“E Tuku Atu i ta te Akakoromaki ra Angaanga Kia Tika Rava”

1, 2. (a) Eaa ta tatou ka apii mai mei te akakoromaki o Gideona e tona 300 tangata? (Akara i te tutu mua.) (e) Kia tau kia Luka 21:19, eaa i puapinga ai te akakoromaki?

KA AKAMANAKO ana i te tamaki ngata e te roiroi i rotopu i te ngati Iseraela tei aratakiia e te akava ko Gideona, e to ratou au enemi. Kua arumaki a Gideona e tona pupu tangata i te ngati Midiana e tona pupu tauturu i te po katoa no tetai 32 kiromita. Te akakite maira te Pipiria eaa tei tupu i muri ake: “Tae aturā Gideona ki Ioridana, e kua aere atura ki tetai pae, koia e te au tangata e toru anere iaia ra, kua potopoto rai te aʼo.” Inara kare akerai ratou i autu e kua anoanoia ratou i te tamaki atu e 15,000 vaeau. Kua roa teia au enemi i te takinokino anga i te ngati Iseraela, no reira kare ratou i tuku i te au. Kua arumaki ua atu a Gideona i tona au enemi e kua upokotu atu ratou!​—Te Au Akava 7:22; 8:4, 10, 28.

² Te tamaki katoa nei tatou i tetai tamaki ngata e te roiroi. To tatou enemi, ko Satani, tona ao, e to tatou uaorai tu apa. Kua tamaki ana etai pae ia tatou i teia au enemi no tetai tuatau roa. Ma te tauturu a Iehova, kua re tatou i teia au tamaki anga. Inara, kare tatou i re ake i te tamaki anga openga. I tetai taime, penei ka roiroi tatou i te tamaki ua atu. Me kore ka roiroi tatou i te tiaki kia ope teia akatereanga kino. Akamatakite mai a Iesu e ka tupu te au timata anga e te takinokino anga pakari i teia tuatau openga nei. Inara kua karanga katoa aia e me akakoromaki tatou, ka re tatou. (E tatau ia Luka 21:19.) Eaa te akakoromaki? Eaa te ka tauturu ia tatou kia akakoromaki? Eaa ta tatou ka apii mai mei te aronga tei akakoromaki? E akapeea tatou te tuku anga i “ta te akakoromaki ra angaanga kia tika rava”?—Iakobo 1:4.

EAA TE AKAKOROMAKI?

3. Eaa te akakoromaki?

³ I roto i te Pipiria, te aiteanga o te akakoromaki, e maata atu ïa i te akakoromaki ua i tetai turanga ngata. Te ō maira to tatou manako no runga i te timata anga e ta tatou ka rave. Ka tauturu te akakoromaki ia tatou kia ngakau toa, kia tiratiratu, e kia tiaki marie. Karanga tetai puka e na te tu akakoromaki e tauturu ia tatou kia rauka te manakonakoanga ketaketa e kia kopae i te tuku i te au me timataia tatou. Ka tauturu te reira ia tatou kia vai ngaueue kore noatu te timata anga pakari. E ka tauturu ia tatou kia autu i taua au timata anga ra e kia akamou ua ki runga i to tatou akakoroanga, kare ki runga i to tatou mamae.

4. No teaa ra tatou ka karanga ai e na te aroa e akakeu i te tu akakoromaki?

⁴ Ka akakeu te aroa ia tatou kia akakoromaki. (E tatau ia 1 Korinetia 13:4, 7.) Na teea tu? Na te aroa o Iehova e akakeu ia tatou kia akakoromaki i tetai ua atu apinga ka tupu. (Luka 22:41, 42) Na te aroa no te au taeake e tauturu ia tatou kia akakoromaki i to ratou au tu apa. (1 Petero 4:8) Na te aroa i toou tokorua akaipoipo e tauturu kia akakoromaki i te “pekapeka” noatu i roto i te oraanga akaipoipo mataora, e ka riro ei akaketaketa i to korua oraanga akaipoipo.​—1 Korinetia 7:28.

EAA TE KA TAUTURU IA KOE KIA AKAKOROMAKI?

5. No teaa ra a Iehova i tau tikai ei tauturu ia tatou kia akakoromaki?

⁵ E pati kia Iehova no te tauturu. Ko Iehova, “te Atua nona te akakoromaki e te pumaana.” (Roma 15:5) Koia anake tei mārama tikai i to tatou turanga, te manako ngakau, e te ngai no reira mai tatou. No reira kua kite tikai aia eaa te ka anoanoia no tatou kia akakoromaki. Te karanga ra te Pipiria: “E akatika aia i te anoano o te aronga i mataku iaia; ka akarongo mai aia i ta ratou kapiki, e ka akaora oki aia ia ratou.” (Salamo 145:19) Inara akapeea te Atua te pau anga mai i ta tatou pure kia akamaroiroi i te akakoromaki?

