Mareko 1:15—“Vaitata Mai Nei te Basileia o te Atua”

“Kua tae ki te tuatau, kua vaitata mai nei te basileia o te Atua; e tataraara kotou, e ka akarongo i te evangelia nei.”—Mareko 1:15, Te Bibilia Tapu Ra.

Aiteanga o Mareko 1:15

Karanga a Iesu Karaiti e kua “vaitata mai” te Patireia o te Atuaa no te mea tei reira aia i te pae ia ratou, ei Ariki no te reira Patireia.

Kare a Iesu i karanga ana e kua akamata takere te Patireia i te tutara. Kua akakite aia ki tana au pipi i muri mai e te aere maira te Patireia. (Angaanga 1:6, 7) Inara, kua tae mai aia i te taime tau, i te mataiti tikai i totou ei te Pipiria e ka riro aia ei Arikib a te tuatau ki mua. No teia tumu, i karanga ai a Iesu: “Kua tae ki te tuatau”​—te tuatau me akamata aia i tana angaanga tutu evangelia me kore nuti meitaki no runga i te Patireia.—Luka 4:16-21, 43.

Kia puapingaia te tangata mei te nuti meitaki o te Patireia, ka anoanoia ratou kia tataraara, koia oki, kia tataraara i ta ratou ara i mua ana e kia aru i ta te Atua au turanga. Kua akaari te aronga tei tataraara e kua akarongo ratou i te nuti meitaki no runga i te Patireia a te tuatau ki mua.

Aerenga manako o Mareko 1:15

Kua karanga a Iesu i teia au tuatua i te akamataanga o tana angaanga tutu aere i Galilea. Mei “i reira” mai i akakite ei a Mataio 4:17, to Iesu tutu aere anga i te Patireia o te Atua. Ko te Patireia te tumu manako o ta Iesu angaanga tutu aere. Kua taikuia te Patireia e 100 tuma taime i roto i te Evangeliac e a, te maata anga na Iesu te reira i tuatua. I roto i te Pipiria, e maata atu ta Iesu i tuatua no te Patireia o te Atua i tetai ua atu tumu manako.