Auraka e Ngere i to Kotou Tutaki
“Auraka kotou e ngere i to kotou tutaki.”—KOLOSA 2:18.
AKAPEEA KOE ME PAU?
Akapeea me paruru ia tatou uaorai mei te au anoano ainga tau kore?
Akapeea te tu aroa e te takinga meitaki te tauturu anga ia tatou kia rauka te tutaki?
Akapeea e rauka ai ia tatou te tutaki ei ngutuare tangata?
1, 2. (a) Eaa te tutaki ta te au tavini o te Atua e akara atura ki mua? (e) Eaa tei tauturu ia tatou kia akamou i to tatou mata ki runga i te tutaki? (Akara i te tutu mua.)
E MANAKONAKOANGA akaperepereia to te au Kerititiano akatainuia. Te tapapa atura ratou i te noo i te rangi. Kapiki te apotetoro ko Paulo i teia manakonakoanga ko “te tutaki i ta te Atua ra kapiki anga no runga maira.” (Philipi 3:14) I te rangi, ka tutara ratou ma Iesu Karaiti i tona Patireia e te angaanga ma ia kia tauturu i te tangata kia riro ei aronga apa kore. (Apokalupo 20:6) Mei teaa atura i te manakonakoanga manea! Te tapapa atura te mamoe ke i te tutaki tuke. Te manakonako ra ratou i te noo e tuatau ua atu i te Parataito i te enua nei, e te mataora tikai ra ratou i teia manakonakoanga!—2 Petero 3:13.
2 Inangaro a Paulo i te tauturu i tona ai taeake Kerititiano akatainuia kia vai tiratiratu e kia rauka te tutaki. Akakite aia kia ratou: “E akamou i to kotou ngakau i te au mea ki runga ra.” (Kolosa 3:2) Anoanoia ratou kia akamou ki runga i to ratou manakonakoanga akaperepereia i te rangi. (Kolosa 1:4, 5) Na te akamanakoanga i te au akameitakianga a Iehova, ka tauturu i te au tavini katoatoa o te Atua kia akamou i to ratou mata ki runga i te tutaki. E tika teia me te manakonako ra ratou i te noo i te rangi me kore i te enua.—1 Korinetia 9:24.
3. Eaa ta Paulo i akamatakite ki te au Kerititiano?
3 Akamatakite katoa a Paulo i te au Kerititiano no te au tumatetenga te ka ngere ratou i te tutaki. Ei akaraanga, kua tata aia ki to Kolosa no te au Kerititiano pikikaa tei tauta i te akamareka i te Atua na te aru anga i te Ture a Mose kare i tuku i te akarongo ki roto ia Karaiti. (Kolosa 2:16-18) Uriuri katoa a Paulo i te au kino te tupu ra i teia tuatau te ka arai ia tatou kia rauka te tutaki. Akamārama aia akapeea te patoi i te anoano ainga tau kore e eaa te ka rave me tupu te au manamanata ki to tatou ngutuare tangata me kore te au taeake i roto i te putuputuanga. Ka riro ta Paulo ako puapinga ei tauturu ia tatou i teia tuatau. No reira, ka akara matatio tatou i etai au akamatakiteanga aroa ka kitea i roto i tana reta ki to Kolosa.
TAMATE I TO KOTOU ANOANO AINGA TAU KORE
4. No teaa ra te anoano ainga tau kore ka arai ei ia tatou kia rauka te tutaki?
4 I muri ake te akamaara anga a Paulo i tona ai taeake i to ratou manakonakoanga manea, tata aia: “E tenana ka tamate i to kotou au melo i te au mea o teianei ao; te akaturi, te tuatua viivii, te anoano viivii ra, te inangaro tika kore, e te noinoi apinga.” (Kolosa 3:5) Ka pakari te anoano ainga tau kore e ka akatupu ia tatou kia ngere i te pirianga kia Iehova e to tatou manakonakoanga no te tuatau ki mua. Karanga tetai tungane tei rave i te ainga tau kore e kua oki mai i muri mai ki roto i te putuputuanga e, kua pakari roa tona au anoano e “kare [aia] i oki vave mai ana kua tureti.”
