Kia Rotai to Tatou Oraanga ki te Pure a te Atu​—Tuanga 1

1. Me tutu aere tatou, akapeea ana tatou me taangaanga i ta Iesu pure i roto ia Mataio 6:9-13?

E MANGANUI te au tangata tei kite i te au tuatua o te pure i roto ia Mataio 6:9-13. Me tutu aere tatou, e taangaanga ana tatou i te au tuatua i roto i teia pure ei apii i te au tangata e e kavamani tika tikai te Patireia o te Atua te ka taui i te enua ei parataito. E taangaanga katoa ana tatou i te au tuatua “kia tapu toou ingoa” i te akaari e e ingoa to te Atua e kia akatapu tatou i te reira.​—Mataio 6:9.

2. Akapeea tatou i kite ei e kare a Iesu e inangaro ia tatou kia taokioki ua i taua tuatua ra me pure ua rai tatou?

² Te inangaro ra ainei a Iesu kia taokioki ua tatou i te au tuatua i roto i tana pure i te au taime ravarai me pure tatou, mei ta te au tangata e rave ra? Kare. Kua akakite mai a Iesu e: “E kia pure kotou, auraka e maata te tuatua rikiriki puapinga kore.” (Mataio 6:7) I tetai tuatau ia Iesu e apii ra i tana au pipi akapeea me pure, kua ripiti aia i te pure, kare ra i taangaanga ana i taua tuatua ra. (Luka 11:1-4) No reira te akanoo ra a Iesu i tetai akaraanga ei apii ia tatou i te au mea ta tatou ka anoanoia kia pure.

3. Ia koe e apii ra i te pure a te Atu, eaa te au uianga ka rauka ia koe i te ui kia koe uaorai?

³ I roto i teia atikara e te ka aru mai, ka apii meitaki tatou i te pure a Iesu. Ia tatou e rave ra i teia, e ui kia koe uaorai e, ‘Akapeea teia pure te tauturu anga iaku kia akameitaki mai i taku au pure?’ Tei puapinga roa atu, ‘Te rotai ra ainei toku oraanga ki te pure a te Atu?’

“TO MATOU METUA I TE AO RA”

4. Eaa ta te au tuatua “to matou Metua” e akamaara maira kia tatou, e akapeea a Iehova i riro ei ei Metua no tatou?

⁴ Kua akamata a Iesu i tana pure na te tuatua anga e, “To matou Metua.” Te akamaara maira teia ia tatou e e Metua a Iehova no te au taeake e te au tuaine i te ao katoa. (1 Petero 2:17) Ko te aronga tei ikiia e Iehova kia noo i runga i te rangi, ka riro ratou ei tamariki nana no reira e Metua aia no ratou i roto i tetai mataara puapinga. (Roma 8:15-17) Ka rauka katoa i te aronga ka noo e tuatau ua atu i te enua nei i te kapiki iaia ei “Metua” no ratou. Na Iehova e oronga i te ora no ratou e te akono aroa ra a Iehova i ta ratou e anoano ra. Ka kapikiia ratou ko “te tamariki a te Atua ra” i muri ake me apa kore ratou e me vai tiratiratu ratou kia Iehova i roto i te timataanga openga.​—Roma 8:21; Apokalupo 20:7, 8.

5, 6. Eaa te apinga aroa meitaki rava atu ta te au metua ka rauka i te oronga ki ta ratou tamariki, e eaa ta te tamariki tataki tai ka rave ki teia apinga aroa? (Akara i te tutu mua o teia atikara.)

