Kia Autu te Oraanga Akaipoipo Kerititiano

1. Noatu e ka mataora te oraanga akaipoipo i te akamataanga, eaa ta te aronga akaipoipo ka tapapa atu? (Akara i te tutu mua.)

ME KITE te tane akaipoipo i tana vaine purotu no te taime mua i to raua rā akaipoipo, e ākā rekareka tikai to raua. I to raua aere kapiti anga, kua tupu maata to raua inangaro i tetai e tetai e kua inangaro i te akaipoipo e kua papau raua kia vai tiratiratu. I muri ake i to raua akaipoipoanga, kia akamata to raua oraanga akaipoipo, ka anoanoia raua kia rave i te au taui anga kia vai taokotai. Ko Iehova Tei anga i te oraanga akaipoipo, te inangaro ra aia i te au tokorua kia mataora te oraanga akaipoipo e kia autu, no reira kua oronga aia i te akoanga pakari i roto i tana Tuatua, te Pipiria. (Maseli 18:22) Noatu ra, te akakite maira te Pipiria kia tatou e ka tupu te manamanata “e pekapeka ra to te reira i te kopapa nei” no te aronga apa ua tei akaipoipo. (1 Korinetia 7:28) Akapeea te au tokorua me akaiti i te au manamanata? E akapeea te au Kerititiano te akariro anga i te oraanga akaipoipo kia autu?

2. Eaa te au tu aroa te anoanoia ra i roto i te oraanga akaipoipo?

² Te apii maira te Pipiria e tu puapinga maata te aroa. Inara te vaira te au tu aroa te anoanoia ra te au tokorua kia akaari i roto i te oraanga akaipoipo. Ei akaraanga, ka anoanoia raua kia akaari i te tu ngakau maru e te inangaro i tetai e tetai. Me e tamariki ta raua, ka riro te aroa ei mea puapinga atu i rotopu i te ngutuare tangata. Inara ko te aroa tei akatumuia ki runga i te kaveinga tei akariro i te oraanga akaipoipo kia autu tikai. Kua akataka te apotetoro ko Paulo i teia tu aroa i te na ko anga e: “E aroa ra te tangata katoa i tana uaorai vaine mei te aroa iaia uaorai; e te vaine oki e kauraro aia i tana tane.”​—Ephesia 5:33.

AKARA ANGA I TE AU APAINGA A TE AU TOKORUA AKAIPOIPO

3. Mei teaa rai te ketaketa o te aroa i roto i te oraanga akaipoipo?

³ Kua tata a Paulo: “E te au tane ra, e aroa atu kotou i ta kotou au vaine, mei te Mesia katoa i aroa i te ekalesia, e kua oronga iaia uaorai ei oko.” (Ephesia 5:25) I teia tuatau ka aru te au Kerititiano i te akaraanga o Iesu na te aroa anga i tetai e tetai mei ta Iesu aroa anga i tana au pipi. (E tatau ia Ioane 13:34, 35; 15:12, 13) Ka tau tetai nga tokorua Kerititiano kia inangaro tikai i tetai e tetai e kia puareinga ua i te mate no tetai e tetai. Inara me tupu te au manamanata kino i roto i te oraanga akaipoipo, penei ka manako tetai pae e kare to ratou aroa e matutu ana. Eaa te ka tauturu ia ratou? Te aroa tei akatumuia ki runga i te au kaveinga tei “tapoki i te au mea katoa, e akarongo i te au mea katoa, e manakonako i te au mea katoa, e akakoromaki i te au mea katoa.” “Kare ua te aroa e kore.” (1 Korinetia 13:7, 8) Ka anoanoia tetai nga tokorua kia akamaara i ta raua i tia. Kua papau raua i te inangaro i tetai e tetai e kia vai tiratiratu. Na te akamaaraanga i teia e akakeu i te au tokorua Kerititiano kia kimi i to Iehova tauturu e kia angaanga kapiti ei akatikatika i te au manamanata.

4, 5. (a) Eaa te apainga a te tane ei upoko no te ngutuare? (e) Eaa to te vaine manako no te taoonga upoko o te tane? (ng) Eaa te au tauianga ta tetai nga tokorua akaipoipo i rave?

