Irinaki ia Iehova, Mei ia Samasona

1-2. Eaa tatou ka inangaro ei i te kite i te tua o Samasona?

EAA taau ka manako me rongo koe i te ingoa o Samasona? Penei e tumutoa. Ae. Inara kua iki a Samasona i te ikianga tei akatupu i te kino. Noatu ra, kua akamanako a Iehova i to Samasona tu tiratiratu, e kua tata i te reira i roto i tana Pipiria.

² Kua taangaanga a Iehova ia Samasona kia tauturu i Tona iti tangata ia Iseraela. E anere ua atu mataiti i te mate anga a Samasona, kua akakeu a Iehova ia Paulo kia tata i to Samasona ingoa e koia tetai tangata akarongo. (Ebe. 11:​32-34) Riro to Samasona akaraanga ei akamaroiroi ia tatou. Kua irinaki aia kia Iehova, noatu te au turanga ngatā. Ka akamanako tatou i te au akamaroiroi anga e te au apiianga tau mei tona akaraanga.

IRINAKI UA A SAMASONA IA IEHOVA

3. Eaa te angaanga tei rauka ia Samasona?

³ I te anauia anga a Samasona, te tutara ra to Philiseti ki rungao i te iti tangata Iseraela e te takinokino anga ia ratou. (Aka. 13:1) Kua mamae tikai to Iseraela. Kua iki a Iehova ia Samasona kia “akaora ia Iseraela i te rima o te Philiseti.” (Aka. 13:5) E aka angaanga tikai! Ka anoanoia a Samasona kia irinaki ua ia Iehova.

4. Akapeea a Iehova te tauturu anga kia matara a Samasona mei te au Philiseti? (Te Au Akava 15:​14-16)

⁴ Akara ana i tetai tupuanga tei akaari mai e kua irinaki a Samasona ia Iehova e Tana tauturu. I tetai atianga, kua aere mai te vaeau o Philiseti i te opu ia Samasona i Lehi, i Iuda. Kua mataku te iti tangata o Iuda, e kua tuku atu ia Samasona ki te enemi. Tapeka atura i te nga rima o Samasona ki te taura ou e rua e kua arataki atu te iti tangata Iseraela iaia ki te au Philiseti. (Aka. 15:​9-13) Inara, kua “aere viviki maira te vaerua o Iehova” ki runga ia Samasona e kua matara te taura mei iaia. “Kitea iora e ia tetai ivi tanga asini e mea mata,” kua rave i te reira e kua tamate e 1,000 tangata Philiseti!—E tatau i Te Au Akava 15:​14-16.

5. Ia Samasona e taangaanga ra i te ivi tanga asini akapeea aia te akaari anga i tona irinaki ia Iehova?

⁵ Eaa ra a Samasona i taangaanga ei i te ivi tanga asini? Kare i te apinga tamaki! Penei kua kite a Samasona e tei ia Iehova tona maroiroi kare i te apinga tana e taangaanga ra. Ae, kua taangaanga teia tangata tiratiratu tana i rauka kia akatupu i to Iehova anoano. No tona irinakianga ia Iehova, kua autu a Samasona i te tamaki.

6. Me rave i te au angaanga pae vaerua, eaa te apiianga mei ia Samasona no tatou?

⁶ Ka akamaroiroiia rai tatou e Iehova kia rave i ta tatou angaanga, noatu kare i te mea mama. Ka tauturu mai te Atua. E irinaki ua rai ia Iehova e ka tauturu aia ia koe, mei ia Samasona, kia rave i Tona anoano.—Mase. 16:3.

7. Eaa te akaraanga puapinga kia kimi tatou i ta Iehova aratakianga?

⁷ E maata te au taeake e te au tuaine te rave ra i te angaanga pātu anga tei irinaki ia Iehova. I mua ana, ka parani e ka pātu te au taeake i te au Are Uipaanga Patireia ou e tetai mai au are. Aere ua rai kua anoanoia te au tauianga no te maata i te tangata e aere mai nei ki ta Iehova akaaerenga. Kua pati tauturu te au taeake akaaere i ta Iehova aratakianga e kua tamata i te au ravenga ou, mei te oko anga i te au are e te akaou i te reira. “I te akamata anga kare tetai pae i āriki ana i teia ravenga ou,” i karanga ai a Robert, tei rave ana i te au angaanga pātu anga takapini i teianei ao. Akakite aia: “Kua tuke ki ta matou i rave ana no te au mataiti. Inara kua akatanotano te au taeake ki te reira, e e akara anga kua akameitaki a Iehova i te reira tauianga ou.” Ko tetai akaraanga teia ia Iehova e arataki ra i tona iti tangata kia akatupu i tona anoano. Mei tetai au taime, ka tau rai tatou i te ui e, ‘Te kimi ra ainei au i ta Iehova aratakianga e te akono anga i te reira?’

