Te Aite ra Ainei Taau Tutu Aere Mei te Au?

E PUAPINGA tikai ta tatou angaanga tutu aere. Inara kare te katoa anga e mārama i teia. Noatu e ka reka te tangata i ta te Pipiria e tuatua ra, tetai taime ka manako ratou e kare e anoanoia kia apii i te Tuatua na te Atua.

Teia te akaraanga no Gavin. Te aere ra aia ki te au uipaanga i ko i te Are Uipaanga Patireia, inara kare aia e inangaro i te apii i te Pipiria. Akamārama a Gavin e meangiti ua tana i kite i te Pipiria e kare aia i inangaro i tetai kia kite i teia. Kua mataku aia penei ka patiia kia piri atu ki tetai akonoanga, e kare aia e inangaro kia akanenevaia mai. Eaa toou manako? Kua rauka ainei i te tauturu ia Gavin? E akamanako i te meitaki ka tupu me apii tetai tangata i te Pipiria? Kua akakite a Iehova ki te ngati Iseraela e: “Toku reo mei te au e topatapata ra; mei te ua tîāu ki runga i te ngangaere ra.” (Deuteronomi 31:19, 30; 32:2) Ka apii ana tatou i tetai au mea no runga i te au e ka akapeea te reira i te akaaiteia atu anga ki ta tatou angaanga tutu aere e rauka ai ia tatou i te tauturu i “te tangata katoatoa.”​—1 Timoteo 2:3, 4.

AKAPEEA TA TATOU TUTU AERE MEI TE AU RAI?

E maru te au. Ka tupu marie te au e ka maūū ki roto i te mareva, e ka taui ki te vai topatapata rikiriki. Akapeea ta Iehova tuatua “mei te au e topatapata ra”? Kua tuatua aia ki tona iti tangata na roto i te tu meitaki, te maru e te akono. Ka aru tatou iaia me akangateitei tatou i ta tetai e irinaki ra. Ka akamaroiroi tatou ia ratou kia oronga mai i to ratou manako e kia rave i ta ratou uaorai ikianga. Me akaari tatou i te reira, ka puareinga ua te tangata i te āriki i ta tatou ka tuatua, e ka meitaki ta tatou angaanga tutu aere.

E oraora te au. Ka riro ta tatou angaanga tutu aere ei akaoraora i tetai me akamanako tatou i te au mataara ke i te tauturu ia ratou kia kite i te tuatua mou. Kare te taeake ko Chris, tei oronga mua i te apii i marō ana ia Gavin kia apii i te Pipiria. Mari ra, kua tauta aia i te kimi i tetai ravenga kia reka a Gavin i te uriuri i te Pipiria. Kua akakite a Chris kia Gavin i te karere puapinga i roto i te Pipiria e na te apii anga i teia karere e tauturu iaia kia mārama meitaki atu i te au uipaanga. I reira, kua akamārama a Chris na te totou Pipiria i akapapu tikai kiaia e e mea tika te Pipiria. Tei tupu, e maata ta raua uriuri anga e akapeea te au totou te akatupuia anga. Kua riro teia au pukapuka anga ei akaoraora ia Gavin, e i muri mai kua āriki aia i te apii Pipiria.

E puapinga te au ki te oraanga. te tuatau vera e te marō i Iseraela, tetai taime kare e ua no tetai tuatau roa. Me kare te au e tuku mai i te maūū, ka marō te rau rakau e ka mate. Kua totou a Iehova e ka tupu te marō i to tatou tuatau, e ka kaki te tangata i “te akarongo ra i te tuatua na Iehova.” (Amosa 8:11) Kua taputou mai aia e ka aite te aronga akatainuia “mei te au no ko ia Iehova ra” ia ratou e tutu aere ra i te nuti meitaki o te Patireia tei turuia e te “mamoe ke atu.” (Mika 5:7; Ioane 10:16) Ta tatou karere e akakite ra no ko mai ia Iehova, ka akaora i te aronga e kaki ra i te tuatua mou. Te riro ra ainei teia karere ei mea puapinga kia tatou?

E akameitakianga te au no ko mai ia Iehova. (Deuteronomi 33:13) Ka riro ta tatou angaanga tutu aere ei akameitakianga, me kore ei apinga aroa ki te aronga e ariu maira. Kua riro te apii Pipiria ei akameitakianga kia Gavin no te mea kua tauturu iaia kia kitea te pauanga ki tana au uianga katoatoa. Kua tere aia ki mua, kua papetitoia, e te rekareka ra i teianei te tutu aere i te nuti meitaki o te Patireia e tana vaine ko Joyce.

EI MEA PUAPINGA TAAU TUTU AERE

Na te akaaiteanga i ta tatou angaanga tutu aere ki te au, ka tauturu ia tatou kia mārama e puapinga ta tatou tauta anga i roto i te angaanga tutu aere. Mei teaa te tu? E meangiti ua ta te topatapata vai tataki tai ka akatupu, inara me e mirioni ua atu topatapata anga o te au, ka maūū te one. Pera katoa ka akara anga meangiti ua me akara tataki taiia ta tatou angaanga tutu aere. Inara me kapitiia te au tauta anga a te mirioni ua atu tavini o Iehova e tutu aere ra, ka riro ei kite no “te pa enua ravarai.” (Mataio 24:14) Ka riro ainei ta tatou angaanga tutu aere ei akameitakianga na Iehova ki tetai ke? E tikai, ka riro ta tatou karere mei te au rai, e maru, e oraora e e puapinga no te oraanga!