Ka Tauturu te Puka o Iobu ia Koe me Tupu te Au Tumatetenga

1-2. Eaa i meitaki ei no tatou kia tatau i te puka o Iobu?

KUA tatau ainei koe i te puka o Iobu? Noatu kua tataia te reira mei tetai 3,500 mataiti i topa, e maata te tangata tei karanga ko teia tetai puka meitaki rava atu tei tataia. Kua akapaapaaia te tangata tata o teia puka no te mea kua taangaanga aia i te au tuatua manea, pakari e te māmā ua i te mārama. Noatu na Mose i tata i teia puka, na Iehova ra i akakite kiaia eaa tana ka tata.—2 Timo. 3:16.

² E puapinga tikai te puka o Iobu i roto i te Pipiria. Eaa te tumu? Ka tauturu te reira ia tatou kia mārama e e ikianga ta te au angera e te au tangata kia tavini tiratiratu ia Iehova e kia akatapu i tona ingoa. Apii katoa mai te reira no runga i to Iehova au tu manea, mei te aroa, te pakari, te tuatua tau e te mana. I roto i te puka o Iobu kua taikuia a Iehova e ko “te Mana Katoatoa” e 31 taime. E maata atu teia i tetai ua atu ngai i roto i te Pipiria. Kua oronga mai te puka o Iobu i te pauanga ki te au uianga puapinga ta te au tangata e manako ra, ei akaraanga: Eaa te tumu i akatika ai te Atua i te kino e te mamae kia tupu?

3. Eaa ta tatou ka apii mai mei te puka o Iobu?

³ Ka rauka ia tatou i te akaaite i te tatau anga i te puka o Iobu, ki te kakeanga i tetai maunga. Mei runga i te maunga, ka kite meitaki koe i te au mea takapini ia koe. Mei tera katoa, me tatau koe i te puka o Iobu ka kite meitaki koe i to Iehova manako no runga i toou turanga mamae. Ka apii tatou akapeea te tua o Iobu te tauturu anga i to Iseraela e akapeea te reira me tauturu ia tatou i teia tuatau. Ka apii katoa tatou akapeea me taangaanga i te puka o Iobu kia tauturu i tetai ke.

AKATIKA TE ATUA KIA MAMAE A IOBU

4. Eaa te tuke i rotopu ia Iobu e te ngati Iseraela tei noo i Aiphiti?

⁴ Kua noo a Iobu ki te enua ko Uza, i te tuatau kua tuikaaia to Iseraela i Aiphiti. Tei te tua itinga a Uza i te Enua Taputouia i te tua tokerau o Arabia. I Aiphiti, kua akamori tetai pae o te ngati Iseraela i te au atua pikikaa. Inara ko Iobu, kua tavini tiratiratu aia ia Iehova. (Iosu. 24:14; Eze. 20:8) Kua karanga a Iehova no Iobu: Kare tetai i aite kiaia i runga i te enua nei.a (Iobu 1:8) E tangata apinganui a Iobu e kua akangateitei maataia aia i tona enua. (Iobu 1:3) E mea papu, kua riri tikai a Satani te kiteanga i teia tangata rongonui e tavini tiratiratu nei i te Atua!

5. Eaa a Iehova i akatika ai ia Iobu kia mamae? (Iobu 1:​20-22; 2:​9, 10)

⁵ Karanga a Satani me tamamaeia a Iobu, ka akamutu aia i te tavini ia Iehova. (Iobu 1:​7-11; 2:​2-5) Kua akaperepere maata a Iehova ia Iobu. Inara kua akatika a Iehova ia Satani kia akapapu me kua tika rai tana i tuatua no runga ia Iobu. (Iobu 1:​12-19; 2:​6-8) Kua tā a Satani i te au manu a Iobu, kua tamate i tana au tamariki e tai ngauru, e kua akatupu i te maki kino kiaia. Noatu kua takinokino maata a Satani ia Iobu, kua tavini tiratiratu rai aia ia Iehova. (E tatau ia Iobu 1:​20-22; 2:​9, 10.) I muri mai, kua akaora a Iehova ia Iobu, kua akamaata i tana apinga e kua oronga e tai ngauru akaou tamariki nana. E kua akangateitei akaouia a Iobu e te tangata. Na roto i tetai temeio kua akaroaia to Iobu oraanga e 140 mataiti e kua kite aia i tana au mokopuna e ā katoa ra uki. (Iobu 42:​10-13, 16) Eaa ta te au tavini o te Atua i taito i apii mei te tua o Iobu? E eaa te apiianga no tatou i teia tuatau?