5. Akapeea me paruru ia tatou uaorai i roto i te au turanga tumatetenga?
5 Ka anoanoia tatou kia matakite tikai me tei roto tatou i tetai turanga te ka arataki kia akarongo kore tatou ki te au turanga tau a Iehova. Ei akaraanga, e mea tau no tetai tokorua e akameamea ra kia akakotinga i te au mea mei te amiri, te ongi, e me vai ko raua anake ua. (Maseli 22:3) Tetai au turanga kino ka tupu, me aere tatou no tetai tere pitiniti me kore me angaanga kapiti ki tetai tane me kore vaine. (Maseli 2:10-12, 16) Eaa taau ka rave ei paruru ia koe uaorai? E akataka ia koe uaorai ei Au Kite no Iehova. E noo marie, auraka e ngaropoina ka taki atu te akameamea ki te tumatetenga. Ka anoano katoaia tatou kia matakite me maromaroa tatou. Penei ka inangaro tatou kia inangaroia mai tatou e tetai. Penei no te anoano maata ka āriki ua tatou i te inangaro o tetai. E tumatetenga teia. Me akamanako akapera koe, auraka e tuku i tetai mea kia arai ia koe kia rauka te tutaki. E uri kia Iehova e toou au taeake e te au tuaine no te tauturu.—E tatau ia Salamo 34:18; Maseli 13:20.
6. Eaa ta tatou ka akamaara me iki i te tamataora anga?
6 Kia tamate i te anoano ainga tau kore, ka anoano tatou kia kopae i te tamataora anga tau kore. I teia tuatau, e maata te tamataora anga te akamaara maira ia tatou no Sodoma e Gomora. (Iuda 7) Te akariro ra te aronga maani tamataora ainga tau kore i teia ei mea noa ua, e kare e kino. No reira ka anoanoia tatou kia matakite. Kare tatou e āriki ua i tetai ua atu tamataora anga o teianei ao. Mari ra, ka anoanoia tatou kia iki i te tamataora te ka arai ia tatou kia rauka te tutaki o te oraanga.—Maseli 4:23.
“E KAKAU NA” IA KOTOU I TE AROA E TE TAKINGA MEITAKI
7. Eaa te au manamanata ka tupu i roto i te putuputuanga Kerititiano?
7 Rekareka tatou me riro ei tuanga no te putuputuanga Kerititiano. Ka apii tatou i te Tuatua a te Atua i ko i te au uipaanga, e ka turu i tetai e tetai. Ka tauturu teia ia tatou kia akamou i to tatou mata ki runga i te tutaki. Inara tetai taime ka tupu te au mārama kore anga te ka akatupu i te au manamanata ki to tatou au taeake e te au tuaine. Me kare teia au manamanata e rapakauia, ka tupu ngoie ua te akamoupuku.—E tatau ia 1 Petero 3:8, 9.
8, 9. (a) Eaa te au tu te ka tauturu ia tatou kia rauka te tutaki? (e) Eaa te ka tauturu ia tatou kia akono i te ‘au, me akariri mai tetai taeake Kerititiano ia tatou?
8 Kare tatou e akatika i te akamoupuku kia arai ia tatou kia rauka te tutaki. Akamārama a Paulo eaa ta te au Kerititiano ka anoanoia kia rave: “Ka akangakau aroa ua e te takinga-meitaki, te akaaka, te maru, te akakoromaki maata, mei te aronga tapu e te akaperepereia, e te ikiia e te Atua ra: E tauturu atu tetai ki tetai, e akakore tetai i ta tetai ara, e tapepeanga ta tetai ki tetai ra; mei te Mesia i akakore i ta kotou na, e akapera katoa kotou. E ei runga ravao i taua au mea katoa nei e kakau na i te aroa, ko taua tatua apa kore ua ra ïa.”—Kolosa 3:12-14.
9 Ka tauturu te aroa e te takinga meitaki ia tatou kia akakore i te ara a tetai ke. Me mamae tatou no tetai apinga tei tuatuaia me kore tei raveia, ka akamanako tatou i ta tatou i tuatua me kore tetai apinga kino ta tatou i rave ki tetai ke e kua akakore mai ratou ia tatou. Mei teaa atura to tatou rekareka no to ratou aroa e te takinga meitaki! (E tatau ia Koheleta 7:21, 22.) Akameitaki tikai tatou e te taokotai meitaki ra a Karaiti i te aronga akamori mou. (Kolosa 3:15) Te inangaro katoatoa ra tatou i te Atua, te tutu aere ra i te karere aiteite, e aiteite katoa to tatou manamanata. Me e tu takinga meitaki e te aroa to tatou ma te akakore i tetai e tetai, ka taokotai maata atu te putuputuanga e ka akamou tatou ki runga i te tutaki.
