Akapeea Tatou me Akaari e te Inangaro ra Tatou ia Iehova?

1, 2. Akapeea a Iehova i te apiianga ia tatou kia inangaro iaia?

KO TE ravenga meitaki rava atu ka apii tetai metua i tana tamariki koia oki ko tona uaorai akaraanga. Me akaari aia i te aroa no tana tamariki, te apii ra aia ia ratou kia aroa atu. Kare atu e tangata tei inangaro maata ia tatou mari ra ko to tatou Metua ko Iehova. No reira, ka apii tatou kia inangaro “no te mea koia ana tei anoano mai ia tatou nei.”​—1 Ioane 4:19.

² Eaa te mataara e akaari maira a Iehova e “koia ana tei anoano mai ia tatou nei”? Te na ko ra te Pipiria e: “I te mea te vai tangata ara ua nei rai tatou, i mate ei te Mesia no tatou nei.” (Roma 5:8) Kua oronga mai to tatou Metua aroa ko Iehova i tana Tamaiti ei atinga oko kia akaora mai ia tatou mei te ara e te mate. Na teia apinga akaperepere i rauka ai ia tatou i te akavaitata kia Iehova e te akaari i to tatou aroa nona. Na te rave anga i teia akaatinga maata, kua akanoo mai a Iehova i te akaraanga no tatou. Kua apii mai aia ia tatou kia akaari i te inangaro na te akatupu anga i te tu noinoi kore e te oronga ua.​—1 Ioane 4:10.

3, 4. Akapeea tatou me akaari e te inangaro ra tatou i te Atua?

³ Ko te aroa te tu maata o Iehova. No reira tatou i mārama ai i te tumu i akakite ei a Iesu e ko te akaueanga puapinga roa atu koia oki: “E anoano atu koe i toou Atua ia Iehova ma to ngakau katoa, e ma to vaerua katoa, e ma to manako katoa, e ma to ririnui katoa.” (Mareka 12:30) Te inangaro maira a Iehova ia tatou kia aroa iaia ma to tatou “ngakau katoa.” Ka mamae a Iehova me maata atu to tatou inangaro no tetai tangata me kore tetai apinga i to tatou inangaro iaia. Tera ra, kare to tatou aroa nona i te mea manako ngakau ua. Te tapapa maira a Iehova ia tatou kia aroa iaia ma to tatou “manako katoa” e te “ririnui katoa.” Te aiteanga i reira, to tatou inangaro no Iehova te o maira to tatou aerenga manako e ta tatou ka rave.​—E tatau ia Mika 6:8.

⁴ No reira ka tau tatou kia inangaro ia Iehova ma to tatou apinga katoa. Na te tukuanga iaia na mua i roto i to tatou oraanga, te akaari ra tatou e te inangaro tikai ra tatou iaia. I roto i te atikara i mua ake, kua uriuri tatou e ā au ravenga e akaari maira a Iehova i tona aroa maata no tana tamariki. I teianei ka akara ana tatou e akapeea me akaoonu atu i to tatou inangaro no Iehova e akapeea me akaari i te reira.

AKAARI KIA IEHOVA I TOOU TU ĀRIKI REKAREKA

5. Me akamanako tatou i te au mea pouroa ta Iehova i rave no tatou, eaa ta tatou ka inangaro i te rave?

⁵ Me oake mai tetai tangata i te apinga aroa naau, papu e ka akaari koe i te tu āriki rekareka. E no te mea te akaperepere ra koe i teia apinga aroa, ka taangaanga koe i te reira. Kua tata a Iakobo e: “Te au mea memeitaki i o maiia ra, e te au mea tika ravarai, no runga ïa, no runga mai i te Metua o te au mārama ra, kare rava e tu ke ke iaia ra, kare oki e tu ke anga e ngai mea ngiti ua ake.” (Iakobo 1:17) E rekareka tikai tatou kua oronga mai a Iehova i te au mea pouroa ta tatou e anoano ra kia ora e kia mataora. Ka kite tatou i tona aroa maata, e ka inangaro tatou i te akaari kiaia i to tatou inangaro nona. Aiteite ainei te reira ki toou manako?

6. Eaa ta te ngati Iseraela ka rave me inangaro ratou ia Iehova kia akameitaki ua rai ia ratou?

⁶ E maata te au mea memeitaki ta te ngati Iseraela i rauka mei ko mai ia Iehova. No te au anere mataiti, kua arataki aia ia ratou ma tana au ture e kua oronga i te au mea ta ratou i anoano kia ora. (Deuteronomi 4:7, 8) Kua rauka i te ngati Iseraela i te akaari i to ratou tu āriki rekareka kia Iehova na te aru anga i teia au ture. Ei akaraanga, me oronga ratou i te au atinga kia Iehova, ka anoanoia ratou kia oronga i “te au mea memeitaki o te popo” mua o te enua kiaia. (Exodo 23:19) Kua kite te ngati Iseraela e ka akameitaki ua rai a Iehova ia ratou me akarongo ratou kiaia e me rave i ta ratou ka rauka.​—E tatau ia Deuteronomi 8:7-11.