⁵ Te oronga ra te au metua i tetai apinga aroa ki ta ratou tamariki me tauturuia ratou kia mārama e ko Iehova to ratou Metua i te rangi e me apiiia ratou kia pure kiaia. Akakite mai tetai akaaere kotinga i Aperika Apatonga e: “Mei te rā i anau mai ei ta maua nga tamaine, e pure kapiti ana au e raua i te au po ravarai, me kare ra au i te kainga kare matou e pure. Ka tuatua ua rai ta maua nga tamaine e kare e maara ana ia raua te au tuatua tikai o taua au pure ra i te po. Inara, kua maara ia raua te turanga, te tu tapu o te tuatua anga ki to matou Metua ko Iehova, e te manako au e te tinamou. Te kite anga mai raua i te tuatua, kua akamaroiroi au ia raua kia pure maata kia akarongo atu au ia raua e akakite ra i to raua manako kia Iehova. E tikaanga manea teia kia kite atu au eaa to roto i to raua ngakau. E oti ka rauka iaku i te tauturu ia raua kia kapiti mai i te au tuanga puapinga o te pure a te Atu kia rauka ia raua i te pure ma te ngakau tae.”

⁶ Kua akavaitata ua atu tana nga tamaine kia Iehova ia raua e mamaata maira. Kua akaipoipo raua i teianei e te tavini tamou ra ia Iehova ma ta raua nga tane. Ko tetai apinga aroa meitaki rava atu ta te au metua ka oronga ki ta ratou tamariki koia oki kia apii ia ratou e e tika tikai a Iehova e ka riro aia ei oa piri vaitata no ratou. Inara ka anoanoia te tamariki tataki tai kia piri vaitata ua rai kia Iehova.​—Salamo 5:11, 12; 91:14.

“KIA TAPU TOOU INGOA”

7. Eaa te tika anga ngateitei tei rauka ia tatou, inara eaa ta tatou ka rave?

⁷ Tei ia tatou te tika anga ngateitei i te kite i te ingoa o te Atua e te riro anga ei ‘tangata no tona ingoa.’ (Angaanga 15:14; Isaia 43:10) Ka pure tatou e, “Kia tapu toou ingoa.” Ka pati katoa tatou ia Iehova kia tauturu ia tatou kia kore e rave i tetai angaanga me kore e tuatua i tetai mea te ka akangateitei kore iaia. Eiaa tatou e riro mei tetai pae i te anere mataiti mua tei kore i akono i ta ratou i apii atu i tetai ke. Kua tata a Paulo kia ratou e: “Kua akakinoia oki te ingoa o te Atua ki o te etene ia kotou.”​—Roma 2:21-24.

8, 9. E oronga mai i tetai akaraanga e akapeea a Iehova i te tauturu anga i te aronga kia akatapu i tona ingoa.

⁸ Ka rave tatou i tei rauka ia tatou kia akangateitei i te ingoa o Iehova. Akakite mai tetai tuaine i Norway kua mate tana tane e koia ua e tana tamaiti e rua mataiti: “E tuatau ngata tikai te reira i roto i toku oraanga. Kua pure au i te au rā ravarai, i te au ora katoa, no te maroiroi kia rauka te turanga meitaki i te pae o te manako ngakau kia kore au e oronga kia Satani tetai tumuanga kia akakino ia Iehova na te rave anga i tetai iki anga tau kore me kore tiratiratu kore. Kua inangaro au i te akatapu i te ingoa o Iehova, e kua inangaro au i taku tamaiti kia kite akaou i tona metua tane i roto i te Parataito.”​—Maseli 27:11.

⁹ Kua pau ainei a Iehova i tana au pure? Ae. Na te kapiti putuputu anga ki te au taeake e te au tuaine, kua akamaroiroiia aia. E rima mataiti i muri mai, akaipoipo aia i tetai tangata pakari. I teianei, tana tamaiti e 20 ona mataiti, e taeake papetitoia aia. Karanga aia e: “E mataora tikai au kua tauturu taku tane iaku kia utuutu mai iaia.”

