Akatinamou a Iehova i Tana Taputou no te Parataito

1. Eaa te karere a te peroveta ko Isaia ki to Iseraela?

AKAKITE te peroveta ko Isaia e ko Iehova “te Atua tuatua-mou.” Te aiteanga o te “tuatua-mou” ko te “amene.” (Isa. 65:16) Te tuatua “amene” te aiteanga “e tika ïa,” me kore “e tika tikai.” I roto i te Pipiria, me taikuia te tuatua “amene” no Iehova e Iesu, e akapapuanga te reira e mea mou ta raua taputou. No reira, kua taka meitaki ta Isaia karere ki to Iseraela: Ka tupu ua ta Iehova totou. Kua akapapu a Iehova i teia na te akatupuanga i tana au taputou pouroa.

2. Eaa tatou ka irinaki ei i ta Iehova taputou no te tuatau ki mua, e eaa nga uianga ka uriuri tatou?

² Ka rauka ainei ia tatou i te irinaki e ka tupu ta Iehova au taputou no te tuatau ki mua? Vaitata i te 800 mataiti i muri ake i te tuatau o Isaia, kua akamārama a Paulo i te tumu ka tupu ua ta te Atua au taputou. Akakite a Paulo e: “Ko tei kore e tika i te Atua kia pikikaa.” (Ebe. 6:18) Me ta’e mai te vai mā mei roto i tetai punavai, kare katoa te vai kava kava e ta’e mai. Koia katoa a Iehova, te Tumu o te tuatua mou, kare aia e pikikaa. No reira, ka rauka ia tatou i te irinaki pu tikai i ta Iehova au tuatua, e tana au taputou no te tuatau ki mua. I teia atikara, ka uriuri tatou i teia nga uianga: Eaa ta Iehova i taputou mai no te tuatau ki mua? E eaa te akapapuanga ta Iehova i oronga mai e ka tupu tana au taputou?

EAA TA IEHOVA I TAPUTOU?

3. (a) Eaa te taputou tei akaperepereia e te au tavini o te Atua? (Apokalupo 21:​3, 4) (e) Eaa te manako o tetai pae no teia taputou?

³ Ka uriuri tatou i tetai taputou akaperepereia e te au tavini o te Atua i teianei ao. (E tatau ia Apokalupo 21:​3, 4.) Kua taputou mai a Iehova “e e kore rava te mate, e te aue, e te mii; e te mamae oki, e kore katoa ïa; no te mea kua kore te au mea taito.” E tatau ana tatou i teia irava me tutu aere ki te tangata no te oraanga i te Parataito. Eaa ta tetai aronga ka tuatua mai me tatau tatou i teia taputou kia ratou? Ka karanga ratou, “Kare teia e tupu.”

4. (a) Eaa ta Iehova i kite e i taputou? (e) Kapiti mai ki tana taputou, eaa atu ta Iehova i rave?

⁴ I te akauru anga a Iehova i te apotetoro ko Ioane kia tata i te au taputou no te oraanga i te Parataito, kua kite Aia e ka akakite tatou i teia manakonakoanga ki te tangata me tutu aere i te karere Patireia. Kua kite katoa a Iehova e ka ngatā i te tangata i te irinaki i teia “tuatua ou.” (Isa. 42:9; 60:2; 2 Kori. 4:​3, 4) Akapeea i reira tatou me akapapu ki te tangata—e tatou—e ka tupu rai te au akameitakianga i roto ia Apokalupo 21:​3, 4? Kare a Iehova i oronga ua mai i teia taputou pumaana mari ra kua oronga katoa mai aia i te au tumu kia irinakiia te reira. Eaa te reira au tumu?

AKATINAMOU A IEHOVA I TANA TAPUTOU

5. Eaa tetai tumu ka irinaki tatou i ta te Atua taputou no te Parataito, e ka kitea te reira kiea?

⁵ Ka kite tatou i tetai tumu kia irinaki i ta Iehova taputou no te Parataito i roto i te nga irava ka aru mai. Te na ko ra: “Kua tuatua maira tei noo ki runga i te terono ra, I na, te akariro nei au i te au mea ravarai ei mea ou. E kua tuatua maira aia kiaku, Ka tata ana: e tuatua-mou oki teianei au tuatua e te pikikaa kore. Kua na ko maira oki aia iaku, Kua tupu. Ko au te Alepha e te Omega, te momua e te akaopenga.”—Apo. 21:​5, 6a.

