Inangaro Aia i te Tangata

1, 2. Akapeea a Iesu i te akapapuanga i tona inangaro oonu no te au tangata?

KO TE Tamaiti anau tai a te Atua te akaraanga maata roa atu no to Iehova tu pakari oonu e koia katoa te pu angaanga a tona Metua. Akamanako ana mei teaa te tu mataora o Iesu i tona Metua e akapapa ra “i te au rangi” e e akono ra “i te au tumu o te enua.” Inara i te au mea ravarai ta tona Metua i anga, ko “te au tamariki a te tangata ra [to Iesu] mataora anga.” (Maseli 8:22-31) Ae, kua inangaro tikai a Iesu i te au tangata mei te akamataanga mai.

² I muri mai, kua akapapu a Iesu i tona tu tiratiratu e tona inangaro i tona Metua pera katoa tona inangaro oonu no te au tangata na te akaruke anga i te rangi kia riro mai ei tangata i te enua nei. Kua rave a Iesu i teia ei “oronga i tona ora ei oko no te tangata e manganui.” (Mataio 20:28; Philipi 2:5-8) Ia Iesu i te enua nei, kua oronga te Atua i te mana kiaia kia rave i te au temeio. Te akaari maira teia au temeio i to Iesu inangaro maata no te tangata e tana au mea umere ka rave no te au tangata a te tuatau ki mua kare e roa atu ana.

3. Eaa ta tatou ka uriuri i roto i teia atikara?

³ Iaia i te enua nei, kua tutu aere a Iesu i “te evangelia o te basileia o te Atua.” (Luka 4:43) Kua kite aia e na teia Patireia e akatapu i te ingoa o tona Metua e na te reira e akatikatika i te au manamanata o te tangata. Ia Iesu e tutu aere ra, kua rave katoa aia i te au temeio e manganui. Na teia au temeio i akaari mai i tona manako oonu no te tangata katoatoa. Eaa ra teia i puapinga ai no tatou? No te mea ka riro tana i rave ei oronga mai i te manakonakoanga e te irinaki papu no te tuatau ki mua. No reira ka uriuri ana tatou e ā tupuanga no ta Iesu temeio i rave.

“TEI REIRA TE MANA O TE ATU I TE AKAORA IA RATOU”

4. Eaa tei tupu te aravei anga a Iesu i tetai tangata repera?

⁴ I roto i tana angaanga orometua, kua aere a Iesu ki te ngai tei kapikiia e ko Galilea. I roto i tetai oire i reira, kua aravei aia i tetai tangata kua tuʼia e te maki kino, koia oki te maki repera. (Mareko 1:39, 40) Kua maki tikai teia tangata e kua karanga te taote ko Luka e “kua pini rava aia i te lepera.” (Luka 5:12) Te akakite maira te Pipiria e i te kite anga te tangata repera ia Iesu, kua “tipapa iora aia ki raro, pati maira kiaia, na ko maira, E te Atu, kia tika ia koe ra, e mā au ia koe.” Kua kite taua tangata ra e tei ia Iesu te mana i te akaora iaia, inara kua anoano aia kia kite e me ka inangaro tikai a Iesu i te akaora iaia. Eaa ra te tumu? No te mea kua mātau aia i te kite i te au Pharisea, e aronga akavaavaa i te aronga maki repera. Inara eaa ta Iesu e manako ra? Akapeea aia me akono i teia tangata, te akara anga kua kino roa? Me ko koe tera, eaa taau ka rave?

5. Eaa a Iesu i inangaro ei i te akaora i te tangata repera?

⁵ I te akara anga, kare te tangata repera i kapiki ana e “Kua viivii, kua viivii,” mei tei umuumuia i roto i te Ture a Mose. (Levitiku 13:43-46) Kare ra a Iesu i riri ana. Mari ra, kua manako oonu aia i teia tangata tei anoano kia tauturuia. Kare tatou i kite tikai i ta Iesu e manako ra, tera ra kua kite tatou e eaa to roto i tona ngakau. Kua tangi tikai aia i taua tangata ra e kua rave i tetai temeio. Kua rave aia i tetai apinga kare rava tetai ua atu tangata e inangaro i te rave, kua amiri aia i teia tangata. Ma te tu irinaki papu e te tangi aroa, kua tuatua a Iesu e: “Kua tika ïa iaku: kia mā koe. Peke ke atura tona lepera i reira.” (Luka 5:13) Te taka ua ra e kua oronga a Iehova i te mana kia Iesu kia rave i teia temeio maata e kia akaari i tona inangaro no te au tangata.​—Luka 5:17.

