Te tu Oronga Maoraora Ua—Ka Anoanoia!

1. Eaa te au turanga ngata tei tupu ki te au Kerititiano i te anere mataiti mua?

I ROTOPU i te au mataiti 62 e te 64, kua tata te apotetoro ko Paulo i “te au tuitarere i pueurikiriki i Ponoto, i Galatia, i Kapadokia, i Asia, e i Bitunia.” (1 Petero 1:1) No te au ngai ke ke mai teia au taeake e te au tuaine. Kua na roto ratou i “te takinga-kino maata,” e kua anoanoia te akamaroiroi anga e te arataki anga. Te noo katoa ra ratou i te tuatau tumatetenga tikai. Tata a Petero: “Kua vaitata ra te openga o te au mea ravarai nei.” I raro ake i te tai ngauru mataiti, ka takoreia a Ierusalema. Eaa te ka tauturu i te au Kerititiano ravarai kia akakoromaki i teia tuatau taitaia?—1 Petero 4:4, 7, 12.

2, 3. Eaa a Petero i akamaroiroi ei i tona au taeake kia oronga maoraora ua? (Akara i te tutu mua.)

² Okotai mea ta Petero i akamaroiroi i te au taeake kia rave “ei oronga to kotou ia kotou rai.” (1 Petero 4:9) Te tuatua Ereni no te “tu oronga maoraora ua,” tona aiteanga “kia akaperepere, me kore kia takinga meitaki i te au tangata ke.” Inara te akamaroiroi ra a Petero i tona au taeake e te au tuaine kia oronga ua “ia kotou rai,” noatu e kua kite takere ratou i tetai e tetai e te angaanga kapiti ra. Akapeea te tu oronga maoraora ua te tauturu anga ia ratou?

³ Ka akavaitata te reira ia ratou ki tetai e tetai. Ka akapeea koe? Te maara ra ainei ia koe i tetai tuatau mataora te pati anga mai tetai ia koe ki tona kainga? E i toou pati anga i tetai ki toou kainga, kua tupu te pirianga vaitata kia korua. Tetai ravenga meitaki no te akamatau i to tatou au taeake e te au tuaine, na te oronga maoraora anga kia ratou. Kua anoanoia te au Kerititiano i to Petero tuatau kia piri vaitata ki tetai e tetai i te au manamanata e kino ua atura. I teia “tuatau openga ra,” ka anoano katoaia tatou kia pera.—2 Timoteo 3:1.

4. Eaa te au uianga ta tatou ka uriuri i roto i teia atikara?

⁴ Eaa te au mataara ka rauka ia tatou i te oronga maoraora ua “ia kotou rai”? Eaa te ka arai ia tatou kia kore e oronga maoraora ua, e akapeea tatou te akamako anga i te reira? Eaa te ka akariro ia tatou ei au manuiri meitaki?

TE AU TUATAU NO TE ORONGA MAORAORA UA

5. Akapeea tatou me oronga maoraora ua i ko i ta tatou au uipaanga Kerititiano?

⁵ I te au uipaanga: Te pati nei a Iehova e tona akaaerenga kia aere tatou ki te au uipaanga. Ka inangaro tatou i te katoatoa kia manako e te akaperepereia ra ratou me aere mai ratou ki te uipaanga, te aronga ou tikai. (Roma 15:7) E au manuiri katoa ratou na Iehova, no reira ka anoanoia tatou kia akono ia ratou, noatu to ratou tu e to ratou kakau. (Iakobo 2:1-4) Me kite koe i tetai manuiri e noo ra koia anake ua, ka pati ainei koe iaia kia noo mai i te pae ia koe? Penei ka rekareka aia me tauturu koe iaia kia mārama eaa te tupu ra i te tuatau o te uipaanga me kore kia akara i te au irava e tatauia ra. E mataara meitaki rava teia no te “akamātau rai i te takinga-meitaki i te tangata ke ra.”—Roma 12:13.

