E tu Mei to te Atua Rai E Puapinga Maata Atu i te Taimana

Kua kitea e Haykanush, e papuritia kare i papetitoia i Armenia, tetai passport i te pae i tona kainga. I roto i te passport e au kati debit tetai e te moni maata. Kua akakite aia ki tana tane, e papuritia rai aia kare i papetitoia, i tana i kite mai.

E au manamanata to raua no te moni e te kaiou. Inara kua manako raua i te apai i te moni ki te ngai nooanga no reira mai te passport. Kua umere tikai te ngutuare tangata e te tangata nana te apinga i ngaro. Kua akamārama a Haykanush e tana tane e e nga tangata raua tei akakite i te tika no te mea te apii ra raua i te Pipiria. E oti, kua taangaanga raua i te tuatau kia tuatua no runga i te Au Kite o Iehova e kua oronga i te au puka ki te ngutuare tangata.

Kua inangaro te ngutuare tangata i te oronga i te moni tutaki kia Haykanush, inara kare aia i āriki ana i te reira. I tera mai rā, kua atoro te vaine ia Haykanush e tana tane i te kainga, ma te akameitaki tikai ia Haykanush e kia āriki aia i tetai tapea taimana.

Mei te reira ngutuare tangata rai, e maata te tangata ka poitirere i te tu tika o Haykanush e tana tane. Inara ka poitirere ainei a Iehova? Eaa tona manako no runga i to raua tu tika? Kua paunaia ainei te taime no to raua tu tika?

E PUAPINGA MAATA ATU TE AU TU I TE AU APINGA UA NEI

Kare te pauanga ki taua au uianga ra i te mea ngata. Eaa ra? No te mea kua kite te au tavini o te Atua na te aru anga i te au tu o Iehova, e puapinga maata atu ïa kiaia i te au taimana, te auro, e tetai apinga ua nei. Ae, e tuke ta Iehova akaraanga ei mea puapinga ki ta te maata anga o te tangata i manako. (Isaia 55:8, 9) E te manako ra tona au tavini e e puapinga maata tikai ta ratou tautaanga i te aru i te au tu o Iehova.

Te kite nei tatou i teia mei ta te Pipiria e karanga ra no runga i te kite e te pakari. Karanga a Maseli 3:13-15: “E ao to te tangata i kitea iaia te pakari, e te tangata i rauka iaia te kite ra: Ko te apinga oki i oko naʼi aia ra, e meitaki maata ïa i to te ario; e kia maata oki aia ra, e meitaki maata ïa i to te auro meitaki ra. E meitaki maata tona i to te poe: e te au mea katoa i inangaroia e koe ra, kare rava ïa e aite kiaia.” Taka meitaki ua, te riro ra teia au tu ei mea puapinga maata atu kia Iehova i tetai ua atu apinga akamanea.

Akapeea ra te akakiteanga i te tika?

E tu tika to Iehova uaorai. “Ta te kore e tika kia pikikaa.” (Tito 1:2) Kua akauru aia ia Paulo kia tata ki te au Kerititiano Epera i te anere mataiti mua: “E pure ia matou: kia kite tikai oki matou e, te tika nei to matou akava-ngakau i te akakoro anga e, ei akono meitaki ta matou i te au mea katoa nei.”​—Ebera 13:18.

Kua akanoo a Iesu Mesia i te akaraanga tu tika. Ei akaraanga, te tuatua anga te Taunga Maata ko Kaiapha e, “Te akataputouia nei koe e au i te Atua ora ra e, e akakite mai koe kia matou nei, ko koe aina te Mesia, te Tamaiti a te Atua?” Kua akakite a Iesu i te tika e koia rai te Mesia. Kua akakite aia i te tika noatu e kua kite aia e ka akaapa te Sunederi iaia ei tangata pikikaa e ka tamate iaia.​—Mataio 26:63-67.

Akapeea tatou? I tetai turanga penei ka puapingaia tatou me kare tatou e akakite i te tika me kore ka tauiui i te au tika, no reira ka rave ainei rai tatou i te tika?

TE AKAAOANGA KIA AKAKITE I TE TIKA

E mea ngata kia akakite i te tika i teia au rā openga nei e manganui “ei akaperepere ia ratou uaorai, ei noinoi.” (2 Timoteo 3:2) Me tupu tetai manamanata mei te moni me kore e ngata kia kitea te ngai angaanga, ka keia te maata anga, ka pikikaa e ka rave i te au mea tau kore. E tupu maata ana teia no reira e manganui te manako ra, te ravenga ua rai e puapinga ai ratou koia oki kia pikikaa. Pera katoa kua rave tetai au Kerititiano i te ikianga tarevake te “morimori apinga” e kua ngere ratou i te ingoa meitaki i roto i te putuputuanga.​—1 Timoteo 3:8; Tito 1:7.