10. Akapeea te Atua te akatapu takiri anga i tona ingoa?

¹⁰ Ka akatapu takiri a Iehova i tona ingoa me takore aia i te aronga pouroa tei akangateitei kore e tei kopae iaia ei Tutara no ratou. (E tatau ia Ezekiela 38:22, 23) A tera tuatau, ka apakore te au tangata e ka akamori te katoatoa ia Iehova, to runga i te rangi e te enua e ka akangateitei i tona ingoa tapu. I te openga, ka “riro ko te Atua i rungao i te au mea katoa i te au ngai ravarai.”​—1 Korinetia 15:28.

“KIA TAE TOOU BASILEIA”

11, 12 I te 1876, kua tauturu a Iehova i tona iti tangata kia mārama i teaa?

¹¹ I mua ake ka oki ei a Iesu ki te rangi, kua ui tana au pipi e: “E te Atu, ei teianei aina koe e akaoki mai ei i te au kia Iseraela?” Kua pau a Iesu e kare i tae ake te tuatau no ratou kia kite e aea te Patireia o te Atua e akamata ai i te tutara. Kua akakite aia ki tana au pipi kia akamou i te manako ki runga i te angaanga puapinga koia oki te angaanga tutu aere. (E tatau ia Angaanga 1:6-8.) Inara kua apii katoa aia ia ratou kia pure no te Patireia o te Atua kia tae mai e kia tapapa ratou i te reira tuatau ki mua. No reira tatou i pure ua ai no te Patireia kia tae mai.

¹² I te vaitata anga mai te tuatau no Iesu kia akamata i tana tutara anga i te rangi, kua tauturu a Iehova i tona iti tangata kia marama eaa te mataiti e tupu ei te reira. I te 1876, kua tata a Charles Taze Russell i te atikara “To te Etene Tuatau: Aea e Ope Ei?” Kua akamārama aia e, i roto i te totou a Daniela te aiteite ra te “itu ua atu tuatau” ki “to te etene tuatau” i roto i ta Iesu totou. Kua akamārama te atikara e ka ope taua tuatau ra i te 1914.a (Akara i te tata rikiriki i raro.)​—Daniela 4:16; Luka 21:24.

13. Eaa tei tupu i te 1914, e eaa ta te au tupu anga i te ao katoa e akapapu maira mei te 1914 mai?

¹³ I te 1914, kua tupu te tamaki i Europa e kare i roa ana kua totoa ki te ao katoa. No te tamaki i tupu ei te onge maata. E i te openga o te tamaki, i te 1918, e maata atu te tangata tei mate i te maki flu i te ao katoa i to te tangata i mate i roto i te tamaki. Kua riro teia au mea pouroa ei tuanga no “te akairo” ta Iesu i oronga mai. Kua akapapu teia akairo e kua riro mai a Iesu ei Ariki i te rangi i te 1914. (Mataio 24:3-8; Luka 21:10, 11) I taua mataiti ra, “aere atura aia ma te upokotu atu e kia upokotu atu rai.” (Apokalupo 6:2) Kua uri a Iesu ia Satani e tana au temoni ki raro nei i te enua. I muri ake i te reira, kua akamata teia totou i te akatupuia: “E mate ra oki to te enua e to te tai! tei raro atu na oki te diabolo ia kotou na, e riri maata oki tona, no te mea kua kite aia e e manga tuatau poto ua tona e toe nei.”​—Apokalupo 12:7-12.

14. (a) Eaa ra tatou i pure ua ai no te Patireia o te Atua kia tae mai? (e) Eaa te angaanga puapinga ta tatou ka rave i teianei?

¹⁴ Te riro ra teia totou i roto ia Apokalupo pene 12 ei tauturu ia tatou kia mārama i te tumu i tupu ei te au mea kino i te enua nei i te tuatau i riro mai ei a Iesu ei Ariki no te Patireia o te Atua. Noatu e te tutara nei a Iesu i te rangi, te tutara nei rai a Satani i te enua nei. Inara kare e roa atu ka “upokotu atu rai” a Iesu na te takore anga i te au kino ravarai i te enua nei. No reira, mei teia taime ki mua, kia pure ua atu rai tatou no te Patireia o te Atua kia tae mai, e kia rave maroiroi i te angaanga tutu aere i te Patireia. Te akatupu ra ta tatou angaanga i te totou a Iesu: “E tutu aereia te evangelia o te basileia nei, e kako rava ake te ao katoa nei; ei kite no te pa enua ravarai; ko te openga iora ïa i reira ra.”​—Mataio 24:14.