6. Eaa te mea umere no runga i ta Iesu au temeio, e eaa ta te reira e akaari maira?

⁶ Ma te mana o te Atua, kua rauka ia Iesu i te rave i te au temeio umere e manganui. Kare aia i akaora ua i te maki repera. Kua akaora katoa a Iesu i tetai atu au maki tukeke. Te akakite maira te Pipiria e kua umere te au tangata “i te kite anga i te murare i te tuatua anga, te paruparu i te ora anga, te pirikoki i te aere ua anga, e te matapo i te akara anga.” (Mataio 15:31) I te rapakauanga a Iesu i tetai tangata, kare aia e anoano i tetai tangata kopapa meitaki kia oronga i tona au mero ei mono i te au mero kino. Kare, mari ra e mana to Iesu i te rapakau i te au mero kopapa tei makiia. Tetai katoa, kua akaora viviki aia i te tangata, tetai taime te aronga tei mamao mei ko mai iaia. (Ioane 4:46-54) Eaa ta teia au akaraanga umere e akaari maira? Tei ia Iesu Karaiti, to tatou Ariki, te mana e te inangaro i te takore takiri i te au maki ravarai. Me apii tatou no runga i te tu e akono ra a Iesu i te tangata, ka irinaki tatou e i roto i te ao ou, “ka akaperepere aia i tei apikepike ra e tei putaua.” (Salamo 72:13) Ka rapakau a Iesu i te aronga pouroa e mamae ra no te mea te inangaro tikai ra aia i te rave i te reira.

“KA TU, KA RAVE I TOOU ROI, KA AERE”

7, 8. E akatutu mai eaa tei tupu i mua ake ka aravei ei a Iesu i tetai tangata maki i Beteseda.

⁷ I nga marama i muri ake i te rapakau anga i te tangata repera, kua tere atu a Iesu mei Galilea ki Iudea e kua tutu aere i te tuatua meitaki o te Patireia o te Atua. E mea papu e e tauatini ua atu au tangata tei akarongo ki ta Iesu karere e kua akakeuia ratou no tona inangaro ia ratou. Kua inangaro tikai a Iesu i te akapumaana i te aronga mii e te putaua e te oronga i te manakonakoanga no ratou.​—Isaia 61:1, 2; Luka 4:18-21.

⁸ I te marama ia Nisana, kua aere a Iesu ki Ierusalema i te akamaara i te oroa Pasa. E maata te angaanga tei tupu i taua oire ra no te au tangata tei aere mai no teia oroa takake. I te tua tokerau o te iero tetai punā vai tei kapikiia e ko Beteseda, i reira te ngai i aravei ei a Iesu i tetai tangata pirikoki.

9, 10 (a) Eaa ra te au tangata i aere ei ki ko i te punā vai i Beteseda? (e) Eaa ta Iesu i rave i ko i te punā vai, e eaa ta teia e apii maira ia tatou? (Akara i te tutu mua o teia atikara.)

⁹ E aere ana te urupu tangata tei makiia ki Beteseda. No teaa ra? No te mea kua manako ratou e ka akaora temeioʼia tetai tangata maki me eke aia ki roto i te punā vai e ngarepu ra. Akamanako ana i te manako ekoko i te reira ngai no te mea e maata te aronga taitaia, apiapi, e te manako puapinga kore tei inangaro kia akaoraia. I te mea e tangata apa kore a Iesu e kare aia e anoano ra kia rapakauia, eaa i reira te tumu i aere ei aia ki reira? No tona inangaro i te tangata i akakeu iaia kia aere. Tei reira te ngai i aravei ei aia i tetai tangata maki no tetai tuatau roa atu i to Iesu oraanga i te enua nei.​—E tatau ia Ioane 5:5-9.

