E Puapinga Tikai te Aronga Pakarikari i Roto i te Putuputuanga

Penei no toou turanga ruaine, kare e rauka ia koe i te rave i taau i rauka mei to mua ana. Noatu kua tavini tiratiratu koe ia Iehova no tetai tuatau roa, penei ka manako koe e kare oou puapinga no te mea kua kotingaia taau ka rauka i te rave. Ei akaraanga, penei ka akaaite koe i taau e rave nei ki taau i rave ana i toou mapuanga. Me koia ia, eaa te ka tauturu ia koe kia akakoromaki i toou turanga?

EAA TA IEHOVA E PATI MAIRA IA KOE KIA RAVE

E ui kia koe uaorai, ‘Eaa ta Iehova e pati maira iaku kia rave?’ Ka rauka te pumaana mei te au tuatua i roto ia Deuteronomi 6:​5, karanga ra: ‘E inangaro atu koe i to Atua ia Iehova ma toou ngakau katoa, e ma toou vaerua katoa, e ma toou maroiroi katoa.’

Karanga ra tera irava, inangaro a Iehova kia tavini koe iaia ma toou ngakau, vaerua e toou maroiroi katoa. Ka tauturu teia ia koe kia kore e akaaite i taau ka rauka i te rave ki ta tetai ke, me kore ki taau i rave ana i toou mapuanga.

Akamanako i teia: I toou mapu anga, eaa taau i oronga kia Iehova? E mea papu kua oronga koe i taau i rauka kiaia i tera tuatau e tei tau katoa ki toou turanga. Eaa taau e oronga nei kia Iehova i teianei? E mea papu, te oronga nei koe i taau ka rauka i teianei, e tei tau ki toou turanga i teia tuatau. Me manako akapera koe, ka kite mai koe e te oronga nei rai koe i taau i rauka kia Iehova mei to mua ana. Kua oronga koe i te mea meitaki rava atu kiaia i tera tuatau, e te oronga nei rai koe i te mea meitaki rava atu i teia tuatau.

KA TAUTURU TAAU I APII MAI I TETAI KE

Auraka e akamanako i te au mea kare e rauka akaou ia koe i te rave, mari ra ki taau ka rauka i te rave no te tauturu atu i tetai ke. Ei Kerititiano pakarikari, ka rauka ia koe i te rave i tetai au apinga kare i rauka ana ia koe i te rave i toou mapuanga. Ei akaraanga, teia taau ka rauka i te rave:

E akakite i taau i apii i roto i toou oraanga ki tetai ke. E akamanako i teia au tuatua i roto i te Pipiria:

Ariki ko Davida: “I vai ou ana au, e teianei kua ruaine; kare ra au i kite i te tangata tuatua-tika i te akaruke angaia, e tona uanga i te pati aere anga i te kai.”—Sala. 37:25.

Iosua: ‘E i na, kua vaitata au i te mate, e kua kite oki kotou i roto i to kotou ngakau, e i roto i to kotou katoa au vaerua, e kare rava tetai o te au mea meitaki ta to kotou Atua ta Iehova i tuatua mai ia kotou i poka; kua ope rava i te tupu ia kotou, kare rava tetai o te reira i toe.’—Iosu. 23:14.

Kua tavini a Davida e Iosua ia Iehova no tetai tuatau roa, e e maata ta raua i kite mai i roto i to raua oraanga. No te mea kua akatumuia ta raua tuatua ki tei tupu i roto i to raua oraanga, ka irinakiia te reira.

Me kua tavini ana koe ia Iehova no tetai tuatau roa, ka rauka ia koe i te akakite i te au mea ta Iehova i rave noou e no tetai ke. Ka maara ainei ia koe i tetai atianga, te tauturu anga a Iehova i tona au tavini na roto i tetai ravenga umere tikai? E akakite atu i te reira ki tetai ke! Ka akamaroiroi teia ia ratou. Me rongo ratou i toou au tua no te tavinianga ia Iehova, ka akamaroiroi te reira i toou au taeake e te au tuaine.—Roma 1:​11, 12.

