Eaa ra Tatou ka Uipa Kapiti ei no te Akamorianga?

1-3. (a) Akapeea te au Kerititiano te akaari anga e te inangaro ra ratou i te uipa kapiti? (Akara i te tutu mua.) (e) Eaa ta tatou ka uriuri i roto i teia atikara?

I TO Corinna 17 anga mataiti, kua tapekaia tona mama e kua tuku mamaoia ki tetai puakapa tuikaa. Muri mai, kua apai katoaia a Corinna mei tona kainga e tauatini ua atu kiro mita ki Siberia. I reira, kua angaanga aia i te ngai tanutanu e te angai manu e kua akariroia ei tuikaa. Tetai taime, kua māroia aia kia angaanga i vao i te ngai anu tikai e kare e rava ana tona kakau maana. Noatu ra, kua iki a Corinna e tetai mai tuaine e ka rave raua i te ka rauka kia akaruke i te ngai tanutanu e kia aere ki tetai uipaanga a te putuputuanga.

² Akakite a Corinna e: “Kua akaruke vave maua i te angaanga i taua aiai ra e kua aere ki te ngai tiaki rerue e 25 kiro mita te mamao. Kua akaruke te rerue i te ora rua i te popongi, e kua na runga maua i te rerue e ono ora e kua eke ki raro e kua aere atu e tai ngauru kiro mita ki te are uipaanga.” Mataora tikai a Corinna kua aru aia i teia tere. Karanga aia: “I ko i te uipaanga, kua apii matou i Te Punanga Tiaki e kua imene i te au imene Patireia. Kua akamaroiroi tikaiia maua e kua ketaketa atu to maua akarongo.” Kua oki teia nga tuaine ki te ngai angaanga e toru rā i muri mai, kare ra te pu angaanga i kite ana e kua aere raua.

³ E tapapa ua ana te iti tangata o Iehova i te kapiti atu ki tetai e tetai. Ei akaraanga, kua inangaro maata te au Kerititiano mua i te uipa kapiti kia akamori ia Iehova e kia apii no runga Iaia. (Angaanga 2:42) E tika, papu e reka katoa ana koe i te aere ki te au uipaanga. Inara, mei toou au taeake e te au tuaine, penei e ngata ia koe i te aere putuputu ki reira. Penei ka anoanoia koe kia angaanga roa me kore e maata taau ka rave e kua roiroi koe. No reira, eaa te ka tauturu ia tatou kia rave i te ka rauka ia tatou kia tae ki te au uipaanga?^[1] (Akara i te manako poto.) Akapeea tatou te tauturu anga i ta tatou aronga apii Pipiria e tetai ke kia aere putuputu mai ki te au uipaanga? Ka akamārama teia atikara eaa te tumu no tatou kia tae ki te au uipaanga: (1) ka riro ei meitaki no tatou, (2) ka tauturu i tetai ke, e te (3) ka akamareka ia Iehova.^[2]​—Akara i te manako poto.

RIRO TE AU UIPAANGA EI MEITAKI NO TATOU

4. Akapeea te au uipaanga te tauturu anga ia tatou kia apii no runga ia Iehova?

⁴ Ka apii tatou i ko i te au uipaanga. I te au uipaanga ravarai, ka apii tatou no runga ia Iehova. Ei akaraanga, kua apii te maataanga o te au putuputuanga i te puka Akavaitata Atu kia Iehova no te Apii Pipiria a te Putuputuanga. Eaa taau i manako i te uriuri anga koe i to Iehova au tu, e te akarongo atu i to te au taeake manako no runga iaia? Papu tikai, kua akakeu te reira ia koe kia inangaro maata atu ia Iehova. I ko i te au uipaanga, ka apii maata atu tatou no runga i te Pipiria na te akarongo meitaki anga ki te au ako, te au akatutuanga e te tatauanga Pipiria. (Nehemia 8:8) Akamanako katoa i te au mea ou ta tatou ka kite mai i te au epetoma me akapapa i te tatauanga Pipiria e me akarongo i ta te au taeake i apii mai.

5. Akapeea te au uipaanga te tauturu anga ia koe kia taangaanga i taau i apii i roto i te Pipiria e kia akameitaki atu i taau tutu aere?