¹⁰ Kua ui a Iesu ki teia tangata pirikoki me ka inangaro aia kia aere akaou. Akamanako ana i te tu taitaia o teia tangata i te karanga anga kia Iesu e kua inangaro aia kia rapakauia inara kare e tangata e tauturu iaia kia eke ki roto i te punā vai. I reira, kua karanga a Iesu ki teia tangata kia rave i tetai mea kare rava i raveia ana. Karanga aia kiaia kia rave i tona roʼi e kia aere. Kua rave iora teia tangata i tona roʼi e kua aere! E akapapuanga umere teia no ta Iesu ka rave i roto i te ao ou. Akaari katoa maira te reira i to Iesu inangaro oonu no te tangata. Kua kimi aia i te aronga te anoano ra i te tauturu. Te akamaroiroi nei to Iesu akaraanga ia tatou kia kimi ua rai i te au tangata i roto i ta tatou ngai tutuanga tei taitaia no te au mea kino e tupu ra i teianei ao.

“KOAI TEI AKATUKIA MAI I TOKU KAKAU NEI?”

11. Akapeea a Mareko 5:25-34 te akaari mai anga i to Iesu inangaro no te aronga maki?

¹¹ E tatau ia Mareko 5:25-34. No tetai 12 mataiti, kua na roto tetai vaine i tetai maki akamā tikai. Kua kino te au tuanga ravarai o tona oraanga no teia maki, kapiti mai tana akamorianga. Kua atoro aia i te au taote e manganui e kua pou tana moni i te kimi i tetai rapakauanga, inara kua kino atu tona maki. Tetai rā, e parani ou ta teia vaine kia meitaki mai aia, no reira kua aere aia na roto i te urupu tangata e kua mou i te kakau o Iesu. (Levitiku 15:19, 25) Te kite mai anga a Iesu e kua takake atu te mana mei roto iaia, kua ui aia e koai tei tukia mai ki runga iaia. “Ma te mataku e te rutetetete” “kua tipapa iora [taua vaine ra] ki raro ki mua iaia, kua aaki ua maira i te tuatua-mou.” Kua kite a Iesu e na Iehova i rapakau i te maki o teia vaine, no reira kua tuatua maru atu aia e: “E taku tamaine, kua ora koe i toou akarongo, ka aere koe ma te au, e ma te ora i to maki.”

12. (a) Mei ta tatou i apii mai, akapeea koe me akataka ia Iesu? (e) Eaa te akaraanga ta Iesu i akanoo mai no tatou?

¹² E pumaana tikai to tatou ngakau i te kite i to Iesu inangaro no te au tangata, te aronga maki tikai. E tuke rai teia mei to Satani tu, tei tauta i te akapapu kia tatou e e puapinga kore tatou e kare e tangata e inangaro mai ana ia tatou. Inara, te akapapu maira ta Iesu au temeio e te manako tikai maira aia ia tatou e to tatou au manamanata. Kia rekareka tatou e e Taunga Maata e e Ariki aroa tikai to tatou! (Ebera 4:15) Penei ka ngata ia tatou i te mārama i te manako ngakau o tetai tangata tei maki ana no tetai tuatau roa, me kare tikai tatou e maki ana. Inara akamanako ana ia Iesu. E tangi aroa tikai tona no te au tangata maki noatu e kare rava aia i maki ana. Kia rave tatou i ta tatou ka rauka i te aru i tona akaraanga aroa.​—1 Petero 3:8.

“AUE IORĀ IESU”

13. Eaa ta te tuakaouanga o Lazaro e akaari maira no runga ia Iesu?

¹³ Kua mii tikai a Iesu te kite anga i te mamae o tetai ke. Ei akaraanga, te mate anga tona oa ko Lazaro, “ngunguru iora aia i roto iaia, e taitaia atura” te kite anga aia e te mamae ra to Lazaro ngutuare tangata e te au oa. (E tatau ia Ioane 11:33-36.) Noatu e kua kite a Iesu e ka akatuakaou mai aia ia Lazaro, kua aue rai a Iesu. Kare aia i akamā ana i te akaari i tona tu mii. E inangaro maata tikai to Iesu ia Lazaro e tona ngutuare tangata e kua taangaanga aia i te mana o te Atua kia akatuakaou mai ia Lazaro!​—Ioane 11:43, 44

14, 15 (a) Eaa te akaari maira e te inangaro ra a Iehova i te takore atu i te mamae o te au tangata? (e) Eaa ta tatou i mārama no runga i te tuatua Ereni tei uriia e e ‘vaarua’?

