Ka Tutaki a Iehova i te Aronga Tei Kimi Tikai Iaia

1, 2. (a) Eaa te pirianga o te aroa ki te akarongo? (e) Eaa te au uianga ka akamanako tatou?

TAPUTOU mai to tatou Metua ko Iehova i te akameitaki i tona au tavini tiratiratu. Ko teia tetai mataara ka akaari a Iehova i tona aroa no tatou, ka inangaro tatou iaia no te mea “koia ana tei anoano mai ia tatou nei.” (1 Ioane 4:19) Me tupu to tatou inangaro ia Iehova, ka ketaketa atu to tatou akarongo kiaia e ka papu roa atu tatou e ka tutaki a Iehova i te aronga tana i inangaro.​—E tatau ia Ebera 11:6.

² Ko Iehova tei tutaki mai! E tuanga maata te reira i tona tu e tana e rave ra. No reira kare to tatou akarongo i roto i te Atua i te mea mou tikai me kare tatou e irinaki papu e ka tutaki aia i te aronga tei kimi tikai iaia. No teaa ra? No te mea “ko te akarongo nei, ko te tumu tikai ïa i te au mea i tatariia nei.” (Ebera 11:1) Ko te akarongo nei, ko te irinaki papu tikai e ka akameitaki a Iehova i tona aronga tiratiratu. Inara, akapeea te manakonakoanga no te tutaki me tauturu ia tatou? Akapeea a Iehova te akameitakianga i tona au tavini i mua ana e i teianei? Ka akara ana tatou.

TAPUTOU A IEHOVA KIA AKAMEITAKI I TONA AU TAVINI

3. Eaa te taputou ta tatou ka tatau ia Malaki 3:10?

³ Kua taputou te Atua ko Iehova i te akameitaki i tona au tavini tiratiratu. Te pati nei aia ia tatou kia oronga i ta tatou i rauka kiaia ma te irinaki e ka akameitaki aia ia tatou. Karanga a Iehova: “Ei timata anga te reira iaku nei i tenana.” Karanga rai aia: “Te kore anga au i te kiriti anga i te au māramārama o te rangi ra, ka riringi atu ei i te apinga maata ua atu, kare e ngai e o ei, ei meitaki no kotou.” (Malaki 3:10) Ka akaari tatou i to tatou āriki rekareka no teia patianga me āriki i ta Iehova tuatua kia timata iaia.

4. No teaa ra tatou ka irinaki ei i ta Iesu taputou ia Mataio 6:33?

⁴ Kua taputou a Iesu ki tana au pipi me tuku i te Patireia na mua, ka turu te Atua ia ratou. (E tatau ia Mataio 6:33.) Kua rauka ia Iesu i te tuatua akapera no te mea kua kite aia e tupu ua ana rai te au taputou a te Atua. (Isaia 55:11) No reira ka papu katoa ia tatou me akaari i te akarongo pu tikai i roto ia Iehova, ka akatupu aia i tana i taputou: “Kare rava au e akaruke atu ia koe, kare oki au e taka ke ia koe, kare, kare rava atu.” (Ebera 13:5) Ka tauturu ta Iehova taputou ia tatou kia irinaki i ta Iesu tuatua ia Mataio 6:33.

5. No teaa ra ta Iesu pauanga kia Petero i akamaroiroi ei ia tatou pouroa?

⁵ Kua ui te apotetoro ko Petero kia Iesu: “Kua akaruke matou i te au mea katoa, e kua aru mai ia koe; eaa te ka rauka ia matou?” (Mataio 19:27) Kare a Iesu i akatikatika ana ia Petero no teia uianga. Mari ra, kua akakite a Iesu ki tana au pipi e ka tutakiia ratou no ta ratou au akaatinga anga. Ka tutara te au apotetoro e tetai atu aronga tiratiratu ma Iesu i te rangi i te tuatau ki mua. Inara karanga katoa a Iesu e ka rauka mai te tutaki i teianei: “E te tangata katoatoa no toku nei ingoa i akaruke ei i te are, e te au taeake, e te au tuaine, e te metua tane, e te metua vaine, e te vaine, e te tamariki, e te enua, e anere ua atu tana e ka rauka, e e rauka oki iaia te ora mutu kore.” (Mataio 19:29) Ka rauka mai te au pipi pouroa a Iesu i te metua tane, te metua vaine, te au taeake, te au tuaine, e te tamariki i roto i te putuputuanga i teia rā. E puapinga maata atu teia i tetai ua atu mea ta tatou e akaatinga nei no te Patireia o te Atua.