6. Akapeea te tua o Iobu te tauturu anga i te ngati Iseraela kia kite i te tumu i akatika ai te Atua i te mamae? (Akara katoa i te tutu.)

⁶ Akapeea te ngati Iseraela e puapingaia ai. E ngatā tikai te oraanga o te ngati Iseraela i Aiphiti. Ei akaraanga, kua maata mai a Iosua e Kaleba ei tuikaa. Kua kapiti raua ki te aronga tei noo i roto i te metepara no tetai 40 mataiti, no te mea kua akarongo kore tetai pae ia Iehova. Me kua kite te ngati Iseraela no runga i te tua o Iobu, ka mārama ratou e na Satani i akatupu i te kino e te mamae e kare na te Atua. Ka mārama katoa ratou i te tumu i akatika ai te Atua i te tangata kia mamae. E ka kite katoa ratou te akaperepere ra te Atua i te aronga tei vai tiratiratu kiaia, noatu te au turanga ngatā, e ka tutaki aia ia ratou.

7-8. Akapeea te puka o Iobu me tauturu i te aronga e na roto ra i te tumatetenga? Oronga mai i tetai akaraanga.

⁷ Akapeea tatou e puapinga ai. Te mea tangi, e maata te aronga i teia tuatau kare e irinaki akaou ana i te Atua, no te mea kare ratou e mārama ana eaa te kino i tupu ei ki te aronga meitaki. Akamanako i te akaraanga o Hazelb no Rwanda. I tona meangiti anga, kua irinaki aia i te Atua. Inara, kua tupu te au mea kino kiaia. Kua tatara tona nga metua, e kua akaipoipo tona mami i tetai tangata tei takinokino ia Hazel. I muri mai, kua rape tetai tangata iaia. Kua aere a Hazel ki te pure inara kare aia i akapumaanaia ana. Kua tata aia i tetai reta ki te Atua te karanga ra: “E te Atua, kua pure au kia koe, kua tauta au i te rave i te meitaki, inara kua tutaki mai koe iaku ki te kino. Kare au e akamori akaou ia koe, e ka rave au i taku i inangaro.” Tangi tikai tatou i teia aronga mei ia Hazel, tei irinaki e na te Atua i akatupu i to ratou mamae!

⁸ Kua apii mai tatou mei te puka o Iobu e na Satani i akatupu i te kino e te mamae, e kare na te Atua. Kua kite katoa tatou e me mamae te tangata, auraka tatou e manako e kua rave ratou i te kino. Akakite maira te Pipiria i tetai taime ka tupu te kino ki tetai ua atu tangata e i te tuatau manako koreia. (Kohe. 9:11; Iobu 4:​1, 8) E kua apii katoa tatou, me tavini tiratiratu tatou ia Iehova noatu te ngatā, te akapapu ra tatou e pikikaa a Satani. (Iobu 2:3; Mase. 27:11) Mareka tikai tatou i teia au apiianga mei te Pipiria, no te mea kua kite tatou i te tumu i mamae ei tatou e to tatou au akaperepere. I muri mai, kua apii a Hazel i te Pipiria ma te Au Kite o Iehova e kua mārama aia kare na te Atua i akatupu i tona mamae. Karanga aia: “Kua pure akaou au ki te Atua, e kua akakite au eaa to roto i toku ngakau. Noatu kua tuatua au kia Iehova e ka akaruke au iaia, kare ra ko tera te tika. Kua tuatua ua au i te reira no te mea kare au i kite koai aia. Kite au i teianei te akaperepere ra a Iehova iaku. Mataora tikai au i teia taime.” Pumaana tikai tatou i te kite i te tumu i akatika ai te Atua i te mamae! I teianei, ka akara tatou akapeea te akaraanga o Iobu me tauturu ia tatou i te tuatau tumatetenga.

