Auraka Toou Aroa e Iti
“No te mea e maata te kino i te tupu anga, ka riro te rai o te tangata i te mea ngiti te anoano.”—MATAIO 24:12.
AKAPEEA KOE ME PAU?
Akapeea tatou i te akamou anga i te aroa ketaketa no Iehova?
Akapeea me akaoonu i to tatou aroa no te tuatua mou Pipiria?
No teaa ra i puapinga ai kia inangaro i to tatou au taeake?
1, 2. (a) Koai ma te aronga mua tei tau ta Iesu tuatua ia Mataio 24:12? (e) Akapeea te puka o Angaanga te akaarianga kua akaketaketa te au Kerititiano mua i to ratou aroa? (Akara i te tutu mua.)
IA IESU i te enua nei, kua akamārama aia i te akairo no “te openga o teianei ao.” Kapiti mai tetai au mea, kua totou aia: “Ka riro te rai o te tangata i te mea ngiti te anoano.” (Mataio 24:3, 12) I te anere mataiti mua, karanga te ngati Iuda e ko ratou te iti tangata o te Atua, inara kua riro to ratou aroa no te Atua ei mea iti.
2 Inara, tuke rai te tu o te au Kerititiano i tera tuatau. Kua maroiroi ratou i “te tuatua anga atu ia Iesu Mesia” e te akaari te inangaro no te Atua, te au taeake, e te aronga kare i kite i te tuatua mou. Kua akaketaketa teia au Kerititiano i to ratou aroa no te Atua. (Angaanga 2:44-47; 5:42) Te mea mii ra, kua tuku tetai pae o te au Kerititiano mua i to ratou aroa kia iti. Akapeea tatou i kite ei i te reira?
3. Eaa tei akatupu i te aroa o tetai au Kerititiano kia iti?
3 Akakite a Iesu ki te au Kerititiano mua e noo ra i Ephesia: “Kua vaoo koe i to inangaro mua.” (Apokalupo 2:4) Penei kua akanauruia te au Kerititiano i Ephesia e te au tangata takapini ia ratou tei inangaro i te akamareka ia ratou uaorai. (Ephesia 2:2, 3) E oire apinganui a Ephesia e kua aruaru tona iti tangata i te oraanga pumaana e te apinganui i runga ake i tetai apinga ke. E maata to Ephesia tei akatupu i te tu tau kore e kare e akangateitei i te au ture a te Atua. Kua inangaro ua ratou i te akarekareka ia ratou uaorai kare kia akatupu i te aroa noinoi kore no te Atua e tetai ke.
4. (a) Akapeea te aroa i iti ei i teia tuatau? (e) Eaa te au tuanga e toru ka anoanoia kia akaketaketa i to tatou aroa?
4 Ta Iesu tuatua no te aroa e iti maira, ka tau katoa no teia tuatau. Te ngaro atura te aroa o te tangata no te Atua. Kare ratou e akara ki te Atua kia akatikatika i te au manamanata o teianei ao, mari ra e mirioni ua atu tei akara ki te au akaereanga a te tangata. Te iti ua atura to ratou aroa. Penei ka iti katoa te aroa o te au tavini o Iehova, mei tei tupu ki te putuputuanga i Ephesia taito. No reira ka uriuri tatou e toru tuanga ka anoanoia kia akaketaketa i to tatou aroa: (1) te aroa no Iehova, (2) te aroa no te tuatua mou Pipiria; (3) te aroa no te au taeake.
TE AROA NO IEHOVA
5. No teaa ra tatou ka inangaro ei i te Atua?
5 Koai ta tatou ka inangaro maata? Karanga a Iesu: “‘E anoano atu koe i to Atua ia Iehova ma to ngakau katoa, e ma to vaerua katoa, e ma to manako katoa.’ Ko te akauenga mua teia e tei maata.” (Mataio 22:37, 38) Ka riro te aroa no te Atua ei tauturu ia tatou kia akono i tana akauenga, kia akakoromaki, e kia rikarika i te kino. (E tatau ia Salamo 97:10.) Inara ka titau a Satani e tona ao kino i te akaparuparu e te takore i to tatou aroa no te Atua.