6. Koai ma tikai ta tatou ka tau kia oronga maoraora ua?

⁶ No tetai manga katikati me kore kai manga: I te tuatau Pipiria, e oronga maoraora ana te tangata na te pati anga i tetai ke ki to ratou ngutuare no te kaikai, te inangaro anga i te akataeake ia ratou kia rauka te tu ‘au. (Genese 18:1-8; Te Au Akava 13:15; Luka 24:28-30) Koai ma tikai ta tatou ka tau kia oronga maoraora ua? Ko te au taeake e te au tuaine tikai i roto i ta tatou putuputuanga. I teia akatereanga e kino ua atura, ka anoanoia tatou kia irinaki ki runga i to tatou au taeake e te au tuaine e kia riro ei au taeake tiratiratu no ratou. I te mataiti 2011, kua taui te Pupu Akaaere i te ora o te Apii Punanga Tiaki no te ngutuare Betela i Marike mei te 6:45 p.m. ki te 6:15 p.m. Eaa te tumu? Kua akakiteia penei e māmā ake no te ngutuare Betela kia āriki e te oronga maoraora ua ki tetai e tetai me akaoti vave te uipaanga. Kua rave katoa tetai au opati manga i teia. Kua riro teia ei atianga meitaki no te ngutuare Betela kia akamatau i tetai e tetai.

7, 8. Akapeea tatou me oronga maoraora ua ki te au vaa tuatua tei atoro mai ia tatou?

⁷ Tetai taime, e oronga ana te au taeake no roto mai i te au putuputuanga ke, te au akaaere kotinga, e te au vaa tuatua o Betela, i tetai ako anga. Ka rauka ainei ia tatou i te taangaanga i teia au atianga kia oronga maoraora ua ki to tatou au taeake? (E tatau ia 3 Ioane 5-8.) Okotai mataara ka rauka koia oki kia pati ia ratou ki to tatou kainga no tetai manga katikati me kore kai manga.

⁸ Maara i tetai tuaine i Marike: “I te au mataiti i topa, kua rauka ia maua ko taku tane i te oronga maoraora ua i to maua kainga ki te au vaa tuatua e ta ratou vaine.” Kua kite aia i te reira tuatau ravarai ei akamaroiroi anga i to raua akarongo ma te rekareka. Karanga aia: “Kare rava maua i tataraara ana i te reira.”

9, 10 (a) Koai ma te ka anoanoia kia noo mai kia tatou no tetai tuatau roa? (e) Ka rauka ainei i te aronga e ngutuare meangiti to ratou i te tauturu? Oronga mai i te akaraanga.

⁹ Te au manuiri tei noo roa mai: I te tuatau Pipiria, e mea matauia kia oronga i te ngai nooanga ki te au manuiri. (Iobu 31:32; Philemona 22) I teia tuatau, ka anoano katoaia tatou kia pera. Te maata anga o te taime ka anoano te au akaaere kotinga i te ngai nooanga me atoro ratou i te au putuputuanga. Pera katoa te aronga apii o te au apii orometua e te aronga tauturu i te patu are. Akapeea te aronga kare o ratou ngutuare i muri ake i tetai tumatetenga natura? Penei ka anoano ratou i tetai ngai nooanga e tae ua atu ki te taime e oti mai ei to ratou are i te akatu akaouia. Auraka tatou e manako e ko te aronga anake ua e are mamaata to ratou te ka tauturu. Penei kua rave takere ratou i te reira no tetai tuatau roa i mua ana. Ka rauka ainei ia koe i te akatuera i toou ngutuare ei ngai nooanga, noatu e meangiti ua te reira?

¹⁰ Maara i tetai taeake i Korea Apatonga te nooanga te aronga apii orometua ki tona kainga. Tata aia: “Kua manga emiemi au no te mea e nga tokorua akaipoipo ou maua, e e ngutuare meangiti ua to maua. Inara kua riro teia ei atianga mataora te nooanga mai te aronga apii ki to maua kainga. Ei nga tokorua akaipoipo ou, kua kite maua mei teaa te mataora me tavini ratou ia Iehova e te aruaru kapiti i te au akakoroanga pae vaerua.”