Inara te aru ra te maata anga o te au Kerititiano ia Iesu. Te kite ra ratou e e puapinga maata atu te au tu mei to te Atua rai i tetai ua atu apinganui me kore puapinga. Ko te tumu te reira kare te au Kerititiano mapu e pikikaa i ta ratou tarere i te apii. (Maseli 20:23) Te maata anga o te taime kare te tu tika e tutakiia ana, mei tei tupu kia Haykanush. Noatu rai, te manako ra te Atua i te tu tika ei mea tau, e ka rauka ia tatou te akava ngakau meitaki, e mea puapinga maata atu.

Te akaari maira to Gagik akaraanga i te reira. Karanga aia e: “I mua ake ka riro mai ei au ei Kerititiano, te angaanga ra au na tetai kamupani maata e kare te pu e tutaki ana i tana tero na te tuku anga i tetai tuanga meangiti ua o te moni tei rauka i te kamupani. Ei manitia akatere, kua anoanoia au kia ‘akatika’ ki te tangata koi tero na te tutaki anga iaia kia akangaropoina i te angaanga pikikaa a te kamupani. Tei tupu, kua rongoia au ei tangata pikikaa. Inara i toku apiianga i te tuatua mou, kua patoi au i te rave i te reira, noatu e e āka moni taku e koi ana. I muri mai, kua rave au i taku uaorai pitiniti. Mei te reira rā e nei, ka retita ua rai au i taku kamupani e ka tutaki i taku au tero katoatoa.”​—2 Korinetia 8:21.

Karanga a Gagik e: “Kua āpa taku moni, no reira e ngata i te akono i toku ngutuare tangata. Inara e mataora atu au i teianei. E akava ngakau meitaki toku i mua ia Iehova. E akaraanga meitaki toku i mua i taku nga tamaroa, e kua orongaia mai tetai tuanga angaanga naku i roto i te putuputuanga. I roto i te aronga angaanga tero e te pitiniti, e ingoa meitaki toku i teianei ei tangata akakite i te tika.”

KA TAUTURU A IEHOVA IA TATOU

E inangaro ana a Iehova i te aronga e akapaapaa ra iaia na te aru anga i tona au tu manea, kapiti mai te tu tika. (Tito 2:10) Me rave tatou i teia, ka taputou aia i te tauturu ia tatou. Kua akauru aia i te Ariki ko Davida kia tuatua e: “I vai ou ana au, e teianei kua ruaine; kare ra au i kite i te tangata tuatua-tika i te akaruke angaia, e tona uanga i te pati aere anga i te kai.”​—Salamo 37:25.

Te riro ra to Ruta akaraanga tiratiratu ei akapapu i te reira. Kua noo aia ma te akono meitaki i tona metua ongai ko Naomi, kare i akaruke iaia no tei ruaine. Kua neke a Ruta ki Iseraela, te ngai ka rauka iaia i te akamori i te Atua mou. (Ruta 1:16, 17) E tu tika tona ma te angaanga pakari i te koi i te kai tei toe mai, te aru anga i te akanooanga a te Ture no te putaua. E aiteite katoa kia Davida, kare rava a Iehova i akaruke ana ia Ruta raua ko Naomi. (Ruta 2:2-18) E maata katoa atu tana i rave i te oronga ua i te au mea pae kopapa kia Ruta. Kua iki aia iaia ei tuanga no te uanga o te Ariki ko Davida e te Mesia tei taputouia!—Ruta 4:13-17; Mataio 1:5, 16

Penei e ngata tikai no te au tavini o Iehova kia angaanga moni ei turu ia ratou i te pae kopapa. Inara kare ratou e tauta kia kitea tetai ravenga māmā ua kia pikikaa, mari ra ka angaanga pakari ratou ma te aruaru. Na te raveanga i teia, te akaari ra ratou e e puapinga maata atu to te Atua au tu manea, kapiti mai te tu tika, i tetai ua atu apinga ua nei.​—Maseli 12:24; Ephesia 4:28.

Mei ia Ruta rai, kua tuku te au Kerititiano i teianei ao i to ratou akarongo ki roto i te mana tauturu o Iehova. Te irinaki pu tikai ra ratou i Tei taputouia mai: “Kare rava au e akaruke atu ia koe, kare oki au e taka ke ia koe, kare, kare rava atu.” (Ebera 13:5) Kua akaari putuputu a Iehova e ka rauka iaia i te tauturu i te aronga tu tika i te au taime ravarai. Kua akono ua rai aia i tana taputou kia oronga i te au apinga pae kopapa ki tona au tavini.​—Mataio 6:33.

Ae, ka riro te au taimana e te au apinga ua nei ei mea puapinga ki te tangata. Inara te papu ra ia tatou e te riro ra to tatou tu tika e tetai atu au tu meitaki ei mea puapinga ki to tatou Metua i te rangi, e mea maata atu i tetai ua atu poe akaperepereia!