Te Kite ra Ainei Koe te Anoano Kia Tereni i Tetai Ke?

1, 2. No teaa ra tatou ka tereni ei i tetai ke kia rave i te au angaanga i te tavini i te Atua?

KUA angaanga pakari tikai a Iesu i te tutu aere i te Patireia. Kua akapou katoa aia i te taime i te tereni i tana au pipi. Kua akaari aia peea ratou me apii e te akono i te iti tangata o te Atua. Kua apii te au pipi kia riro mai ei au tiaki ei akono i te mamoe. (Mataio 10:5-7) Ko Philipa tetai tei angaanga pakari i te tutu aere, inara kua tereni katoa aia i tana tamariki tamaine kia rave i teia angaanga. (Angaanga 21:8, 9) I teia tuatau ka anoanoia tatou kia tereni i tetai ke. No teaa ra?

² I roto i te au putuputuanga takapini i teianei ao, e maata te aronga ou kare i papetitoia ake. Ka anoanoia kia tereni i teia aronga ou. Kia tauturu ia ratou kia mārama i te tumu i puapinga ai no ratou kia tatau e te apii i te Pipiria. Ka anoano katoaia kia tereni ia ratou kia tutu aere e te apii i te nuti meitaki. Ka anoanoia te au taeake tei papetitoia akenei kia tereniia, kia riro mai ratou ei au tavini tauturu e ei aronga pakari. Ka rauka i te katoatoa i roto i te putuputuanga i te tauturu i te aronga ou.​—Maseli 4:2.

APII I TE ARONGA OU AKAPEEA TE APII I TE PIPIRIA

3, 4. (a) Akapeea a Paulo te kapiti anga i te apii Tuatua Tapu ki te angaanga tutu aere? (e) I mua ake ka akamaroiroi ei i te aronga apii kia apii i te Pipiria, eaa ta tatou ka rave?

³ Ka anoanoia te au tavini tataki tai o Iehova kia tatau e te apii i te Pipiria kia kite i to te Atua anoano. Kua akamārama a Paulo i teia ki tona au taeake e te au tuaine i Kolosa i te na ko anga e: “I kore katoaʼi matou i tivata i te pure ia kotou, mei te rā mairai i kite ei matou, e te pati akatenga anga atu kia akakiia mai kotou i te kite i tona anoano.” No teaa ra i puapinga ai no ratou kia tatau e te apii i te au Tuatua Tapu? No te mea ka oronga teia i te pakari e ka tauturu ia ratou “kia tau to [ratou] aerenga i te Atu i te au mea katoa e mareka mai ei ra.” E ka tauturu katoa ia ratou kia rave i “te au angaanga meitaki” ta Iehova i inangaro ia ratou kia rave, koia te tutu aere i te nuti meitaki. (Kolosa 1:9, 10) No reira me te apii nei tatou i tetai tangata, ka anoanoia kia tauturu iaia kia mārama e me tatau e te apii i te Pipiria ka tauturu iaia kia tavini ia Iehova.

⁴ Kare e rauka ia tatou i te tauturu i te aronga apii Pipiria kia mārama i te puapinga o te apii i te Pipiria me kare tatou e rave i te reira. Te tika, me tatau putuputu tatou i te Pipiria e te akamanako oonu i te reira, ka tauturu teia i to tatou oraanga e te angaanga tutu aere. Ei akaraanga, me ui mai tetai tangata i te uianga ngata i roto i te angaanga tutu aere, ka rauka ia tatou i te pau mei roto i te Pipiria. Me tatau tatou akapeea a Iesu, Paulo e tetai ke, tei kore i tuku i te au i roto i ta ratou angaanga tutu aere, ka akamaroiroiia tatou kia tutu ua atu rai noatu e ngata te reira. Me akakite tatou i ta tatou i mou mai mei te apii e akapeea te reira te tauturu anga ia tatou, penei ka akamaroiroi ia ratou kia apii oonu atu i te Pipiria kia puapinga.