Tetai ravenga no te akamaroiroi i tetai ke na te aereanga ki te au uipaanga, me ka rauka ia koe. Me aere koe, ka akamaroiroiia toou au taeake e te au tuaine e koe katoa. Karanga a Connie, tei taikuia i mua ana, “Me tae au ki te au uipaanga, ka tauturu teia iaku kia kore e taitaia. Ka mataora au me aroa mai te au taeake e te au tuaine iaku. Ka akaari au i toku inangaro kia ratou na te oronga anga i tetai apinga aroa. Ka tauta au i te rave i te au angaanga pae vaerua ma toku au taeake e te au tuaine.”

AKAPEREPERE A IEHOVA I TAAU TAVINIANGA

E maata te au akaraanga i roto i te Pipiria no te au tavini ta Iehova i akaperepere, noatu e iti ua ta ratou ka rauka i te rave. Akamanako i te tangata pakarikari ko Simeona, tei ora i te tuatau i anauia ai a Iesu. Me aere a Simeona ki te iero, penei kua kite aia i te au tane mapu e rave ra i te au angaanga puapinga i reira. Inara akapeea a Simeona? Penei, kua manako a Simeona e kare ona puapinga kia Iehova, no te mea kare e rauka iaia i te rave i ta teia au mapu e rave ra. Inara, e tuke te manako o Iehova. Kua kite Aia e tangata “tuatua-tika” a Simeona, e kua oronga aia i te tikaanga ngateitei kia kite aia i te pepe ko Iesu. Kua taangaanga a Iehova ia Simeona kia akakite i tetai totou no runga i te Mesia! (Luka 2:​25-35) Taka meitaki, kare a Iehova i akamou ki runga i te tu pakarikari o Simeona, mari ra kua kite aia i tona akarongo matutu e “tei runga oki iaia te vaerua tapu.”

E mea papu te akaperepere ra a Iehova i taau tavinianga iaia noatu kua kotingaia taau ka rauka i te rave. I roto i te mata o Iehova, ka āriki meitakiia te atinga a tetai tangata me kua tau ki tana ka rauka i te oronga e kare ki tei kore i rauka iaia.—2 Kori. 8:12.

No reira, e akamou ki taau ka rauka i te rave. Ei akaraanga, akamanako i tetai au ravenga tukeke taau ka rave no te tutu aere, noatu e tuatau poto ua te reira. Penei ka rauka ia koe i te akamaroiroi i tetai ke na te taniuniu anga me kore te oronga anga i tetai kāti kia ratou? No te mea kua tavini koe ia Iehova no tetai tuatau roa, ka riro te aroa taau e akaari ra i te akamaroiroi maata i toou au taeake e te au tuaine.

Ko tetai pae kua kotingaia ratou i te pae kopapa. Tatau i tetai akaraanga no Aperika Itinga i roto i te pia “Taangaanga te Tuaine i te Pipiria ei Tauturu i Tetai Vaine.”

Auraka e ngaropoina e ka riro toou tu tiratiratu no te tavini ia Iehova ei akamaroiroi i tetai ke. E akaraanga meitaki koe no te akakoromaki e e mea papu ‘Kare te Atua i te Atua tuatua-tika kore, ka akangaro atu ei aia i ta kotou angaanga i rave, e to kotou anoano, i tona ingoa i akakite puia e kotou na, ko kotou tei tavini i te aronga tapu, e te tavini ua ra kotou.’—Ebe. 6:10.

KIA MAROIROI I TE TAUTURU I TETAI KE

Kua akaari mai tetai kimikimi anga e ko te au tane e te au vaine pakarikari e tauturu ra i tetai ke ka meitaki atu to ratou oraanga kopapa, to ratou manako e ka roa atu to ratou oraanga.

E tika, me rave koe i tetai apinga meitaki no tetai ke, kare te aiteanga e ka apai ke te reira i te turanga pakarikari. Na te Patireia o te Atua anake e takore i te turanga pakarikari e te mate tei akatupuia e te ara.—Roma 5:12.

Noatu ra, me rave koe i ta Iehova e pati maira i teianei, mei te apii anga i tetai ke kia kite no runga iaia, ka akamatutu te reira i toou manakonakoanga e toou oraanga kopapa. E te aronga pakarikari, kia kite kotou e te akaperepere ra a Iehova i taau tavini anga iaia e te akaperepere katoa ra te putuputuanga i toou akaraanga tiratiratu.