6. Eaa te ka tupu me ngere te tangata i te aroa no te Atua?
6 Kua tatipake te manako o teianei ao no te aroa. Kare ratou e inangaro i te Atua, mari ra e manganui tei “akaperepere ia ratou uaorai.” (2 Timoteo 3:2) Ka akamou ratou ki runga i “te anoano tika kore o te kopapa nei, e te anoano tika kore o te mata nei, e te akatietie o te ora anga nei.” (1 Ioane 2:16) Kua akamatakite te apotetoro ko Paulo i te ka tupu me akamareka ia tatou uaorai na mua. Karanga aia: “Ko te akono oki i ta te kopapa nei, ko te mate ïa.” Te tumu? No te mea te aronga e akapera ra, kua riro ei enemi no te Atua. (Roma 8:6, 7) Te aronga tei akamou i te oraanga ki runga i te akaputu moni e te akamerengo i te anoano o te ainga, taopenga mai ka mareka kore ratou.—1 Korinetia 6:18; 1 Timoteo 6:9, 10.
7. Eaa te au manako kino te ka akakeu i te au Kerititiano i teia tuatau?
7 Maata te aronga irinaki kore i te Atua e te apii i te au mea tupu ua, te tauta ra i te akakeu i te tangata auraka kia inangaro i te Atua e te irinaki e kare e Atua. Kia ratou, mei te mea rai e kua nenevaia e te kite kore te tangata tei irinaki i roto i Tei Anga mai. Pera katoa, e manganui tei akangateitei maata atu i te aronga taieni kare i Tei Anga mai. (Roma 1:25) Ka akanauruia tetai Kerititiano e teia au manako. Penei ka paruparu to tatou pirianga kia Iehova e ka iti mai to tatou aroa.—Ebera 3:12.
8. (a) Eaa te au turanga te ka akaparuparu i te iti tangata o te Atua? (e) Akapeea a Salamo 136 te akapumaana anga ia tatou?
8 No te mea te noo nei tatou i roto i to Satani akatereanga, e maata te tumu ka manako paruparu tatou i tetai au atianga. (1 Ioane 5:19) Inara me tuku tatou ia tatou uaorai kia taitaia roa, penei ka paruparu to tatou akarongo e ka iti mai te aroa no te Atua. Ei akaraanga, ka aro atu tatou i te au manamanata no te ruaine anga, te oraanga kopapa maki, e te manamanata no te moni. Me kore penei ka maromaroa tatou no tei kore e rauka i te rave i te au angaanga mei ta tatou i matau. Penei ka mareka kore tatou no te mea kare tetai au mea no te oraanga i tupu mei ta tatou i inangaro. Noatu te akaaoanga, auraka tatou e manako kua akaruke a Iehova ia tatou. Akamanako i teia au tuatua pumaana i roto ia Salamo 136:23: “Kua manako mai aia ia tatou i to tatou akaaka anga: ka tu oki tona aroa e rimua.” Papu ia tatou te akarongo maira a Iehova i ta tatou “i pati atu” e ka pau mai i te reira.—Salamo 116:1; 136:24-26.
9. Eaa tei akamaroiroi ia Paulo kia akaketaketa ua rai i tona aroa no te Atua?
9 Ko te apotetoro ko Paulo tetai tavini o te Atua tei akamanako oonu i ta Iehova tiaki anga iaia, e kua tauturu teia iaia kia vai ketaketa. Tata aia: “Ko Iehova toku tauturu, kare au e mataku; eaa ta te tangata kia rave mai iaku?” (Ebera 13:6) Kua riro to Paulo irinaki papu ia Iehova ei tauturu iaia kia akakoromaki i te au akaaoanga o te oraanga. Ia Paulo e aro atura i te au turanga ngata, kare aia i ngere i te irinaki ia Iehova. Noatu tei roto aia i te are tapekaanga, kua tauturu aia i te au taeake Kerititiano na te tata reta anga ei akamaroiroi i te au putuputuanga. (Ephesia 4:1; Philipi 1:7; Philemona 1) Noatu te au manamanata ta Paulo i aro atu, kua akaketaketa ua rai aia i tona aroa no Iehova. Kua irinaki pu tikai aia i “te Atua nona anake te pumaana; ko tei akapumaana mai ia matou i to matou au mate katoa nei.” (2 Korinetia 1:3, 4) Akapeea tatou me aru ia Paulo?
