinokino i tetai ke.

16. Eaa tatou ka akakite ei ki te tangata no runga i te Patireia o te Atua?

¹⁶ Mei ia Iesu rai, ka inangaro tatou i te akakite ki te tangata e na te Patireia o te Atua e takore takiri i te au manamanata. Ka akamaroiroi teia manakonakoanga i te aronga tei takinokinoia. (Iere. 29:11) Karanga a Stacy tei taikuia i mua ana: “Te apiianga au i te tuatua mou, tauturu tera iaku kia akakoromaki i te au takinokinoanga tei tupu kiaku e tetai ke. Oronga mai a Iehova i te karere Pipiria ei akapumaana ia tatou.” No reira, kia papa ua tatou i te akamaroiroi i tetai ke no te au taputou mei te Pipiria. Me papu ia koe i te tika tei uriuriia mei teia atikara, ka rauka ia koe i te akakite aere i te reira i te apii e te ngai angaanga.b

17. Akapeea a Iehova me tauturu ia tatou kia akakoromaki i te au takinokinoanga?

¹⁷ Kite tatou e ka tupu ua rai te kino no te mea ko Satani “te ariki o teianei ao.” Inara, ka tapapa tatou i te au akameitakianga a Iehova no te tauturu ia tatou i teianei e kia tiaki i te tuatau e takoreia ai a Satani e te au kino. (Ioa. 12:31) Akakite a Iehova na roto i te Pipiria i te tumu i maata ai te au kino e te akaperepere ra aia i te aronga tei takinokinoia. (Sala. 34:​17-19) Na roto i tana Tamaiti, kua apii a Iehova ia tatou eaa ta tatou ka rave me takinokinoia tatou e akapeea tona Patireia me takore takiri i te reira. (2 Pete. 3:13) No reira, ka tutu aere tatou i te nuti meitaki o te Patireia e ka tapapa atu i te tuatau me kī te enua i te “tuatua-tau, e te tuatua-tika.”—Isa. 9:6.