Akapeea Koe me Akangateitei ia Iehova i Toou Rā Akaipoipo

1-2. Eaa to Iehova manako no toou rā akaipoipo?

KUA tapaoia ainei koe kia akaipoipo? Me koia ia e tuatau mataora tikai teia noou! Kare e ekoko, te rave ra koe i te au angaanga tei anoanoia no toou rā akaipoipo. Ka inangaro a Iehova kia rekareka to korua rā akaipoipoa e kia mataora to korua oraanga.—Mase. 5:18; Pe’e. 3:11.

² E puapinga kia akangateiteiia a Iehova i toou rā akaipoipoanga. Eaa ra te tumu? E akapeea tatou me rave i te reira? Noatu kua tataia teia atikara no te au tokorua te parani ra i to raua rā akaipoipo, ka tauturu te au kaveinga o teia atikara ia tatou kia akangateitei ia Iehova me aere tatou ki tetai akaipoipo, me kore me pati mai te nga tokorua i to tatou manako no to raua rā akaipoipo.

EAA TE TUMU KIA AKANGATEITEIIA A IEHOVA?

3. Eaa ta tetai nga tokorua ka akamanako me parani i to raua rā akaipoipo?

³ Ko te au tokorua Kerititiano e parani ra kia akaipoipo, ka aru raua i ta Iehova au kaveinga i roto i te Pipiria. Eaa te tumu? No te mea na Iehova i akanoo mua i te akaipoipo. Kua oronga aia ia Eva ei vaine akaipoipo na Adamu. (Gene. 1:28; 2:24) No te mea na Iehova i akamata i te akaipoipo, ka anoanoia te au tokorua kia akapapu e ka akangateitei to raua rā akaipoipo ia Iehova.

4. Eaa tetai tumu kia akangateitei te au tokorua ia Iehova i to raua rā akaipoipo?

⁴ Ko teia katoa tetai tumu kia akamanako koe eaa ta Iehova e umuumu maira no toou rā akaipoipo. Ko Iehova toou Metua i te rangi e toou Oa piri mou. (Ebe. 12:9) E mea papu ka akaperepere ua rai koe i te reira. Kare koe e akatika i tetai apinga kia takino i toou pirianga oa kiaia. (Ebe. 13:5e, 6) Me akamanako koe i te au mea pouroa ta Iehova i rave e ka rave noou, kare ainei ka āriki koe e kua tau aia kia akangateiteiia i toou rā akaipoipo?—Sala. 116:12.

AKAPEEA KOE ME AKANGATEITEI IA IEHOVA?

5. Akapeea te Pipiria me tauturu i te au tokorua kia parani meitaki i to raua akaipoipo?

⁵ Kare te Pipiria e oronga mai ana i te au ture eaa te ka raveia i ko i tetai akaipoipoanga me kore te tamataora anga i muri mai. Ka parani te nga tokorua i to raua akaipoipo, kia tau ki to raua turanga, ki tei matauia i to raua ngai e ta raua ka inangaro. Ka akangateitei katoa te au Kerititiano i te au ture a te kavamani no te akaipoipo. (Mata. 22:21) Noatu eaa ta raua ka iki i te rave, me aru raua i te au kaveinga Pipiria, ka akangateitei e ka akamareka raua ia Iehova. No reira, eaa te au kaveinga taau ka akamanako?

6. Eaa i puapinga ai no tetai nga tokorua kia aru i te ture a te kavamani no te akaipoipo?

⁶ Kauraro ki te au ture a te kavamani. (Roma 13:​1, 2) I tetai au enua ka anoanoia te au tokorua kia aru i te au ture a te kavamani no te akaipoipo. Ka anoano katoaia raua kia kite eaa teia au ture i te ngai e noo ra raua. Me ka inangaroia te tauturu e pati i te aronga pakari.b