6. Mei tei taputouia e te Pipiria, ka akapeea a Iehova te ‘akatupu anga i te akapuanga’ i to tatou timata anga?

⁶ Me pati tatou kia Iehova no te tauturu kia akakoromaki, ka taputou aia e ka “akatupu katoa aia i te akapuanga i taua timataanga ra.” (E tatau ia 1 Korinetia 10:13.) Akapeea aia te rave anga i teia? Tetai taime, penei ka akakore aia i te timata anga. Inara te maata anga o te taime, ka oronga mai aia i te maroiroi “kia maata atu te akakoromaki, e te maru anga kia roa, ma te rekareka.” (Kolosa 1:11) No te mea kua kite meitaki aia i to tatou au kotinga pae kopapa e te pae manako ngakau, kare rava a Iehova e tiaki kia kino atu to tatou timataanga e kare e rauka ia tatou kia vai tiratiratu.

7. Akatutu mai eaa te tumu ka anoanoia ai te kai pae vaerua kia akakoromaki.

⁷ E akariro i te kai pae vaerua kia akaketaketa i toou akarongo. Eaa i puapinga ai te kai pae vaerua? Ei akatutuanga: Me piki tetai tangata i te Maunga Everest, e akakoromaki ei kia taea tona akakoroanga, ka tau te reira tangata kia kai i te kai akamatutu kia rava te maroiroi no tona kopapa. Koia katoa tatou i te akapou i te taime i te apii i te kainga e i ko i ta tatou au uipaanga. Ka riro teia ei akaketaketa i to tatou akarongo.​—Ioane 6:27.

8, 9. (a) Kia tau kia Iobu 2:4, 5, eaa te ō maira me rokoia tatou e te timata anga? (e) Me rokoia koe e te timata anga, eaa taau akatutu anga ka akamanako?

⁸ Akamaara i toou tu tiratiratu ki te Atua. Me tupu te timata anga kia tatou, ka mamae tatou e e maata atu te ka ō mai. Te timataia ra to tatou tiratiratu ki te Atua. Me ariu atu ki te reira timata anga, ka akaari mai me te manako ra tatou ia Iehova ei Tutara mou no te ao katoa e pini ua ake. Akapeea ra? Kua akakinoia a Iehova e Satani, koia te enemi tei patoi i ta te Atua tutara anga, tei karanga e te tavini ua ra te tangata i te Atua no te anoano tau kore. Karanga a Satani e: “E riro oki ta te tangata katoa ra ei oko i tona ora.” E oti, kua karanga a Satani no runga ia Iobu e: “Kia akatika ua atura koe i to rima i tenana, ka rave atu ei i tona ivi e tona kiko, kare aia e kore i te akakino ia koe ki mua i to mata.” (Iobu 2:4, 5) Kua taui ainei a Satani me akara tatou i teia? Kare! I te au mataiti i muri mai, te tiria anga a Satani mei te rangi mai, te akakino nei aia i te au tavini o te Atua. (Apokalupo 12:10) I teia rā, te akaapa nei rai a Satani e te akamori ra te tangata i te Atua ma te anoano tau kore. Te aruaru ra aia kia patoi tatou i te tutara a te Atua e kia akamutu i te tavini Iaia.

⁹ Me rokoia koe e te mamae no tetai timata anga, e akamanako ana i teia akatutu anga. Ko Satani e tana au temoni i tetai tua. Te akara ra ratou eaa taau ka rave e kua karanga e ka tuku ua koe i te au. I tetai tua ra, ko Iehova, to tatou Ariki ko Iesu Mesia, te aronga akatainuia tei akatuia ki te rangi, e te tauatini ua atu angera. Te kite katoa ra ratou i toou putōtō anga, inara te akamaroiroi ra ratou ia koe. Te mataora ra ratou i te kite e te akakoromaki ra e te vai tiratiratu ra koe kia Iehova. E oti, ka akarongo koe kia Iehova i te tuatua anga e: “E taku tamaiti, kia pakari koe, kia rekareka toku ngakau, kia tika iaku kia patoi atu i tei akakino mai iaku nei.”​—Maseli 27:11.