⁴ Kua akataka a Paulo i te au apainga o te nga tokorua akaipoipo i te na ko anga e: “E te au vaine noo tane ra, e kauraro kotou ki ta kotou uaorai au tane, mei ta kotou e kauraro i te Atu ra. Ko te tane oki te upoko o te vaine, mei te Mesia katoa ra te upoko ïa i te ekalesia.” (Ephesia 5:22, 23) Kare te aiteanga e e meitaki atu te tane i tana vaine. Kua tuatua a Iehova no runga i te tuanga puapinga o te vaine i te na ko anga e: “Kare ïa e meitaki kia noo ua te tangata koia anake ra; e anga au i tetai tauturu tau nona ra.” (Genese 2:18) Ka tauturu tetai vaine i tana tane kia riro ei upoko meitaki no te ngutuare. E ka anoanoia te tane kia aru i te akaraanga aroa o Iesu, te “upoko ïa i te ekalesia.” Me akapera te tane, ka vai tinamou tana vaine e ka māmā ake nona i te akangateitei e te turuturu iaia.

⁵ Karanga a Cathy, tei akaipoipo ia Fred e: “Ei tuaine takaua, naku rai e akono ana iaku. Kua riro te oraanga akaipoipo ei taui anga maata kiaku no te mea kua apii au kia irinaki ki runga i taku tane. Kare i te mea māmā ua, inara kua piri vaitata tikai maua ei nga tokorua na te aru anga i to Iehova aerenga.”^[1] (Akara i te manako poto.) Karanga a Fred: “Kare i te mea māmā noku i te rave i te au ikianga. I roto i te oraanga akaipoipo, e ngata atu i te akamanako e rua nga tangata. Inara na te kimianga i ta Iehova arataki anga na roto i te pure e te akarongo tikai ki te au manako o taku vaine, kua māmā mai te reira. Te angaanga taokotai tikai nei maua!”

6. Akapeea te aroa me riro ei “tatua apa kore” me tupu te manamanata i roto i te oraanga akaipoipo?

⁶ Ka matutu te oraanga akaipoipo o tetai nga tokorua tei “tauturu atu tetai ki tetai, e akakore tetai i ta tetai ara.” No te mea e nga tangata apa ua raua, ka rave raua i te tarevake. Me tupu te reira, kia apii raua mei to raua tarevake, kia akakore i ta tetai ara, e kia akaari i te aroa tei akatumuia ki runga i te au kaveinga Pipiria. Ko teia aroa “ko taua tatua apa kore ua ra ïa.” (Kolosa 3:13, 14) Ka akaari te au tokorua akaipoipo i teia aroa na te akakoromakianga e te takinga meitaki e kia kore “e manako kino ia etai ke.” (1 Korinetia 13:4, 5) Me tupu te tauetono, ka tauta te nga tokorua i te akatikatika viviki i te reira, i mua ake ka opu ei te rā. (Ephesia 4:26, 27) Ma te tu akaaka e te ngakau toa kia karanga e: “Te tataraapa nei au no tei tamamae au ia koe,” ka tauturu teia i te akatikatika i te manamanata e te akapiri vaitata atu i te au tokorua akaipoipo ki tetai e tetai.

KA ANOANOIA TE TU MARU

7, 8. (a) Eaa te akoanga ta te Pipiria e oronga maira no te pirianga ainga i roto i te oraanga akaipoipo? (e) No teaa ra te tokorua akaipoipo ka akaari ei i te tu maru?

⁷ Te oronga maira te Pipiria i te akoanga meitaki te ka tauturu i tetai nga tokorua kia rauka te manako tau no te ainga i roto i te oraanga akaipoipo. (E tatau ia 1 Korinetia 7:3-5.) E mea puapinga tikai kia akamanako tetai tane e te vaine i to raua au manako ngakau e te au anoano. Me kare te tane e akono maru i tana vaine, penei ka ngata iaia i te rekareka i te pirianga ainga. Ka tau te au tane kia akono i ta ratou au vaine “ma te kite.” (1 Petero 3:7) Auraka rava te pirianga ainga e maroia e te akaueia mari ra kia tupu natura ua te reira. E mea putuputu no te tane kia ariu viviki atu ki te vaine. Inara kia tau te tuatau no te tane e te vaine.

⁸ Kare te Pipiria i oronga mai i te au ture tikai no te akaarianga i te akainangaro i rotopu i te tane e te vaine. Inara te taiku ra te reira i te au tu akainangaro. (E Peʼe na Solomona 1:2; 2:6) Ka tau te tokorua Kerititiano tei akaipoipo kia akono maru i tetai e tetai.