11. No teaa te aronga ou i taau putuputuanga ka anoano ei i te tu maoraora ua?

¹¹ Te au taeake e te au tuaine ou i roto i te putuputuanga: Penei ka neke tetai au taeake e te au tuaine me kore te ngutuare tangata mei ta ratou putuputuanga ki toou ngai. Penei kua aere mai ratou no te mea te anoanoia ra te tauturu i roto i taau putuputuanga. E penei e au painia ratou tei tonoia ki taau putuputuanga. E taui anga maata teia no ratou. Penei ka anoanoia ratou kia akatano ki tetai ngai ou, tetai putuputuanga ou, e penei tetai reo ou me kore peu. Ka rauka ainei ia koe i te pati ia ratou no tetai manga katikati, kai manga, e te aaere kapiti ki tetai ngai? Ka tauturu teia ia ratou kia rauka te au taeake ou e te akatano ia ratou uaorai ki te au turanga ou.

12. Eaa te tupuanga te akaari maira kare koe e anoanoia kia akapapa i te au mea e manganui no te oronga maoraora ua?

¹² Kare koe e anoanoia kia akapapa i te au mea e manganui kia oronga maoraora ua ki tetai ke. (E tatau ia Luka 10:41, 42.) Maara i tetai taeake tei tupu, te riro anga mai raua ko tana vaine ei mitinari. Karanga aia: “E mapu ua maua, te karape kore, e te mii ra i to maua enua anau. I tetai aiai, kua mii taku vaine i tona enua anau, e noatu taku tauta anga kare te reira i akamaru mai iaia. I reira, i te 7:30 p.m., kua topapa mai tetai i te ngutupa. Te tu ra tetai vaine apii Pipiria e toru ana anani. Kua aere mai aia ma te āriki i teia nga mitinari ou. Kua pati maua iaia ki roto i te are e kua oronga i tetai karati vai nona. I reira kua maani maua i te kapu ti e te koko. Kare maua i kite ake i te reo Swahili, e kare aia i kite i te reo Papaa.” Karanga te taeake, kua riro teia ei tauturu ia raua kia akaoa ki te au taeake o te reira ngai e kua tupu te mataora.

AURAKA KOE E AKAMUTU I TE ORONGA MAORAORA UA

13. Akapeea te tu maoraora ua me tauturu ia koe?

¹³ Kua emiemi ana koe i te oronga maoraora ua? Me koia ia, penei kua ngere koe i tetai atianga rekareka e kia rauka te au oa ou. Na te oronga maoraora ua anga, ko te ravenga meitaki rava atu teia no te akakore i te maromaroa. No reira eaa tetai ka emiemi ei i te oronga maoraora ua? E au tumu takake tetai.

14. Eaa ta tatou ka rave me kare e rava ana to tatou taime e te maroiroi no te akaari e te āriki i te tu oronga maoraora ua?

¹⁴ Te taime e te maroiroi: E maata te angaanga a te iti tangata o Iehova e e maata te au apainga. Penei ka akamanako tetai pae kare e rava ana to ratou taime me kore maroiroi no te oronga maoraora ua. Me te manako ra koe i teia, penei ka anoanoia koe kia taui i taau akapapaanga e rauka ai i te akaari e te āriki i te tu oronga maoraora ua. E mea puapinga teia no te mea te akamaroiroi ra te Pipiria ia tatou kia oronga maoraora ua. (Ebera 13:2) No reira e mea tau kia akaari i te tu oronga maoraora ua. Inara kia akaari i te tu maoraora ua, penei ka anoanoia koe kia akameangiti mai i taau akapou anga ki runga i te au mea puapinga kore.