IRINAKI UA A SAMASONA KI TA IEHOVA AU APINGA

8. Tetai atianga kua kaki vai a Samasona, eaa tana i rave?

⁸ Penei kua tatau ana koe no runga i ta Samasona au angaanga umere i rave. Ma te maroiroi, kua tamate aia i tetai riona e te 30 tangata i te oire Philiseti ko Asekelona. (Aka. 14:​5, 6, 19) Kua kite a Samasona kare e rauka iaia mari ra i ta Iehova tauturu. Kua kiteaia teia i tetai atianga kua mate aia i te kaki vai i muri ake i te tamate anga e 1,000 Philiseti. Eaa tana i rave? Kua pati aia i te tauturu kia Iehova.—Aka. 15:18.

9. Akapeea a Iehova te pau anga i ta Samasona patianga? (Te Au Akava 15:19)

⁹ Kua pau mai a Iehova i ta Samasona kapiki anga na te oronga semeio anga mai i tetai puna vai. Te inu anga a Samasona i te reira, “kua io akera te a’o, kua ora atura.” (E tatau i Te Au Akava 15:19.) Akaraanga te vai nei rai teia puna vai i te au mataiti i muri mai i te tata anga te peroveta ko Samuela i te puka o Te Au Akava. Me kite atu to Iseraela i te reira vai ta’e ka maara ia ratou te puapinga kia irinaki ua kia Iehova e ka tauturu i tona aronga akamori tiratiratu i te tuatau tumatetenga.

10. Eaa te o maira no te kimi anga i ta Iehova tauturu? (Akara katoa i te tutu.)

¹⁰ Ka anoanoia rai tatou kia akara kia Iehova no te tauturu noatu to tatou kite e te karape i te rave i tana angaanga. Ka āriki akaaka ua tatou e ka tupu te puapinga me irinaki ua kia Iehova. Mei ia Samasona i akamaroiroiia i tona inu anga i te vai a Iehova, ka akamaroiroi ia tatou i te pae vaerua me taangaanga i ta Iehova au apinga.—Mata. 11:28.

11. Akapeea tatou me taangaanga meitaki i ta Iehova tauturu? Akatutu mai.

¹¹ Akamanako ana i te akaraanga o Aleksey, e taeake i Rutia te akakoromaki ra i te au takinokino anga pakari. Eaa tei tauturu iaia kia maroiroi noatu tona au turanga kino? Kua rave ua ana raua ko tana vaine i ta raua apii i te pae vaerua. Karanga aia: “E tauta ana au i te rave i taku apii i te pae vaerua e te tatau i te Pipiria i te au rā. I te au popongi, ka uriuri maua ko taku vaine i to maua tia e ka pure kapiti kia Iehova.” Te apiianga? E irinaki ua rai kia Iehova. Akapeea? Na te akamatutu i to tatou akarongo na roto i te apii putuputu i te Pipiria e te rave i te au angaanga pae vaerua. Aru mai, ka akamaroiroi a Iehova ia tatou kia tavini iaia. Kua akamaroiroi aia ia Samasona, ka pera katoa Aia kia tatou.

KARE A SAMASONA I TUKU I TE AU

12. Eaa te ikianga tarevake ta Samasona i rave, e eaa te tuke i te reira mei tetai au tupuanga o mua ana?

¹² E tangata apa ua Samasona mei ia tatou rai, kua rave aia i te au ikianga tarevake. Kua riro tetai ikianga nana ei akatupu i te tumatetenga. Iaia e tavini ra ei akava no tetai tuatau, kua “inangaro aia i tetai vaine i te o ra i Soreka, ko Delila tona ingoa.” (Aka. 16:4) I mua ana, kua tapaoia a Samasona ki tetai vaine Philiseti, “na Iehova taua mea ra” te “kimi ra aia [kia tamaki atu] i te Philiseti.” I muri mai, kua noo atu a Samasona ki te ngutuare o tetai vaine akaturi i te oire Philiseti ko Gaza. I te reira atianga, kua akamaroiroi a Iehova ia Samasona kia apai ke i te nga ngutupa, autuia te oire. (Aka. 14:​1-4; 16:​1-3) Kareka ra te turanga o Delila e tuke te reira no te mea e vaine Iseraela aia.

13. Eaa ta Delila i rave kia akakeu ia Samasona kia akakite i te tika?

¹³ Kua āriki a Delila i te moni maata mei te au Philiseti kia pikikaa ia Samasona. E tu irinaki ua ainei to Samasona no tona inangaro tikai i teia vaine e kare aia i kite i te akakoroanga o Delila? Noatu eaa te tu, kua maro putuputu a Delila ia Samasona kia akakite mai i tona maroiroi, e aere ua rai kua akakite aia kia Delila. Te mea maromaroa, kua tuku a Samasona iaia ki roto i te kino e kua ngere i tona maroiroi e tona pirianga kia Iehova.—Aka. 16:​16-20.

