“Te Maata na Toou Anoano Kiaku i Teia?”

“E Simona a Iona e, te maata na toou anoano kiaku i teia?”​—IOANE 21:15.

AU IMENE: 32, 45

EAA TE KA TAUTURU IA TATOU KIA RAUKA TE MANAKO TAU NO TE . . .

ngai angaanga?

tarekareka?

apinga pae kopapa?

1, 2. Muri ake i te tautai anga i te po katoa, eaa te apiianga ta Petero i mou mai?

TOKOITU a Iesu au pipi tei tautai i te po katoa i te Tai o Galilea. Inara kare a ratou ika i mou ana. E popongi iora, te tu ua ra a Iesu tei akatuia mai i taatai e te akara atura ia ratou. “Kua tuatua maira aia kia ratou, Ka tuku i te kupenga ki te pae katau i te pai na, ka rauka ïa ta kotou. Kua tuku atura ratou, e kare ua atura e maranga ia ratou kia kika i te maata o te ika.”​—Ioane 21:1-6.

² Kua angai a Iesu i tana au pipi ki te ika e te varaoa. I reira kua uri aia kia Simona Petero e kua ui atu kiaia: “E Simona a Iona e, te maata na toou anoano kiaku i teia?” Kua kite a Iesu e inangaro maata to Petero i te tautai. Penei te ui ra a Iesu kia Petero me e maata atu tona inangaro iaia e tana i apii i te angaanga tautai. Pau atu a Petero kia Iesu: “E te Atu; kua kite koe e, te anoano atu nei au ia koe.” (Ioane 21:15) Mei tera rā mai, kua akatupu a Petero i tana i tuatua. Kua akaari aia i tona aroa no te Mesia na te rave maroiroi anga i te angaanga tutu aere, e kua riro mai ei mema puapinga no te putuputuanga Kerititiano.

3. Eaa ta te au Kerititiano ka matakite?

³ Eaa ta tatou ka apii mei ta Iesu i tuatua kia Petero? Kia matakite tatou auraka e akatika i to tatou aroa no te Mesia kia parukā. Kua kite a Iesu e ngata te oraanga i teia akatereanga e ka aro atu tatou i te au apiapi e te akaaoanga. Roto i tana akatutuanga no te tangata ruru, karanga a Iesu e ka āriki tetai pae i “te tuatua o te basileia nei” e ka maroiroi i te akamataanga. Inara i muri mai, “pokia atura te tuatua i te anoano maata i to teianei ao, e te pikikaa o te apinga,” e ka ngere teia aronga i te maroiroi. (Mataio 13:19-22; Mareko 4:19) Me kare tatou e matakite, ka tamanata te au apiapi o te oraanga i ta tatou tavini anga ia Iehova. No reira a Iesu i akamatakite ei i tana au pipi: “E matakite ra ia kotou, ko te opue aea to kotou ngakau i te maata o te kai e te kona, e te pekapeka o teianei ao.”​—Luka 21:34.

4. Eaa te ka tauturu ia tatou kia kite me te ketaketa ra to tatou aroa no te Mesia? (Akara i te tutu mua.)

⁴ Mei ia Petero rai, ka akaari tatou i te aroa no te Mesia na te akariro anga i te angaanga tutu aere ei mea mua i roto i te oraanga. Akapeea tatou me rave tamou i te reira? E ui kia tatou uaorai: ‘Eaa taku mea reka roa atu i roto i te oraanga? Te reka ra ainei au i te tavini ia Iehova me kore te rave i te angaanga ke?’ Ei tauturu ia tatou kia pau i teia, ka akara matatio tatou e toru tuanga o te oraanga te ka akaparuparu i to tatou aroa no te Mesia. Ko te ngai angaanga, te tarekareka, e te au apinga pae kopapa.

TUKU I TE NGAI ANGAANGA KI TONA NGAI TAU

5. Eaa te apainga a te au upoko o te ngutuare?

⁵ Kia Petero, kare te angaanga tautai i te mea tarekareka ua. Ko teia te angaanga tana i rave ei akono i tona ngutuare tangata. I teia tuatau katoa, kua oronga a Iehova i te apainga ki te au upoko o te ngutuare kia akono i to ratou ngutuare tangata. (1 Timoteo 5:8) Ka anoanoia ratou kia angaanga pakari. Inara, i teia au rā openga, ka akatupu te ngai angaanga i te apiapi maata.

6. No teaa ra te ngai angaanga i te mea taitaia?

⁶ Maataanga te taime, e maata atu te tangata tei kimi i te ngai angaanga i te au angaanga ka rauka mai. Ko teia te tumu i taemoemo ei te tangata kia rauka te ngai angaanga. E maata te manako ra ka anoanoia kia angaanga roa, noatu e iti ua te tutaki. I teia tuatau, te tauta nei te au pitiniti i te rave maata i te angaanga ma te iti ua te aronga angaanga. No reira ka taitaia, roiroi, e ka maki katoa te aronga angaanga. E manganui tei manamanata e ka ngere i ta ratou angaanga me kare e rave i ta te pu e inangaro ra.