TAUTURU TE TUA O IOBU IA TATOU KIA AKAKOROMAKI

9. Akapeea koe me akamārama i to Iobu turanga, iaia e noo ra ki roto i te reu? (Iakobo 5:11)

⁹ Akamanako ana ia Iobu e noo ra ki roto i te reu. Kua kīia tona kopapa e te ee e kua mamae tikai aia. Kua viivii tona pakiri mei teia maki kino e kua ikoke takiri tona kopapa. Kua pou rava tona maroiroi. Kua ukī aia i tona pakiri ki tetai vaanga karaea e kua aue ua aia no tona mamae. Inara kare a Iobu i akakoromaki ua i tona turanga mamae, mari ra kua irinaki aia kia Iehova e kua vai tiratiratu kiaia. (E tatau ia Iakobo 5:11.) Eaa tei tauturu ia Iobu kia akakoromaki?

10. Eaa te tu o to Iobu pirianga kia Iehova? Akamārama mai.

¹⁰ Kua akakite a Iobu i tona au mamae kia Iehova. (Iobu 10:​1, 2; 16:20) Ei akaraanga, i te pene 3 kua kopekope a Iobu i tona au tumatetenga e kua manako aia e na Iehova i akatupu i te reira. E oti, kua taumāro tona au oa e toru e kua karanga e te akautunga ra te Atua iaia no tona au tarevake. Noatu ra kua akakite ua rai a Iobu e te vai tiratiratu ra aia. Inara te akaari maira ta Iobu i tuatua, e no tetai atianga kua manako aia e meitaki atu tona tu tika i to te Atua. (Iobu 10:​1-3; 32:​1, 2; 35:​1, 2) Kua karanga katoa a Iobu e kua tuatua aia i te au tuatua neneva no te mea te tauta ra aia i te akapapu i tona tu tiratiratu. (Iobu 6:​3, 26) I te pene 31, kua māro a Iobu i te Atua kia akakite mai e kare aia i tau kia akautungaia. (Iobu 31:35) Inara, kua tarevake a Iobu i te māro i te Atua kia akakite mai i te tumu i mamae ei aia.

11. Eaa to Iehova manako no runga i ta Iobu tuatua e e tangata tiratiratu aia?

¹¹ Teianei kua kite tatou i te tumu i tuatua ai a Iobu kia Iehova, no te mea e pirianga vaitata tona Kiaia e kua irinaki aia e ka akava a Iehova iaia ma te tau. Kua tuatua mai a Iehova kia Iobu na roto i te puaioio. Inara kare Aia i akakite ana i te tumu i mamae ei a Iobu. Kare a Iehova i akautunga ia Iobu no tona manako me kore i tuatua e kare aia i rave i te tarevake. Mei tetai metua meitaki rai, kua akatikatika a Iehova i to Iobu manako tarevake. Ko teia te ravenga tau no te tauturu ia Iobu. Tei tupu, ma te tu akaaka kua akakite a Iobu e e iti ua tana i kite e kua tataraara aia no tana au tuatua akaapa. (Iobu 31:6; 40:​4, 5; 42:​1-6) Akapeea teia tua te tauturu anga i te au tangata i taito, e eaa te apiianga no tatou i teia tuatau?

