Inangaro a Iehova i te Aronga Tei ‘Uua i te ua’ ma te Tamou Marie

1, 2. (a) Eaa ra tatou ka akamaroiroiia ai e te au taeake e te au tuaine tei tutu aere ua i te au ngai kare te maata anga e akarongo mai? (Akara i te tutu mua.) (e) Eaa ta Iesu i tuatua no te tutu aere anga “i tona uaorai enua”? (Akara i te tataanga rikiriki i raro.)

SERGIO E OLINDA, e tokorua painia raua i Marike. E 80 tuma o raua mataiti. E te ngata nei ia raua te aaere no te mamae i to raua vaevae. Inara, mei tei matauia no tetai tuatau, ka aaere raua ki tetai ngai e aere putuputu ana te tangata i te ora itu i te popongi. Ka tu raua i te pae i tetai ngai tapu anga o te bus no te oronga i ta tatou au puka ki te tangata. Ka kopae te maata anga o te tangata ia raua, inara ka tu ua a Sergio e Olinda ma te katakata ki te tangata e akara maira. I te avatea, ka aaere marie ua raua ki te kainga. I tera mai popongi, i te ora itu, ka oki akaou raua ki te ngai tapu anga o te bus. Ka tutu aere raua e ono popongi i te epetoma, i te mataiti katoa.

² Mei ia Sergio e Olinda, e manganui te au taeake e te au tuaine tiratiratu tei tutu aere ana i to ratou oire no tetai tuatau roa, noatu kare te maata anga o te tangata e akarongo mai. Penei te tutu aere ra koe ki tetai ngai mei teia te tu. Me koia ia, ka akameitaki matou ia koe, no te mea te tamou marie ra koe i te tutu aere noatu te tu ngata.a (Akara i te tataanga rikiriki i raro.) Te riro ra toou akaraanga ei akamaroiroi i te au taeake e te au tuaine, pera katoa te aronga tukatau. Karanga tetai akaaere kotinga: “Me tutu aere au ma te au taeake e te au tuaine tiratiratu, ka riro ratou i te akamaroiroi mai iaku.” “Kua riro to ratou tu tiratiratu i te akamaroiroi iaku kia rave ua rai ma te ngakau toa i taku angaanga tutu aere.” “Kua riro to ratou akaraanga i te akapumaana i toku ngakau.”

3. Eaa te au uianga e toru ta tatou ka uriuri, e no teaa ra?

³ I teia atikara ka pau tatou e toru uianga: Eaa tatou ka akaparuparu ei i tetai taime? Eaa te aiteanga kia uua i te ua? Eaa te ka tauturu ia tatou kia uua i te ua ma te tamou marie? Na te kite anga i te pauanga ki teia au uianga, ka akamaroiroiia tatou kia rave i te angaanga tutu aere ta Iesu i oronga mai.

EAA RA TATOU KA AKAPARUPARU EI?

4. (a) Eaa to Paulo manako no te tu kino o te ngati Iuda? (e) Eaa a Paulo i manako ei mei teia te tu?

⁴ Kua akaparuparu ainei koe no te mea kare te tangata i toou ngai e inangaro i te akarongo mai ki te karere o te Patireia? Me koia ia, ka mārama koe i to Paulo manako. E 30 ona mataiti te tutu aere anga, e e maata tana aronga i tauturu kia riro mai ei au Kerititiano. (Angaanga 14:21; 2 Korinetia 3:2, 3) Noatu ra, kare i rauka iaia i te tauturu i te au ngati Iuda pouroa kia riro mai ei au Kerititiano. No te mea kare te maata anga i akarongo kia Paulo, e kua takinokino tetai pae iaia. (Angaanga 14:19; 17:1, 4, 5, 13) Eaa to Paulo manako no teia tu kino? Karanga aia: “E aue maata toku, e te mamae tukutuku kore i roto i toku ngakau.” (Roma 9:1-3) Eaa aia i manako ei mei teia te tu? No te mea e inangaro maata tona i te tangata e te angaanga tutu aere. E inangaro tikai to Paulo i te ngati Iuda e kua maromaroa te kopae anga ratou i te tu tangi aroa o te Atua.

5. (a) Eaa te ka akakeu ia tatou kia tutu aere? (e) Eaa i riro ei ei mea matau kia akaparuparu i tetai taime?

