Isaia 41:10—“Auraka e Mataku, te Vaitata Katoao Au ia Koe”

“Auraka e mataku, te vaitata katoao au ia koe: auraka e taitaia, ko au oki toou Atua: e akamaroiroi au ia koe; koia ïa, e tauturu au ia koe; koia ïa, e mou au ia koe i toku rima katau tuatua tika ra.”—Isaia 41:10, Te Bibilia Tapu Ra.

Aiteanga o Isaia 41:10

Kua akapapu te Atua ko Iehovaa ki tona aronga akamori tiratiratu e nana e tauturu ia ratou, noatu eaa te au manamanata ka tupu kia ratou.

“Te vaitata katoao au ia koe.” Kua oronga a Iehova ki tona aronga akamori i tetai tumu e auraka ratou e mataku—kare ko ratou anake ua. No te mea te kite maira aia eaa te tupu nei kia ratou e te akarongo maira aia i ta ratou au pure, mei te mea e tei te pae ua aia ia ratou.—Salamo 34:15; 1 Petero 3:12.

“Ko au oki toou Atua.” Akapumaana a Iehova i tona aronga akamori na te akakite anga e koia to ratou Atua e te āriki nei aia ia ratou ei aronga akamori iaia. Papu tikai ia ratou e kare tetai ua atu manamanata e tāpu i te Atua i te tauturu ia ratou.—Salamo 118:6; Roma 8:32; Ebera 13:6.

“E akamaroiroi au ia koe; koia ïa, e tauturu au ia koe; koia ïa, e mou au ia koe i toku rima katau tuatua tika ra.” Te taikuanga e toru au tuatua i te akakite mai i te manako okotai, te akapapu maira a Iehova e nana e tauturu mai. Kua taangaanga aia i tetai akatutuanga i tana ka rave me inangaro tona iti tangata i te tauturu. Me topa tetai tangata ki raro, ka oronga mai te Atua i tona rima katau i te uuti mai iaia ki runga.—Isaia 41:13.

Na roto i tana Tuatua, te Pipira tetai mataara puapinga me akamaroiroi e me tauturu te Atua i tona aronga akamori. (Iosua 1:8; Ebera 4:12) Ei akaraanga, te oronga maira te Tuatua a te Atua i te akoanga tau ki te aronga e manamanata ra, mei te putaua, te maki, me kore kua takake tei akaperepereia. (Maseli 2:6, 7) Ka taangaanga katoa te Atua i tona vaerua tapu, me kore mana ririnui, i te tauturu i tona aronga akamori kia manako meitaki e kia kore to ratou ngakau e taitaia.—Isaia 40:29; Luka 11:13.

Aerenga manako o Isaia 41:10

Kua akapumaana teia au tuatua i te au ngati Iuda tiratiratu tei apainaia i muri mai ei tuikaa ki Babulonia. Kua akakite a Iehova e i te openga o te tuikaa anga o te ngati Iuda, ka tae mai te akakiteanga no runga i tetai tutara te ka akapueurikiriki i te au enua takapini ia ratou e ka takinokino ia Babulonia. (Isaia 41:2-4; 44:1-4) Ka tupu te mataku kia Babulonia e te au enua i te pae mai me akarongo ratou i taua nuti, kare ra te ngati Iuda e manamanata, no te mea na Iehova e paruru ia ratou. E toru taime te akapapu anga aia kia ratou ma teia au tuatua e “auraka e mataku.”—Isaia 41:5, 6, 10, 13, 14.

Noatu kua akakiteia teia au tuatua ki te ngati Iuda tiratiratu tei tuikaa i Babulonia, kua paruru te Atua ko Iehova i teia au tuatua i roto ia Isaia 41:10 ei akapumaana i tona aronga akamori katoatoa. (Isaia 40:8; Roma 15:4) Te tauturu nei aia ia ratou i teia tuatau, mei tana i rave i te paruru i tona au tavini i mua ana.