7. Eaa te tu tau kia akaariia no tetai akaipoipoanga e akapeea e rauka ai te reira?

⁷ Kia papu e tuatau ngateitei teia. (1 Kori. 10:​31, 32) Ka inangaro koe i toou rā akaipoipo kia akaari i te au tu manea o Iehova e kare i to teianei ao. (E tatau ia Roma 13:13; Gala. 5:​19-26) Kia tau ki te Pipiria, ko te tane te upoko no tona ngutuare tangata ou no reira, nana te apainga kia akapapu e ka riro to raua rā akaipoipo ei tuatau mataora e te ngateitei. Akapeea e rauka ai te reira? Me oronga te taeake i te akoanga Pipiria ma te aroa e te ngateitei, ka tauturu te reira i te katoatoa kia mārama e apinga aroa te akaipoipo no ko mai ia Iehova. E ka tauturu te reira i te katoatoa kia kite i te puapinga o te akaipoipo. No teia tumu, kua iki te au tokorua Kerititiano kia raveia to ratou akaipoipo i ko i te Are Uipaanga Patireia. Me ka inangaro koe i te taangaanga i te Are Uipaanga e tata i taau patianga ki te pupu aronga pakari.

8. Me e tamataoraanga tetai i muri ake i toou akaipoipo, akapeea koe me akangateitei ia Iehova? (Roma 13:13)

⁸ E tatau ia Roma 13:13. Me ka iki koe i te rave i tetai tamataoraanga i muri ake i te akaipoipo, akapeea koe me akapapu e kare te reira e akaari i te au peu o teianei ao? Te aiteanga o te tuatua “akatietie e te kona,” ko te inu maata i te kava e te imene i te roaanga po. Me iki koe kia oronga i te kava, e parani i taau ka rave kia akapapu e kare tetai tangata e inu maata i te kava.c Me e akatangianga imene tetai e akapapu e kua tau te tangianga o te reira kia rauka i te tangata kia pukapuka ma te mataora. E iki meitaki i te au imene te ka akatangiia e kia akapapu e kare e au tuatua viivii i roto te ka akaturori i tetai ke.

9. Eaa ta te nga tokorua ka akamanako no te au tuatua e te au tamataoraanga i muri ake i te akaipoipo?

⁹ E aronga ainei tetai ka tuatua, me kore ka akaariia te au tutu e te au vitio me kore tetai tamataoraanga ke i te tuatau kaikai? Ka akatupu teia i te mataora i toou rā akaipoipo. Inara e akapapu e kia riro te reira ei mea mareka na te katoatoa. (Phili. 4:8) E ui kia koe uaorai: ‘Ka akangateitei ainei te reira i tetai ke? Ka akaari ainei te reira i te tu ngateitei no te akaipoipo?’ E tei puapinga atu: ‘Ka akangateitei ainei te reira ia Iehova?’ Noatu e mea meitaki i te tuatua i te au mea kia kata te tangata, eiaa ra e taiku i te au tuatua no runga i te ainga. (Ephe. 5:3) Me ka tuatua toou kopu tangata e te au oa, e akapapu kua mārama ratou i te au mea kare koe e inangaro kia akakiteia ki te katoatoa.

10. Eaa tetai nga tokorua ka akaari ei i te tu tau me parani i to raua akaipoipo? (1 Ioane 2:​15-17)

¹⁰ E akaari i te tu tau. (E tatau ia 1 Ioane 2:​15-17.) Ko te aronga tei akaperepere ia Iehova ka tauta ratou i te akakakā Iaia e kare ia ratou uaorai. No reira, kare te au Kerititiano tau e akapou maata i te moni e te akaari i te tu “akatietie” i to ratou rā akaipoipo. Akapeea koe e puapingaia ai mei te parani anga i tetai akaipoipo māmā e te tau meitaki? Akamanako i te akaraanga o Mike e taeake no Norway. Karanga aia: “Kare a maua kaiou e kua painia ua atu maua. Kua tau ua to maua rā akaipoipo inara kua manea te reira e kare e ngaropoinaia.” Karanga a Tabitha, e tuaine no Initia mai: “Na te parani anga i tetai akaipoipo māmā, kare maua i apiapi maata. E kua iti ua te au uriurianga no runga i te au mea ka raveia.”

11. Akapeea te tokorua akaipoipo me akamanea ma te tau? (Akara katoa i te tutu.)

¹¹ Kua iki ainei koe eaa toou kakau ka aao? E mea papu kua inangaro koe kia sumalinga tikai koe. I te au tuatau Pipiria, kua akamanako meitaki te au tokorua akaipoipo i to raua tu akamanea. (Isa. 61:10) E tika, e tuke taau ka aao ki toou akaipoipo ki taau ka aao i tetai au atianga ke. Inara e mea puapinga kia tau ua te reira. (1 Timo. 2:9) Inara eiaa e akariro i toou tu akamanea e ko te mea puapinga rava atu i toou rā akaipoipo.—1 Pete. 3:​3, 4.