⁵ Mei ia Paulo rai, ka tutu aere tatou ki te tangata no to tatou inangaro ma te tauturu atu ia ratou. (Mataio 22:39; 1 Korinetia 11:1) Kua kite tatou e ko te tavini anga ia Iehova te oraanga meitaki rava atu. E ka inangaro tatou i te tauturu i tetai ke kia kite katoa i tetai oraanga meitaki atu! Ko te tumu teia ka akamaroiroi tatou ia ratou kia apii i te tika no runga ia Iehova e tona akakoroanga no te tangata. Mei te mea te apai ra tatou i tetai apinga aroa manea ma te pati akatenga atu: ‘E āriki i teia ine.’ Me kare ratou e āriki i te apinga aroa, ka ‘mamae to tatou ngakau,’ i na Paulo ei. Ka mamae tatou, kare mei te mea e kare o tatou akarongo, mari ra no te mea e inangaro tikai to tatou i te tangata. Noatu e ka akaparuparu tatou i tetai taime, ka tutu aere ua atu rai tatou. Penei ka akatika tatou ki ta Elena, e painia no tetai 25 tuma mataiti, i karanga: “E ngata tikai iaku i te tutu aere. Noatu ra, kare atu e angaanga taku ka inangaro i te rave.”

EAA TE AITEANGA KIA UUA I TE UA?

6. Eaa te uianga ta tatou ka pau i teianei?

⁶ Eaa tatou ka papu ei e ka puapinga ta tatou angaanga tutu aere noatu te ngai ka tutu aere tatou? Ei pau i teia uianga, ka uriuri tatou e rua akatutuanga ta Iesu i tuatua e ka anoanoia tatou kia ‘uua i te ua.’ (Mataio 13:23) Te akatutuanga mua no runga i te vine.

7. (a) I teia akatutuanga a Iesu, koai tei akatutuia e “te tanu-kai,” “te vine,” e “te au rara”? (e) Eaa te uianga ka anoano katoaia tatou kia pau?

⁷ E tatau ia Ioane 15:1-5, 8. I teia akatutuanga, akamārama a Iesu e ko Iehova “te tanu-kai,” e ko Iesu uaorai “te vine,” e ko tana au pipi “te au rara.”b (Akara i te tataanga rikiriki i raro.) E kua akakite a Iesu ki tana au apotetoro: “Ko te mea ïa e akakakāiaʼi taku Metua, kia maata to kotou ua anga; e riro kotou ei pipi naku i reira.” Eaa i reira te aiteanga kia uua i te ua? I teia akatutuanga, kare a Iesu i tuatua tikai ana eaa te ua, inara kua oronga mai aia i te manako te ka tauturu ia tatou kia kitea te pauanga ki teia uianga.

8. (a) I ta Iesu akatutuanga, eaa te tumu kare te aite anga o te ‘uua i te ua’ e ko te akariroanga ei au pipi ou? (e) Eaa te tika no runga i ta Iehova ka pati mai ia tatou kia rave?

⁸ Karanga a Iesu no tona Metua: “E te au rara ua kore katoa i roto iaku nei, nana ïa e tipu ke atu.” Mei tera te tu, ka riro tatou ei au tavini anake no Iehova me uua tatou i te ua. (Mataio 13:23; 21:43) No reira i teia akatutuanga, kare te aiteanga o te uua i te ua e ko te akariroanga i te tangata ei au pipi. (Mataio 28:19) Naringa i pera, kua aite te Au Kite tiratiratu tei kore i tauturu i tetai kia riro ei pipi na Iesu, ei au rara kare i uua i te ua. Inara kare teia i tika! Eaa te tumu? No te mea kare tatou e māro i te tangata kia riro mai ei pipi. E tu aroa to Iehova. Kare rava aia e pati ia tatou kia rave i tetai mea kare e rauka ia tatou. Ka pati anake ua aia i ta tatou ka rauka.—Deuteronomi 30:11-14.

9. (a) Akapeea tatou me uua i te ua? (e) Eaa ta tatou akatutuanga ka uriuri i teianei?

⁹ Eaa i reira, te aiteanga kia uua i te ua? Papu e mea teia ka rauka pouroa ia tatou i te rave. Eaa te angaanga ta Iehova i oronga ki tona au tavini katoatoa? Ko te tutu aere anga i te nuti meitaki o te Patireia o te Atua.c (Akara i te tataanga rikiriki i raro.) (Mataio 24:14) Te akataka meitakiia ra teia i roto i ta Iesu akatutuanga no te tangata ruru ua. Ka uriuri tatou i teia akatutuanga.