9. No teaa ra te akainangaro i tetai ua atu kare i te tokorua no taua ei mea āriki koreia?

⁹ Me ketaketa to tatou inangaro no te Atua e te tangata tupu, kare tatou e akatika i tetai ua atu tangata me kore apinga kia takino i to tatou oraanga akaipoipo. Kua akaparuparu e kua takinokino tetai pae i to ratou akaipoipo na te akara putuputu anga i te au tutu ainga viivii. Ka anoanoia tatou kia patoi i tetai ua atu timataanga kia akara i te tutu ainga viivii e tetai ua atu akakoroanga no te ainga tau kore. Ka anoanoia tatou kia kopae i tetai ua atu angaanga te ka riro mei te mea e te akameamea ra tatou i tetai kare i te tokorua akaipoipo no te mea kare teia i te mea aroa. Kia akamaara tatou e kua kite te Atua i to tatou au manako pouroa e ta tatou e rave ra. Ka tauturu teia ia tatou kia akaketaketa i to tatou inangaro i te akamareka iaia e kia vai tiratiratu ki to tatou tokorua.​—E tatau ia Mataio 5:27, 28; Ebera 4:13.

ME TUPU TE MANAMANATA I ROTO I TE ORAANGA AKAIPOIPO

10, 11 (a) Eaa te maata o te tatara? (e) Eaa ta te Pipiria e akakite maira no te akatakake? (ng) Eaa te ka tauturu i tetai tokorua akaipoipo kia kore e akatakake viviki?

¹⁰ Me kare e akatikatikaia te au manamanata kino, penei ka iki tetai au tokorua i te akatakake me kore te tatara. I tetai au enua, tere atu i te āpā o te au tokorua tei tatara. E tika, kare teia i te mea matauia i roto i te putuputuanga Kerititiano. Inara, te maata ua atura te au tokorua Kerititiano e au manamanata kino to ratou i roto i te oraanga akaipoipo.

¹¹ Te oronga maira te Pipiria i teia au ikuikuanga: “Eiaa te vaine e akataka ke i tana tane. (Kia akataka ke ra aia, e noo ua aia auraka e akaipoipo, e kia akaongiia aia e tana tane:) e eiaa te tane e tuku ke atu i tana vaine.” (1 Korinetia 7:10, 11) Penei ka manako tetai au tokorua e e kino tikai to raua manamanata e ka anoanoia kia akatakake. Inara, kua akaari a Iesu i te kino o te akatakake i tana akakite akaou anga i ta te Atua i tuatua mua no te oraanga akaipoipo e oti kua akakite aia e: “E ta te Atua i topiri ra, auraka te tangata e akataka ke atu.” (Mataio 19:3-6; Genese 2:24) No reira ka inangaro a Iehova i te au tane e te au vaine kia noo kapiti ua. (1 Korinetia 7:39) Kia akamaara tatou pouroa e e apainga ta tatou i mua ia Iehova no ta tatou e rave ra. Ka tauturu teia ia tatou kia akatikatika viviki i te au manamanata i mua ake ka riro mai ei mea kino.

12. Eaa te ka taki atu i tetai tokorua akaipoipo kia akamanako i te akatakake?

¹² No teaa ra tetai au tokorua i āro atu ei i te au manamanata kino? No tetai pae, kare to ratou oraanga akaipoipo i ta ratou i manakonako atu e kua taitaia ma te riri. Te maataanga i te taime, ka tupu te manamanata no te mea e tuke te utuutuanga e te manako ngakau o tetai pae. Ka riro katoa te akono i te metua ongai, te au tauetono no te moni e te utuutu i te tamariki ei akatupu i te au manamanata. Inara, e mea meitaki i te kite e kua rauka i te maata anga o te au tokorua Kerititiano i te akatikatika i to ratou manamanata no te mea kua tuku ratou i te Atua ei arataki ia ratou.

13. Eaa te au tumu anga tau no te akatakake?

¹³ Penei te vaira te tumu anga tau no tetai nga tokorua kia akatakake. Kua iki tetai i te rave i te reira no te mea kua tupu tetai turanga kino takiri, e kare e oronga tauturu i te pae moni e te vai atura, te takinga kino te ka riro ei tumatetenga ki te tokorua, e me takino takiriia te tikaanga o tetai kia akamori ia Iehova. Me tupu te au manamanata kino, kia pati tauturu te au tokorua akaipoipo ki te aronga pakari. E kite karape to ratou e ka tauturu i te nga tokorua kia taangaanga i te ako a te Atua i roto i to raua oraanga. E me pati te au tokorua akaipoipo kia Iehova no tona vaerua tapu, ka tauturu te reira ia ratou kia akono i te au kaveinga Pipiria e kia akaari i te au tu Kerititiano. (Galatia 5:22, 23)^[2]​—Akara i te manako poto.