15. Eaa tetai pae ka manako ei e kare e rauka ia ratou kia oronga maoraora ua?

¹⁵ Toou manako ia koe uaorai: Kua inangaro ana ainei koe i te oronga maoraora ua, inara kua manako e kare e rauka ia koe? Penei e akama toou e te manata e ka maromaroa te au manuiri. Penei kare e rava ana taau moni, e kua manata e kare e rava ana taau ka oronga ki taau manuiri mei ta tetai au taeake e te au tuaine rai. Inara kia akamaara kare to tatou ngutuare e anoanoia kia purapura. Ka mataora ua taau manuiri i toou kainga mā e te mako, e toou tu oaoa.

16, 17 Eaa taau ka rave me apiapi koe i te akono i te manuiri?

¹⁶ Me te apiapi ra koe no te akono i te au manuiri, te pera katoa ra tetai pae. Akakite tetai tangata pakari i Peritane: “Tetai taime ka tupu te ru no te akapapa no te au manuiri. Inara me akaaiteia ki te tavini anga ia Iehova, e maata atu te au puapinga e te mareka anga te ka tupu i tetai ua atu tu apiapi. Kua rekareka tikai au i te noonoo ua ma taku au manuiri ia matou e inu kaope ra e te pukapuka.” E mea meitaki ua ana rai te akono i taau manuiri. (Philipi 2:4) E reka ana te maata anga o te tangata i te pukapuka i te au mea tei tupu i to ratou oraanga. Penei ka rongo anake tatou i to ratou tua, me aravei kapiti tatou. Tata tetai tangata pakari: “Me aere mai te au taeake mei te putuputuanga ki toku kainga, ka tauturu iaku kia mārama meitaki atu ia ratou, e ka rauka te tuatau kia kite meitaki ia ratou, i te taime tikai i āriki ei i te tuatua mou.” Me akono koe i taau manuiri, papu e ka rekareka te katoatoa i te reira.

¹⁷ Akakite tetai tuaine painia e putuputu ana te aronga apii orometua i te noo ki tona kainga: “I te akamata anga kua manata tikai au no te mea kare toku kainga e manea roa ana e e au nooanga takere toku. Kua riro te vaine a tetai o te au puapii ei akamaru mai iaku. Karanga aia, me tavini raua ko tana tane i te angaanga tutaka, te au tuatau mataora roa atu koia oki te nooanga ki te aronga pae vaerua kare e maata ana ta ratou apinga, inara aiteite ua te manako—te tavini anga ia Iehova ma te oraanga māmā ua. Kua akamaara mai teia i ta toku mama i karanga mai i to matou tamariki anga: ‘Meitaki ïa kai anga i te kai kinaki kore ra ma te aroa.’” (Maseli 15:17) Kare e anoanoia kia manamanata, no te mea ko te aroa te mea puapinga kia akaari ki ta tatou au manuiri.

18, 19 Akapeea te tu oronga maoraora ua me tauturu ia tatou kia akakore i te au manako tau kore no tetai ke?

¹⁸ Toou manako i tetai ke: E aronga ainei tetai i taau putuputuanga tei akariri ia koe? Me kare koe e tauta i te akakore i toou au manako tau kore, kare te reira e taui. Penei kare koe e inangaro i te pati i tetai ki toou kainga me kare koe e reka ana i tona tu. Penei te vaira tetai tei tamamae ia koe i te tuatau i topa, e ngata ia koe i te akangaropoina.

