Eaa te Akakoroanga o te Oraanga?
Te pauanga a te Pipiria
Tukeke te au uianga no te aiteanga o te oraanga. Ei akaraanga, Eaa tatou i ora ai? me kore Eaa te akakoroanga o te oraanga? Akaari mai te Pipiria e ko te akakoroanga o te oraanga koia oki kia rauka tetai pirianga oa ki te Atua. Ka akamanako ana i tetai au tuatua mou puapinga i roto i te Pipiria.
Ko te Atua oki Tei Anga ia tatou. Karanga te Pipiria: “Nana [na te Atua] tatou i anga, e nona oki tatou.”—Salamo 100:3; Apokalupo 4:11.
E akakoroanga to te Atua no tana au mea i anga, kapiti mai ia tatou.—Isaia 45:18.
Kua anga te Atua ia tatou ma te anoano pae vaerua, tei kapiti katoa mai te anoano kia mārama i te akakoroanga o te oraanga. (Mataio 5:3) Ka inangaro aia kia akamerengo tatou i teia anoano.—Salamo 145:16.
Ei akono i to tatou anoano pae vaerua, ka akatupu tatou i te pirianga oa ki te Atua. Noatu e ka manako tetai pae e kare e rauka kia riro mai ei oa no te Atua, te akamaroiroi ra te Pipiria ia tatou: “E akavaitata atu ki te Atua, e nana e akavaitata mai kia kotou na.”—Iakobo 4:8; 2:23.
Kia riro ei oa no te Atua, ka anoanoia kia akarotai i to tatou oraanga ki tona akakoroanga no tatou. Te taiku ra te Pipiria i tona akakoroanga i roto ia Koheleta 12:13: “Ko te Atua te mataku atu, e akono oki i tana au akauenga: ko ta te tangata katoa ïa e pini ua ake.”
A te tuatau ki mua, ka kite tatou me akatupu takiri te Atua i tona akakoroanga mua no te tangata na te takore anga i te mamae e te oronga atu i te ora mutu kore no tona au oa, tona aronga akamori.—Salamo 37:10, 11.