14. Eaa te tupuanga kino kia Samasona no tona irinaki ia Delila?

¹⁴ Kua tupu te kino maata kia Samasona no tona irinakianga ia Delila. Kua opu e kua akamatapoia aia e te au Philiseti. Kua tukunaia ki roto i te are auri i Gaza, e aronga takinga kino i te iti tangata o Samasona, e kua riro mai aia ei tangata taviri sitona. E oti kua taakamaia aia ki te ngai tamataoraanga a te au Philiseti. Kua oronga ratou i te atinga maata ki te atua pikikaa ko Dagona, no te opu anga ia Samasona. Kua arataki ratou ia Samasona mei te are auri ki te ngai tamataoraanga e kua akariro iaia ei “takatakata” anga na ratou.—Aka. 16:​21-25.

15. Akapeea a Samasona te akaari anga e kua irinaki akaou aia ia Iehova? (Te Au Akava 16:​28-30) (Akara i te tutu i te kapi mua.)

¹⁵ Kua tarevake maata a Samasona, kare ra aia i tuku i te au. Kua tauta aia i te akatupu i tana angaanga no ko mai i te Atua no te au Philiseti. (E tatau i Te Au Akava 16:​28-30.) Kua pati a Samasona kia Iehova: “Kia mate ua atu au i te matenga o te Philiseti nei.” Kua pau mai te Atua mou i ta Samasona pati anga e kua akamaroiroi akaou iaia. Tei tupu, kua maata atu ta Samasona au Philiseti i tamate i to mua ana.

16. Eaa te apiianga mei te tarevake o Samasona? 

¹⁶ Noatu kua tupu te kino maata kia Samasona no tona tarevake, kare aia i akamutu ana i te rave i to Iehova anoano. Me tarevake tatou, me akoia, e me ngere i tetai apainga, auraka e tuku i te au. E akamaara, kare a Iehova e tuku i te au no tatou. (Sala. 103:​8-10) Ka puapinga rai tatou kia Iehova, mei ia Samasona.

17-18. Eaa te akamaroiroi anga mei te akaraanga o Michael? (Akara katoa i te tutu.)

¹⁷ Akamanako ana i te akaraanga o tetai mapu taeake ko Michael. Kua maroiroi aia i te rave i te au angaanga na Iehova, e tavini tauturu e e painia katoa. Ma te mii, kua rave aia i te tarevake e kua ngere i tana au apainga i roto i te putuputuanga. Karanga aia: “E tae mai ki teia atianga kua maroiroi au i te tavini ia Iehova. Kite ua ake au kua ngere au i taku apainga. Kare au i manako ana e ka akaruke a Iehova iaku, inara kua manako au me ka meitaki akaou mai to maua pirianga e me ka rauka akaou iaku i te tavini iaia mei to mua ana.”

¹⁸ Ma te mataora, kare a Michael i tuku i te au. Karanga aia: “Kua akamou au i toku manako kia meitaki akaou to maua pirianga ko Iehova na te riringi anga i toku ngakau kiaia na roto i te pure, te apii, e te akamanako ua iaia.” E aere ua rai, kua meitaki akaou mai to Michael turanga i roto i te putuputuanga. Te tavini nei aia ei tangata pakari e ei painia tamou. Akakite aia: “Kua riro ta te aronga pakari akamaroiroianga i te tauturu iaku kia kite e te akaperepere ua ra a Iehova iaku. Kua rave akaou au i te angaanga i roto i te putuputuanga ma te akava ngakau ma. Kua apii mai teia tupuanga kiaku e te akakore ra a Iehova i te ara a te aronga tei tataraara.” Papu ia tatou ka taangaanga e ka akameitaki a Iehova ia tatou noatu me kua tarevake ana tatou, kia rave ra tatou i te au mataara akatikatika anga e kia irinaki ua rai kia Iehova.—Sala. 86:5; Mase. 28:13.  

19. Akapeea to Samasona akaraanga i te akamaroiroi anga ia koe?

¹⁹ I teia atikara, kua uriuri mai tatou i te au tupuanga o Samasona. Kare aia i te tangata tiama, e kare aia i tuku i te au no te tavini ia Iehova noatu kua tarevake aia kia Delila. Kare a Iehova i akaruke ana iaia. Kua taangaanga akaou te Atua ia Samasona ma te maroiroi. Kua akamanako a Iehova ia Samasona ei tangata akarongo, e kua tata i tona ingoa i te pae i te aronga tiratiratu i te pene 11 o Ebera. E akamaroiroi anga i te kite e te tavini nei tatou i tetai Metua akaperepere i te rangi tei inangaro i te tauturu ia tatou me rokoia e te manamanata! Mei ia Samasona rai, e pati kia Iehova: “E akamaara mai koe iaku, . . . e akamaroiroi mai koe iaku nei.”—Aka. 16:28.