¹⁹ Te karanga ra te Pipiria e ka rauka ia koe i te akameitaki atu i toou pirianga ki tetai ke, pera katoa toou au enemi, me oronga maoraora ua koe. (E tatau ia Maseli 25:21, 22.) Me pati koe i tetai ki toou kainga, penei ka rauka ia koe te akakore i te au manako tau kore e kia akatupu i tetai pirianga ‘au kiaia. Penei ka akamata koe i te kite i te au tu meitaki i roto iaia ta Iehova i kite i Tona akavaitata anga iaia ki te tuatua mou. (Ioane 6:44) Me akakeu te aroa ia koe kia pati i tetai tei kore i tapapa mai i te reira, ko te akamata anga te reira o te pirianga oa meitaki. Akapeea koe e papu ei ko te aroa te akakoroanga tikai? Okotai mataara, koia oki ko te taangaanga i te akoanga ia Philipi 2:3: “Ei ngakau akaaka ra, i te manako akameitaki atu tetai ki tetai, auraka iaia uaorai.” Kia akamaara tatou i te au mataara no te akameitaki atu tetai ki tetai, auraka ia tatou uaorai. Penei ka rauka te apiianga mei to ratou akarongo, tu akakoromaki, e tetai atu tu Kerititiano ke. Na te akamanako anga i to ratou au tu meitaki, ka akamaata atu i to tatou aroa no ratou, e ka māmā atu i te oronga maoraora ua.

KIA RIRO EI MANUIRI MEITAKI

20. No teaa e akapeea e rauka ai kia irinakiia tatou me kua āriki tatou i tetai patianga?

²⁰ Kua ui te tata Salamo ko Davida: “Koai, e Iehova, te ka tuitarere i toou ra puakapa?” (Salamo 15:1) I muri ake i te reira, kua uriuri a Davida i te au tu ta Iehova ka inangaro kia rauka i tana au manuiri. Tetai o teia, kia rauka te irinaki: “Ko tei taputou ra, kino uaʼi aia uaorai, kare e taeke ua.” (Salamo 15:4) Me āriki tatou i tetai patianga, auraka tatou e akatau i te reira naringa e ka anoano tikaiia te reira. Penei kua akapapa takere te pu kainga i to tatou atoro anga, e me akatau tatou, ka kaimoumou i tona maroiroi. (Mataio 5:37) Tetai pae ka akatau ratou i te patianga mua kia rauka i te āriki i te patianga meitaki atu. E tu aroa ainei teia e te akangateitei? Kia rekareka ua tatou ta te pu kainga i oronga mai. (Luka 10:7) Me ka akatau tatou, e tu aroa e te manako meitaki i te akakite vave ki te pu kainga.

21. Akapeea ta tatou akangateitei anga i te au peu enua o te reira ngai te akariro anga ia tatou ei au manuiri meitaki?

²¹ E mea puapinga katoa kia akangateitei i te au peu o te reira ngai. I tetai au peu enua, ka ārikiia te au manuiri kare i patiia. I tetai taime, e mea meitaki i te rave i te au akanoonooanga i mua ake ka atoro ei tatou. I tetai au ngai, ka oronga te pu kainga i te au kai memeitaki rava ki tana au manuiri, i mua ake i tona uaorai ngutuare. I tetai ngai ke, aiteite ua te katoatoa. I tetai au ngai, ka apai mai te au manuiri i te kai ei tauturu. I tetai atu au ngai, kare te au pu kainga e inangaro i ta ratou manuiri kia apai mai i tetai apinga. I tetai au peu, ka patoi maru ua te au manuiri i te patianga mua me kore te rua. Inara i tetai au ngai, e mea tau kore kia kore e āriki i te patianga mua. Kia akapapu ua rai tatou e kua mataora te pu kainga no tei pati mai ia tatou.

22. No teaa i puapinga rava ai “ei oronga to kotou ia kotou rai”?

²² Karanga a Petero: “Kua vaitata ra te openga o te au mea ravarai nei.” (1 Petero 4:7) I teia rā, te aro atura tatou i te mate maata rava atu o teianei ao. I teia akatereanga e kino ua atura, ka anoanoia tatou kia rauka te aroa maata no to tatou au taeake e te au tuaine. Ka anoanoia ta Petero akoanga i teia taime tikai: “Ei oronga to kotou ia kotou rai.” (1 Petero 4:9) Ae, e tuanga mataora e te anoanoia te tu oronga maoraora ua i teianei, e tuatau ua atu.