10. Akapeea koe te aru anga ia Iesu te akamanako anga i te tutaki no te akakoromaki?

¹⁰ Akamanako ana i te au puapinga. Akamanako ana e te aere ra koe no tetai tere. Ia koe e aere ra, ka na roto koe i tetai ana mamao. I taau ngai ka akara, e poiri ua. Inara me tae koe ki te ope o te ana, ka kite akaou koe i te mārama. Ka riro katoa te oraanga mei teia tere rai. Penei ka anoanoia kia na roto koe i te au tuatau ngata tikai, e penei ka taitaia koe no te au manamanata. Penei kua manako akapera rai a Iesu. I tona mate anga ki runga i te rakau tamamae, kua taakamāia aia ma te mamae tikai. Papu ko te tuatau kino rava atu teia i tona oraanga! Eaa tei tauturu iaia kia akakoromaki? Karanga te Pipiria e kua akara ua aia ki “te meitaki i tukuia mai ki mua i tona aroaro.” (Ebera 12:2, 3) Kua akamou a Iesu ki runga i te tutaki o tona akakoromaki, e tei puapinga rava atu, kia rauka iaia te akatapu i te ingoa o te Atua e te turu i tona tikaanga kia tutara. Kua kite aia e poto ua teia timata anga e ka vai mutu kore ua rai tana tutaki i te rangi. I teia rā, penei ka riro to tatou timata anga ei mea kino e te mamae, inara e akamaara e mea poto ua te reira.

“TE ARONGA I TAMOU MARIE I TE AKAKOROMAKI”

11. No teaa ra tatou ka akamanako ei i te au tupuanga a “te aronga i tamou marie i te akakoromaki”?

¹¹ Kare tatou e anoanoia kia akakoromaki ko tatou anake ua. Ei akamaroiroi i te au Kerititiano kia akakoromaki i te au timata anga a Satani, kua tata a Petero e: “Ko tei patoi atu ïa ma te akarongo turori kore, kua kite oki kotou e, tei to kotou au taeake katoa i te ao nei taua au mate ra.” (1 Petero 5:9) Ka riro te au tupuanga o “te aronga i tamou marie i te akakoromaki” ei apii mai ia tatou kia vai tiratiratu, kia akapapu e ka autu tatou, ma te akamaara anga e ka tutakiia to tatou tu tiratiratu. (Iakobo 5:11) Ka akara tatou i tetai au akaraanga.^[1]​—Akara i te manako poto.

12. Eaa ta tatou ka apii mai mei te akaraanga o te au kerubi tei akanooia kia tiaki i te aua o Edene?

¹² Te au kerubi, e au angera taoonga teitei to ratou. I muri ake te ara anga a Adamu raua ko Eva, kua oronga a Iehova i tetai angaanga ou i te enua nei na teia au kerubi. E tuke tikai te reira mei ta ratou i matau i te rangi. Ka riro to ratou akaraanga ei apii ia tatou kia akakoromaki i ta tatou tuanga angaanga. Karanga te Pipiria e “kua tuku iora aia i te au Kerubi, ma te koke mura i te koraparapa ua anga, i te pae i te itinga o te ra i taua kainga i Edene ra, ei tiaki i te ara i te rakau o te ora ra.”^[2] (Akara i te manako poto.) (Genese 3:24) Kare te Pipiria i karanga ana e kua kopekope te au kerubi e kare i manako ana e puapinga roa ratou no teia tuanga angaanga. Kare ratou i maromaroa ana e te tuku i te au. Mari ra, kua akono i ta ratou tuanga angaanga kia oti, e tae ua atu ki te Vaipuke, e tere atu i te 1,600 mataiti i muri mai!

13. Akapeea a Iobu i te akakoromaki anga i tona au timataanga?

¹³ Te tangata akarongo mou ko Iobu. Tetai taime, ka mamae koe no te au tuatua akakino a tetai oa me kore kopu tangata. Me kore ra, kua tu koe i tetai maki kino tikai, e kua mate toou akaperepere. Inara noatu eaa tei tupu, ka rauka mai te akapumaana mei te akaraanga o Iobu. (Iobu 1:18, 19; 2:7, 9; 19:1-3) Kare a Iobu i kite i te tumu i rokoia ai aia e te au timataanga e manganui. Noatu ra, kare aia i tuku i te au. Eaa tei tauturu iaia kia akakoromaki? Mea mua, kua inangaro aia ia Iehova e kua mataku i te akamareka kore Iaia. (Iobu 1:1) Kua inangaro a Iobu i te akamareka ia Iehova i te tuatau meitaki e te tuatau kino. Kapiti mai, kua tauturu a Iehova ia Iobu kia kite i Tona mana na te akakite anga i tetai au mea umere Tana i anga. Kua akapapu teia kia Iobu e ka akaope a Iehova i tona au timataanga i te tuatau tau tikai. (Iobu 42:1, 2) Ko te reira rai tei tupu. “Kua ruri ke akerā Iehova i taua eketumu anga o Iobu ra, . . . e kua tataki rua mairā Iehova i ta Iobu apinga i tei rauka iaia i muatangana ra.” “Mate iorā Iobu kua ruaine, e ma te iu i tona ra puke rā.”​—Iobu 42:10, 17.