10. Akapeea tatou me akaketaketa ua rai i to tatou aroa no Iehova?
10 Akamārama a Paulo i tetai mataara ka vai ketaketa ua to tatou inangaro no te Atua i te na ko anga e: “Auraka e tukutuku i te pure.” Tata katoa aia: “Tamou marie tikai i te pure.” (1 Tesalonia 5:17; Roma 12:12) No teaa ra te pure ka akavaitata atu ei ia tatou ki te Atua? Me pure tatou, te tuatua nei tatou kia Iehova. Ka tauturu teia ia tatou kia rauka te pirianga meitaki kiaia. (Salamo 86:3) Me akakite tatou i to tatou au manako oonu rava ki to tatou Metua i te rangi, ka akavaitata atu ia tatou kiaia. (Salamo 65:2) Pera katoa, ka tupu to tatou aroa no Iehova me kite i tana pau anga ki ta tatou pure. Papu ia tatou “te vaitata mairā Iehova i te aronga i kapiki atu iaia.” (Salamo 145:18) Ka tauturu to tatou irinaki papu i to Iehova aroa e te tauturu kia akakoromaki i tetai ua atu manamanata i teianei e te tuatau ki mua.
TE AROA NO TE TUATUA MOU PIPIRIA
11, 12 Akapeea tatou me akamaata i te inangaro no te tuatua mou Pipiria?
11 Ei au Kerititiano, inangaro tatou i te tuatua mou. Ka kitea te tuatua mou i roto i te Tuatua a te Atua. Akakite a Iesu ki tona Metua: “Ko te tuatua aau na te tuatua-mou.” (Ioane 17:17) Kia inangaro i te tuatua mou Pipiria, ka anoanoia kia kite eaa to roto i te Pipiria. (Kolosa 1:10) Inara e maata atu tei anoanoia. Akara ana akapeea te tata o Salamo 119 te tauturu anga ia tatou kia kite i ta tatou ka rave. (E tatau ia Salamo 119:97-100.) I te rā katoa, ka anoanoia kia manakonako, me kore kia akamanako oonu i ta tatou e tatau ra i roto i te Pipiria. Me akamanako oonu tatou i te puapinga me taangaanga i te tuatua mou Pipiria i roto i te oraanga, ka maata atu to tatou inangaro i te reira.
12 Karanga katoa te tata salamo: “Ko te vene o taau nei tuatua i toku nei tongi anga e! e venereka ïa to te reira i to te meli i toku nei vaa.” (Salamo 119:103) Kua aite te au puka Pipiria ta te akaaerenga a te Atua i akapapa mei te kai reka rai. Me kai tatou i te manga reka, ka kai marie i te reira ma te rekareka. Koia katoa, ka aere marie ua tatou me apii. I reira tatou e mareka ai “te tuatua te ka ārikiia,” koia te tuatua mou, e ka māmā ua te akamaara i ta tatou i tatau ma te taangaanga i te reira ei tauturu i etai ke.—Koheleta 12:10.
13. Eaa tei tauturu ia Ieremia kia akaperepere i te au tuatua a te Atua? Akapeea teia te akakeu anga iaia?
13 Akaperepere te peroveta ko Ieremia i te au tuatua a te Atua. Karanga aia: “Kua kitea taau au tuatua, e kua kai atura au; e ko taau tuatua, ko toku ïa rekareka anga, e te pereperekavana anga o toku ngakau: kua tapaia oki au i toou ra ingoa, e te Atua Sabaota ra, e Iehova e.” (Ieremia 15:16) Kua akamanako oonu a Ieremia i te tuatua akaperepere a te Atua, kua inangaro aia i te reira. Kua mataora tikai aia te riro anga ei mata no Iehova e te akakitekite i tana karere. Me akaperepere tatou i te tuatua mou Pipiria, ka kite tatou mei teaa te tikaanga ngateitei kia riro ei Au Kite no Iehova ma te tutu aere i te Patireia i te au rā openga.
14. Eaa atu ta tatou ka rave kia akamaata i te inangaro no te tuatua mou Pipiria?
14 Eaa atu te ka tauturu ia tatou kia akaoonu i to tatou inangaro no te tuatua mou Pipiria? Kia aere putuputu tatou ki te au uipaanga a te putuputuanga, te ngai i apii ei a Iehova ia tatou. Ko te apii Pipiria i te au epetoma na te taangaanga i Te Punanga Tiaki e mataara meitaki no te apii ia tatou. Ka puapingaia tatou mei teia uipaanga me akapapa na mua. Ei akaraanga, ka akara tatou i te au irava tei taikuia. I teia rā, e manganui tei tatau e te kopi i Te Punanga Tiaki mei runga i te roro uira no te mea ka rauka te reira i roto i te au reo e manganui i runga i te website jw.org e te JW Library app. I runga i te au apinga roro uira, ka viviki i te kimi i te au irava. Noatu te ravenga ta tatou ka iki no te apii, me tatau i te au irava ma te akamanako oonu i te reira, ka tupu to tatou inangaro no te tuatua mou Pipiria.—E tatau ia Salamo 1:2.