TUTAU NO TE ORAANGA

6. No teaa ra a Iehova i taputou ei kia tutaki i tona au tavini?

⁶ Kapiti mai i te au akameitakianga e manganui ta tatou e kite nei i teia tuatau, te tapapa atu nei tatou i te au akameitakianga maata atu i te tuatau ki mua. (1 Timoteo 4:8) Te taputou maira a Iehova i te tutaki ki tona au tavini tiratiratu, e me kite tatou i teia ka tauturu ia tatou kia akakoromaki i te tuatau ngata. Na te irinaki papu tikai e ko Iehova tei “tutaki mai i te aronga i kimi tikai iaia,” ka rauka ia tatou kia vai tiratiratu.​—Ebera 11:6.

7. Akapeea te manakonakoanga i riro ei mei te tutau rai?

⁷ I roto i tana Ako i te Maunga, karanga a Iesu: “E rekareka kotou, e kia rere ua i te rekareka; e tutaki maata oki ta kotou i te ao ra: i pera oki ratou i te takinga-kino i te aronga peroveta, ko mua ïa ia kotou.” (Mataio 5:12) Ka rauka i tetai pae o te au tavini o te Atua i te tutaki i te rangi. E tetai pae, ka rauka i te tutaki no te ora mutukore i te enua parataito. E tumu katoa te reira kia “rekareka kotou, e kia rere ua i te rekareka.” (Salamo 37:11; Luka 18:30) Inara no tatou katoatoa, ka riro te manakonakoanga ei “tutau no te [oraanga] e mea mauti kore e te mou meitaki.” (Ebera 6:17-20) Mei te tutau rai tei mou meitaki i te paī i roto i te uriia, ka riro katoa to tatou manakonakoanga ketaketa ei tauturu ia tatou kia vai ngaueue kore. Ka akamaroiroi katoa te reira ia tatou kia akakoromaki i te tuatau ngata.

8. Akapeea te manakonakoanga me akaiti i te manako apiapi?

⁸ Ka tauturu te manakonakoanga ia tatou kia akaiti i te manako apiapi. Mei te manongi rai tei akaoraora i te pakiri, ka riro te au taputou a te Atua ei akamaru mai i to tatou ngakau apiapi. E mea pumaana i te kite e ka akono mai a Iehova ia tatou me tuku i ta tatou apainga kiaia. (Salamo 55:22) Ka papu meitaki ia tatou no te Atua i “te maata ua atu tana kia rave i te au mea katoa ta tatou e pati nei.” (Ephesia 3:20) Ka tauturu a Iehova ia tatou, kare ma te maata me kore maata atu, mari ra ma “te maata ua atu”!

9. Akapeea tatou i papu ei ka rauka mai ta Iehova akameitakianga?

⁹ Kia rauka te tutaki, ka anoanoia tatou kia tuku i te akarongo mou tikai i roto ia Iehova e te aru i tana aratakianga. Akakite a Mose ki te ngati Iseraela: “E akameitaki rava oki a Iehova ia koe i runga i te enua ta to Atua ra ta Iehova e oronga noou nei ei nooanga: Kia akarongo meitaki koe i te reo to Atua ra o Iehova, e e akono koe kia rave i teia katoa nei au akauenga taku e akaue atu kia koe na i teianei rā. E akameitaki mai oki to Atua ra ko Iehova ia koe, tana oki i tuatua mai kia koe ra.” (Deuteronomi 15:4-6) Kua papu tikai ainei ia koe e ka akameitaki a Iehova ia koe me tavini tiratiratu ua atu iaia? E tumu anga meitaki toou kia irinaki papu i te reira.

KO IEHOVA TEI TUTAKI IA RATOU

10, 11 Akapeea a Iehova te tutaki anga ia Iosepha?

¹⁰ Kua tataia te Pipiria ei meitaki no tatou. Tei roto i reira te au akaraanga e manganui akapeea te Atua te tutaki anga i tona au tavini tiratiratu i mua ana. (Roma 15:4) Ko Iosepha tetai akaraanga meitaki tikai. Mea mua, kua oko tona au tuakana iaia ei tuikaa. Muri mai, kua akaapa pikikaa te vaine a tona pu iaia e kua tiria aia ki roto i te areauri i Aiphiti. Ia Iosepha i roto i te areauri, kua atea ke ainei a Iehova mei iaia? Kare rava! Karanga te Pipiria: “Te vaitata rā Iehova ia Iosepha, e kua takinga-meitaki maira iaia,” e “tei iaia oki a Iehova, e tana i rave ra, na Iehova ïa i akariro ei mea meitaki.” (Genese 39:21, 23) Noatu e tuatau ngata te reira, kua tiaki marie a Iosepha i tona Atua.