6. Eaa i riro ei te taputou ia Apokalupo 21:​5, 6 ei akaketaketa i to tatou irinakianga i ta te Atua i tuatua?

⁶ Eaa ra teia nga irava Pipiria i akatinamou ei i to tatou irinaki i ta te Atua taputou? Karanga te puka Revelation Climax no teia nga irava: “Mei te mea e kua papau me kore kua koreromotu a Iehova i teia au akameitakianga, e mea mou no te tuatau ki mua ki te aronga tiratiratu.”b Kua tataia ta te Atua taputou ia Apokalupo 21:​3, 4. Inara i te irava 5 e te 6, ka kite tatou i ta Iehova koreromotu, tei akatinamou i tana taputou no te tuatau ki mua. Ka akara meitaki tatou i ta Iehova i taputou mai.

7. Eaa te mea umere i ta te Atua taputou, eaa i puapinga ai te reira?

⁷ Akamata te taputou a te Atua na te karanga anga: “Kua tuatua maira tei noo ki runga i te terono ra.” (Apo. 21:5a) E au tuatua puapinga teia no te mea i roto i te puka o Apokalupo, e toru atianga i tuatua ai a Iehova na roto i te orama. Kare e na tetai angera ririnui me kore na Iesu tei akatuia mai, i oronga mai i teia akapapuanga, mari ra na Iehova! Akakite mai teia i te tika o te au tuatua tei aru mai. Eaa ra? No te mea no ko mai ïa ia Iehova “tei kore e tika kia pikikaa.” (Tito 1:2) Te akapapu maira teia e e mea mou tikai te au tuatua ta tatou ka tatau ia Apokalupo 21:​5, 6.

“I NA, TE AKARIRO NEI AU I TE AU MEA RAVARAI EI MEA OU”

8. Akapeea a Iehova i te akatinamou anga i tana taputou? (Isaia 46:10)

⁸ Aru mai, ka akamanako tatou i te tuatua, “I na.” (Apo. 21:5) E taangaanga putuputuia ana te tuatua Ereni “i na” i roto i te puka o Apokalupo. Akakite mai tetai tataanga e ka riro teia tuatua “ei ravenga no te akakeu i te tangata tatau kia akarongo meitaki mai.” Eaa tei aru mai? Akakite te Atua: “Te akariro nei au i te au mea ravarai ei mea ou.” Te tuatua nei a Iehova no runga i te ka tupu a te tuatau ki mua, inara e mea papu tikai teia taputou e mei te mea e te tuatua nei aia kua tupu takere te reira.—E tatau ia Isaia 46:10.

9. (a) Te tuatua “te akariro nei au i te au mea ravarai ei mea ou” eaa te nga angaanga ka rave a Iehova? (e) Eaa te ka tupu ki te “rangi” e te “enua” o teia tuatau?

⁹ Ka uriuri ana tatou i tetai tuatua i roto ia Apokalupo 21:5: “Te akariro nei au i te au mea ravarai ei mea ou.” I roto i teia pene o te Pipiria, te akataka ra teia tuatua e rua angaanga ta Iehova ka rave—te monoanga e te akaouanga. Te mea mua, eaa ta Iehova ka mono? Akakite a Apokalupo 21:1 e: “Kua kore oki tei muatangana rangi e tei muatangana enua.” Ko “tei muatangana rangi,” te akataka ra i te au kavamani tei akaaereia e Satani e tana au temoni. (Mata. 4:​8, 9; 1 Ioa. 5:19) I roto i te Pipiria, te akataka ra te “enua” i te au tangata i te enua nei. (Gene. 11:1; Sala. 96:1) No reira, ko “tei muatangana enua” ko te aronga kino i teia tuatau. Kare a Iehova e akameitaki mai i te “rangi” e te “enua”; mari ra, ka takore takiri aia i te reira. Ka mono i reira aia i te rangi e te enua o teia tuatau ki te “rangi ou e te enua ou”—koia oki, tetai kavamani ou te ka tutara ki rungao i te aronga tuatua tika.

10. Eaa ta Iehova ka akaou?

¹⁰ Ia Apokalupo 21:​5, ka tatau tatou no runga i te au mea ta Iehova ka akariro ei mea ou. Akamanako ana e kare a Iehova i karanga e: “Te maani nei au i te au mea ou.” Mari ra, karanga aia: “Te akariro nei au i te au mea ravarai ei mea ou.” No reira, ka akariro a Iehova i te au mea ravarai ei mea ou na te akameitakianga i te enua e te tauturu anga i te tangata kia rauka te tu apa kore. Mei ta Isaia i totou, ka akariroia te enua katoa ei kainga manea—mei te aua rai i Edene. Ka akaou katoa ia tatou tataki tai. Ka akaoraia te aronga pirikoki, te matapo, e te aronga turi, e ka akaoraia te aronga tei mate.—Isa. 25:8; 35:​1-7.