12. Akapeea te ngati Iseraela e puapingaia ai mei te tua o Iobu?

¹² Akapeea te ngati Iseraela e puapingaia ai. Ka rauka i to Iseraela i te apii mai mei te au mea tei tupu kia Iobu. Akamanako ana i te akaraanga o Mose. Kare i te mea māmā no Mose i te arataki i te iti tangata Iseraela. Te maata anga o te taime, kua akarongo kore ratou kia Iehova e kua akariri ia Mose. I te au tuatau ngatā, kua kopekope te au ngati Iseraela kia Iehova. Inara ko Mose, kua pure aia kia Iehova no te tauturu i te au tuatau ngatā. (Exo. 16:​6-8; Nume. 11:​10-14; 14:​1-4, 11; 16:​41, 49; 17:5) Penei kua riro te akaraanga o Iobu i te tauturu katoa ia Mose, te akatikatikaanga a Iehova iaia. Ei akaraanga, i mua ua ake ka tomo ei te ngati Iseraela ki roto i te Enua Taputouia, kua vetaveta a Mose e kua tuatua riri atu kia ratou. Kare aia i oronga i te akapaapaa anga tei tau kia Iehova. (Sala. 106:​32, 33) Tei tupu kare a Iehova i akatika ia Mose kia tomo ki roto i te Enua Taputouia. (Deu. 32:​50-52) Noatu kua mamae a Mose, kua āriki ua aia i te ako a Iehova ma te akaaka. Ka tauturu katoa te tua o Iobu i te au Iseraela tei ora i muri ake i te tuatau o Mose, kia vai tiratiratu noatu te au taomianga. Ka rauka ia ratou i te apii mei te tua o Iobu e kia akakite pu kia Iehova i to ratou manako. Inara kia akamaara, auraka ratou e manako e meitaki atu to ratou tu tika i to Iehova. Ka apii katoa ratou akapeea me āriki i ta Iehova akoanga ma te akaaka.

13. Akapeea te tua o Iobu me tauturu ia tatou kia akakoromaki? (Ebera 10:36)

¹³ Akapeea tatou e puapinga ai. Ei Kerititiano, ka anoano katoaia tatou kia akakoromaki. (E tatau ia Ebera 10:36.) Ei akaraanga, penei kua rokoia tatou e tetai maki kino, te maki manako, te taitaia maata, me kore te manamanata i roto i te ngutuare. Penei kua takake tetai kopu tangata, tetai oa me kore kua tupu tetai au manamanata ke atu. Tetai taime penei ka tuatua e ka rave tetai tangata i tetai apinga te ka akatupu i te taitaia maata. (Mase. 12:18) Inara ka apii mai tatou mei te puka o Iobu, e ka rauka ia tatou i te riringi i to tatou ngakau kia Iehova e kia irinaki te akarongo maira aia. (1 Ioa. 5:14) Kare a Iehova e riri mai me akakite tatou i to tatou manako, noatu i tetai au taime e au tuatua neneva te reira. Kua tupu teia kia Iobu. Ka oronga mai te Atua i te maroiroi e te pakari kia rauka ia tatou i te akakoromaki. (2 Para. 16:9; Iako. 1:5) Ka akatikatika katoa aia ia tatou mei tana i rave kia Iobu. Ka apii katoa mai te puka o Iobu akapeea tatou me akakoromaki me orongaia mai te ako mei te Tuatua a Iehova, Tana akaaerenga e mei te au taeake tukatau. (Ebe. 12:​5-7) Mei ia Iobu tei puapingaia no te ārikianga i te ako, ka puapingaia tatou me āriki akaaka tatou i te au akatikatika anga. (2 Kori. 13:11) E au apiianga puapinga teia mei te akaraanga o Iobu. Ka uriuri tatou akapeea me taangaanga i te tua o Iobu me tauturu i tetai ke.

TA ANGAANGA I TE PUKA O IOBU EI TAUTURU I TETAI KE

14. Eaa tetai ravenga kia akamārama ki te tangata i te tumu i tupu ei te mamae?

¹⁴ E maata te tangata e ui ana eaa ra te aronga meitaki i mamae ei? Akapeea koe te pauanga i tera uianga? Penei kua akamārama koe i ta te Pipiria i akakite no runga i tei tupu i te aua o Edene. Penei kua taiku koe e na tetai vaerua kino ko Satani, tei pikikaa i te nga tokorua mua kia akarongo kore i te Atua. (Gene. 3:​1-6) Kua akamārama koe no te mea kua akarongo kore a Adamu e Eva i te Atua, kua kī te enua i te mamae e te mate. (Roma 5:12) E oti, ka akamārama tatou e te oronga nei te Atua i tetai tuatau kia akapapu e e pikikaa ta Satani au tuatua. E te taangaanga nei te Atua i te taime e toe nei, kia akakite ki te tangata e ka takore aia i te au mamae e ka rauka te oraanga mataora e tuatau ua atu. (Apo. 21:​3, 4) E au akamārama anga meitaki teia kia tauturu i te tangata kia kite i te tumu i mamae ei te aronga meitaki.

