No to ratou aroa no te Atua ka akapaapaa te aronga tiratiratu i tona ingoa. Kua kite te Ariki ko Davida me akapaapaaia te ingoa o te Atua, aite rai ki te akapaapaa anga ia Iehova. Me rongo tatou i to Iehova ingoa, ka akamanako tatou i tona au tu manea e tana au angaanga memeitaki. Kua akatapu a Davida i te ingoa o tona Metua e kua akapaapaa Iaia. Kua rave aia i te reira ma tona ngakau katoa koia oki “to roto katoa” iaia. E pera kua rave katoa te ngati Levi i te arataki anga no te akapaapaa ia Iehova. Kua āriki akaaka ratou e kare ta ratou au tuatua e taeria te akameitaki e te akapaapaa anga i te ingoa tapu o Iehova. (Nehe. 9:5) Mea papu, kua riro to ratou tu akaaka, ei akamareka ia Iehova. w24.02 9 ¶6

Kare a Iehova e manako e e puapinga kore koe no tei kore i rauka ia koe. (2 Kori. 8:12) Akamanako i taau i akatupu takere. Karanga te Pipiria “kare te Atua i te Atua tuatua-tika kore, ka akangaro atu ei aia i ta kotou angaanga i rave.” (Ebe. 6:10) Auraka e ngaropoina rai ia koe. Akamanako i tei rauka takere ia koe i te akatupu—penei te akatupu i tetai pirianga oa kia Iehova, te tuatua ki tetai ke no runga iaia, me kore kia papetito. Mei ia koe e tere ra ki mua ma te itae i toou au akakoroanga pae vaerua i te tuatau i topa, ka tere rai koe ki mua i teianei. Ma to Iehova tauturu, ka rauka ia koe te itae i toou akakoroanga. Me tauta koe te itae i toou akakoroanga pae vaerua, auraka e ngaropoina kia mataora i ta Iehova tauturu e te akameitakianga. (2 Kori. 4:7) Auraka e tuku i te ʼau, e maata ua atu te akameitakianga ka rauka.—Gala. 6:9. w23.05 31 ¶16-18

E mareka ana a Iehova i te akakite i tona akaperepere maata i tana aronga e inangaro ra. Akakite mai te Pipiria e rua atianga i tuatua ai Aia kia Iesu, ko taku Tamaiti akaperepere teia, kua mareka rava au iaia. (Mata. 3:17; 17:5) Ka inangaro ainei koe i te akarongo i te reo o Iehova te karanga anga kua mareka rava aia ia koe? Kare a Iehova e tuatua kia tatou mei te rangi mai, mari ra na roto i tana Tuatua. Ka rongo tatou i to Iehova reo me tatau tatou i ta Iesu tuatua i roto i te au Evangeria. Kua akaata meitaki a Iesu i te tu o tona Metua. No reira me tatau tatou e kua mareka a Iesu i tana au pipi apa ua e te tiratiratu, ka akamanako tatou ia Iehova e tuatua ra i te reira kia tatou. (Ioa. 15:​9, 15) Me tupu te au manamanata kare te aiteanga e kua mareka kore te Atua ia tatou. Mari ra, e au atianga te reira no te akaari i te maata o to tatou inangaro e te irinaki ia Iehova.—Iako. 1:12. w24.03 28 ¶10-11