E Runanga Puka i Roto i to Rima

“Kare rava tatou i manako ana e ka rauka ta tatou kai pae vaerua na roto i te ravenga o te uira.” Te akatika ra ainei koe i teia? E ako akamaroiroi teia na Geoffrey Jackson o te 2020 Akakiteanga #6 a te Pupu Akaaere. Karanga aia: “Inara i teianei akapeea e rauka ai ia tatou teia au kai i teia tuatau maki kino me kare e JW Library. Kua tereni a Iehova ia tatou i teia au mataiti i topa kia papa tatou no teia turanga.”

Akapeea a Iehova te akapapa anga ia tatou? Eaa tei raveia no te maani i te JW Library app, e eaa te anoanoia ra kia akono e te akameitaki atu i te reira?

Te Mea Mua Teia

Ia Me 2013, kua pati te Pupu Akaaere i te MEPS Programming, e tipatimani o te opati maata i te ao katoa, kia maani i tetai app no te urianga ou o te New World Translation. “I te reira taime, kare ake rai matou i tuku ake i tetai mobile app ki runga i tetai o te au app store,” i na Paul Willies ei, o te MEPS Programming. “Inara kua akapapa matou i tetai pupu, kua akamutu i tetai au angaanga, e kua angaanga kapiti ki tetai au tipatimani no te design e te maani i te app e tona au content. Kua pure putuputu matou e ma te tauturu a Iehova kua papa te app e rima marama i muri mai no te uipaanga mataiti!”

Kua anoanoia kia maani i te app ei runanga puka kia akaari i te au puka i te au reo tukeke. Te tae anga kia Tianuare 2015, e maata te au puka i te reo Papaa tei tukuia ki roto i te app, e ono marama i muri mai, ka rauka i tetai ua atu i te kopi mai i teia au puka i roto i te anere ua atu reo.

Mei te reira taime mai, kua akameitaki atu te au taeake i te app, kua tuku i te au vitio, te au puka e te media no te au uipaanga putuputuanga i raro ake i te tab okotai, e ka rauka i tetai ua atu te akara i te Research Guide no runga i tetai irava Pipiria.

Akonoanga i te Runanga Puka

E 8 mirioni apinga apaipai e aere ana ki roto i te JW Library i te au rā, e tere atu i te 15 mirioni apinga apaipai i te marama! Eaa te anoanoia ra kia angaanga meitaki ua te app i runga i te au apinga apaipai? Akamārama te Taeake Willies: “Kare te mobile app e oti ana i te maani. E angaanga ua ana matou i te tapiri atu i tetai au mea ou ki runga no te akamako i te reira. No te mea e update putuputuia ana te au operating system no teia au apinga apaipai uira, ka akatano putuputu matou i te app kia tano ki te reira au system. Ka akono e ka upgrade katoa matou i ta matou internal software me maata te au puka e te au rekoti anga i runga i te JW Library.” Me tareia te au reo, e 200,000 puka, tere atu i te 600,000 akatangi anga autio e te vitio i runga i te JW Library!

Ei akono i teia app, e maata te au hardware komupiuta ka inangaroia. E maata te au software license kia okoia mai. Mei te $1,500 (U.S.) te license okotai i te mataiti. Ka pou i te MEPS Programming e $10,000 (U.S.) i te mataiti ki runga i te au apinga uira no ko mai i te au kamupani tukeke ei akapapu kia angaanga meitaki te app i runga i te au komupiuta ou, te au apinga apaipai e te taniuniu.

Toe Mai te Moni Tauturu Mei te au Kopi Anga

Na roto i te JW Library e maata te moni tauturu tei toe mai e kua pou ana no te neneianga, te tapiri anga, e te tuku anga i te au puka na runga i te paʼi. Ei akaraanga, te puka Akara Matatio i te Tuatua Tapu i te au Rā. Kua nenei matou e 12 mirioni kopi o te Akara Matatio i te Tuatua Tapu i te au Rā—2013. I te tataanga 2020, kua nenei matou e rima mirioni puka—noatu e e 700,000 au papuritia tei maata atu i te ao katoa. Eaa tei taui? Te tatau nei te maata anga o te au taeake e te au tuaine i te tia i runga i te JW Library.a

“Puapinga Maata Tikai”

E ākā tauturu tikai te JW Library ki te aronga te taangaanga ra i te reira. Akakite a Geneviève, i Kanata e, kua riro te app ei akakeu iaia kia apii putuputu. “Te tika, me ka rave mai au i tetai putunga puka no te apii, papu kare au e inangaro i te apii i te au popongi ravarai,” i nana ei. “Ka mou mai au i taku tablet e tei runga taku au apinga no te apii. Kua riro teia apii putuputu ei akamaroiroi i toku akarongo e toku turanga pae vaerua.”

E ākā tauturu tikai teia app i te tuatau o te maki kino COVID-19. Karanga a Charlyn, no Marike mai e: “I te COVID-19 e kino atura i teianei ao, kare au i kite ana i tetai o ta tatou au puka ou tei neneiia no tetai mataiti i teianei. Inara na te JW Library i angai ia matou i te pae vaerua, akameitaki tikai au ia Iehova no teia apinga aroa.”

Pera a Faye, i te Philippines, aiteite tona manako ki te maata anga. Karanga aia: “E taangaanga ana au i teia app ririnui kia piri vaitata kia Iehova. Ko taku teia e tatau mua ana i te au popongi ravarai. E akarongo ana au i teia me rave i taku angaanga. E taangaanga ana au i teia no taku uipaanga. E akapapa ana au mei teia no taku apii Pipiria. E akarakara ana au i te au vitio i toku taime vā. E tatau ana au i te au atikara me kore te Pipiria iaku e tiaki ra. Puapinga maata tikai.”

E puapinga katoa teia app no te angaanga tutu aere. Ei akaraanga, iaia e tutu aere ra, kua inangaro tetai tuaine i Cameroon i te taangaanga i tetai irava tana i kite i tetai tuaine te taangaanga anga i nga epetoma i mua atu ana. Inara, kare e maara ana iaia. Karanga aia: “Manuia, kua maara iaku tetai tuatua o te irava. Aere au ki roto i te app, e oti aere au ki te Pipiria, e kua kimikimi i te tuatua. I te reira taime tikai kua kitea mai te irava. Na roto i te app, ka kitea taku au irava e ngaropoina ana iaku.”

Na roto i ta kotou au moni tauturu tei tae mai na roto i te au ravenga tukeke o te donate.jw.org i rauka ai ia matou te maani, te akono e te akameitaki atu i te JW Library app no te au taeake e te au tuaine i te ao katoa. Meitaki maata no to kotou ngakau aroa.

Tupuanga Puapinga o te JW Library

1. 

   Okotopa 2013—Akamata te app e te urianga ou o te New World Translation

2. 

   Tianuare 2015—Aere te au puka reo Papaa ki roto e te anere ua atu reo ke

3. 

   Noema 2015—Rauka te mākā akaira

4. 

   Me 2016—Oti te tab no te uipaanga

5. 

   Me 2017—Rauka te tātā tuatua

6. 

   Titema 2017—Rauka te Study Bible

7. 

   Mati 2019—Rauka te kopi anga autio, te vitio stream, e te Research Guide

8. 

   Tianuare 2021—Oti te au tuanga o te Oraanga Mataora e Tuatau Ua Atu!