Akamaroiroi i Tetai e Tetai “Kia Maata Atu Rai te Maroiroi”
“E akono marie rai tatou tetai ki tetai . . . , ka akamaroiroi ra, e kia maata atu rai te maroiroi, no te mea te akara na kotou i taua rā ra i te vaitata anga mai.”—EBERA 10:24, 25.
1. Eaa te apotetoro ko Paulo i raurau ei i te au Kerititiano Ebera mua kia akamaroiroi i tetai e tetai “kia maata atu rai te maroiroi”?
I TE anere mataiti mua, kua oronga te apotetoro ko Paulo i teia akoanga ki te au Kerititiano i Ebera: “E akono marie rai tatou tetai ki tetai, ka akamaroiroi atu ei kia maata te aroa, e i te angaanga memeitaki ra: Auraka e akaruke i to tatou akaputuputu anga mei ta tetai aronga, ka akamaroiroi ra, e kia maata atu rai te maroiroi, no te mea te akara na kotou i taua rā ra i te vaitata anga mai.” (Ebera 10:24, 25) Penei kua manako te au taeake eaa ra a Paulo i akakite ei kia ratou kia akamaroiroi maata atu i tetai e tetai. E rima mataiti i muri mai, kua taka meitaki te tumu. I tera tuatau, kua kite mai ratou e kua vaitata te rā akavaanga o Iehova ki runga ia Ierusalema. Kua anoanoia ratou kia oro ki vao i te oire mei ta Iesu i akakite kia ratou. (Luka 21:20-22; Angaanga 2:19, 20) Kua tae mai te rā o Iehova i te mataiti 70, te takore anga a Roma ia Ierusalema.
2. No teaa ra tatou ka akamanako maata atu ei i te akamaroiroi i tetai e tetai i teia tuatau?
2 I teia tuatau, tei roto tatou i tetai turanga mei te reira rai te tu. Te vaitata maira “te rā o Iehova, e te rikarika maata.” (Ioela 2:11) Kua tau rai te tuatua a te peroveta ko Zephania ki to tatou tuatau: “Kua vaitata te rā maata o Iehova, kua vaitata, e te rapurapu roa maira.” (Zephania 1:14) No teia tumu, ka anoanoia kia “akono marie rai tatou tetai ki tetai, ka akamaroiroi atu ei kia maata te aroa, e i te angaanga memeitaki ra.” (Ebera 10:24) Ka anoanoia tatou kia akamanako ua rai i to tatou au taeake no te akamaroiroi ia ratou me anoanoia te reira.
KOAI MA TE KA ANOANO KIA AKAMAROIROIIA?
3. Eaa ta te apotetoro ko Paulo i tuatua no runga i te akamaroiroi anga? (Akara i te tutu mua.)
3 “E aue tei te ngakau o te tangata ra, e piko ïa ki raro: okotai rava ra tuatua meitaki ra, rekareka akera ïa.” (Maseli 12:25) Ka anoano rai tatou pouroa i tetai akamaroiroi anga i tetai au taime. Kua akataka mai a Paulo e ko te aronga e apainga ta ratou no te akamaroiroi i tetai ke, ka anoano katoaia tetai akamaroiroi anga no ratou. Tata aia ki tona au taeake i Roma: “E anoano maata toku kia kite atu ia kotou, kia tuku au i ta te vaerua ia kotou, kia akatinamouia kotou: Kia pumaana oki au e kotou katoa i to tatou akarongo, i to kotou e i toku katoa oki.” (Roma 1:11, 12) No reira kua anoano rai te apotetoro ko Paulo i tetai akamaroiroi anga i tetai au taime.—E tatau ia Roma 15:30-32.
4, 5. Koai ma ta tatou ka akamaroiroi i teia tuatau, e eaa te tumu?
4 I teia tuatau, ka rauka ia tatou i te akamaroiroi i te aronga e tavini tamou ra ia Iehova, mei te au painia tiratiratu rai. Kua akaatinga te maata anga ia ratou i te au mea ta ratou e reka ana i te oraanga kia rauka i te painia. Kua pera katoa te au mitinari, au taeake i Betela, au akaaere kotinga e ta ratou vaine, e te au taeake i roto i te opati uri reo. Kua akaatinga teia aronga katoatoa kia rauka i te akamaata i to ratou taime no te tavini ia Iehova. No reira ka tau rai kia akamaroiroi tatou ia ratou. E maata katoa tei inangaro ua atu rai i te tavini tamou inara kare e rauka akaou. Ka mataora katoa ratou me akamaroiroiia ratou.
