Ka Tauturu Ainei te Pipiria ia Koe te Akakore i te Kai Apinga Akakona?

I teia au mataiti, e mirioni ua atu tei matemate mei te kai vairakau e tei piri atu ki te reira, pera te kai apinga akakona. I te tuatau o te maki COVID-19, kua kino atu teia manamanata. Kua riro te pakari o te Pipiria ei tauturu i te manganui kia akakore i te kai apinga akakona. Me ko koe tetai i roto i teia manamanata, ka riro teia ei tauturu ia koe.a

I roto i teia atikara

• Eaa ka aere ei ki te Pipiria no te tauturu kia akakore i te kai apinga akakona?

• E a takainga a te Pipiria ka tauturu ia koe te akakore i te kai apinga akakona

• Te au irava Pipiria te ka tauturu ia koe kia akakore i te kai apinga akakona

• Maata te au tua oraanga: Autuanga i te kai apinga akakona ma te tauturu a te Pipiria

• Te arai ra ainei te Pipiria i te kai vairakau no te akakore i te kai apinga akakona?

• Te arai ra ainei te Pipiria me taangaangaia te au apinga akakona ei vairakau?

Eaa ka aere ei ki te Pipiria no te tauturu kia akakore i te kai apinga akakona?

Kua kite mai te aronga kimikimi e te piri atura te kai apinga akakona ki te maromaroa, te roiroi, te apiapi, e te taitaia. Ka rauka i te Pipiria te tauturu ia koe te akamatutu i te akarongo kia akakoromaki i te au manamanata te taki atura ki te kai apinga akakona. Te akaari maira e ka rauka ia koe tetai pirianga oa ki te Atua. (Salamo 25:14) Ma tona tauturu, ka rauka ia koe te akakore i te au manamanata tei ngata ia koe anake te akakore.—Mareko 11:22-24.

E a takainga a te Pipiria ka tauturu ia koe te akakore i te kai apinga akakona

1. 1. Apii kia kite i te Atua ko Iehova.b (Ioane 17:3) Koia Tei Anga e te Tumu o te mana katoatoa. Tei maata atu, e Metua aia noou i te rangi. Te inangaro ra aia i tetai pirianga vaitata kia koe e kia taangaanga i tona mana ei tauturu ia koe. (Isaia 40:29-31; Iakobo 4:8) E oraanga manea tana e vai maira noou me inangaro koe i tona aroa.—Ieremia 29:11; Ioane 3:16.

2. 2. E pati tauturu kia Iehova. E pure ki te Atua e pati kiaia kia tauturu ia koe te akakore i te kai apinga akakona e kia “tapu [me kore, mā], e tau oki [kiaia].” (Roma 12:1) Na roto i tona vaerua tapu, me kore mana ririnui, ka oronga atu aia i te “mana maata meitaki.” (2 Korinetia 4:7; Luka 11:13) Ka tauturu teia mana maata ia koe kia akamutu i te kai apinga akakona e kia “akatangata ou” te akamareka i te Atua.—Kolosa 3:9, 10.

3. 3. Kia rauka to te Atua au manako. (Isaia 55:9) Ka tauturu aia ia koe “kia akaouia oki [koe i toou] vaerua ra i te ngakau,” me kore kia taui i toou au manako, te ka tauturu ia koe kia akakore i te kai apinga akakona. (Ephesia 4:23) Ka kitea to te Atua au manako i roto i te Pipiria, no reira e mea puapinga kia tatau koe i te Pipiria i te au rā. (Salamo 1:1-3) E manganui tei puapingaia te rauka anga te tauturu kia mārama i ta te Pipiria e apii maira. (Angaanga 8:30, 31) Te oronga nei te Au Kite o Iehova i tetai uriurianga apii Pipiria kare e tutaki. Te pati katoa nei matou ia koe kia aere mai ki ta matou uipaanga, e akara matatio ana matou i ta te Pipiria e akakite maira e akapeea te taangaanga i te reira ki roto i to matou oraanga.

4. 4. Iki i te au pirianga meitaki. Ka akakeu pakari toou au oa ia koe, ei meitaki me kore ei kino noou, i taau akakore anga i te kai apinga akakona. (Maseli 13:20) Te oronga maira te Atua i te au oa meitaki i rotopu i te aronga tei akamori iaia, e te inangaro ra aia ia koe kia puapinga mei tona pirianga oa. (Salamo 119:63; Roma 1:12) Kia matakite i taau tamataora anga, no te mea te piri atura koe ki te aronga taau e akara ra, e akarongo atura, e tatau ra. E kopae i tetai ua atu apinga te ka akaparuparu i toou anoano kia rave i te mea tau.—Salamo 101:3; Amosa 5:14.

Te au irava Pipiria te ka tauturu ia koe kia akakore i te kai apinga akakona

Philipi 4:13: ‘E tika iaku te au mea ravarai nei ko tei akamaroiroi mai iaku nei.’

“Kite au e kare au e maroiroi ana te akamutu i te kai apinga akakona, no reira kua pure tauturu au ki te Atua. Kua oronga mai aia i te maroiroi tei anoanoia.”—Patrizia, no Italy.

Maata te au tua oraanga: Autuanga i te kai apinga akakona ma te tauturu a te Pipiria

Joseph Ehrenbogen, kua utuutuia mai aia ma te oraanga ta ua e te kona kava, kai kava, kai marijuana, e te heroin. E maata te taime kua vaitata aia i te mate no te kai kino i te apinga akakona. E tai irava Pipiria tei akakeu iaia kia taui. Tatau i tona tua i roto i te atikara “Apii Mai Au Kia Akangateitei i te Vaine e Iaku Uaorai.”

Dmitry Korshunov, kua ngata iaia te akamutu i tana kai apinga akakona. Akara i te vitio ‘Kare Oku Mataora i Toku Oraanga’ kia kite eaa tei tauturu iaia.

Te arai ra ainei te Pipiria i te kai vairakau no te akakore i te kai apinga akakona?

Kare. Te karanga ra te Pipiria: “Kare no te aronga ora te [taote], no te aronga maki ra.” (Mataio 9:12) Akakite te U.S. National Institute on Drug Abuse e: “E maki kino te kai apinga akakona, noatu te anoano meitaki e te anoano pakari kia akamutu e maata atu tei anoanoia.” Ae, e ririnui atu ta te Atua tauturu ka oronga i to tetai ra anoano. Noatu rai, e maata tei akakore i te kai apinga akakona na te aru anga i te akoanga a te Pipiria kua anoano katoa i te tauturu o te rapakau anga vairakau.c Ei akaraanga, maara i tetai tangata ko Allen e: “Iaku e akakore ra i te kai kava, e kino pakari tikai te kaki kava. Toku kite anga e ka anoanoia rai te rapakau anga vairakau i te pae i te tauturu i te pae vaerua.”

Te arai ra ainei te Pipiria me taangaangaia te au apinga akakona ei vairakau?

Kare. Te tika, te akakite ra te Pipiria e kua taangaangaia te kava ei rapakau i te maki me kore ei akamaru i te mamae o tetai te mate atura. (Maseli 31:6; 1 Timoteo 5:23) Inara, mei te kava, me taangaangaia te vairakau ei akamaru i te mamae ka tupu rai te kaki kino i te reira. No reira, e mea tau kia tapapa atu i te kino ka tupu e kia matakite i te au ua akakore mamae.—Maseli 22:3.