14. Kia tau ia 2 Korinetia 1:6, akapeea te tu akakoromaki o Paulo te tauturu anga i etai ke?

¹⁴ Te apotetoro ko Paulo. Te takinokino pakariia ra koe? Ko koe ainei tetai tangata pakari i roto i te putuputuanga me kore tetai akaaere kotinga tei manako e e maata roa taau apainga? Me koia ïa, ka riro te akaraanga o Paulo ei tauturu ia koe. Kua takinokino tikaiia a Paulo, e kua manamanata ua rai aia i te au taeake i roto i te putuputuanga. (2 Korinetia 11:23-29) Inara, kare rava a Paulo i tuku i te au, e kua riro tona akaraanga ei akamaroiroi i etai ke. (E tatau ia 2 Korinetia 1:6.) Mei te reira katoa, ka riro toou tu akakoromaki ei tauturu i etai ke kia akakoromaki.

KA TUKU AINEI KOE “I TA TE AKAKOROMAKI RA ANGAANGA KIA TIKA RAVA”?

15, 16. (a) Eaa te “angaanga” ta te akakoromaki ka tika rava? (e) Oronga mai i te au akaraanga e akapeea tatou me tuku i “ta te akakoromaki ra angaanga kia tika rava.”

¹⁵ Kua akauruia te pipi ko Iakobo kia tata e: “E tuku atu i ta te akakoromaki ra angaanga kia tika rava, kia meitaki rava kotou, ma te apa kore, auraka e ape toe.” (Iakobo 1:4) Akapeea tatou te tuku anga “i ta te akakoromaki ra angaanga kia tika rava”? Me na roto tatou i tetai au timataanga, penei ka kite mai tatou e ka anoanoia tatou kia akaari i te au tu akakoromaki, āriki rekareka, e te aroa. Ia tatou e akakoromaki ra i te au timataanga, ka kite mai tatou e ka akapeea me akaari maata atu i teia au tu, pera katoa ka meitaki atu to tatou tu Kerititiano.

¹⁶ No te mea ka tauturu te akakoromaki ia tatou kia riro mai ei Kerititiano meitaki atu, kare tatou e inangaro i te aati i ta Iehova ture kia akaope i tetai timataanga. Ei akaraanga, me ngata ia koe i te kopae i te au manako ainga tau kore, auraka e tuku ua atu ki te timataanga! E pati kia Iehova no te tauturu kia kopae takiri i te au manako tarevake. E kopu tangata ainei toou te patoi ra ia koe? Auraka e tuku i te au! E tauta ua atu rai i te tavini ia Iehova. Te ka tupu, ka akaketaketaia toou irinaki anga papu kia Iehova. E akamaara: E rauka ai i te akamareka ia Iehova, ka anoanoia tatou kia akakoromaki.​—Roma 5:3-5; Iakobo 1:12.

17, 18. (a) Akatutu mai i te puapinga o te akakoromaki e tae ua atu ki te openga. (e) I te openga e vaitata maira, eaa te tu akapapu ka rauka ia tatou?

¹⁷ Ka anoanoia tatou kia akakoromaki e tae ua atu ki te openga, kare no tetai tuatau poto ua. Akamanako ana i tetai paī e tomo ra ki raro i te moana. E ora ai te tangata, ka anoanoia ratou kia kau ki uta i te enua. Ko te tangata tei tuku i te au i te akamataanga aia i te kau, ka maremoia aia. Pera katoa, te tangata tei tuku i te au iaia e vaitata atura ki te enua, ka maremo katoaia. Me ka inangaro tatou i te noo i roto i te ao ou, ka anoanoia tatou kia akakoromaki ua atu. Kia aru tatou i te tu o te apotetoro ko Paulo, tei karanga e: “I kore ei matou i roiroi.”​—2 Korinetia 4:1, 16.

¹⁸ Mei ia Paulo rai, kua papu tikai ia tatou e ka tauturu mai a Iehova ia tatou kia akakoromaki e tae ua atu ki te openga. Kua tata a Paulo: “Ka riro ra te re i taua au mea katoa nei ia tatou i tei aroa mai ia tatou nei. Kua kite tikai oki au e, kare te mate, kare oki te ora, kare oki te au angela, kare oki te ui ariki, kare oki te au mea mana, kare oki te au mea e vai nei, kare oki te au mea e ka tupu a muri atu, Kare oki te teitei, kare oki te akaaka, e kare katoa te au mea i angaia nei, e tika kia akataka ke ia tatou i te aroa o te Atua i roto i to tatou Atu ia Iesu Mesia ra.” (Roma 8:37-39) E tika, ka roiroi tatou i tetai au taime. Inara kia aru tatou i te tu o Gideona e tona au tangata. Kua roiroi ratou, inara kare ratou i tuku i te au. “Te arumaki ua ra”!​—Te Au Akava 8:4.