KIA MATAKITE!
Akatupu te Tamaki i Ukraine i te Manamanata o te Kai i Teianei Ao
Ia Me 19, 2022, kua rongo te United Nations Security Council mei te 75 tuma aronga mana teitei e “no te manamanata o te kai i teianei ao, tei akatupuia e te maki kino COVID-19 e te tauianga reva, kua onge takiri atu teianei ao no te tamaki i Ukraine.” I muri mai, kua akakite The Economist e “te akatupu ra teia tamaki i te onge maata i teianei ao.” Kua totou te Pipiria i te manamanata o te kai i to tatou tuatau, inara te oronga katoa maira i te tauturu kia rauka ia tatou i te akakoromaki.
Totou te Pipiria i te manamanata o te kai
Kua totou a Iesu: “E tu mai tetai enua e tamaki mai ki tetai enua, e tetai basileia e tamaki mai ki tetai basileia: e onge oki.”—Mataio 24:7.
Te akakite maira te puka Pipiria o Apokalupo i te akaoro oroenua e ā. Ko tetai o teia akaoro oroenua ko te tamaki. Aru mai i te reira ko te onge, e tuatau akaravarava kai e te oko maata. “Kua kite atu au i tetai oroenua kerekere, e te mou ra tei akaoro i te arite i tona rima. Kua akarongo atu au i tetai reo maata . . . Tei karanga ra e, ‘E okotai arite sitona e tai denari i te ra okotai! E e toru arite kerite e tai denari i te ra okotai.”’—Apokalupo 6:5, 6, Contemporary English Version.
Te akatupuia nei teia au totou Pipiria no te manamanata o te kai i te tuatau te kapiki ra te Pipiria ko “taua tuatau openga ra.” (2 Timoteo 3:1) Kia apii maata atu no runga i “taua tuatau openga ra” e te akaoro oroenua e ā o Apokalupo, e akara i te vitio Kua Taui Teianei Ao Mei te 1914 Mai e e tatau i te atikara “Te Akaoro Oroenua e Ā—Koai ma Ratou?”
Akapeea te Pipiria me tauturu
E maata te au akoanga Pipiria tau te ka tauturu ia tatou kia akakoromaki i teia au turanga ngatā, kapiti mai te oko maata e te rava kore o te kai. Akara i te au akaraanga i roto i te atikara “How to Live on Less.”
Te oronga katoa maira te Pipiria i te manakonakoanga kia tatou e ka meitaki ua atu te oraanga. Te taputou maira i tetai tuatau e “manga sitona okotai rima i ki i te enua nei” e ka maata te kai na te katoatoa. (Salamo 72:16) Kia apii maata atu no runga i te manakonakoanga o te Pipiria no te tuatau ki mua e kia irinaki koe i te reira, e tatau i te atikara “Manakonakoanga Meitaki no te Tuatau ki Mua.”