“E Tangata Riri Kino Au”

TOKU ORAANGA I MUA ANA

Anauia au i San Juan Chancalaito, e oire meangiti i Chiapas, Mexico. No roto mai toku kopu tangata i te iti tangata Chol, e iti tangata Maya. E 12 tamariki a toku nga metua, ko au te rima. I toku tamariki anga kua apii matou, tamariki i te Pipiria ki te Au Kite o Iehova. Ma te maromaroa, kare au i aru ana i te akoanga Pipiria i toku tamariki anga.

I toku 13 mataiti, kua akamata au i te kai i te au apinga akakona e te keia apinga mei tetai ke. I te reira taime, kua akaruke au i to matou kainga e kua neke aere mei tera ngai ki tera ngai. I toku 16 mataiti, kua angaanga au i ko i tetai ngai tanutanu maruana. Kua pou iaku e tai mataiti i te angaanga i konei, e i tetai po ia matou e tari ra i te au pia maruana ki runga i te pai, kua tae mai tetai pupu ke, e aronga tari maruana rai e kua pupui mai ia matou. Kua ora mai au i te reira, na te pou anga ki roto i te kauvai, e kua pakoko ki tetai ngai ke. Mei reira mai kua oro atu au ki Marike.

I Marike, kua rauka rai iaku i te apai mai i te apinga akakona ki reira, e kua ō atu au ki roto i te manamanata. I te 19 mataiti, kua opuia au e te akava e kua tukunaia ki roto i te are auri, te tumu no te keia apinga e te tauta i te tamate i tetai tangata. I roto i te are auri, kua piri atu au ki tetai pupu aronga kino e kua rave i te au angaanga kino. No teia, kua neke te akava iaku ki tetai are auri, ketaketa to te reira aua e te maata te aronga tiaki i Lewisburg, Pennsylvania.

I roto i teia are auri i Lewisburg, kua kino roa atu toku tu. No te mea kua tatauia toku kopapa ki te au akairo o toku pupu aronga kino e piri ana au, kua māmā iaku i te piri ki teia pupu aronga i roto i te are auri. Kino tikai toku tu e ka viviki au i te piri ki roto i te pupu tā. I tetai atianga kua piri atu au ki roto i te manamanata a tetai pupu aronga kino i roto i teia are auri. Kua tā matou i tetai e tetai, kua taangaanga i te pa poro e te au auri akaetaeta kopapa. Kua pei mai te aronga tiaki are auri i te tear gas kia akamutu ta matou tā. I muri ake i te reira, kua neke te au tiaki iaku ki tetai are auri no te au mouauri kino. E tangata riririri au e te kino, e ka tuatua viivii ki tetai. Māmā ua iaku i te tā i tetai tangata. E reka ana au i teia. Kare au i manata ana no toku tu.

KUA TAUI TE PIPIRIA I TOKU ORAANGA

I roto i teia ngai, kua noo ua au ki roto i toku pia, no te reira kua akamata akaou au i te tatau i te Pipiria. I muri mai kua oronga mai tetai tiaki mouauri i te puka Ka Rauka ia Koe te Ora Mutukore i Paradaiso i te Enua Nei.a Iaku e tatau ra i teia puka, kua maara mai iaku tetai au apiianga taku i tamou ana i toku tamariki anga i te apii anga au i te Pipiria ki te Au Kite. Mei reira mai, kua akamanako au i toku oraanga marikonga kore no toku tu riririri e te kino. Kua manako katoa au i toku kopu tangata. No te mea kua riro mai toku nga tuaine e rua ei Kite no Iehova, manako mai au, ‘Ka ora raua e tuatau ua atu.’ Kua ui au e, ‘Akapeea oki au?’ I reira kua iki au i te taui i toku oraanga.