7. Akapeea tatou i te taangaanga i te “au apinga” kia akaari i to tatou inangaro no Iehova?

⁷ Ka rauka katoa ia tatou i te akaari kia Iehova i to tatou inangaro nona na te oronga anga i te “au apinga” kiaia. (Maseli 3:9) Ka rave tatou i teia na te akangateitei anga iaia ma to tatou au apinga. Ei akaraanga, penei ka oronga tatou i te moni turuturu i te angaanga Patireia ki ta tatou uaorai putuputuanga takapini i teianei ao. Noatu e maata me kore e iti ua ta tatou apinga, ka rauka ia tatou katoatoa i te taangaanga i te reira ei akaari i to tatou inangaro no Iehova. (2 Korinetia 8:12) Inara te vaira te au mataara ke ka akaari tatou kia Iehova i to tatou inangaro nona.

8, 9. Eaa tetai atu mataara kia akaari tatou kia Iehova i to tatou inangaro nona? Eaa ta Mike e tona ngutuare tangata i rave?

⁸ Kua apii mai a Iesu e na mua tatou i te kimi i te Patireia e auraka tatou e apiapi ua i te kai e te kakau. Te taputou maira to tatou Metua i te oronga mai i ta tatou e anoano ra. (Mataio 6:31-33) Ka irinaki tatou ia Iehova kia akatupu i taua taputou ra. Mei tera te tu, me inangaro tikai koe i tetai tangata, ka irinaki koe iaia. Te tika, ko te maata atu i to tatou irinaki ia Iehova, te maata atu to tatou akaari anga kiaia e te inangaro ra tatou iaia. (Salamo 143:8) No reira, penei ka ui tatou kia tatou uaorai e: ‘Te riro ra ainei taku au parani e te tu e taangaanga ra au i toku taime e te maroiroi ei akaari e te inangaro tikai ra au ia Iehova? I te au rā katoa, te irinaki ra ainei au kia Iehova kia akono i toku au anoano?’

⁹ Kua irinaki tikai a Mike e tona ngutuare tangata ia Iehova. I to Mike tamariki anga, e inangaro tikai tona i te tutu aere i tetai enua ke. Noatu i muri ake i tona akaipoipo anga e e rua ana tamariki, te vai ua ra tona inangaro. Te tatau anga a Mike e tona ngutuare tangata no runga i te au taeake e te au tuaine tei tavini ana i te au ngai e anoano maataia ra te tauturu, kua akamāmā mai ratou i to ratou oraanga. Kua oko i to ratou are e kua neke ki tetai are meangiti ua. Kua akaiti katoa a Mike i tana angaanga pitiniti tāmā anga e kua rauka i te akatere i te reira mei tetai enua ke na runga i te Initaneti. Tei tupu mai, kua rauka ia Mike e tona ngutuare tangata i te neke ki tetai enua, e kua mataora tikai ratou i te rave i te angaanga orometua i reira. Karanga a Mike, “Kua kite matou i te tika o ta Iesu au tuatua i roto ia Mataio 6:33.”

E MANAKONAKO I TA IEHOVA E APII MAIRA IA KOE

10. Mei te Ariki ko Davida rai, no teaa ra i meitaki ei no tatou kia akamanako oonu i ta tatou i apii no runga ia Iehova?

¹⁰ Tata te Ariki ko Davida e: “Te tuatua nei te au rangi i te kakā o te Atua; e te akakite nei te reva i te angaanga a tona rima.” Akakite katoa aia e: “Ko te ture a Iehova kare e apa, i te akaariu anga i te vaerua; te tuatua-akakite a Iehova, e mea mou ïa, e pakari ei te kamakura.” Te manakonako anga a Davida i ta Iehova ture pakari e te au mea manea tana i anga, kua akavaitata atu aia kia Iehova e kua inangaro i te akaari i tona aroa nona. Karanga a Davida e: “Kia tikaia mai te tuatua a toku vaa, e te manako o toku ngakau, i mua i to aroaro, e Iehova, e toku mato, e toku akaora.”​—Salamo 19:1, 7, 14

11. Akapeea tatou me taangaanga i te kite ta Iehova i oronga mai ei akaari i to tatou inangaro nona? (Akara i te tutu mua o teia atikara.)