¹⁴ Te akataka maira te Pipiria ia Iesu mei tona Metua rai ko Iehova. (Ebera 1:3) No reira te akapapu maira te au temeio a Iesu e te inangaro katoa ra a Iehova i te takore atu i te maki, te mamae e te mate. Kare e roa atu ana, ka akatuakaou mai a Iehova e Iesu i te au tangata mei te mate. Kua akakite a Iesu e “te vaitata mai nei oki te ora, e akarongo ei te aronga katoa i roto i te rua i tona reo,” e ka tuakaou mai.​—Ioane 5:28, 29

¹⁵ Ko te tuatua Ereni tei uriia e e ‘vaarua,’ no roto mai i te tuatua verepa Ereni, te aiteanga “kia akamaara.” Te tau ra teia ki te Atua Mana Katoatoa, Tei Anga mai i te ao katoa, no te mea ka maara iaia te au mea ravarai no runga i to tatou aronga akaperepereia tei mate, pera katoa to ratou au tu. (Isaia 40:26) Ka maara ia Iehova teia aronga, e ka inangaro katoa aia i te akamaara ia ratou. E au akaraanga umere tikai te au tuakaouanga i roto i te Pipiria no te ka tupu i te ao ou.

TA TATOU I APII MAI MEI TE AU TEMEIO A IESU

16. Eaa te tikaanga manea ka rauka i te au tavini o te Atua?

¹⁶ Me vai tiratiratu ua tatou, penei ka rauka ia tatou i te tikaanga manea i te kite i tetai temeio maata rava atu, te ora mai anga mei te mate maata! I muri ua ake ia Aramakito, e maata atu ta tatou au temeio ka kite mai. A te reira tuatau, ka rauka i te au tangata ravarai te oraanga kopapa apa kore. (Isaia 33:24; 35:5, 6; Apokalupo 21:4) Akamanako ana e te akara ra koe i te au tangata e titiri ra i to ratou mata titia, au tokotoko, pereoo oparapara, e te au apinga akarongo no te aronga turi. Kua kite a Iehova e ka anoanoia te aronga pouroa te ka ora mai mei ia Aramakito kia maroiroi e kia matutu te kopapa no te mea e maata ta ratou angaanga ka rave. Ko ratou te aronga te ka taui i to tatou enua ei parataito i te ao katoa.​—Salamo 115:16.

17, 18 (a) Eaa ra a Iesu i rave ei i te au temeio? (e) Eaa ra koe ka rave ei i tei anoanoia kia o atu ki roto i te ao ou o te Atua?

¹⁷ Te akamaroiroiia nei te “aronga maata rava” me tatau ratou e akapeea ta Iesu rapakau anga i te aronga maki. (Apokalupo 7:9) Ka riro taua au temeio ra ei akaketaketa i to tatou manakonakoanga umere no te rapakauanga tinamou a te tuatau ki mua. Te akaari katoa maira te reira i te inangaro maata o te Tamaiti anau tai a te Atua no te tangata. (Ioane 10:11; 15:12, 13) Te akaari maira te tu tangi aroa o Iesu i to Iehova aroa maata no tona au tavini tataki tai.​—Ioane 5:19.

¹⁸ Kua kī teianei ao i te mamae e te mate. (Roma 8:22) No reira tatou i anoano ei i te ao ou o te Atua. Ka rauka i reira i te au tangata te oraanga kopapa apa kore ta te Atua i taputou mai. Te oronga maira a Malaki 4:2 i te manakonakoanga e “ka rererere aere [tatou] mei te au punua puakatoro akaangai ra,” ma te mataora no te mea kua rapakauia tatou e ka apa kore tatou. Kia riro to tatou tu āriki rekareka no Iehova e te irinakianga i tana au taputou ei akakeu ia tatou kia rave i tei anoanoia kia o atu ki roto i te ao ou. E akamaroiroianga tikai i te kite e te riro ra te au temeio a Iesu ei akaraanga no te akaoraanga tinamou ta te au tangata ka kite mai me tutara aia kare e roa atu ana!