“Manako Au Kua Rauka Iaku te au Mea Ravarai”

TOKU ORAANGA I MUA ANA

Kua anauia au i Montreal, ko tetai oire maatamaata ïa i Quebec, Kanata. Kua utuutuia matou ko toku nga teina e toku tuaine e to matou nga metua akaperepere i Rosemont. Kua mataora e te meitaki to matou nooanga kapiti.

Toku mapu anga, e reka ana au i te tatau i te Pipiria. Maara au i toku 12 mataiti, kua reka au i te tatau i to Iesu oraanga i roto i te Koreromotu Ou. Kua pakia toku ngakau no tona inangaro e te tangi i te tangata, kua inangaro au kia aite mei iaia rai. Ma te maromaroa, kua ngaro teia inangaro i te maata mai anga au, e kua kapiti ki te aronga kare e meitaki ana te oraanga.

E tangata akatangi toku papa i te saxophone, e kua oronga mai aia i teia apinga akatangi naku, tupu atura toku inangaro i te imene. Reka tikai au i te imene, no reira kua apii au akapeea me akatangi i te kitā. Aere ua rai, kua akamata au e toku au oa i tetai rock band, e e maata ta matou ngai i imene ana. Kua kite mai tetai aronga rongonui no te rekoti imene ia matou, e kua aravei mai iaku no te rekoti i ta matou imene. I runga i tetai pepa tikaanga, kua āriki au e kia rekoti teia aronga i ta matou imene. Kua reka tikai te tangata i ta matou imene e kua akatangiia na roto i te au ratio i Quebec.

Manako au kua rauka iaku te au mea ravarai. E tane rongonui au i teianei, kua maata taku moni i rauka mai mei teia angaanga. I te ao ka akamatutu au i toku kopapa i te ngai akaetaeta uaua, ka pukapuka au ki te aronga ka aravei mai iaku, ka aravei i te aronga e inangaro maira, kia tata au i toku ingoa rongonui, e ka aravei i te aronga angaanga i ko i te ngai tivi. I te po, ka aere au ki te ngai e anoano maira e kia imene au e ka tamataora katoa ki reira. No te mea e ru ana au ki mua i te katoatoa, kua akamata au i te inu kava mei toku tamariki anga e kua kai katoa i te au apinga akakona. Kare e marikonga te oraanga e ka tupu te akaturi.

Kua vareae tetai aronga i toku oraanga, i te akaraanga kua mataora au i teia. Inara ko te tika, kua taitaiaia au e teia oraanga puapinga kore. Kua tupu te maromaroa e te ngakau taitaia kiaku. Ma te mii, i te tuatau te meitaki ra toku turanga imene, kua mate toku nga tangata rekoti imene, i te maki AIDS. Kua poitirere au! Noatu e reka ana au i te imene, kua rikarika ra au i teia oraanga.

KUA TAUI TE PIPIRIA I TOKU ORAANGA

Noatu kua meitaki toku turanga, kua kite mai au e kino tikai te oraanga i teianei ao. Eaa ra te tumu i maata ai te tu tika kore? Umere au no teaa ra te Atua kare i akakore i teia. E pure putuputu ana au ki te Atua kia tauturu mai iaku kia kite i te tumu. I te tuatau kare au i imene ana, kua akamata akaou au i te tatau i te Pipiria. Noatu kare au i mārama e eaa taku e tatau ra, kua tamanako mai au e te vaitata mai nei te openga.

Iaku e tatau ra i te Pipiria, kua mārama mai au e kua akakore a Iesu i te kai e 40 rā. (Mataio 4:1, 2) Kua manako au e, me rave au i teia, penei ka akakite mai te Atua i tona manako kiaku, no reira kua iki au i te rā ka akamata. E rua epetoma i mua ake ka akamata ai au, kua topapa mai e rua nga Kite no Iehova i toku ngutupa, kua karanga atu au kia raua, kia tomo mai ki roto. Kua akara tika atu au ki tetai ia raua ko Jacques tona ingoa, e kua ui e, “Akapeea tatou e kite ei e te noo nei tatou i te au rā openga?” Kua eeu mai aia i tana Pipiria kia 2 Timoteo 3:​1-5 e kua tatau mai i te reira. E maata taku uianga i ui kia raua, e kua mataora au i te takataka i ta raua pauanga e te māmā i te aru i ta raua i akamārama mai i roto i te au Tuatua Tapu. I tetai nga aravei anga i muri mai, kua mārama mai au, kare e anoanoia te akakore anga kai.

Kua akamata au i te apii putuputu i te Pipiria ki teia nga Kite. Tei tupu mai, kua tipu au i toku rouru roroa e kua akamata i te aere ki te au uipaanga i ko i te Are Uipaanga Patireia o te reira ngai. No te oaoa e te maoraora i te au taeake, te aravei anga au kua papu iaku e kua kitea e au te tuatua mou.

Inara, kua anoanoia au i te akatanotano i toku oraanga ki runga i taku e apii ra mei te Pipiria. E tetai, kia akamutu i te kai i te au apinga akakona e te akaruke i toku oraanga tau kore. E kia taui i toku manako e toku tu e te akamanako maata atu i tetai ke. E ei metua, kua anoanoia au kia kite akapeea me akono i taku nga tamariki e rua i te pae kopapa e te pae vaerua. No reira kua akamutu au i taku angaanga imene e kua angaanga no tetai manga moni, ki roto i te factory, no te akono i toku ngutuare.

Kare i te mea māmā i te rave i teia au tauianga. Kua tupu te tuatau kinokino, iaku e tauta ra i te akakore i te kai apinga akakona. (Roma 7:​19, 21-​24) Kare i māmā ana iaku i te akakore i toku oraanga marikonga kore. Tetai katoa, kua roiroi au i te angaanga, e kare e maata ana taku moni. Ka pou iaku e toru marama kia aiteite taku moni ki tei rauka iaku e rua ora ei tangata imene.

Na te pure i tauturu mai iaku kia tauta ua atu i te taui i toku tu. Kua tauturu katoa taku tatau putuputu i te Pipiria iaku. Kua tauturu tetai au irava iaku i te taui i toku oraanga. Tetai irava tei roto ia 2 Korinetia 7:1, te akakite ra no te au Kerititiano kia “tamā ua tatou ia tatou uaorai i te au viivii katoa o te kopapa e te vaerua.” E tetai irava tei akamaroiroi mai iaku e ka rauka rai i te akakore i teia au tu kino, tei roto ia Philipi 4:13 te karanga ra e: “E tika iaku te au mea ravarai nei i te Mesia, ko tei akamaroiroi mai iaku nei.” Kua pau mai te Atua ko Iehova i taku pure e kua tauturu mai iaku kia mārama i te au tuatua mou Pipiria e kia taangaanga i teia. Na teia i akamaroiroi iaku kia akatapu i toku oraanga kiaia. (1 Petero 4:1, 2) Kua papetito au ei Kite no Iehova i te mataiti 1997.

KUA PUAPINGAIA AU

Kua papu meitaki iaku e naringa au e te rave nei i toku oraanga o mua ana, kua mate au i teia rā. Inara, te mataora nei au i teianei! Kua riro taku vaine meitaki ko Elvie, ei tauturu tau kiaku. Ei nga tavini tamou, te angaanga kapiti nei maua i te apii i te tuatua mou Pipiria ki te tangata. E mea pumaana teia e te mataora. Ka akameitaki au ia Iehova e kua akatae mai aia iaku nei kiaia.​—Ioane 6:​44.