12. Eaa tetai nga tokorua ka kopae ei i te au peu akaipoipo tei matauia i to raua ngai inara kare i rotai ki te Pipiria?

¹² E kopae i te au peu kare i rotai ki te Pipiria. (Apo. 18:4) Ko tetai au akaipoipo o teianei ao, te ō maira te au peu no ko mai i te au akonoanga pikikaa e te au angaanga purepure. Kua akamatakite mai a Iehova ia tatou kia kopae i teia au mea. (2 Kori. 6:​14-17) Me e au peu tetai i toou ngai kare i papu ia koe me ka mareka a Iehova, e rave i tetai kimikimi anga no runga i te reira, e tetai au kaveinga Pipiria te ka tauturu ia koe kia rave i te au ikianga meitaki no toou akaipoipo.

13. Akapeea te nga tokorua me aru i te akaraanga o Iehova me āriki i te au apinga aroa?

¹³ E mea matauia ainei i toou ngai no te au taeake kia oronga i tetai apinga aroa na te nga tokorua akaipoipo? E tuke te apinga aroa ka oronga tetai tei maata tana moni ki tetai e iti ua tana moni. Kua akamaroiroiia te au Kerititiano kia oronga ua e ka mataora ratou i te rave i te reira. (Mase. 11:25; Anga. 20:35) Inara kare te nga tokorua e māro i te tangata kia oronga i tetai apinga aroa e te oko maata na raua. Ka aru tatou i te akaraanga o Iehova, na te āriki anga i ta te au taeake ka rauka i te oronga mai mei to ratou ngakau.—2 Kori. 9:7.

KOPAE E KIA AUTU I TE AU MANAMANATA

14. Eaa te au manamanata ta tetai nga tokorua akaipoipo e na roto ana?

¹⁴ Me tauta koe i te parani i tetai akaipoipo te ka akangateitei ia Iehova ka tupu rai te au manamanata. Ei akaraanga penei e mea ngatā i te parani i tetai akaipoipo māmā ua. Karanga a Charlie, no te Solomon Islands e: “Ngatā tikai i te iki e koai taau ka pati ki te tamataoraanga i muri ake i te akaipoipo. E maata to maua au oa e i to matou enua inangaro te katoatoa kia tae mai!” Karanga a Tabitha: “I toku enua, e mea matau i te pati e kia maata te tangata kia tae mai ki te tamataoraanga i muri ake i te akaipoipo. E ngatā no to maua nga metua kia āriki i ta maua ikianga, kia pati ua e 100 tangata kia tae mai.” Karanga a Sarah, no Initia mai: “Inangaro tetai pae aronga kia akaari e maata ta ratou moni e kia manako te tangata e koia ai ratou. Kua rave tetai o toku au kopu tangata i tetai akaipoipo maata e te āka moni, no reira kua manako au e ka anoanoia au kia parani i tetai akaipoipo maata atu i to ratou.” Eaa te ka tauturu ia koe kia autu i teia e tetai atu au manamanata ke?

15. Eaa tatou ka pure putuputu ei me parani i tetai akaipoipo?

¹⁵ E pure putuputu me parani i toou akaipoipo. Ka rauka ia koe te akakite kia Iehova i toou au manamanata e toou au manako me parani i toou akaipoipo. (Phili. 4:​6, 7) E pati i tana tauturu kia rave i te au ikianga meitaki, kia vai maru me apiapi toou manako e kia akaari i te tu ngakau toa me anoanoia. (1 Pete. 5:7) Ka irinaki maata koe ia Iehova me kite koe iaia e pau ra i taau au pure. Karanga a Tabitha: “Kua manata maua ko taku tane ka akaipoipo e penei ka tupu te pekapeka kia maua e to maua ngutuare tangata. No reira i mua ake ka uriuri ei matou i te au parani no te akaipoipo, ka pure matou. Kua kite meitaki matou i ta Iehova tauturu e kua vai ua te ’au i rotopu ia matou.”

16-17. Akapeea te komakoma anga meitaki me tauturu i te au parani no te akaipoipo?