¹¹ I teia tuatau, e maata te au mea ta Iehova i apii mai ia tatou no runga iaia uaorai, tona akakoroanga, tana au mea i anga, e tana Tuatua. Te akamaroiroi ra teianei ao i te tangata kia apii i te au mea, inara te riro ra te apii teitei ei apai ke i to ratou aroa no te Atua. Tei tuke, kare a Iehova e inangaro ua ia tatou kia rauka te kite, mari ra ka tauturu katoa aia ia tatou kia pakari. Te inangaro ra aia ia tatou kia taangaanga i ta tatou i mou mai ei meitaki no tatou uaorai e kia tauturu i tetai ke. (Maseli 4:5-7) Ei akaraanga, te inangaro ra aia ia tatou kia akakite i “te kite i te tuatua-mou” ki tetai ke e kia tauturu ia ratou e ora ai. (1 Timoteo 2:4) Ka akaari tatou i te inangaro no Iehova e te tangata na te apiianga ia ratou no te Patireia o te Atua e ta te reira ka rave no te tangata.​​—E tatau ia Salamo 66:16, 17

12. Eaa ta tetai tuaine mapu i tuatua no runga i tetai apinga aroa no ko mai ia Iehova?

¹² Ka rauka katoa i te au mapu te manakonako i te au mea ta Iehova i oronga e i apii kia ratou. Te maara nei rai ia Shannon i tana i kite i ko i tetai uruoaanga tana i aere i te tuatau e 11 ona mataiti e tona teina e 10 ona mataiti. I te tuatau o te Uruoaanga Tapere “Akono i te Atua,” kua patiia te katoa anga o te au mapu, kapiti mai a Shannon e tona teina, kia noo ki tetai ngai tapaʼoia. I te akamataanga, kua ru tikai aia. Poitirere ua ake aia te orongaia ra te puka Questions Young People Ask​​—Answers That Work ki te au mapu tataki tai. Eaa tona manako ia Iehova no teia apinga akaperepere? Karanga aia e: “I taua taime tikai i kite mai ei au e e tika tikai a Iehova e e āka inangaro tikai tona iaku. Mei teaa atura to tatou mataora i to tatou Atua maata ko Iehova tei oronga ua mai i teia au apinga aroa memeitaki e te manea!”

ĀRIKI I TE AKO A IEHOVA

13, 14 Akapeea tatou te ariu anga me ako mai a Iehova ia tatou, e no teaa ra?

¹³ Te akamaara maira te Pipiria ia tatou: “Ko tei akaperepereia e Iehova ra, ko tana ïa e pāpā mai; mei te metua i te tamaiti, tana i akaperepere ra.” (Maseli 3:12) Me āriki tatou i te akoanga a Iehova e me akatika iaia kia tereni ia tatou, ka kite tatou kia rave i te mea tika e ka rauka ia tatou te au. E tika, “kare rava oki e ako e riro ei mea rekareka i reira ra, e mea aue ra.” (Ebera 12:11) Noatu ra, akapeea tatou te ariu anga me ako mai a Iehova ia tatou? Auraka tatou e kopae i te ako a Iehova me kore e akariri ua atu me kare tatou e reka i ta tatou i rongo. E inangaro to tatou ia Iehova, no reira tatou ka akarongo ei kiaia e ka rave i te au taui anga tei anoanoia.

¹⁴ I te tuatau ia Malaki, kare te maata anga o te ngati Iuda i akarongo kia Iehova. Kare ratou i manako ana e kare ta ratou atinga i akamareka iaia. No reira a Iehova i ako pakari tikai ia ratou no runga i teia. (E tatau ia Malaki 1:12, 13) Te tika, e maata te taime i ako ei a Iehova ia ratou, inara kare ratou i akarongo. No reira kua akakite aia kia ratou e: “E tono atu au i te taumaa ki runga ia kotou, e e taumaa atu au i to kotou au meitaki.” (Malaki 2:1, 2) Te taka ua ra e me kopae ua rai tatou i te akarongo ki te akoanga a Iehova e me manako tatou kare te reira i te mea puapinga, ka ngere tatou i te pirianga oa kiaia.