10, 11 (a) No teaa ra te vareae i kino ei? (e) Akapeea tatou me akapapu kare te vareae e arai ia tatou kia rauka te tutaki?
10 Ka arai te vareae ia tatou kia kore e rauka te tutaki. Te akaari maira te au akaraanga Pipiria e e kino te vareae. Ei akaraanga, kua vareae a Kaina ia Abela e kua tamate iaia. Ko Kora, Datana, e Abirama kua vareae ratou ia Mose e kua patoi iaia. Kua vareae te Ariki ko Saula ia Davida e kua tauta i te tamate iaia. E tika tikai te Tuatua a te Atua tei karanga e: “Te vai ra oki te vareae, e te tauetono, tei reira katoa te oripu ua e te au tuatua kikino katoa ra.”—Iakobo 3:16.
11 Me angaanga pakari tatou kia aroa tikai e te takinga meitaki, kare tatou e viviki ua i te vareae. Karanga te Tuatua a te Atua e: “E akakoromaki anga roa to te aroa, e te takinga-meitaki; kare te aroa e vareae.” (1 Korinetia 13:4) Ei akapapu kia kore te vareae e riro ei tu no tatou, ka anoanoia tatou kia tauta kia aite te manako ki to Iehova. Ka anoanoia tatou kia akamanako i to tatou au taeake e te au tuaine ei au mema o te kopapa okotai, koia oki te putuputuanga. Te karanga ra te Pipiria: “E kia akateiteiia tetai melo ra, e rekareka ïa te au melo ravarai.” (1 Korinetia 12:16-18, 26) Me tupu tetai apinga meitaki ki tetai o to tatou au taeake, ka rekareka tatou, kare e vareae iaia. Akamanako ana i te akaraanga meitaki o te tamaiti a te Ariki ko Saula ko Ionatana. Kare a Ionatana i vareae ana te ikiia anga a Davida ei ariki. Kua akamaroiroi katoa aia e kua turu ia Davida. (1 Samuela 23:16-18) Ka aite ainei tatou kia Ionatana te takinga meitaki e te aroa?
KIA RAUKA TE TUTAKI EI NGUTUARE TANGATA
12. Eaa te akoanga Pipiria te ka tauturu i to tatou ngutuare tangata kia rauka te tutaki?
12 Me taangaanga te mema okotai o to tatou ngutuare tangata i te au kaveinga Pipiria, ka tupu te ‘au e te mataora e ka rauka te tutaki. Kua oronga a Paulo i te ako pakari ki te au ngutuare tangata: “E te au vaine ra, e moraro marie kotou i ta kotou uaorai au tane, mei tei tau ïa i te Atu nei. E te au tane ra, e aroa kotou i ta kotou au vaine ra, auraka e rotoriri atu ia ratou. E te au tamariki e, e akarongo i to kotou au metua i te au mea katoa nei, e mea mareka te reira na te Atu. E te au metua ra, auraka e akariri atu i ta kotou tamariki, ko te taitaia aea ratou.” (Kolosa 3:18-21) Te kite ra ainei koe akapeea teia ako te tauturu anga i toou ngutuare tangata?
13. Akapeea tetai tuaine Kerititiano te tauturu anga i tana tane irinaki kore kia inangaro i te tavini ia Iehova?
13 Penei e tuaine koe kare taau tane e tavini ana ia Iehova. Eaa taau ka rave me kare aia e akono ana ia koe ma te tau? Penei ka riri koe ma te taumaro kiaia, inara ka meitaki atu ainei te turanga? Noatu me ka re koe i te taumaro, ka akakeu ainei koe iaia kia tavini ia Iehova? Kare paa. Inara me akangateitei koe i tana tuanga ei upoko no te ngutuare, ka tauturu koe i toou ngutuare tangata kia maata atu te ‘au e ka akangateitei koe ia Iehova. Ka riro toou akaraanga meitaki ei akakeu i taau tane kia inangaro i te tavini ia Iehova, e ka rauka ia korua te tutaki.—E tatau ia 1 Petero 3:1, 2.
14. Eaa ta tetai tane Kerititiano ka rave me kare tana vaine irinaki kore e akangateitei ana iaia?
14 Penei e tungane koe kare taau vaine e tavini ana ia Iehova. Eaa taau ka rave me kare aia e akangateitei ana ia koe? Me tauta koe i te akaari kiaia koai te pu na te ava anga iaia, ka akangateitei ainei aia ia koe? Kare! Te tapapa ra te Atua i tetai tane aroa kia aru ia Iesu. (Ephesia 5:23) E akakoromaki ua ana e te aroa a Iesu, te upoko o te putuputuanga. (Luka 9:46-48) Me aru koe ia Iesu, kare e roa ka inangaro taau vaine i te tavini katoa ia Iehova.