⁵ Te apii maira te au uipaanga ia tatou kia taangaanga i ta tatou i apii mei te Pipiria mai ki roto i to tatou oraanga. (1 Tesalonia 4:9, 10) Ei akaraanga, kua aere ainei koe ki tetai Apii Punanga Tiaki tei akakeu ia koe kia tavini maata atu ia Iehova, kia akameitaki atu i taau pure, e kia akakore i te ara a tetai taeake me kore tuaine? Ka riro te uipaanga i te epetoma ei apii ia tatou kia tutu aere i te nuti meitaki e kia tauturu i tetai ke kia mārama i te tuatua mou i roto i te Pipiria.​—Mataio 28:19, 20.

6. Akapeea ta tatou uipaanga te tauturu anga e te akamaroiroi anga ia tatou?

⁶ Ka akamaroiroi te au uipaanga ia tatou. Te tauta nei te ao o Satani i te akaparuparu i to tatou akarongo e kia manako taitaia tatou. Inara ka riro ta tatou au uipaanga ei akamaroiroi ia tatou kia tavini ua atu ia Iehova. (E tatau ia Angaanga 15:30-32.) E uriuri putuputu ana tatou akapeea te au totou i roto i te Pipiria te akatupuia anga. Ka tauturu teia ia tatou kia irinaki papu e ka akatupuia ta Iehova au taputou no te tuatau ki mua. Ka akamaroiroi te au taeake e te au tuaine ia tatou me rave ratou i te au akoanga, pera katoa me paupau ratou e me imene akapaapaa ia Iehova mei roto i to ratou ngakau. (1 Korinetia 14:26) Me pukapuka tatou i mua ake e i muri ake i te au uipaanga, ka akaoraoraia tatou no te mea e maata te au taeake te inangaro maira ia tatou.​—1 Korinetia 16:17, 18.

7. Eaa i puapinga ai kia aere ki te au uipaanga?

⁷ I ko i te au uipaanga, ka rauka te tauturu a te vaerua tapu o te Atua. Te taangaanga nei a Iesu i teia vaerua tapu kia arataki i te putuputuanga. Te tika, te akakite maira aia ia tatou kia akarongo ‘i ta te vaerua e tuatua ki te au ekalesia.’ (Apokalupo 2:7) Ka tauturu te vaerua tapu ia tatou kia patoi i te timataanga e kia tutu ngakau toa. Ka tauturu katoa ia tatou kia rave i te au ikianga meitaki. Ko te tumu teia ka anoanoia tatou kia tauta pakari kia tae ki te au uipaanga e kia rauka te tauturu a te vaerua tapu o te Atua.

KA TAUTURU TATOU I TETAI KE I KO I TE AU UIPAANGA

8. Me kite mai te au taeake ia tatou i te au uipaanga, me paupau, e me imene, akapeea te reira te tauturu anga ia ratou? (Akara katoa i te pia “Ka Rekareka ua Rai Aia i Muri Ake i te Uipaanga.”)

⁸ E atianga meitaki to tatou i te akaari i to tatou inangaro no te au taeake e te au tuaine i ko i te au uipaanga. E manganui i roto i te putuputuanga, te akakoromaki ra i te au turanga ngata. Kua tata te apotetoro ko Paulo: “E akono marie rai tatou tetai ki tetai.” (Ebera 10:24, 25) Ka akaari tatou i to tatou inangaro no te au taeake na te uipa kapiti anga i te akamaroiroi i tetai e tetai. Me aere ki te au uipaanga, te akaari ra tatou ki te au taeake e ka inangaro tatou i te uipa kapiti kia ratou, te pukapuka atu, e ka inangaro i te kite e te peea ua ra ratou. Ka akamaroiroiia ratou me akarongo ia tatou te paupau anga e te imene anga ma te ngakau katoa.​—Kolosa 3:16.

9, 10. (a) Akamārama mai akapeea ta Iesu tuatua ia Ioane 10:16 te tauturu anga ia tatou kia mārama i te puapinga kia uipa kapiti ki te au taeake. (e) Me aere putuputu tatou ki te au uipaanga, akapeea tatou te tauturu anga i tetai tei kopaeia e tona ngutuare tangata?