15. Eaa te au manako ta tatou ka kopae?

¹⁵ Te akamaroiroi ra to Satani ao i te tangata kia akaparau e kia noinoi. Kare te maata anga e reka ana me akatikatikaia ratou e me akaueia kia rave i tetai angaanga. Ka akarongo ua tetai pae ki te ako i te mea e te anoanoia ra ratou kia pera. Eiaa tatou e akapera. Te akakite maira te Pipiria kia tatou “eiaa e akatau atu i teianei ao.” Mari ra, ka anoanoia tatou kia mārama e eaa ta Iehova e tapapa maira ia tatou e kia rave i tana e mareka ra. (Roma 12:2) Na roto i tana akaaerenga te oronga maira aia i te akoanga i te tuatau tau tikai. Ei akaraanga, te akamaaraia ra tatou eaa ta tatou ka rave me kapiti atu ki tetai tane me kore vaine, akapeea me iki i to tatou au oa, e akapeea me iki i ta tatou ka rave me akangaroi. Me āriki puareinga tatou i te ako a Iehova e kia rave i te au taui anga ei akamareka iaia, te akaari ra tatou e te āriki ra tatou i tana arataki anga e te inangaro tikai ra tatou iaia.​—Ioane 14:31; Roma 6:17.

IRINAKI IA IEHOVA KIA TAUTURU E TE PARURU IA KOE

16, 17 (a) Eaa ra tatou ka kimi ei i to Iehova manako i mua ake ka rave ei i te au ikianga? (e) No tei kore te ngati Iseraela i irinaki ia Iehova, eaa ta ratou i rave?

¹⁶ E irinaki ua ana te tamariki rikiriki i to ratou au metua kia tauturu e te paruru ia ratou. Penei ka pati katoa te aronga mamaata i te tauturu a to ratou metua. Noatu ka rauka ia ratou i te rave i ta ratou uaorai ikianga, kua kite ratou e ka oronga mai te au metua i te akoanga tau. Te akatika ra to tatou Metua ko Iehova ia tatou kia rave i ta tatou uaorai ikianga. Inara no to tatou irinaki e to tatou inangaro iaia, ka pati ua rai tatou no tana tauturu e ka rave i ta tatou ka rauka i te kimi i tona manako i mua ake ka rave ei i tetai tukuanga. Me irinaki tatou ia Iehova, ka oronga mai aia i tona vaerua tapu ei tauturu ia tatou kia rave i te mea tika.​—Philipi 2:13.

¹⁷ I to Samuela tuatau, kua ruti te ngati Iseraela i te tamaki ki te Philiseti. No tei kore ratou i pati kia Iehova eaa ta ratou ka rave, kua karanga ratou e: “E tiki tatou i te aruna koreromotu a Iehova i Silo ra, e apai mai i ko nei ia tatou nei, kia na rotopu ia tatou nei, ei akaora ia tatou i te rima o to tatou au enemi.” Eaa tei tupu no taua ikianga? “E maata ua atu taua pou ra: e toru oki ngauru anga o te tausani to Iseraela au tangata aere ua i mate ra. Riro atura oki te aruna a te Atua.” (1 Samuela 4:2-4, 10, 11) Kua manako to Iseraela me apai ratou i te Aruna, ka tauturu e ka paruru a Iehova ia ratou. Inara kare ratou i pati ana kia Iehova no te tauturu e kare ratou i titau i te kimi i tona manako. Mari ra, kua rave ratou i ta ratou i manako e ko te mea tika, e kua tupu te mamae maata kia ratou.​—E tatau ia Maseli 14:12.

18. Eaa ta te Pipiria e apii maira ia koe no te irinaki anga ia Iehova?

¹⁸ Te tata salamo tei inangaro maata ia Iehova e kua irinaki iaia, kua tata e: “E irinaki i te Atua; ka akameitaki rai au iaia, tei mua oki i tona aroaro te ora. E taku Atua e, kua taitaia toku vaerua i roto iaku nei; E teianei, te akamaara nei au ia koe.” (Salamo 42:5, 6) Ko toou manako ainei teia no runga ia Iehova? Te akavaitata ra ainei koe kiaia e te irinaki ra iaia? Penei ka rauka ia koe i te apii kia irinaki maata atu iaia. Te akakite maira te Pipiria kia tatou: “E irinaki kia Iehova ma to ngakau katoa ra; auraka ra e irinaki ki toou uaorai kite. Auraka e akangaropoina iaia i toou katoa ra au aerenga; e nana e akakite kia koe i toou ra au arataa.”​—Maseli 3:5, 6.

19. Akapeea koe me akaari kia Iehova i toou inangaro nona?

¹⁹ No tei aroa mai a Iehova ia tatou na mua, kua apii mai aia ia tatou kia aroa atu. E akamanako ua rai tatou i te au mea tana i rave no tatou e tona āka inangaro ia tatou. E kia akaari tatou kiaia e te inangaro ra tatou iaia ma to tatou ngakau, vaerua, manako, e te ririnui katoa.​—Mareko 12:30.