14. Eaa ta te Pipiria e akakite ra ki te au Kerititiano tei akaipoipo i te tokorua kare e akamori ana ia Iehova?

¹⁴ Te akaari maira te Pipiria e e tumuanga meitaki to te au tokorua kia noo kapiti ua noatu kare tetai tokorua e akamori ana ia Iehova. (E tatau ia 1 Korinetia 7:12-14.) Kua ‘akatapuia’ te tokorua kare i roto i te akarongo no te mea kua akaipoipo i tetai tavini o te Atua. E “tapu” ta raua tamariki e tei raro ake i te paruruanga a te Atua. Kua akamaroiroi a Paulo i te au tokorua Kerititiano: “Eaa oki koe e kite ei, e maine e, kare taau tane e ora ia koe? e eaa oki koe e kite ei, e tama e, kare taau vaine e ora ia koe?” (1 Korinetia 7:16) E maata te au akaraanga meitaki o te au tane e te au vaine Kerititiano tei tauturu i to ratou tokorua kia riro mai ei tavini no Iehova.

15, 16 (a) Eaa te akoanga ta te Pipiria e oronga ra ki te au vaine Kerititiano kare ta ratou tane i te tavini no te Atua? (e) Eaa te turanga o tetai Kerititiano “kia aere ke ra tei kore i akarongo”?

¹⁵ Te ako maira te apotetoro ko Petero i te au vaine Kerititiano kia kauraro i ta ratou tane, “kare tetai pae e akarongo i te tuatua ra, kia rauka mai ratou i te akono meitaki o ta ratou au vaine, auraka atu rai te tuatua; I te akara anga mai ratou i to kotou aerenga viivii kore i kapiti katoaia i te mataku.” Kare te vaine e tuatua no runga i tana irinakianga i te au atianga ravarai, mari ra ka tauturu aia i tana tane kia āriki i te tuatua mou na te akaarianga i “te ngakau maru e te muteki ua, ko te mea apinga maata ïa ki mua i te aroaro o te Atua.”​—1 Petero 3:1-4.

¹⁶ Akapeea ra me iki te tokorua kare i roto i te tuatua mou i te akatakake? Karanga te Pipiria: “Kia aere ke ra tei kore i akarongo ra, aere ua atu ïa: kare te taeake e te tuaine e ii i te reira. Kua akonoia ra tatou e te Atua, ei au ta tatou.” (1 Korinetia 7:15) Noatu e ka tupu te au na te akatakake kia tau ki te Pipiria, kare te tokorua Kerititiano e akatikaia kia akaipoipo akaou. Inara kare aia e anoanoia kia marō i tona tokorua kia noo mai. Aere ua rai, penei ka iki te tokorua kare i roto i te tuatua mou i te oki mai, te inangaro i te akatupu akaou i te oraanga akaipoipo. Penei i te tuatau ki mua ka riro mai te tokorua kare i roto i te tuatua mou ei tavini no Iehova.

EAA TO TATOU AKAKOROANGA MUA I ROTO I TE AKAIPOIPO?

17. Eaa te akakoroanga mua o te au tokorua Kerititiano akaipoipo?

¹⁷ No te mea te noo nei tatou “i taua tuatau openga ra,” ka kite tatou “ka tupu te kino maata.” (2 Timoteo 3:1-5) Ko te tumu teia ka anoano tatou i te paruruanga mei te pirianga matutu kia Iehova. “Te poto nei te tuatau,” i tata ei a Paulo. “E tau i te aronga e vaine ta ratou ra, kia riro mei te mea e kare; . . . E te aronga i rave i to teianei ao ra, mei te mea e kare i rave.” (1 Korinetia 7:29-31) Kare te aiteanga i ta Paulo i tuatua e ka kopae te au tokorua akaipoipo i to ratou tokorua. Mari ra no te mea te noo nei tatou i te au rā openga, ka anoanoia tatou kia akariro i ta tatou akamorianga ia Iehova ei akakoroanga mua.​—Mataio 6:33.

18. No teaa ra i rauka ai i te au Kerititiano te oraanga akaipoipo mataora e te autu?

¹⁸ I teia tuatau ngata tikai, e maata te au akaipoipo ta tatou e kite nei e kino ra. Ka rauka ainei tetai oraanga akaipoipo mataora e te autu? Ae, me noo vaitata tatou kia Iehova e tona iti tangata, me taangaanga i te au kaveinga Pipiria, e me āriki i te aratakianga a te vaerua tapu o Iehova. Me akapera tatou, ka akangateitei tatou i “ta te Atua i topiri ra.”​—Mareko 10:9.