5 Koai atu tetai ka tau kia akamaroiroiia? Ka rauka ia tatou i te akamaroiroi i te au taeake e te au tuaine tei iki i te noo kare e akaipoipo no te mea kua akarongo ratou kia Iehova e ka akaipoipo ua “kia tau ra i te Atu.” (1 Korinetia 7:39) Ka akamaroiroiia te au vaine akaipoipo me tuatua ta ratou tane e te inangaroia ra ratou, e te mataora ra i ta ratou i rave. (Maseli 31:28, 31) Ka anoano katoaia te au Kerititiano tei akakoromaki i te au takinokino anga me kore te turanga maki, i tetai akamaroiroi anga. (2 Tesalonia 1:3-5) Ka akapumaana a Iehova raua ko Iesu i teia aronga tiratiratu.—E tatau ia 2 Tesalonia 2:16, 17.
KA AKAMAROIROI TE ARONGA PAKARI IA TATOU
6. Eaa ta tatou i kite no runga i te angaanga a te aronga pakari tei taikuia ia Isaia 32:1, 2?
6 E tatau ia Isaia 32:1, 2. E tuatau ngata teia e noo nei tatou e ka māmā ua te tu maromaroa e te tu paruparu i te tupu mai. Ka taangaanga a Iesu Karaiti i tona au taeake akatainuia e te “ui ariki” o te au mamoe ke no te akamaroiroi ia tatou. Kare teia aronga pakari mei roto i te au putuputuanga i te “atu” o to tatou akarongo, mari ra ei “tauturu ra ratou” i to tatou rekareka. Ka tauturu ratou ia tatou kia rekareka e kia vai tiratiratu.—2 Korinetia 1:24.
7, 8. Akapeea te aronga pakari me akamaroiroi i tetai ke na roto i ta ratou ka tuatua e ta ratou ka rave?
7 Ka aru te aronga pakari i te akaraanga o Paulo, tei tauta ua rai i te akamaroiroi i tona au taeake. Tata aia ki te au Kerititiano i Tesalonia tei takinokinoia: “No te maata o to matou aroa ia kotou, kua tika rava ia matou i te oronga atu i te evangelia a te Atua ia kotou na, e auraka oki i te reira anake, ko matou katoa uaorai oki, no te mea kua riro kotou ei akaperepere na matou.”—1 Tesalonia 2:8.
8 Ka rauka i te aronga pakari i te akamaroiroi atu na roto i ta ratou ka tuatua. Inara ka rava ua ainei te reira? Akakite a Paulo ki te aronga pakari i Ephesia: “E turu atu oki kotou i te aronga apikepike, e tika’i, e kia maara oki i te tuatua a te Atua ra a Iesu, ko tana oki i tuatua maira e, ‘E mea meitaki i te oronga atu i te rave mai.’” (Angaanga 20:35) Kua inangaro a Paulo i te “akaope i [tona] nei ririnui e kia ope rava no” tona au taeake. Kua akaari aia na roto i tana angaanga e ka rave aia i tana ka rauka no ratou. (2 Korinetia 12:15) Mei te reira rai, ka akamaroiroi e ka akapumaana te aronga pakari i tetai ke na roto i ta ratou ka tuatua, e ta ratou ka rave. Na teia e akaari mai e te manako tikai maira ratou ia tatou.—1 Korinetia 14:3.
9. Akapeea te aronga pakari me oronga i te ako na roto i te tu akamaroiroi?
9 Ei akamatutu i te au taeake, tetai taime ka anoanoia te aronga pakari kia ako atu. Ka apii te aronga pakari mei te Pipiria akapeea me rave i te reira na roto i te tu akamaroiroi. Kua akanoo a Iesu i tetai akaraanga meitaki tikai no te oronga i te ako, te tuku anga aia i te au karere ki te au putuputuanga i Asia Minora i muri ake i tona matenga e tona tuakaouanga. E akoanga pakari tikai tana no te putuputuanga i Ephesia, Peregamo, e Tuatira. Inara i mua ake ka ako atu ei aia, kua akameitaki aia ia ratou no te au angaanga meitaki pouroa ta ratou e rave ra. (Apokalupo 2:1-5, 12, 13, 18, 19) Akakite a Iesu ki te putuputuanga i Laodikea: “Ko taku katoa e akaperepere ra, ko taku ïa e ako e e pāpā oki: e tenana e akamaroiroi, e e tataraara.” (Apokalupo 3:19) Ka tauta te aronga pakari i te aru i te tu o Karaiti me oronga i te akoanga.