7, 8. (a) Ka vai tiratiratu tatou kiaai? (e) Eaa te apiianga maata ta tetai taeake i Thailand i mou mai no tana angaanga?

⁷ Ei au Kerititiano, ka tiratiratu tatou kia Iehova i runga ake i tetai tangata, kapiti mai to tatou pu angaanga. (Luka 10:27) Ko te ngai angaanga, e ravenga ïa kia rauka i ta tatou e anoano ra e kia turu i te angaanga orometua. Inara me kare tatou e matakite, ka riro te au apainga o te ngai angaanga ei tamanata i ta tatou akamorianga. Ka apii tatou mei te akaraanga o tetai taeake i Thailand. Karanga aia: “Taku ngai angaanga no te ripea komupiuta e angaanga mataora tikai, inara ka anoanoia kia angaanga roa. Tei tupu, kare oku taime no te au angaanga pae vaerua. Kua kite i reira au e kia tuku i te anoano Patireia na mua, ka anoanoia au kia taui i taku ngai angaanga.” Eaa ta te taeake i rave?

⁸ “Muri ake i te parani anga no tetai mataiti,” i akamārama ei aia, “Kua iki au i te okooko ice cream i te pae mataara. I te akamata anga, kua tupu te manamanata i te pae moni e kua taitaia au. Te aravei anga au i toku au oa angaanga, kua aviri ratou iaku e kua ui e eaa au i manako ei ka meitaki atu te oko ice cream i te angaanga komupiuta i roto i te ngai anuanu. Kua pure au kia Iehova, ma te pati iaia no te tauturu kia akakoromaki e kia itae i toku akakoroanga no te rave maata i te angaanga pae vaerua. Kare i roa ana, kua meitaki mai teia turanga. Kua matau au i te tangata e ta ratou e reka ana e kua karape au i te maani ice cream. Muri mai, kua pou taku ice cream i te oko i te au rā ravarai. Te tika, e meitaki atu toku turanga pae moni i to te angaanga komupiuta. Kua mataora atu au no te mea kare e apiapi e te manamanata akaou i taku ngai angaanga i mua ana. Tei puapinga roa atu, i teianei kua piri vaitata au kia Iehova.”​—E tatau ia Mataio 5:3, 6.

9. Akapeea tatou e rauka ai te manako tau no te ngai angaanga?

⁹ E mataora ana a Iehova me angaanga pakari tatou. E tutaki maata to te angaanga pakari. (Maseli 12:14) Inara ka anoanoia kia akapapu auraka te ngai angaanga e puapinga atu i ta tatou tavini anga ia Iehova. Te tuatua anga a Iesu no runga i ta tatou e anoano ra i te pae kopapa, karanga aia: “E na mua ra kotou i te kimi i te basileia o te Atua, e te tuatua-tika nana ra; e kapiti katoaia mai taua au mea katoa ra ia kotou.” (Mataio 6:33) Akapeea tatou e kite ei e manako tau to tatou no te ngai angaanga? E ui kia tatou uaorai, ‘E mea mataora ainei e te oraora taku ngai angaanga inara ko te tavini anga i te Atua e mea noa ua e te maromaroa?’ Me akamanako i teia uianga ka tauturu ia tatou kia kite meitaki eaa tikai to tatou inangaro.

10. Eaa te apiianga puapinga ta Iesu i apii?

¹⁰ Kua apii a Iesu eaa te mea puapinga roa atu i roto i te oraanga. I tetai atianga, kua atoro aia i te ngutuare o Maria e Mareta. Kua viviki a Mareta i te akapapa i te manga na Iesu, inara kua noo ua a Maria i te pae iaia i te akarongo i tana apiianga. Kua kopekope a Mareta e kare a Maria i tauturu atu. Akakite a Iesu kia Mareta: “Kua inangaro oki a Maria nei i taua tuanga meitaki nei, kare rava oki tana e riro ke.” (Luka 10:38-42) Te apii nei a Iesu i tetai apiianga puapinga. Kia kore e akaanga ke i to tatou aroa no te Mesia no ta tatou e anoano ra, ka anoanoia kia iki i te “tuanga meitaki nei.” Tera te aiteanga, kia riro to tatou pirianga kia Iehova ei mea puapinga roa atu i roto i te oraanga.