5. Oronga mai i te au manako akapeea me tauturu i te aronga ou kia apii putuputu i te Pipiria.

⁵ Penei ka ui koe, ‘Akapeea au me tereni i taku tangata apii kia apii putuputu i te Pipiria?’ Penei ka akaari koe kiaia akapeea me akapapa i te puka ta korua e apii kapiti ra. Penei ka akakite koe kiaia kia tatau i te au akakiteanga i roto i te apenetiki o te puka Eaa Tikai ta te Pipiria e Apii Maira? e kia tatau i te au irava tei taikuia. Aru mai, penei ka akaari koe akapeea aia me akapapa no te au uipaanga e kia paupau aia. E akamaroiroi iaia kia tatau i te au itiu ravarai o Te Punanga Tiaki e te Awake! E akaari akapeea aia me kimi i te pauanga ki te au uianga Pipiria, na te taangaanga anga i te Watchtower Library me kore te Watchtower ONLINE LIBRARY. Me tamata aia i teia au ravenga ke ke no te apii, e mea papu ka rekareka aia i te reira e ka inangaro i te kite maata atu.

6. (a) Akapeea koe me tauturu i taau aronga apii kia akatupu i te inangaro no te Pipiria i roto i tona ngakau? (e) Eaa ta tetai tangata apii Pipiria ka rave me akatupu aia i te inangaro ngakau tae no te Tuatua Tapu?

⁶ Me apii tatou i tetai tangata, ka inangaro tatou iaia kia kite e e puapinga te Pipiria no te mea ka tauturu iaia kia kite meitaki atu ia Iehova. Auraka e mārō iaia kia apii, mari ra e akaari akapeea aia e rekareka ai i te apii. Ko te maata atu tana ka apii i roto i te Pipiria, ko te maata atu tana ka akamanako mei te tata salamo tei imene e: “E mea meitaki ra iaku kia akavaitata atu ki te Atua: kua irinaki au i te Atu ra, ia Iehova.” (Salamo 73:28) E mea papu ka tauturu te vaerua o Iehova i tetai ua atu tei inangaro i te akavaitata atu kiaia.

APII I TE ARONGA OU KIA TUTU AERE E TE APII

7. Akapeea a Iesu te terenianga i te aronga akakitekite i te nuti meitaki? (Akara i te tutu mua.)

⁷ E maata ta tatou ka apii mai mei ta Iesu terenianga i tana au apotetoro. Kua aru ratou ia Iesu i roto i tana angaanga tutu aere, e kua akara ratou akapeea aia te apiianga i te tangata. Kua oronga katoa aia i te au ikuikuanga taka meitaki akapeea ratou me tutu aere. (Mataio, pene 10)^[1] (Akara i te manako poto.) Kare i roa ana, kua apii te au apotetoro mei ia Iesu akapeea me apii i te tuatua mou ki te tangata. (Mataio 11:1) Ka akara ana tatou e rua nga apinga ka tereni tatou i te aronga ou kia rave i roto i te angaanga tutu aere.

8, 9. (a) Akapeea a Iesu te tuatua anga ki te au tangata i roto i tana angaanga tutu aere? (e) Akapeea tatou me tauturu i te au papuritia ou kia pukapuka ki te tangata mei ta Iesu i rave?

⁸ E pukapuka ki te tangata. Kare a Iesu i tuatua ua ana ki te au urupu tangata. Maataanga o te taime kua tuatua aia ki te au tangata tataki tai, e kua pera aia ma te tu oaoa. Ei akaraanga, e pukapukaanga reka ta raua ko tetai vaine tei aere mai i te tiki vai mei te puna vai o te oire ko Sikara. (Ioane 4:5-30) Kua tuatua katoa a Iesu kia Mataio Levi, e tangata koʼi tero, e kua pati iaia kia riro mai ei pipi nana. Kua āriki a Mataio e kua pati ia Iesu e tetai ke ki tona kainga no tetai kaikai anga. I reira, kua tuatua a Iesu ki te au tangata e manganui.​—Mataio 9:9; Luka 5:27-39.

⁹ Kua tuatua katoa a Iesu kia Natanaela ma te tu oaoa, noatu e kua akakino aia i te au tangata mei Nazareta. No te tu oaoa o Iesu i te tuatua anga kiaia, kua taui to Natanaela tu no runga ia Iesu i te mea no Nazareta mai aia. E kua inangaro a Natanaela i te apii maata atu mei ia Iesu. (Ioane 1:46-51) Mei te akaraanga o Iesu ka kite tatou e me tuatua ki te tangata ma te tu oaoa e te takinga meitaki e mea papu ka akarongo mai ratou i ta tatou ka tuatua.^[2] [Akara i te manako poto.] Me apii tatou i te aronga ou kia tuatua akapera, ka rekareka maata ratou i te angaanga tutu aere.