KARE NA TE ARONGA PAKARI UA E AKAMAROIROI I TETAI KE
E te au metua, te tereni ainei kotou i ta kotou tamariki kia akamaroiroi i tetai ke? (Akara i te parakarapa 10)
10. Akapeea tatou pouroa me akamaroiroi i tetai e tetai?
10 Kare ko te aronga pakari ua te ka anoanoia kia akamaroiroi i tetai ke. Kua raurau a Paulo i te au Kerititiano pouroa e ko te “tuatua meitaki ra e tupu ei te meitaki tika ra, e meitaki ei te aronga e akarongo ra.” (Ephesia 4:29) Ka anoanoia tatou tataki tai kia akamanako eaa ta tetai ke e anoano ra, kia rauka ia tatou i te tauturu ia ratou. Tata a Paulo ki te au Kerititiano i Ebera: “E apai i te rima i tautau ana ki raro ra i runga, e e akapakari i te turi paruparu; e akatika ua oki i te ara o to kotou vaevae, kia kore e tungongi ke te pirikoki, kia akaoraia ra.” (Ebera 12:12, 13) Ka rauka ia tatou pouroa i te akamatutu e i te akamaroiroi i tetai e tetai na roto i ta tatou ka tuatua, noatu me e tamariki ua tatou.
11. Eaa tei tauturu ia Marthe i tona tuatau taitaia?
11 Kua taitaia tikai te tuaine ko Marthe no tetai tuatau.a (Akara i te tataanga rikiriki i raro.) Tata aia: “I tetai rā e pure ra au no tetai akamaroiroi, kua aravei au i tetai tuaine pakarikari tei akaari mai i te tu aroa e te takinga meitaki kiaku. Kua akakite katoa mai aia i tei tupu kiaia mei taku rai e na roto nei, e kua pumaanaia au.” Kare paa tera tuaine i kite e kua riro tana tuatua i te tauturu ia Marthe!
12, 13. Akapeea tatou me taangaanga i te ako ia Philipi 2:1-4?
12 Tata a Paulo ki te au Kerititiano i Philipi: “E teianei e manga maanaana tei te Mesia ra, e manga rekareka tei te aroa, e manga tauanga to te vaerua, e manga aroa ngakau e te takinga-meitaki, ka akarava mai kotou i toku nei rekareka, i te tavaitai anga i to kotou manako, ma te inangaro okotai, ma te kapitianga o to kotou ngakau, i te akono anga i te tuatua okotai ra. Auraka takiri e mea e raveia ma te taumāro, e te akanengonengo puapinga kore; ei ngakau akaaka ra, i te manako akameitaki atu tetai ki tetai, auraka iaia uaorai. Auraka te tangata e akono i tona anake uaorai au mea, e akono katoa ra i to etai ke ra au mea.”—Philipi 2:1-4.
13 Ka kimi tatou pouroa i tetai ravenga no te tauturu atu i tetai e tetai. Kia oronga tatou e “manga rekareka tei te aroa, e manga tauanga to te vaerua, e manga aroa ngakau e te takinga-meitaki” ei akamaroiroi i to tatou au taeake e te au tuaine.
AU RAVENGA NO TE AKAMAROIROI ATU
14. Eaa tetai ravenga no te akamaroiroi atu?
14 Ka mataora tatou me akarongo e kua vai tiratiratu te aronga ta tatou i tauturu i mua ana. Tata te apotetoro ko Ioane: “Kia kite au e, te aere ra taku au tamariki na te tuatua-mou, kare oku e rekareka anga maata atu.” (3 Ioane 4) Ka mataora te au painia me kite ratou e ko tetai tangata ta ratou i tauturu ana kia kite i te tuatua mou, te tavini tiratiratu nei rai ia Iehova, penei te painia ra ratou. No reira me maromaroa tetai painia, ka rauka ia tatou i te akamaara kia ratou i te meitaki ta ratou i rave no te tauturu i tetai ke.