“E TUATUA-MOU OKI TEIANEI AU TUATUA E TE PIKIKAA KORE. . . . KUA TUPU”

11. Eaa ta Iehova akauenga kia Ioane e e eaa te tumu o te reira?

¹¹ Eaa atu tetai tuanga o ta te Atua taputou? Akakite a Iehova kia Ioane e: “Ka tata ana: e tuatua-mou oki teianei au tuatua e te pikikaa kore.” (Apo. 21:5) Kare a Iehova i oronga ua mai i te akauenga “ka tata ana.” Kua akakite katoa mai aia i te tumu. Karanga aia: “E tuatua-mou oki teianei au tuatua e te pikikaa kore”—koia oki, e tinamou te tuatua a te Atua. Mareka tatou e kua akarongo a Ioane ki te akauenga “ka tata ana.” No te reira, ka rauka ia tatou i te tatau no runga i ta te Atua taputou no te Parataito e te akamanako oonu i te au akameitakianga manea ki mua.

12. Eaa i rauka ai ia Iehova te tuatua: “Kua tupu”?

¹² Eaa atu ta te Atua i tuatua mai? “Kua tupu.” (Apo. 21:6) Te tuatua ra a Iehova no runga i te Parataito taputouia mei te mea e kua tupu ke ana. Ka tau rai tana tuatua no te mea kare e mea e tāpu iaia mei te akatupu i tona akakoroanga. Kua oronga akaou mai aia i tetai akapapuanga i roto i tana tuatua. Eaa te reira?

“KO AU TE ALEPHA E TE OMEGA”

13. Eaa a Iehova i tuatua ai e: “Ko au te Alepha e te Omega”?

¹³ Mei tei taikuia akenei, e toru taime kua tuatua a Iehova i roto i te orama kia Ioane. (Apo. 1:8; 21:​5, 6; 22:13) I tera au atianga, kua tuatua a Iehova: “Ko au te Alepha e te Omega.” Ko te alepha te reta mua o te arareta Ereni e ko te omega te reta openga. Na te karanga anga e “ko au te Alepha e te Omega,” te karanga ra a Iehova e me akamata aia i tetai angaanga, ka akaoti takiri aia i te reira.

14. (a) Oronga mai tetai akaraanga me tuatua a Iehova e “Alepha” e me karanga aia, e “Omega.” (e) Eaa te akapapuanga i roto ia Genese 2:​1-3?

¹⁴ I muri ake te anga mai anga a Iehova ia Adamu e Eva, kua akakite Aia i tona akakoroanga no te tangata e te enua. Akakite te Pipiria: “Kua akameitaki atura te Atua ia raua, e kua tuatua maira te Atua kia raua, Kia anau korua, e kia maata roa, e e akaki i te enua nei, e e akavi.” (Gene. 1:28) I tera atianga, mei te mea rai e kua tuatua a Iehova “Alepha.” Kua akakite mai aia i tona akakoroanga. Ka tae mai te tuatau me kī te enua i te uanga apa kore e te tuatua tika a Adamu raua ko Eva e ka riro te enua ei parataito. Me tae ki tera tuatau, mei te mea rai e ka tuatua a Iehova “Omega.” Te akaoti anga a Iehova i te anga i “te rangi, e te enua e to reira katoa ranuku,” kua oronga aia i tetai akapapuanga. Tei roto ia Genese 2:​1-3. (E tatau.) Kua akatapu a Iehova i te rā itu. Eaa te aiteanga? Kua akapapu mai a Iehova e ka tupu rai tona akakoroanga no te tangata e te enua. Ka akatinamouia te reira me tae ki te openga o te rā itu.

15. Eaa i akaraanga e kua tamanata a Satani i ta te Atua akakoroanga no te tangata?

¹⁵ I te meameau anga a Adamu raua ko Eva, kua riro mai raua ei nga tangata ara e kua iri te ara e te mate ki runga i ta raua uanga. (Roma 5:12) Tei tupu, i te akara anga penei kua tamanata a Satani i to te Atua akakoroanga kia akakī i te enua ki te aronga apa kore e te tiratiratu. I te akaraanga, kua tāpu a Satani ia Iehova mei te tuatua anga “Omega.” Penei kua manako a Satani e kare e rauka ia Iehova i te akatupu i tana i taputou. Kua manako aia e ka tamate atu te Atua ia Adamu e Eva e oti, ka anga akaou i tetai nga tokorua apa kore ei akatupu i Tona akakoroanga no te tangata. Naringa te Atua i akapera, ka akaapa i reira te Tiaporo iaia ei pikikaa. No teaa ra? No te mea i roto ia Genese 1:​28, kua akakite a Iehova kia Adamu raua ko Eva e akakī i te enua ki ta raua uanga.