“KIA AKONOIA TOOU ANOANO I TE ENUA NEI”

15, 16 Kua rava ua ainei kia pure kia akonoia to te Atua anoano i te enua nei? Akamarama mai.

¹⁵ Mei te 6,000 mataiti i topa, kua akonoia to te Atua anoano i te enua nei. Ko te tumu teia i karanga ai a Iehova “te meitaki roa ra” te au mea ravarai. (Genese 1:31) Inara, kua meameaau a Satani, e mei taua tuatau mai, kare te maata anga o te tangata i akono ana i te anoano o te Atua. I teia tuatau ra, te vaira e varu mirioni tangata e tavini ra ia Iehova. Te pure nei ratou kia akonoia to te Atua anoano i te enua nei, e te rave katoa ra ratou i te anoano o te Atua. Te akono ra ratou i te tu oraanga te akamareka ra i te Atua e te apii maroiroi ra ratou i tetai ke no runga i tona Patireia.

¹⁶ Ei akaraanga, kua karanga tetai mitinari i Aperika, e 80 ona mataiti, tei papetitoia i te 1948 e: “E pure ua ana au e kia atoroia te aronga tu mamoe pouroa e kia tauturuia ratou kia kite ia Iehova i mua ake ka tureti ei. Pera katoa, i mua ua ake ka tutu aere ei au ki tetai tangata, ka pati au no te pakari kia itae i te ngakau o te reira tangata. E no te aronga tu mamoe tei kiteaia mai, e pure ana au kia Iehova kia akameitaki mai i ta tatou tauta anga no te akono anga ia ratou.” E manganui te tangata ta teia tuaine pakarikari i tauturu kia kite ia Iehova. Ka rauka ainei ia koe i te akamanako mai i tetai atu au taeake pakarikari e rave maroiroi nei i to Iehova anoano?​—E tatau ia Philipi 2:17.

17. Eaa toou manako no runga i ta Iehova ka rave no te au tangata e no te enua a te tuatau ki mua?

¹⁷ Kia takore roa a Iehova i tona au enemi i te enua nei, ka pure ua atu rai tatou kia akonoia tona anoano. I reira e akamaneaia ai te enua ei parataito, e e pirioni ua atu tangata ka akatuia mai. Kua karanga a Iesu e “te vaitata mai nei oki te ora, e akarongo ei te aronga katoa i roto i te rua i tona reo, E kua aere mai ki vao.” (Ioane 5:28, 29) Ka akamanako ana e mei teaa atura to tatou mataora me aravei akaou i to tatou aronga akaperepereia! Na te Atua “e orei i te roi-mata katoatoa.” (Apokalupo 21:4) Te maata anga o te aronga te ka akatuia mai e “aronga tuatua-tika kore” tei kore rava i apii i te tuatua mou no runga ia Iehova e Iesu. Ka mataora tatou i te apii atu ia ratou i to te Atua anoano kia rauka ia ratou “te ora mutu kore.”​—Angaanga 24:15; Ioane 17:3.

18. Eaa tikai ta te tangata e anoano maata ra?

¹⁸ Me tae mai te Patireia o te Atua, ka akatapuia tona ingoa, e ka taokotaiia te katoatoa i te ao katoa e pini ua ake kia akamori ia Iehova. Ae, ka oronga mai te Atua i te au mea tikai ta te tangata e anoano ra me pauia mai te toru patianga i roto i te pure a te Atu. I roto i te atikara ka aru mai, ka uriuri tatou i tetai atu au anoano puapinga ta Iesu i apii mai ia tatou kia pure.