¹⁶ Komakoma meitaki ma te marū. (Mase. 15:22) Ei tokorua e maata te au mea ta korua ka iki no to korua akaipoipo. Ka iki korua i te rā, te moni ka pou e koai mā ta korua ka pati kia tae mai. I mua ake ka rave ei korua i tetai ikianga, e uriuri meitaki i te reira e e kimi i te au kaveinga Pipiria tei tau. E ui katoa i te manako o te au taeake e te au tuaine tukatau. Me uriuri korua i ta korua i inangaro e rave i te reira ma te takinga meitaki, marū e kia ngoie ua i te akatanotano. Ei akaraanga, me pati mai to korua nga metua kia raveia tetai apinga i ko i to korua akaipoipo, e rave i te reira me kua tau. E tuatau mataora katoa teia no ratou. Me kare e rauka ia koe i te rave i ta ratou i pati mai e akamārama meitaki i te tumu. (Kolo. 4:6) E akataka meitaki ki toou kopu tangata e ko toou akakoroanga maata koia oki kia akangateitei ia Iehova i toou rā akaipoipo.

¹⁷ Ka rauka rai ia korua te akamārama i ta korua au ikianga ki to korua nga metua me kare ratou i roto i te tuatua mou. Karanga te taeake ko Santhosh no Initia “Kua inangaro to matou kopu tangata kia kapitiia mai te au peu Hindu. Kua pou tetai tuatau roa no maua ko taku vaine ka akaipoipo, kia akamārama i ta maua au ikianga kia ratou. Kua āriki maua kia rave i ta ratou i inangaro me kare te reira e akamareka kore ia Iehova. Ei akaraanga, kua taui maua i te kai ta maua e reka ana ki te au kai ta ratou i inangaro e kua iki kia kore e raveia te au imenemene e te ura, no te mea kare ratou i matau i te reira.”

18. Eaa te ka tauturu ia koe kia akapapu e ka mako toou rā akaipoipo? (1 Korinetia 14:40) (Akara katoa i te tutu.)

¹⁸ E parani meitaki. Me parani meitaki koe ka iti mai te apiapi i toou rā akaipoipo. (E tatau ia 1 Korinetia 14:40.) Karanga a Wayne, no Taiwan: “I tetai au rā i mua ake i te akaipoipo, kua uipa kapiti matou ki te aronga tei inangaro i te tauturu. Kua uriuri matou i te au akanoonooanga no tera rā e eaa te ka anoanoia kia rave matou e kia mako te reira.” Kia akaari i te tu ngateitei ki te aronga taau i pati, e akapapu kia rave i te au mea i te ora tei akanooia.

19. Eaa te ka tauturu ia koe kia akaaere meitakiia te tamataoraanga i muri ake i te akaipoipo?

¹⁹ E maata te au manamanata ka kopaeia me akara mamao koe i te au mea ka tupu e eaa taau ka rave me tupu te reira. (Mase. 22:3) Ei akaraanga, me e mea matauia i toou ngai no te aronga kare i patiia kia tae mai ki te tamataoraanga i muri ake i te akaipoipo, e akamanako i taau ka rave kia kore te reira e tupu. E akapapu e kua kite toou kopu tangata kare i roto i te tuatua mou i te au mea ka raveia e kia akamārama i toou manako no runga i tetai au peu o te akaipoipo. E akaari kia ratou i te atikara “What Happens at a Wedding of Jehovah’s Witnesses?” i runga i te jw.org. Ka rauka ia koe i te pati i tetai taeake tukatau taau e irinaki ra ei akaaere no te tamataora a muri ake i te akaipoipo. (Ioa. 2:8) Me uriuri meitaki koe i taau parani kiaia ka tauturu aia kia vai ngateitei toou rā akaipoipo e kia tupu tei akanooia.

20. Eaa ta te tokorua ka akamaara no to raua rā akaipoipo?

²⁰ Penei ka apiapi maata koe no te au mea e ō maira no te parani anga i toou rā akaipoipo. Inara e akamaara ko toou akaipoipo e tai rai rā. Ko te akamata anga te reira o tetai oraanga mataora i te tavini kapiti ia Iehova. E tauta kia parani i tetai akaipoipo māmā e te ngateitei. E irinaki ia Iehova. Ma tana tauturu ka rauka ia koe i te parani i tetai akaipoipo manea e te mataora e kare rava koe e tataraapa i te reira.—Sala. 37:​3, 4.