TO TATOU MANAKO NO TE TAREKAREKA E TE TAMATAORA

11. Eaa ta te Pipiria e karanga ra no te akangaroi anga?

¹¹ Maata tikai te angaanga i roto i te oraanga, no reira i tetai taime ka anoanoia kia akangaroi. Ka tatau tatou i roto i te Pipiria: “Kare ainei e meitaki no te tangata nei kia kaikai, e kia inu, e kia kite tona ngakau i te meitaki i tana ra angaanga?” (Koheleta 2:24) Kua kite a Iesu i te puapinga kia akangaroi tana au pipi. Ei akaraanga, muri ake te angaanga maroiroi anga i te tutu evangelia, akakite a Iesu kia ratou: “Ka taki aere tatou ko tatou anake uaorai i tetai ngai motutaa, e noonoo iti ua na.”​—Mareko 6:31, 32.

12. No teaa ra tatou ka matakite ei i te tarekareka e te tamataora? Oronga mai i te akaraanga.

¹² Ka riro te tarekareka e te tamataora ei tauturu ia tatou kia akangaroi. Inara kia matakite tatou auraka te tarekareka anga e riro ei mea puapinga roa atu i roto i te oraanga. I te anere mataiti mua, e manganui tei akaari i teia tu: “E kai tatou, e e inu oki; apopo oki tatou e mate ei.” (1 Korinetia 15:32) E mea matau katoa teia tu i teia tuatau. Ei akaraanga, kua akamata tetai mapu i Europa Opunga i te aere ki te au uipaanga Kerititiano. Inara kua reka maata roa aia i te tamataora e kua akamutu i te piri atu ki te Au Kite o Iehova. I muri mai, kua kite aia e kua riro te aruaru i te tamataora ei akatupu i te au manamanata. Kua akamata akaou aia i tana apii Pipiria e i muri mai, kua akamata i te tutu aere i te nuti meitaki. Muri ake i tona papetitoanga, karanga aia: “E tai rai aku tataraapa koia oki kua pou te tuatau roa i mua ake ka kite ei au e mataora atu te tavini ia Iehova i to te aruaru anga i te tamataora o teianei ao.”

13. (a) Oronga mai i te akatutuanga tei akaari e kare e meitaki ana kia maata roa te tarekareka e te tamataora. (e) Eaa te ka tauturu ia tatou kia rauka te manako tau no te tarekareka e te tamataora?

¹³ Ka tauturu te tarekareka ia tatou kia akangaroi e kia maroiroi akaou. No reira eia taime e akapou ana tatou no te tarekareka? Ei pau i te reira, ka akamanako ana tatou i teia. Maata te tangata e reka ana i te kai keke e te mea venevene. Inara kua kite tatou me kai anake i teia i te au atianga ravarai, ka kino te oraanga kopapa. Me inangaro tatou kia matutu, ka anoanoia kia kai i te kai meitaki. Mei te reira katoa, me akapou maata i te taime no te tarekareka e te tamataora, ka takinoia to tatou pirianga kia Iehova. Eaa te ka tauturu ia tatou kia kite me e manako tau to tatou no te tarekareka e me kare? Tetai mataara koia oki e iki i tetai epetoma, e oti tata i te ora tei pou i roto i te angaanga tavini anga ia Iehova, mei te uipaanga, te angaanga tutu aere, e te apii Pipiria. E oti tata i te ora tei pou i taua epetoma ra no te tarekareka, mei te tipoti, te akara tivi, e te vitio kangakanga. Me akaaite tatou i nga numero, eaa ta tatou ka kite mai? Ka anoanoia ainei kia rave i te tauianga?​—E tatau ia Ephesia 5:15, 16.

14. Eaa te ka tauturu ia tatou kia iki i te tarekareka e te tamataora meitaki?

¹⁴ E akatika ana a Iehova ia tatou kia iki i ta tatou tarekareka, e ka tau te au upoko o te ngutuare kia iki i te tarekareka no to ratou ngutuare tangata. I roto i te Pipiria, kua oronga mai a Iehova i te au kaveinga tei akaari i tona aerenga manako. Ka tauturu teia au kaveinga ia tatou kia rave i te ikianga tau.a (Akara i te tataanga rikiriki i raro.) Ko te tarekareka anga meitaki, “e mea o maiia mai ïa e te Atua.” (Koheleta 3:12, 13) E tika e tukeke te tamataora ta te au tangata ke ke e reka ana. (Galatia 6:4, 5) Noatu te tamataora ta tatou ka iki, ka anoanoia rai kia matakite. Karanga a Iesu: “Te ngai oki i vaioiaʼi to kotou na apinga, ka riro katoa i reira to kotou ngakau.” (Mataio 6:21) Ka riro te aroa no to tatou Ariki ko Iesu ei akakeu ia tatou kia manako, tuatua, e kia rave i te au angaanga tei akaari e puapinga roa atu te Patireia i tetai apinga ke.​—Philipi 1:9, 10.