10. (a) Eaa te ua e te one i roto i ta Iesu akatutuanga? (e) Eaa ta te sitona ka uua mai?

¹⁰ E tatau ia Luka 8:5-8, 11-15. I roto i te akatutuanga o te tangata ruru ua, kua akamārama a Iesu i te ua e ko “te tuatua a te Atua,” me kore ko te karere o te Patireia o te Atua. Ko te one, e ngakau te reira o te tangata. Ko te ua tei topa ki runga i te one meitaki kua tupu te aka, kua puera, e kua riro mai ei tumu rakau. “E uua atura, taki tai anere i te ua okotai.” Naringa e e sitona te reira, eaa tana tu ua ka uua mai? E au sitona rikiriki ainei? Kare, ka uua mai te reira i te au ua, i muri akera ka tupu mai ei sitona. I teia akatutuanga, ka uua mai e 100 ua i roto i te ua okotai. Eaa ta teia e apii maira ia tatou no te angaanga tutu aere?

11. (a) Eaa ta te akatutuanga o te tangata ruru ua e apii maira ia tatou no te angaanga tutu aere? (e) Akapeea tatou me uua i te ua ou?

¹¹ Te apii mua anga to tatou metua Kerititiano me kore Au Kite i te Patireia o te Atua, kua aite te reira ki te tanu anga i tetai ua ki roto i te one meitaki. Kua rekareka tikai ratou e kua āriki tatou i te karere. Kua tupu ua atu te reira e tae ua atu ki te taime i uua mai ei te ua. E mei te sitona tei taikuia tei kore i uua mai i te sitona, inara ko te ua ou, kare tatou e uua mai i tetai pipi ou, mari ra te ua ou.d (Akara i te tataanga rikiriki i raro.) Akapeea tatou me rave i teia? Me akakite ua rai tatou i te Patireia o te Atua ki tetai ke, te aite ra te reira ki te akamaata anga e te ruru anga i te ua tei tanuia ki roto i to tatou ngakau. (Luka 6:45; 8:1) No reira me tutu aere ua atu tatou i te karere o te Patireia o te Atua, te ‘uua ra tatou i te ua’ ma te tamou marie.

12. (a) Eaa ta tatou ka apii mai mei te akatutuanga a Iesu no te vine e te tangata ruru ua? (e) Eaa toou manako i teia apiianga?

¹² Eaa ta tatou ka apii mai mei ta Iesu akatutuanga no te vine e te tangata ruru ua? Kua apii tatou e ko te ‘uua i te ua’ kare tona aiteanga e me ka akarongo mai te tangata i te karere. Tona aiteanga, me ka tutu aere ua atu tatou. Kua aite teia kia ta Paulo i akamārama: “E rave tetai e tetai i tana uaorai tutaki e tau i tana uaorai angaanga.” (1 Korinetia 3:8) Ka tutaki a Iehova i ta tatou angaanga, kare no te au tupuanga o ta tatou angaanga. Karanga a Matilda, tei painia no tetai 20 mataiti, “Te rekareka nei au i te kite e ka tutaki a Iehova i to tatou maroiroi.”

AKAPEEA TATOU ME UUA I TE UA MA TE TAMOU MARIE?

13, 14 Kia tau kia Roma 10:1, 2, eaa te au tumu kare rava a Paulo i akamutu ana i te tutu aere?

¹³ Eaa te ka tauturu ia tatou kia ‘uua i te ua’ ma te tamou marie? Ka akara meitaki tatou i te akaraanga o Paulo. Kua kite tatou e kua akaparuparu a Paulo no tei kopae te ngati Iuda i te karere o te Patireia. Inara, kare a Paulo i akamutu ana i te tutu aere kia ratou. Kua akamārama aia i tona manako no te ngati Iuda te na ko anga: “Teia oki te anoano tikai i taku ngakau, e taku nei pure ki te Atua ia Iseraela, kia ora ratou. Ko au te kite ia ratou, e maroiroi to ratou i ta te Atua, kare ra i te maroiroi kite.” (Roma 10:1, 2) No reira eaa a Paulo ka tutu aere ua atu ei?