16. Eaa a Satani i manako ei e ka rauka iaia i te akaapa e e puapinga kore ta Iehova angaanga?

¹⁶ Eaa atu tetai ikianga ta Satani i manako e ka rave te Atua? Penei kua manako a Satani e ka akatika a Iehova ia Adamu e Eva kia anau i te tamariki apa ua te ka kore rava e rauka te tu apa kore. (Kohe. 7:20; Roma 3:23) Me koia ïa, ka akaapa atu i reira te Tiaporo ia Iehova ei Atua puapinga kore. No teaa ra? No te mea kare teia ravenga e akatupu i to te Atua akakoroanga koia oki, kia akakī i te enua Parataito ki te uanga apa kore e te tiratiratu a Adamu e Eva.

17. Akapeea a Iehova te akatikatika anga i te meameaau anga a Satani e te nga tangata mua, e eaa te openga? (Akara katoa i te tutu.)

¹⁷ Kua akatikatika a Iehova i te meameaau anga a Satani e te nga tangata mua na roto i tetai ravenga umere kare rava a Satani i manako ana. (Sala. 92:5) Kare a Iehova i pikikaa mari ra kua akatupu aia i tana tuatua kia uangaia a Adamu e Eva. Kare katoa aia i puapinga kore mari ra kua akaari a Iehova, me rave aia i tetai angaanga, ka akaoti aia i te reira. Kua akapapu aia i tana taputou na te oronga mai anga i te “uanga” te ka akaora i te uanga tuatua tika a Adamu e Eva. (Gene. 3:15; 22:18) Penei kua poitirere tikai a Satani i ta Iehova akanoonooanga no te oko! No teaa ra? No te mea kua akatumuia teia ki runga i te aroa noinoi kore. (Mata. 20:28; Ioa. 3:16) Kare o Satani aroa. Eaa ta te oko ka akatupu? Me tae ki te openga o te Tauatini Mataiti, ka nooia te enua parataito e te uanga apa kore e te tiratiratu a Adamu e Eva—mei ta Iehova i akakoro. A tera tuatau, mei te mea e ka karanga a Iehova, “Omega.”

AKAKETAKETA I TOOU IRINAKI I TA IEHOVA I TAPUTOU NO TE PARATAITO

18. Eaa nga akapapuanga e toru te akakite maira te Atua? (Akara katoa i te pia “E Toru Tumu Kia Irinaki i ta Iehova Taputou.”)

¹⁸ Mei ta tatou i uriuri, eaa te akapapuanga ta tatou ka akakite atu ki te aronga tei ekoko e ka tupu ta te Atua taputou no te Parataito? Te mea mua, na Iehova i taputou mai i te reira. Akakite mai te puka a Apokalupo: “Kua tuatua maira tei noo ki runga i te terono ra, I na, te akariro nei au i te au mea ravarai ei mea ou.” Tei iaia te pakari, te mana, e te inangaro i te akatupu i tana i taputou. Te rua, e tinamou ta Iehova taputou, mei te mea ra e kua tupu takere. Karanga aia: “E tuatua-mou oki teianei au tuatua e te pikikaa kore. . . . Kua tupu.” Te toru, me akamata a Iehova i tetai angaanga, ka akaoti takiri aia i te reira mei tei akapapuia e tana tuatua: “Ko au te Alepha e te Omega.” Akapapu i reira a Iehova e ko Satani te pikikaa e tei puapinga kore.

19. Me ekoko te tangata i ta te Atua taputou no tetai Parataito eaa taau ka tuatua?

¹⁹ E akamaara, me akakite koe i ta te Atua taputou ki te aronga taau ka aravei i te ngai tutu aere, ka akaketaketa koe i toou irinaki i ta Iehova i taputou. No reira me tatau akaou koe i te taputou manea no te Parataito ia Apokalupo 21:4 e me karanga te pu ngutuare, “Kare teia e tupu,” akapeea koe me pau? E tatau e e akamārama i te irava 5 e te 6. Akaari akapeea a Iehova te akatinamou anga i tana taputou na te akapapuanga i te reira.—Isa. 65:16.