TA TATOU TAMAKI I TE ANOANO MAATA I TE APINGA

15, 16 (a) Akapeea te anoano maata i te apinga te riro anga ei ereere no tatou? (e) Eaa te akoanga meitaki ta Iesu i oronga no te au apinga pae kopapa?

¹⁵ I teia tuatau e manganui te manako ra ka anoanoia kia rauka te kakau ou, tereponi apaipai, komupiuta ou e te vai atura. Anoano maata ratou i te au apinga pae kopapa, e tu oraanga tei akariro i te apinganui e te moni ei mea puapinga roa atu. Ei Kerititiano, eaa te mea puapinga roa atu kia koe? E ui kia koe uaorai: ‘Kua pou ainei toku manako ki runga i te motoka ou me kore te au mea akamanea ou i to te akapapa no te uipaanga a te putuputuanga? Kua maata roa ainei taku angaanga i te au rā e kare e maata toku taime no te pure e te tatau i te Pipiria?’ Me kare tatou e matakite, ka riro te anoano maata i te apinga ei mea puapinga atu i to tatou anoano i te Mesia. Ka tau tatou kia akamanako i ta Iesu tuatua: “E matakite ia kotou i te morimori apinga.” (Luka 12:15) Eaa ra aia i tuatua akapera ai?

¹⁶ Karanga a Iesu “kare e tika i te tangata kia akono i nga pu e toko rua.” Karanga katoa aia: “Kare e tika kia akono atu i te Atua e te Mamona.” Kare e rauka i te oronga i te mea meitaki kia Iehova e i taua taime rai kia aruaru i te apinga pae kopapa. Akamārama a Iesu e “ka riro aia i te riri atu ki tetai, e te anoano atu ki tetai; e kare ra, ka riro i te tau atu ki tetai, e te akaviivii atu ki tetai.” (Mataio 6:24) No te mea e aronga apa ua tatou, ka anoanoia kia tamaki ua atu rai i “te anoano o te kopapa nei,” kapiti mai te anoano maata i te apinga.​—Ephesia 2:3.

17. (a) No teaa ra i ngata ai no tetai pae kia rauka te manako tau no te apinga? (e) Eaa te ka tauturu ia tatou kia patoi i te anoano maata i te apinga?

¹⁷ E manganui tei akamou ua ki runga i to ratou uaorai anoano e te navenave e ka ngata ia ratou kia rauka te manako tau no te apinga. (E tatau ia 1 Korinetia 2:14.) No te mea kare e taka ana to ratou aereanga manako, kare ratou i kite i te tuke i te mea meitaki e te kino. (Ebera 5:11-14) Ka tupu maata to ratou anoano no te apinga. Te maata atu ta ratou i rauka mai, ko te maata atu ïa ta ratou ka inangaro. (Koheleta 5:10) Inara ka rauka ia tatou i te patoi atu i teia aereanga manako. Me tatau putuputu i te Tuatua a te Atua ka akamaroiroi ia tatou kia kopae i te anoano maata i te apinga. (1 Petero 2:2) Kua akamanako oonu a Iesu i to Iehova pakari, e kua tauturu teia iaia kia patoi i te au timataanga a te Tiaporo. (Mataio 4:8-10) I teia tuatau, me inangaro tatou kia patoi i te anoano maata i te apinga, ka anoanoia kia taangaanga i to Iehova pakari i te oraanga. Ka akaari teia kia Iesu e inangaro maata to tatou iaia i to te apinga.

18. Eaa taau ka tauta i te rave?

¹⁸ Te ui anga a Iesu kia Petero, “Te maata na toou anoano kiaku i teia?” te apii ra aia ia Petero e ko te tavini anga ia Iehova te mea maata i roto i te oraanga. E mea umere te aiteanga o te ingoa o Petero koia e “Mato.” Kua akaaiteia to Petero au tu meitaki ki tetai mato. (Angaanga 4:5-20) Teia tuatau, ka inangaro katoa tatou kia ngaueue kore to tatou aroa no te Mesia. No reira ka akapapu tatou kia tuku i te ngai angaanga, te tarekareka, e te au apinga i te ngai tau i roto i te oraanga. Me pera tatou, mei ia Petero rai ka tuatua tatou: “E te Atu; kua kite koe e, te anoano atu nei au ia koe.”

[Tataanga Rikiriki i Raro]

[Tataanga i te kapi 22]

Ka tiratiratu te au Kerititiano kia Iehova i runga ake i tetai tangata

[Tataanga i te kapi 23]

E mea mataora ainei taku ngai angaanga i te tavini anga i te Atua?

[Tataanga i te kapi 26]

Kare e rauka i te oronga i te mea meitaki rava atu kia Iehova e i taua taime rai kia aruaru i te apinga pae kopapa

[Tutu i te kapi 25]

Eaa te mea puapinga roa atu i toou oraanga? (Akara i te parakarapa 18)