⁹ Me aere tatou ki te au uipaanga, ka tauturuia te putuputuanga kia vai taokotai. (E tatau ia Ioane 10:16.) Kua akaaite a Iesu iaia uaorai ki tetai tiaki mamoe, e tana au pipi ki te anana mamoe. E akamanako ana i teia: Me tei runga tetai nga mamoe i te maunga, e rua i roto i te ō, e tetai e ngai ke atu ïa, ka riro ainei teia au mamoe e rima ei anana mamoe? Kare, no te mea ka noo kapiti te anana mamoe e ka aru i to ratou tiaki. Mei te reira katoa, eiaa tatou e akataka ke atu mei te au taeake na te kore e tae mai ki te au uipaanga. Ka anoanoia tatou kia uipa kapiti kia riro ei “okotai oki anana, okotai oki tiaki.”

¹⁰ Ka tauturu te au uipaanga kia vai taokotai ua tatou mei tetai ngutuare tangata aroa. (Salamo 133:1) Tetai pae i roto i te putuputuanga, kua kopaeia e to ratou uaorai ngutuare tangata, mei to ratou nga metua, to ratou tungane me kore tuaine. Inara kua taputou a Iesu e ka oronga aia i tetai ngutuare tei aroa ia ratou e ka akono ia ratou. (Mareko 10:29, 30) Me aere putuputu koe ki te au uipaanga, penei ka riro mai koe mei tetai metua tane, metua vaine, tungane, me kore tuaine no tetai i roto i te putuputuanga. Me akamanako tatou i teia, ka inangaro tatou i te tauta pakari kia tae ki te au uipaanga ravarai.

KA AKAMAREKA TATOU IA IEHOVA

11. Akapeea te aere anga ki te au uipaanga i te tauturu ia tatou kia oronga i tei tau kia Iehova?

¹¹ I ko i te au uipaanga, ka oronga tatou i tei tau kia Iehova. I te mea Nana i anga mai ia tatou, ka tau i reira tatou kia akameitaki, kia akangateitei, e kia akapaapaa iaia. (E tatau ia Apokalupo 7:12.) Ka rave tatou i teia i ko i te au uipaanga me pure tatou kia Iehova, me imene kiaia, e me tuatua no runga iaia. Mei teaa atura te tikaanga ngateitei i te akamori ia Iehova i te au epetoma ravarai!

12. Me akarongo tatou ki ta Iehova akauenga kia tae ki te au uipaanga, eaa tona manako?

¹² Kua anga mai a Iehova ia tatou, e ka akarongo tatou kiaia. Kua akaue aia ia tatou kia uipa kapiti no te mea te vaitata maira te openga. Me akarongo tatou ki teia akauenga, te mareka maira Iehova. (1 Ioane 3:22) Te kite nei aia e ka inangaro tikai tatou kia tae ki te au uipaanga, e te akaperepere ra aia ia tatou no ta tatou tautaanga kia tae ki reira.​—Ebera 6:10.

13, 14. Akapeea tatou te akavaitata anga kia Iehova e Iesu i ko i te au uipaanga?

¹³ Me aere ki te au uipaanga, ka akaari tatou e te inangaro nei tatou i te akavaitata atu kia Iehova e tana Tamaiti. I ko i te au uipaanga, ka apii tatou i te Pipiria e ka apii mai a Iehova ia tatou i ta tatou ka tau kia rave e ka akapeea me akono i te oraanga. (Isaia 30:20, 21) Me aere mai tetai aronga kare e tavini ana ia Iehova ki te au uipaanga, ka kite ratou e te arataki nei te Atua ia tatou. (1 Korinetia 14:23-25) Te arataki nei a Iehova i ta tatou uipaanga ma tona vaerua tapu, e no ko mai iaia te au mea ta tatou e apii ra. No reira, me aere tatou ki te au uipaanga, ka akarongo tatou i ta Iehova e tuatua maira, ka kitea te oonu o tona aroa no tatou, e ka akavaitata atu tatou kiaia.