10-12. (a) Akapeea a Iesu te apiianga i te au tangata tei inangaro i te nuti meitaki? (e) Akapeea tatou me tauturu i te au papuritia ou kia akameitaki i to ratou tu karape ei au puapii no te tuatua mou Pipiria?

¹⁰ E apii i te aronga tei inangaro i te akarongo. E maata ta Iesu angaanga. Inara te inangaro anga te tangata i te akarongo kiaia kua akapou aia i te tuatau e kua apii maata ia ratou. Ei akaraanga, i tetai rā kua akaputuputu mai te urupu tangata ki te pae taatai i te akarongo kia Iesu. No reira kua aere a Iesu raua ko Petero ki runga i te poti e kua apii mai i te tangata. I muri ake, kua inangaro katoa aia i te apii ia Petero. Kua rave aia i tetai temeio na te tuku anga mai i te putunga ika kia mou ia Petero. Karanga i reira aia kia Petero: “Mei teianei atu, e tangata taau e rauka.” I te reira taime tikai a Petero e tona au oa “e tae maira to raua puke pai ki uta, akaruke anake iora ratou” e kua aru ia Iesu.​—Luka 5:1-11.

¹¹ Kua inangaro katoa a Nikodemo i te apii maata atu mei ia Iesu. Inara i te mea e mema a Nikodemo no te Sunederi, kua mataku aia i ta tetai ke ka manako me kite ratou iaia e tuatua ra kia Iesu. No reira kua aravei aia ia Iesu i te po. Kare a Iesu i tuaru ana iaia kia aere mari ra kua akapou i te taime i te akamārama i te au tuatua mou puapinga kiaia. (Ioane 3:1, 2) Kua puareinga ua a Iesu i te akapou i tona taime te apii i te tangata i te tuatua mou e te akaketaketa i to ratou akarongo. Pera katoa, ka anoanoia tatou kia puareinga ua te aravei i te tangata i te taime meitaki no ratou, e kia akapou i te taime te tauturuanga ia ratou kia mārama i te Pipiria.

¹² Me angaanga kapiti tatou ki te aronga ou i roto i te angaanga tutu aere, ka apii tatou ia ratou kia oki akaou ki tetai ua atu tei inangaro i te pukapuka akaou kia ratou. Ka pati katoa tatou i te aronga ou kia aru mai ia tatou ki te au atoro akaou anga e te au apii Pipiria. Na teia tu, ka kite ratou akapeea me apii i tetai ke e ka kite i te meitaki ka tupu me tauturu i te aronga kia apii i te tuatua mou no Iehova. I reira, ka reka te aronga ou i te atoro akaou i te tangata e te apii i te Pipiria kia ratou. Ka apii katoa ratou kia akakoromaki e kia kore e tuku i te au, me kare e kitea akaouia te tangata i te kainga.​—Galatia 5:22; akara i te pia “Kare Aia i Tuku Ana i te Au.”

TERENI I TE ARONGA OU KIA TAVINI I TO RATOU AU TAEAKE

13, 14 (a) Eaa toou manako i te au akaraanga Pipiria o te aronga tei rave i te angaanga maata no tetai ke? (e) Eaa te au mataara tau ka tereni koe i te au papuritia ou e te aronga mapu kia akaari i te aroa no to ratou au taeake e te au tuaine?

¹³ Ka inangaro a Iehova i tona au tavini kia aroa e te tavini i tetai e tetai ei au taeake e te au tuaine. (E tatau ia Luka 22:24-27; 1 Petero 1:22.) Te akamārama maira te Pipiria kua oronga mai a Iesu i tona oraanga e te au mea ravarai, ei tauturu i tetai ke. (Mataio 20:28) Kua ki a Doreka i “te angaanga meitaki tana i rave ra, e te oronga oki i te apinga.” (Angaanga 9:36, 39) Kua “angaanga maata” a Maria no te au taeake e te au tuaine i Roma. (Roma 16:6) Akapeea tatou me tauturu i te aronga ou kia mārama e e puapinga tikai te rave i te angaanga meitaki no to ratou au taeake e te au tuaine?