15. Eaa ta tatou ka rauka i te rave no te akamaroiroi i te aronga e tavini tiratiratu ra?
15 E maata te au akaaere kotinga tei tuatua e kua akamaroiroiia ratou e ta ratou vaine te orongaia anga tetai reta akameitakianga me atoro ratou i te au putuputuanga. E tika katoa teia ki te aronga pakari, au mitinari, au painia, e te au taeake i Betela, ko ratou pouroa te tavini tiratiratu ra ia Iehova. Na te akameitakianga ia ratou, penei ka riro te reira i te akamaroiroi maata atu ia ratou.
KA RAUKA IA TATOU POUROA I TE AKAMAROIROI ATU
16. Eaa te mea māmā rava atu no te akamaroiroi i tetai tangata?
16 Akapeea i reira me e ngata ia koe i te akakite ki tetai ke i toou manako no runga ia ratou? Te tika, kare i te mea ngata i te akamaroiroi i tetai ke. E akaari i toou mata katakata ki tetai ua atu tangata. Me kare ratou e katakata mai, penei e manamanata to ratou e ka inangaro i te tuatua ki tetai tangata. Ka rauka i reira ia koe i te akapumaana ia ratou na te akarongo ua anga kia ratou.—Iakobo 1: 19.
17. Eaa tei akamaroiroi i tetai taeake mapu?
17 Kua maromaroa tikai tetai taeake mapu ko Henri te akamutu anga te maata anga o tona kopu tangata i te tavini ia Iehova. Ko tona metua tane tetai, tei tavini ana ei tangata pakari. Kua kite mai tetai akaaere kotinga i tona tu maromaroa e kua apai iaia no te inu kaope. Kua akarongo meitaki aia ki to Henri manako. Kua kite mai a Henri e ko te ravenga anake i te tauturu i tona pamiri kia oki mai ki te tuatua mou, koia oki kia vai tiratiratu ua rai aia. Kua akapumaana katoaia aia na te tatau anga ia Salamo 46, Zephania 3:17, e Mareko 10:29, 30.
Ka rauka ia tatou pouroa i te akamatutu e te akamaroiroi i tetai e tetai (Akara i te parakarapa 18)
18. (a) Eaa ta te Ariki ko Solomona i tata no runga i te akamaroiroi anga? (e) Eaa ta te apotetoro ko Paulo i tamanako mai?
18 Eaa ta tatou i apii mai mei te akaraanga o Marthe e Henri? Ka rauka i tetai ua atu ia tatou i te akapumaana e te akamaroiroi i tetai taeake me kore tuaine me anoano aia i te reira. Tata te Ariki ko Solomona: “Te tuatua ra i tuatuaia i te tuatau e tau ei, e meitaki roa ïa. Te rekareka nei te ngakau me mārama te mata: e matuia te ivi i te rongo meitaki ra.” (Maseli 15:23, 30) Kua kite ainei koe i tetai tangata kua maromaroa me kore kua taitaia? Eaa ka kore ei e rave i tetai mea māmā ua na te tatau anga kiaia mei Te Punanga Tiaki me kore ta tatou website? Pera katoa, kua apii mai a Paulo e mea meitaki kia imene kapipiti tatou i te au imene Patireia. Tata aia: Kia maata “te apii anga e te ako anga tetai ki tetai ma te salamo e te imene e te pe’e a te vaerua, i te imene anga ma te aroa ua i roto i to kotou ngakau i te Atu.”—Kolosa 3:16; Angaanga 16:25.
19. Eaa ra ka puapinga maata atu ei te akamaroiroi anga, e eaa ta tatou ka rave?
19 Ia tatou e vaitata atura ki te rā o Iehova, ka riro i reira ei mea puapinga atu no tatou kia akamaroiroi i tetai e tetai. (Ebera 10:25) Ka mataora tatou me rave tatou i ta Paulo i ako mai: “E akapumaana kotou tetai ki tetai, e akatupu i te meitaki tetai ki tetai, mei ta kotou rai oki e rave nei.”—1 Tesalonia 5:11.
a Kua tauiia te ingoa.