¹¹ I te au mataiti i muri mai, kua tuku a Pharao ia Iosepha ki vao i te areauri, e kua riro teia tuikaa akaaka ko te rua o te tutara ririnui roa atu i Aiphiti. (Genese 41:1, 37-43) I te anauanga te vaine a Iosepha i ta raua nga tamaroa, “tapa iorā Iosepha i to te tama mua ra ingoa ko Manase; Kua ngaropoina oki toku ra au tumatetenga katoa, e te ngutuare katoa o toku ra metua, iaku, i te Atua. E tapa iora aia i te ingoa o te toko rua ra, ko Epheraima: Kua akamaata mai oki te Atua iaku i te enua i tumatetengaʼi au nei.” (Genese 41:51, 52) Kua tutaki a Iehova i to Iosepha tu tiratiratu, e kua akaora aia i te ngati Iseraela e to Aiphiti mei te onge. Kua kite a Iosepha e na Iehova i tutaki mai e kua akameitaki mai iaia.​—Genese 45:5-9.

12. Akapeea a Iesu te vai tiratiratu anga i te au timataanga?

¹² Kua akarongo ua rai a Iesu Karaiti ki te Atua na roto i te au timataanga e manganui, e kua tutaki a Iehova iaia. Eaa tei tauturu ia Iesu kia vai tiratiratu? Te akamārama ra te Tuatua a te Atua: “Ko tei akakoromaki i te satauro, kare i akono i te akama, i te meitaki i tukuia mai ki mua i tona aroaro.” (Ebera 12:2) Kua rekareka tikai a Iesu e kua rauka iaia te akatapu i te ingoa o te Atua. E kua tutakiia a Iesu ma te mareka anga a tona Metua e te au akameitakianga umere. Te karanga ra te Pipiria “e te noo ra [aia] i teianei i te pae katau i te terono o te Atua ra.” Ka tatau katoa tatou: “I akateitei rava atu ei te Atua iaia, e kua oronga mai i te ingoa i maata ua atu i te teitei i te au ingoa ravarai nei nona.”​—Philipi 2:9.

KARE A IEHOVA E AKANGAROPOINA I TA TATOU I RAVE

13, 14 Eaa to Iehova manako i ta tatou i rave nona?

¹³ Ka papu ia tatou e te akaperepere ra a Iehova i te au mea ta tatou e rave ra kia tavini iaia. Te mārama nei aia me ekoko tatou ia tatou uaorai e ta tatou ka rauka i te rave. Te manako oonu maira aia ia tatou me apiapi i te ngai angaanga me kore i te akono i to tatou ngutuare tangata. Te mārama katoa ra aia me kare e maata ta tatou ka rauka i te rave mei mua ana i roto i tana angaanga, no te mea kua maki me kore kua taitaia tatou i teianei. Kia papu tikai ia tatou e te akaperepere ra a Iehova i to tatou tu akarongo mou noatu te au manamanata.​—E tatau ia Ebera 6:10, 11

¹⁴ Akamaara katoa e ko Iehova “tei akarongo i te pure.” Ka papu ia tatou me pure kiaia, te akarongo maira aia kia tatou. (Salamo 65:2) Koia “te tumu o te aroa, e ko te Atua nona anake te pumaana” i oronga mai i te au mea ravarai ta tatou ka anoano e rauka ai i te noo vaitata kiaia. I tetai taime, penei ka taangaanga aia i te au taeake e te au tuaine kia rave i te reira. (2 Korinetia 1:3) Ka mareka a Iehova ia tatou me akaari i te tangi aroa no tetai ke. “Ko tei aroa i te ao ra, kua oronga aia i te apinga na Iehova; e nana rai e tutaki mai iaia i taua mea ra.” (Maseli 19:17; Mataio 6:3, 4) No reira me oronga ua tatou i te tauturu ki te au taeake, kia Iehova ka riro te meitaki ta tatou i rave ei kaiou nana. E te taputou nei aia e nana e tutaki i te reira.

TE TUTAKI I TEIANEI E TUATAU UA ATU

15. Eaa te tutaki taau e tapapa ra? (Akara i te tutu mua.)

¹⁵ E manakonakoanga to te au Kerititiano akatainuia kia rauka “te korona o te tuatua-tika,” e tutaki no ko mai ia Iesu. (2 Timoteo 4:7, 8) Inara, kare e iti ake toou puapinga ki te Atua me e manakonakoanga ke toou. E mirioni ua atu ta Iesu “mamoe ke” e aruaru ra i te tutaki o te oraanga mutukore a te tuatau ki mua i runga i te enua parataito. “Ka rekareka ratou i te maata o te au.”​—Ioane 10:16; Salamo 37:11.