¹⁴ Ka rauka i te pati i te aronga ou kia aru mai ia tatou me atoro i te aronga pakarikari e te maki. Me aravei te au metua i teia aronga, ka rauka i te apai i ta ratou tamariki me ka tau. Ka pati te aronga pakari i te au mapu me kore te aronga ou kia angaanga kapiti kia ratou me anoanoia kia oronga i te kai na te aronga pakarikari me kore te ripea i to ratou are. Me kite te au mapu e te aronga ou akapeea te au taeake e te au tuaine me akono i tetai e tetai, ka pera katoa ratou. Ei akaraanga, te tutu anga tetai o te aronga pakari i te ngai mamao, kua atoro putuputu aia i te au taeake e noo ra i reira kia kite e te peea ua ra ratou. Tetai taeake mapu tei aru putuputu iaia kua apii mei te akaraanga meitaki o teia tangata pakari kia akamanako i tana ka rave ei tauturu i te au taeake e te au tuaine.​—Roma 12:10.

15. No teaa ra i puapinga ai kia akara te aronga pakari i te turanga o te au tane i roto i te putuputuanga?

¹⁵ Kua oronga a Iehova i te apainga ki te au tane ei apii i te Tuatua a te Atua ki te putuputuanga. No reira e mea puapinga no te au taeake kia tamou i te apii meitaki me oronga i ta ratou akoanga. Me e tangata pakari koe, penei e akarongo i te ako a tetai tavini tauturu ei tauturu iaia kia mako ua atu. (Nehemia 8:8)^[3]​—Akara i te manako poto.

16, 17 (a) Eaa ta Paulo i akara i roto ia Timoteo? (e) Akapeea te aronga pakari me tereni meitaki i te au taeake kia riro mai ei au tiaki no te putuputuanga?

¹⁶ Ka anoanoia kia tereni i te au taeake kia riro mai ei aronga tiaki i roto i te putuputuanga. Kua tereni a Paulo ia Timoteo e kua akamaroiroi iaia kia tereni i tetai ke. Karanga a Paulo: “Kia maroiroi koe i te aroa ua e vai ki roto i te Mesia ra ia Iesu. E te au tuatua taau i akarongo iaku nei i te aroaro o te au kite katoa e manganui ra, ko taau ïa e tuku ki te aronga tuatua-mou, ko te tau kia apii atu ia etai ke ra.” (2 Timoteo 2:1, 2) E maata te au mea ta Timoteo i apii mei ia Paulo, e tangata pakari e e apotetoro, mei te akamako anga i tana tutu aere e te tauturu i tetai ke i roto i te putuputuanga.​—2 Timoteo 3:10-12.

¹⁷ Kua akapou maata a Paulo i tona taime kia Timoteo no te mea kua inangaro aia i te akapapu e kua tereni meitakiia a Timoteo. (Angaanga 16:1-5) Ka aru te aronga pakari i to Paulo tu na te apai anga i te au tavini tauturu tei tau no tetai atoroanga tiaki. Na teia tu, ka apii te au tavini tauturu mei te aronga pakari akapeea me apii i tetai atu, kia akakoromaki ma te aroa, e kia irinaki ki runga ia Iehova me akono i tana anana.​—1 Petero 5:2.

E MEA PUAPINGA TE TERENI

18. No teaa ra tatou ka akariro ei i te tereni i tetai ke ei mea puapinga?

¹⁸ I teia tuatau openga nei, e maata te aronga ou ka anoano kia tereniia kia karape i roto i te angaanga tutu aere. Ka anoano katoaia te au taeake kia apii i te akono i te putuputuanga. Ka inangaro a Iehova i tona au tavini pouroa kia tereni meitakiia, e kua oronga mai aia i te akameitakianga no te tauturu i te aronga ou. No reira e mea puapinga kia angaanga pakari i te tereni i tetai ke, mei ia Iesu raua ko Paulo. Ka anoanoia kia tereni maata i tetai ke no te mea e maata te angaanga tutu aere i mua ake ka tae mai ei te openga.

19. Eaa koe i papu ei e ka puapingaia taau tautaanga maroiroi i te tereni i tetai ke i roto i ta Iehova angaanga?

¹⁹ Ka anoanoia te taime e te maroiroi no te tereni i te aronga ou. Inara ka papu ia tatou e ka tauturu mai a Iehova e Iesu ia tatou kia kite meitaki i te tereni i tetai ke. Ka mataora tatou i te kite i te aronga ta tatou e tereni ra e angaanga pakari nei i roto i te putuputuanga e te angaanga tutu aere. (1 Timoteo 4:10) I taua taime rai, ka anoanoia tatou kia tauta pakari i te tere ki mua i te pae vaerua, te akamako i to tatou au tu Kerititiano, e te akavaitata atu kia Iehova.