15. Akapeea tetai tangata Kerititiano te akaari anga e te inangaro ra aia i tana vaine?
15 Te ikuiku ra a Iehova i te au tane: “E aroa kotou i ta kotou au vaine ra, auraka e rotoriri atu ia ratou.” (Kolosa 3:19) Ka akangateitei tetai tane aroa i tana vaine. Akapeea? Ka akarongo aia i tona au manako e ka akakite kiaia e e puapinga aia kiaia. (1 Petero 3:7) Noatu kare aia e rave ua rai i ta te vaine i pati mai, ka riro tana akarongo anga kiaia ei tauturu i te akatupu i te au ikianga meitaki atu. (Maseli 15:22) Kare tetai tane aroa e taumaro i tana vaine kia akangateitei iaia. Mari ra, ka tauta aia kia rauka te reira. Me inangaro tetai tane i tana vaine e te tamariki, ka mataora atu ratou ia ratou e tavini ra ia Iehova e ka rauka te tutaki o te oraanga.
E TE AU MAPU—AURAKA E TUKU I TETAI APINGA KIA ARAI IA KOE KIA RAUKA TE TUTAKI!
16, 17 Ei mapu, eaa taau ka rave kia kore e riri kino i toou nga metua?
16 Penei e mapu koe tei manako kare toou nga metua e mārama ana ia koe me kore e tu arairai to raua. Penei kua riri maata koe e kua manako me ka inangaro koe i te tavini ia Iehova. Inara akapeea me akaruke koe ia Iehova, ka kite mai koe kare e tangata i vaoo i ko e inangaro atu ia koe mei to nga metua Kerititiano e toou au oa i roto i te putuputuanga.
17 Akamanako ana i teia: Me kare toou nga metua e akatikatika ana ia koe, akapeea koe e kite ei me kua inangaro rai raua ia koe? (Ebera 12:8) E tika, kare raua e apa kore ana, no reira, penei ka riri koe i ta raua tu akoanga. Inara auraka e akamou ki runga i te reira. Mari ra, e tauta kia mārama i te au tumu no ta raua e rave ra e e tuatua ra. E noo maru ua, e e tauta kia kore e riri atu. Karanga te Tuatua a te Atua: “Te tangata pakari, kare e rapurapu i te tuatua ra, e te tangata kite ra, e ngakau maru tona.” (Maseli 17:27) E akamou ki runga i te akakoroanga kia riro ei tangata tukatau tei āriki i te ako e ka apii i te reira noatu eaa te tu. (Maseli 1:8) Auraka e akangaropoina e apinga akaperepereia te au metua tei inangaro ia Iehova. Te inangaro ra ratou kia ora koe e tuatau ua atu.
18. Eaa koe ka titau ei kia akamou i toou mata ki runga i te tutaki?
18 Me e manakonakoanga to tatou kia noo e tuatau ua atu i te rangi me kore i te enua parataito, ka tapapa atu tatou i tetai tuatau umere ki mua. E tika tikai to tatou manakonakoanga. Kua akatumuia ki runga i te taputou a Tei Anga i teianei ao e pini ua ake, tei karanga: “Ka ki te enua i te kite ia Iehova.” (Isaia 11:9) Kare e roa ka apii te Atua i te katoatoa i te enua nei. Ka pauna te taime te tapapa atu i teia tutaki. No reira e akamaara ua rai i ta Iehova i taputou kia koe, auraka e tuku i tetai apinga kia arai ia koe kia rauka te tutaki!
[Pia i te kapi 32]
TETAI AU TUATUA I URIURIIA
E akamou i to tatou mata ki runga i te tutaki: Te tutaki, ko te nooanga e tuatau ua atu ma te rekareka i tetai pirianga meitaki kia Iehova. Ka akamou i to tatou mata ki runga i te tutaki kare e tuku i tetai ua atu tamanata anga me kore anoano kia takino i to tatou akakoro anga
[Au Tutu i te kapi 30, 31]
Akapeea tatou me arai i te au manamanata ngutuare kia kore tatou e ngere i te tutaki? (Akara i te parakarapa 13-15)