Inara, kua kite au ka anoano au i te tauturu me ka taui au i toku oraanga. Te mea mua kua pure au ki te Atua ko Iehova e kua pati akatenga kiaia kia tauturu mai iaku. E oti, kua tata au ki te opati Betela o te Au Kite o Iehova i Marike e kua pati i tetai apii Pipiria. Kua akanoonoo te opati Betela i tetai putuputuanga kia aravei mai iaku. I te reira taime, kare tetai aronga ke i akatikaia i te aravei mai iaku, no reira kua tata tetai Kite i roto i te putuputuanga, tetai reta akamaroiroi iaku e kua tuku mai i te au puka Pipiria, kua riro teia ei akamaroiroi iaku kia taui i toku tu.

Tetai taui anga i rave au, ka akaruke au i te pupu aronga kino e mema au no tetai tuatau roa. Tei roto katoa te arataki o te pupu aronga kino e piri ana au i te reira are auri, kua aravei au iaia e kua akakite kiaia i toku inangaro kia riro mai e ko tetai o te Au Kite o Iehova. Poitirere au, kua karanga mai aia kiaku: “Me inangaro koe, e rave i te reira. Kare au e arai i te Atua. Inara me inangaro koe i te akaruke i te pupu, kite koe eaa te ka tupu.”

I te au mataiti i aereia mai, kua kite mai te aronga tiaki mouauri i te tuke i toku tu. No teia kua reka mai ratou iaku. Ei akaraanga, kare te aronga tiaki e tapeka akaou i toku nga rima me aru mai ratou iaku ki te ngai pai. Kua aravei mai tetai tiaki iaku e kua akamaroiroi mai iaku no te tuke i toku tu. E tetai, kua neke te aronga mana o te are auri iaku ki tetai are auri vaitata mai ki te are auri paruru meitakiia, kia akapou au te katoa anga o taku utunga ki reira. I te 2004 kua tukunaia au ki vao i te are auri e kua apainaia ki Mexico, kua pou iaku e tai ngauru mataiti toku noo anga ki roto i te are auri.

Toku tae anga ki Mexico, kua kimi au i te Are Uipaanga Patireia o te Au Kite o Iehova. Kua aere atu au ki taku uipaanga mua i roto i toku kakau mouauri​—kare atu e kakau ke. Noatu toku kakau, kua āriki pumaana mai te Au Kite iaku. Toku kiteanga i to ratou aroa takinga meitaki, kua manako au e tei rotopu tikai au i te au Kerititiano mou. (Ioane 13:35) I te uipaanga kua akanoonoo te aronga pakari e kia apii au i te Pipiria ki tetai taeake. E tai mataiti i muri mai kua papetitoia au e ko tetai o te Au Kite o Iehova, ia Tepetema 3, 2005.

I roto ia Tianuare 2007, kua riro mai au ei taeake rave tamou i te angaanga tutu aere, i te akapou anga e 70 ora i te marama tataki tai i te apiianga i te Pipiria ki tetai ke. I te 2011, kua oti mai iaku te Apii Pipiria no te au Taeake (teianei kua kapikiia e ko te Apii no te Aronga Tutu Evangeria o te Patireia). Tauturu teia apii iaku i te rave meitaki i taku apainga i roto i te putuputuanga.

I te 2013, kua akaipoipo au i taku vaine akaperepere ko Pilar. Karanga mai aia ma te katakata kare aia e irinaki ana i te au angaanga taku i rave ana i mua ana. Kare rava au i oki akaou ana ki toku oraanga o mua ana. Irinaki maua ko taku vaine i te tumu i taui ei au, na te Pipiria i tauturu iaku kia taui.​—Roma 12:2.

KUA PUAPINGAIA AU

Kite mai au e kua tau rai ta Iesu tuatua ia Luka 19:10 kiaku. Karanga aia: “Aere mai nei oki [au] e kimi i tei ngaro ra e akaora.” Kare au i ngaro i teianei. E kare katoa au e takinokino akaou ana i te tangata. Mari ua ake taku apii Pipiria, te rekareka nei au i tetai oraanga meitaki tikai, te oaoa ki tetai ke, e tei maata roa atu, tetai pirianga meitaki ki Tei Anga iaku ko Iehova.