16. Eaa te akapumaana ta tatou ka kite mai mei ia 1 Ioane 3:19, 20?

¹⁶ Tetai taime penei ka manako tatou e kare e maata ana ta tatou e rave nei i roto i te angaanga a Iehova, me kore penei te ekoko ra me te mareka maira a Iehova i ta tatou e rave ra. Penei ka manako katoa tatou e kare tatou e tau kia rauka mai tetai ua atu tutaki. Inara auraka e akangaropoina e “e maata te Atua i to tatou ngakau, e kua kite aia i te au mea katoa nei.” (E tatau ia 1 Ioane 3:19, 20) Me tavini tatou ia Iehova no te akarongo e te aroa iaia, ka papu ia tatou e ka tutaki mai aia ia tatou, noatu e i te akaraanga e iti ua te puapinga ta tatou e rave ra.​—Mareko 12:41-44.

17. Eaa te au tutaki te mataora nei tatou i teianei?

¹⁷ Noatu teia au rā openga i roto i to Satani akatereanga, te akameitaki nei rai a Iehova i tona iti tangata. Te akapapu nei aia kia maata to tatou kite e te au i rauka mai ei tuanga no te taokotaianga taeake i te ao katoa. (Isaia 54:13) Ae, mei ta Iesu i taputou, te tutaki nei a Iehova ia tatou i teianei ma te ngutuare aroa o te au taeake e te au tuaine takapini i teianei ao. (Mareko 10:29, 30) Pera katoa, ka tutakiia te aronga tei kimi tikai i te Atua ma te ngakau au, te tu merengo e te mataora.​—Philipi 4:4-7.

18, 19 Eaa te manako o te au tavini o Iehova no runga i ta ratou tutaki?

¹⁸ Kua kite mai te au tavini o Iehova i te ao katoa i te tutaki manea no ko mai i to tatou Metua. Ei akaraanga, karanga a Bianca no Tiamani mai e: “Te akameitaki maata tikai nei au ia Iehova no te tauturu mai iaku i toku au apiapi e te noo vaitata kiaku i te rā tataki tai. Kua oripu ua teianei ao e kua ngere i te manakonakoanga. Inara iaku e angaanga kapiti nei kia Iehova, kua rauka te tu tinamou i roto i tona nga rima. I te au taime ravarai me rave au i te akaatinga nana, ka akameitaki mai aia iaku e anere ua atu taime te maata.”

¹⁹ Akamanako katoa ia Paula e 70 ona mataiti no Kanata mai, tei kotingaia no tona maki spina bifida, e turanga maki tikai no te ivi mokotua. Karanga aia e noatu kua kotingaia aia no tona turanga maki, kare te aiteanga e kua kotingaia tana angaanga tutu aere. Karanga katoa aia: “E taangaanga meitaki ana au i te au mataara ke ke no te tutu aere mei te akakiteanga na runga i te tereponi e te ngai tangata. Ei akamaroiroi iaku, ka akono au i tetai puka kua kī i te au irava e te au manako no roto mai i ta tatou puka ei tatau naku i tetai au atianga. Kapiki au i te reira ‘Taku Puka Ora.’ E tuatau poto ua toku taitaia me akamou ki runga i te au taputou a Iehova. Te vaitata ua ra a Iehova ei tauturu ia tatou, noatu to tatou turanga.” Penei e tuke takiri toou turanga mei to Bianca raua ko Paula. Noatu ra, e mea papu ka rauka ia koe i te akamanako i te au mataara i tutaki ei a Iehova ia koe e te aronga takapini ia koe. Mei teaa tikai te meitaki i te akamanako akapeea a Iehova te tutaki anga ia koe i teianei e tana tutaki i te tuatau ki mua!

20. Eaa ta tatou ka tapapa atu me rave i ta tatou i rauka kia tavini tiratiratu ia Iehova?

²⁰ Auraka e akangaropoina e ko taau au pure ngakau tae, “e tutaki maata oki” tona. Ka papu ia koe “kia oti ia kotou te rave i ta te Atua i anoano ra, kia rauka ia kotou te tutaki i tuatuaia maira.” (Ebera 10:35, 36) No reira kia akaketaketa ua rai tatou i to tatou akarongo ma te rave i te au mea ravarai ka rauka i te tavini ia Iehova. Ka papu i reira tatou e ka tutaki mai a Iehova ia tatou!​—E tatau ia Kolosa 3:23, 24