Roma 6:23—“Te Tutaki a te Ara ko te Mate, Inara te Apinga Aroa a te Atua ko te Ora Mutu Kore”

“E utunga te mate no te ara; kareka te ora mutu kore ra, e mea oronga uaia mai e te Atua i roto i to tatou Atu ia Iesu Mesia.”—Roma 6:23, Te Bibilia Tapu Ra.

”‏Te tutaki a te ara ko te mate, inara te apinga aroa a te Atua ko te ora mutu kore na roto ia Iesu Karaiti to tatou Atu.”—Roma 6:23, New International Version.

Aiteanga o Roma 6:23

Ma teia au tuatua, te akamārama maira te apotetoro ko Paulo e te mate nei te tangata no ta ratou ara. Inara, te manakonakoanga meitaki rava atu ta te Atua ka oronga mai no tona au tavini tiratiratu—ko te ora mutu kore.

“E utunga [tutaki] te mate no te ara.” Anauia mai te tangata ei aronga apa ua no reira ratou i ō ei ki roto i te ara.a (Salamo 51:5; Koheleta 7:20) No to ratou turanga ara ua i ruaine ei e i mate ei te tangata.—Roma 5:12.

Akatutu maira a Paulo i te ara mei tetai pu angaanga te tutaki ra i te tangata angaanga. Mei tetai tangata angaanga e tapapa ra kia tutakiia mai aia, ko te tu rai ïa o te tangata te ka mate no to ratou tu apa ua.

Inara, te akāmarama katoa maira a Paulo e ko te tangata “i mate ra, kua matara ïa aia i te kino nei.” (Roma 6:7) Me mate te tangata, kua matara mai aia mei tana ara. No reira kare tatou e manako ua e te tamamaeia ra tei mate i tetai ngai ke atu no ta ratou ara i rave i mua ana. Te akataka maira te Pipiria e ko te tangata tei mate kare ana tuatua, angaanga me kore manako.—Koheleta 9:5.

“Kareka te ora mutu kore ra, e mea oronga uaia mai e te Atua i roto i to tatou Atu ia Iesu Mesia.” Ei tuke ki te “tutaki” me kore utunga no te ara, ka oronga aroa ua mai te Atua i te ora mutu kore. Te tuatua e “mea” ka uri katoaia e “mea aroa ua” me kore e “mea takinga meitaki.” Te taiku ra te reira ki tetai apinga i orongaia ki tetai tangata kare i angaanga pakari ana no te reira. Kare e tika i te tangata apa ua te ora mutu kore. (Salamo 49:7, 8) Inara, kua oronga aroa ua mai te Atua i te ora mutu kore ki te aronga tei irinaki ia Iesu.—Ioane 3:16; Roma 5:15, 18.

Aerenga manako o Roma 6:23

Kua tata a Paulo i teia reta ki te au Kerititiano i Roma i te 56 T.N. Tarevake te manako o tetai au Kerititiano i taua tuatau no runga i te aroa o te Atua. No te apiianga kimi kite Ereni, kua manako tetai au Kerititiano e me maata atu ta ratou ara, ka maata atu rai ta te Atua akakoreanga i ta ratou ara. (Roma 6:1) Kua karanga tetai papaki e kare ratou e akautungaia no ta ratou ara no te mea kare ratou i raro ake i te Ture a Mose. (Roma 6:15) I roto i tana reta, te karanga ra a Paulo e kare te au Kerititiano e puapingaia mei te aroa o te Atua me na te ara e akaaere ana i to ratou oraanga.—Roma 6:12-14, 16.

Te akapapu maira ta Paulo tuatua ki te au tavini tiratiratu o te Atua i teia tuatau e noatu e aronga apa ua ratou, e manakonakoanga to ratou. Me akarongo ratou ki te au kaveinga a te Atua e kare e aru i to ratou uaorai anoano, ka oronga mai te Atua i te ora mutu kore no ratou.—Roma 6:22.

Akara i teia vitio poto ua no runga i te puka o Roma.