15. Akapeea tatou me taangaanga i te puka o Iobu ei tauturu i te tangata me ui ratou eaa te tumu i tupu ei te mamae? (Akara katoa i te tutu.)

¹⁵ Tetai akaou ravenga kia akamārama i te tumu i mamae ei te tangata koia oki na te akakiteanga i te tua o Iobu. Penei ei akamata, ka akameitaki koe i tera tangata no tana uianga meitaki. E oti, ka rauka ia tatou i te pau e kua ui katoa tetai tangata tiratiratu ko Iobu i tena uianga. Kua irinaki aia e na te Atua i akatupu i tona mamae. (Iobu 7:​17-21) Ka umere tera tangata i te kite e kua inangaro katoa te aronga tei ora ana i te tuatau taito kia kite i te tumu i mamae ei tatou. Aru mai, ka akamārama koe e na te Tiaporo i akatupu i to Iobu mamae, kare na te Atua. Karanga te Tiaporo te tavini ua ra te tangata i te Atua no ta ratou ka rauka. Inara me tupu te kino, ka akamutu ratou i te tavini i te Atua. Penei ka karanga koe, noatu kare na te Atua i akatupu i te mamae o Iobu, kua akatika ra aia i te reira. Akaari maira teia e kua irinaki te Atua e ka rauka i te au tangata tiratiratu i te akapapu e pikikaa a Satani. I te openga, ka akamārama koe e kua akameitaki te Atua ia Iobu no tona tu tiratiratu. No reira, ka rauka ia tatou i te akapumaana i tetai ke na te akapapuanga kia ratou e kare na Iehova i akatupu i te mamae.

16. Oronga i tetai akaraanga te akaari ra akapeea te puka o Iobu te tauturu anga i tetai ke e mamae ra.

¹⁶ Akara tatou akapeea te puka o Iobu te tauturu anga ia Mario. I te 2021, te tutu aere ra tetai tuaine i runga i te tereponi. Ko Mario te tangata mua tana i pukapuka. Kua tatau aia i tetai irava te akaari maira e te akarongo ra te Atua i ta tatou au pure e kua taputou aia i tetai oraanga meitaki rava atu a te tuatau ki mua. Kua ui aia kia Mario eaa tona manako. Kua pau a Mario, te tata ra aia i tetai reta ki tona au akaperepere, e a muri ake ka tamate aia iaia uaorai. Karanga aia, “Irinaki au i te Atua, inara i teia popongi kua manako au e kare aia e inangaro ana iaku.” I muri mai, kua komakoma raua no runga i te au tumatetenga o Iobu. No reira, kua iki a Mario i te tatau i te tua o Iobu. Kua tuku atu te tuaine i te link o te New World Translation of the Holy Scriptures kiaia. Eaa tei tupu? Kua āriki a Mario i te apii i te Pipiria e kua mataora aia i te apii maata atu no runga i te Atua tei akaperepere iaia.

17. Eaa tatou ka akameitaki ei ia Iehova no tei tuku mai i te tua o Iobu i roto i te Pipiria? (Iobu 34:12)

¹⁷ E mana to te Tuatua a te Atua no te tauturu i te tangata e te akapumaana i te aronga e mamae ra. (Ebe. 4:12) Akameitaki tatou ia Iehova no tei tuku mai i te tua o Iobu i roto i te Pipiria! (Iobu 19:​23, 24) Akapapu maira te puka o Iobu e ‘kare takiri te Atua e rave i te kino.’ (E tatau ia Iobu 34:12.) Apii katoa ra teia ia tatou i te tumu i akatika ai te Atua i te mamae e akapeea tatou me akakoromaki. E ka tauturu ia tatou kia akapumaana i te aronga e mamae ra. I te atikara ka aru mai, ka uriuri tatou akapeea te puka o Iobu me tauturu ia tatou kia oronga i te ako meitaki.