¹⁴ Mea mua, karanga a Paulo e kua akakeuia aia kia tutu aere ki te ngati Iuda e ko ‘teia oki te anoano tikai i tona ngakau.’ Kua inangaro tikai aia kia ora ratou. (Roma 11:13, 14) Te rua, kua taiku aia i tana “pure ki te Atua ia Iseraela.” Kua pati akatenga a Paulo kia Iehova kia tauturu i te ngati Iuda tataki tai kia āriki i te karere o te Patireia. Te toru, karanga a Paulo: “E maroiroi to ratou i ta te Atua.” Kua kite a Paulo i te meitaki o te tangata e ka rauka ia ratou i te tavini ia Iehova. Kua kite aia e ka rauka i taua ngati Iuda maroiroi ra kia riro mai ei au pipi maroiroi na Karaiti, mei iaia rai.

15. Akapeea tatou me aru ia Paulo? Oronga mai i te au akaraanga.

¹⁵ Akapeea tatou me aru ia Paulo? Mea mua, kia inangaro tikai tatou i te kimi i te aronga “i akonoia no te ora mutu kore ra.” Te rua, ka pati akatenga tatou kia Iehova kia tauturu i te tangata kia akarongo mai me tutu aere tatou kia ratou. (Angaanga 13:48; 16:14) Kua rave a Silvana i te reira, kua painia aia no tetai 30 mataiti. Karanga aia, “I mua ake ka topapa ei au i te ngutupa i toku ngai, ka pure au kia Iehova, ka pati kiaia kia rauka te tu meitaki.” Ka pure katoa tatou kia tauturu mai te au angera kia kimi i te tangata te ka inangaro i te akarongo mai. (Mataio 10:11-13; Apokalupo 14:6) Karanga a Robert, tei painia no tetai 30 tuma mataiti, “E reka tikai i te angaanga kapiti ki te au angera tei kite eaa te tupu ra ki te au ngutuare tangata.” Te toru, ka tauta tatou i te kimi i te meitaki i roto i te tangata te ka inangaro i te tavini ia Iehova. Karanga a Carl, e tangata pakari tei papetitoia no tetai 50 tuma mataiti, “Ka kimi au i tetai akairo meangiti te ka akaari mai i te ngakau tae o tetai tangata, penei tona mata katakata, tu meitaki, me kore tana au uianga oonu.” Me rave tatou i teia au mea, ka ‘uua tatou i te ua,’ ma te tamou marie mei ta Paulo i rave.

“AURAKA E TĀPU UA I TO RIMA”

16, 17 (a) Eaa te apiianga ta tatou ka kite mai mei ia Koheleta 11:6? (e) Akapeea ta tatou angaanga tutu aere me akakeu i te aronga e akara maira ia tatou?

¹⁶ Auraka rava tatou e akangaropoina i te meitaki te ka tupu ki te tangata, noatu me kare ratou e akarongo mai. (E tatau ia Koheleta 11:6.) Te akara ua maira te tangata ia tatou. Te kite ra ratou e e mako to tatou tu akamanea ma te tu oaoa e te maru. Penei ka umere ratou i teia, e a muri akera, penei ka akamata te aronga tei manako kino ana i te manako meitaki mai ia tatou. Kua tupu teia kia Sergio e Olinda.

¹⁷ Karanga a Sergio: “No te maki, kare maua i aere ana ki te angaanga pereoo puka no tetai tuatau. Te oki anga mai maua, kua ui mai te tangata, ‘Noea korua? Ngarongaro korua.’” Katakata a Olinda te karanga anga: “E tarevareva mai ana te aronga akaoro bus e ka kapiki mai, ‘Mako tikai ta korua angaanga!’ Kua pati katoa mai ratou i ta maua makatini.” Kua poitirere tikai a Sergio e Olinda te aere anga mai tetai tangata ki ta raua pereoo, ma te oronga mai i tetai ruru tiare, e te akameitaki mai i ta maua angaanga.

18. No teaa koe ka tauta ei kia ‘uua i te ua’ ma te tamou marie?

¹⁸ “Auraka e tāpu ua i to rima” mei te akakitekite anga i te Patireia o te Atua ki tetai ke, no te mea e tuanga puapinga taau i roto i te angaanga “ei kite no te pa enua ravarai.” (Mataio 24:14) Tei puapinga rava atu, ka rekareka tikai koe i te kite e te mataora maira a Iehova ia koe. Te inangaro ra aia i te aronga pouroa tei ‘uua i te ua’ ma te tamou marie!