¹⁴ Akakite mai te Upoko o te putuputuanga ko Iesu e: “I te ngai e putuputu ei e toko rua e toko toru i toku nei ingoa, tei rotopu katoa au ia ratou i reira.” (Mataio 18:20) Te akakite katoa ra te Pipiria e ko Iesu tei “aaere na roto” i te au putuputuanga. (Apokalupo 1:20–2:1) Te taka ua ra, tei rotopu a Iehova raua ko Iesu ia tatou e te akamaroiroi nei raua ia tatou i ko i te au uipaanga. Eaa toou manako i ta Iehova e manako maira me kite aia e te rave ra koe i taau ka rauka i te akavaitata atu kiaia e tana Tamaiti?

15. Me aere tatou ki te au uipaanga, akapeea te reira i te akaari anga e ka inangaro tatou i te akarongo ki te Atua

¹⁵ Me aere ki te au uipaanga, ka akaari tatou kia Iehova i to tatou inangaro i te akarongo kiaia. Kare a Iehova e māro ana ia tatou kia rave i tana e tuatua ra. (Isaia 43:23) No reira, me iki tatou i te aru i tana akauenga kia aere ki te uipaanga, ka akaari tatou i to tatou inangaro iaia e te irinaki e nona te tikaanga kia akakite mai eaa ta tatou ka rave. (Roma 6:17) Ei akaraanga, eaa ta tatou ka rave me inangaro te pu angaanga kia angaanga roa tatou e kare e rauka i te aere putuputu ki te au uipaanga? Penei ka akakite mai te kavamani e me uipa kapiti tetai i te akamori ia Iehova, ka anoanoia aia kia oronga i te tutaki, ka tiria ki roto i te are auri, e ka akautunga maataia. Me kore ra, penei ka inangaro tatou i te rave i tetai angaanga ke, kare kia aere ki te uipaanga. I teia au turanga, kia iki i ta tatou ka rave. (Angaanga 5:29) Inara, i te au taime ka iki tatou i te akarongo kia Iehova, te akamareka ra tatou iaia.​—Maseli 27:11.

E UIPA KAPITI UA RAI KI TOOU AU TAEAKE

16, 17. (a) Akapeea tatou te kite anga i te puapinga tikai o te au uipaanga ki te au Kerititiano o te anere mataiti mua? (e) Eaa to te Taeake ko George Gangas manako no runga i te au uipaanga Kerititiano?

¹⁶ Muri ake i te uipa kapiti anga i te Penetekote mataiti 33, kua uipa putuputu te au Kerititiano i te akamori ia Iehova. “Kua mou piri tikai atura ratou i ta te au aposetolo i apii ra, e te kapiti katoa anga atu.” (Angaanga 2:42) Kare ratou i akamutu ana i te uipa kapiti noatu e kua patoiia ratou e te kavamani o Roma, pera katoa te au arataki akonoanga ngati Iuda. Noatu kare te reira i te mea māmā ua, kua tauta ua rai ratou i te uipa kapiti.

¹⁷ I teia tuatau katoa, te āriki rekareka nei to Iehova au tavini i te au uipaanga e e reka ana ratou me tae ki reira. Ko George Gangas, e mema aia no te Pupu Akaaere tere atu i te 22 mataiti, karanga aia e: “Kiaku uaorai, ko te uipa kapiti anga ki te au taeake tetai mea meitaki rava atu o te oraanga e e akamaroiroianga maata. E reka tikai ana au kia tae vave mai ki te Are Uipaanga Patireia, e kia akaruke i te reira i muri roa mai. E rekareka ana toku ngakau me pukapuka ki te iti tangata o te Atua. Me noo au i rotopu ia ratou, mei te mea rai tei rotopu au i toku ngutuare tangata i roto i te parataito vaerua.” Akakite katoa aia: “Ko toku manako e toku inangaro pakari roa atu, koia oki kia aere ki te au uipaanga.”

18. Eaa toou manako no runga i ta tatou au uipaanga, e eaa taau ka inangaro i te rave?

¹⁸ Te manako akapera ra ainei koe no te akamori anga ia Iehova? Me koia ïa, e rave i taau ka rauka i te uipa kapiti ki toou au taeake i ko i te au uipaanga, noatu e ngata te reira. E akaari kia Iehova e te manako ra koe mei te Ariki ko Davida tei karanga e: “Kua inangaro au, e Iehova, i te vairanga o to are.”​—Salamo 26:8.