TE AROA NO TE AU TAEAKE
15, 16 (a) Kia tau ia Ioane 13:34, 35, eaa te akaueanga ta Iesu i oronga mai? (e) Akapeea te aroa no te Atua e te Pipiria i piri atu ei ki te aroa no te au taeake?
15 I te po openga o tona oraanga i te enua nei, akakite a Iesu ki tana au pipi: “E tuku atu au i te akauenga ou kia kotou, E aroa kotou ia kotou uaorai: mei iaku i aroa ia kotou na, e aroa katoa oki kotou ia kotou uaorai. Ko te mea teia e kite ei te tangata katoa e e pipi kotou naku, kia aroa kotou ia kotou uaorai.”—Ioane 13:34, 35.
16 Ko te aroa no te au taeake e te au tuaine te piri atura ki te aroa no Iehova. Me kare o tatou aroa no te Atua, kare tatou e aroa i te au taeake. Me kare o tatou aroa no te au taeake, kare tatou e aroa i te Atua. Tata te apotetoro ko Ioane: “Ko tei kore e aroa i tona taeake tei akaraia e ia ra, eaa e tikaʼi iaia kia anoano i te Atua tei kore i akaraia e ia ra?” (1 Ioane 4:20) Ko te aroa no Iehova e te au taeake te piri atura ki te aroa no te Pipiria. No teaa ra? No te mea me akaperepere tatou i te Pipiria, ka inangaro tatou i te akono i te au akaueanga tei roto i reira kia aroa i te Atua e te au taeake.—1 Petero 1:22; 1 Ioane 4:21.
17. Eaa te au mataara tau no te akaari i te aroa?
17 E tatau ia 1 Tesalonia 4:9, 10. Eaa te au mataara tau no te akaari i te aroa ki te au taeake i roto i te putuputuanga? Penei ka anoanoia kia tiki i tetai taeake me kore tuaine pakarikari no te au uipaanga a te putuputuanga. Penei ka anoano tetai vaine takaua i te tauturu kia ripea i tona are. (Iakobo 1:27) Te au taeake e te au tuaine tei paruparu e te taitaia, me kore te aro atura i te au manamanata ka anoano ratou i to tatou taime, te akamaroiroi anga, e te akapumaana. (Maseli 12:25; Kolosa 4:11) Ka akaari tatou i te aroa “ki to te ngutuare o te akarongo ra” na roto i ta tatou tuatua e te angaanga.—Galatia 6:10.
18. Eaa te ka tauturu ia tatou kia akakore i te karo ki to tatou au taeake?
18 Akakite te Pipiria e i te “tuatau openga” o teia akatereanga kino, e manganui tei noinoi e te karapii. (2 Timoteo 3:1, 2) Ei au Kerititiano, ka anoanoia kia angaanga pakari kia maata to tatou inangaro ia Iehova, tana Tuatua, e etai ke. I te mea e aronga apa ua tatou, i tetai taime ka tupu te karo ki te au taeake. No to tatou aroa i tetai e tetai, ka viviki tatou i te akatikatika i te manamanata ma te takinga meitaki. (Ephesia 4:32; Kolosa 3:14) Auraka tatou e tuku i to tatou aroa kia iti mai! Mari ra, kia akatupu ua rai tatou i te aroa maata no Iehova, tana Tuatua, e to tatou au taeake.
[Tutu i te kapi 20]
TETAI AU TUATUA I URIURIIA
Me iti te aroa no te Atua, ka ngere tatou i te tu oraora o te tuatua mou e te akaperepere i te au taeake. Ka tupu teia me akanauruia tatou e teianei ao e me tuku i te au mea ke kia puapinga atu to tatou pirianga ki te Atua
[Tutu i te kapi 17]
Akaari i te aroa no Iehova (Akara i te parakarapa 10)
[Tutu i te kapi 19]
Akaari i te aroa no te tuatua mou Pipiria (Akara i te parakarapa 14)
[Tutu i te kapi 20]
Akaari i te aroa no te au taeake e te au tuaine (Akara i te parakarapa 17)