Eaa ta te Pipiria e Karanga ra no te Tu Takaua e te Akaipoipo?

I tetai au enua, irinaki tetai aronga e kare te tangata e mataora mari ra kia akaipoipo. Inara, kare te katoa anga o te aronga akaipoipo e mataora ana e kare te katoa anga o te aronga takaua e maromaroa ana. Akakite te Pipiria e apinga aroa te oraanga takaua e te akaipoipo.

1. Eaa te au mea meitaki no te oraanga takaua?

Karanga te Pipiria: “Ko tei oronga kia akaipoipoia, e tuatua meitaki tana; ko tei kore ra i oronga kia akaipoipoia, e tuatua meitaki roa tana.” (E tatau ia 1 Korinetia 7:​32, 33, 38.) I teea tu i “meitaki roa” ai te aronga takaua? Kare te au Kerititiano takaua e akono i tetai tokorua. E maata ta ratou ka rave. Ei akaraanga, ka rave ratou i te angaanga tutu aere tukeke, te teretere ki tetai enua no te tutu aere i te nuti meitaki. Tei puapinga roa atu, ka akapou ratou i te tuatau no te akavaitata kia Iehova.

2. Eaa te au puapinga me akaipoipo kia tau ki te ture?

Ka tupu te meitaki i roto i te oraanga akaipoipo e te takaua. Karanga te Pipiria “e meitaki nga tangata toko rua i te taki tai.” (Koheleta 4:9) Tika rai teia ki te au Kerititiano mou te taangaanga ra i te au kaveinga Pipiria i roto i to ratou oraanga akaipoipo. Te au tokorua tei akaipoipo kia tau ki te ture, kua tia i te aroa, te akangateitei e te akaperepere ia raua. E pirianga tinamou to raua tei tuke ki te aronga noo kapiti ua kare i akaipoipo. E ka riro te oraanga akaipoipo ei oraanga mataora no te utuutu i te tamariki.

3. Eaa to Iehova manako i te oraanga akaipoipo?

Te akono anga a Iehova i te akaipoipo mua, karanga aia: “E akaruke ei te tangata i tona metua tane e tona metua vaine, ka piri atu ei ki tana vaine.” (Genese 2:24) Inangaro a Iehova i te tane e te vaine kia aroa e kia noo kapiti raua e tuatau ua atu. Ka akatika aia kia tatara te tokorua me kua akaturi tetai ia raua. I roto i teia turanga, kua oronga a Iehova i te tikaanga ki te tokorua apa kore kia iki.a (Mataio 19:9) Kare a Iehova e akatika i te au Kerititiano kia maata te tokorua i roto i tona oraanga akaipoipo.​—1 Timoteo 3:2.

KIMI OONU

4. Taangaanga meitaki i te apinga aroa o te oraanga takaua

Karanga a Iesu e apinga aroa te oraanga takaua. (Mataio 19:​11, 12) E tatau ia Mataio 4:23, e oti uriuri i teia uianga:

• Akapeea a Iesu te taangaanga anga i teia apinga aroa, te oraanga takaua no te tavini i tona Metua e te tauturu i tetai ke?

Ka mataora te au Kerititiano i te oraanga takaua mei ia Iesu rai. Akatangi i te VITIO, e oti uriuri i te uianga ka aru mai.

VITIO: Tiratiratu te Aronga Takaua (3:11)

• Na roto i teea au ravenga puapinga ka taangaanga te au Kerititiano takaua i to ratou oraanga?

Kua kite ainei koe?

Kare te Pipiria i akakite mai eaa te mataiti tau kia akaipoipo. Inara, te akamaroiroi maira i tetai kia tiaki “kia pakari aia,” kia pāti te tuatau o te inangaro āinga te ka taruri ke i te manako o tetai mapu.​—1 Korinetia 7:36.

5. Iki meitaki i toou tokorua

Te ikianga i tetai tokorua, ko tetai ikianga puapinga maata ka rave koe. E tatau ia Mataio 19:​4-6, 9, e oti uriuri i teia uianga:

• Eaa tetai Kerititiano kare e rapurapu i te akaipoipo?

Ka tauturu te Pipiria ia koe kia kimi i te tokorua tau. Tei maata atu, e kimi i te tokorua tei akaperepere ia Iehova.b E tatau ia 1 Korinetia 7:39 e 2 Korinetia 6:14. E oti uriuri i teia au uianga:

• Eaa tatou ka akaipoipo ei i tetai taeake Kerititiano?

• Eaa to Iehova manako me akaipoipo koe i tetai kare e inangaro ana Iaia?

6. Aru i to Iehova manako no te akaipoipo

I Iseraela taito, kua akaruke ua te tane i ta ratou vaine no te au tumu pikikaa. E tatau ia Malaki 2:​13, 14, 16, e oti uriuri i teia uianga:

• Eaa a Iehova i rikarika ai i te tatara tika kore?

Akatangi i te VITIO, e oti uriuri i teia uianga ka aru mai.

VITIO: Akaipoipo​—E Pirianga Mutu Kore (4:30)

• Me kua akaipoipo koe i tetai kare i roto i te tuatua mou, eaa taau ka rave kia puapinga toou akaipoipo?

7. Taangaanga i ta Iehova au turanga i roto i toou akaipoipo

VITIO: Ka Rauka ia Koe te Aru i ta Iehova au Turanga no te Akaipoipo (4:14)

E tatau ia Ebera 13:4, e oti uriuri i teia uianga:

• I toou manako e tau ainei ta Iehova au turanga no te oraanga akaipoipo? Eaa ra, e eaa ka kore ei?

Te tapapa maira a Iehova kia retita te nga Kerititiano i to raua akaipoipo e me tatara, mei tei matauia i tetai au enua na te kavamani e rave ana i teia. E tatau ia Tito 3:1, e oti uriuri i teia uianga:

• Me kua akaipoipo koe, kua papu ainei ia koe e kua tau toou akaipoipo ki te ture a te kavamani?

APIIANGA

E apinga aroa te oraanga takaua e te akaipoipo mei ia Iehova. Ka tupu te mataora e te merengo me rotai te reira ki to Iehova anoano.

Uriurianga

• Akapeea tetai me taangaanga meitaki i tona oraanga takaua?

• Eaa te tumu i akakite ei te Pipiria kia akaipoipo i te taeake Kerititiano?

• Eaa ta te Pipiria anake tumu kia tatara?

KIMI KIMI

Eaa te aiteanga kia akaipoipo “kia tau ra i te Atu”?

“Au Uianga a te Aronga Tatau” (Te Punanga Tiaki, Tiurai 1, 2004)

Akara i te nga vitio e i tauturu ia  koe kia iki i te au ikianga meitaki no te dating e te akaipoipo.

Akapapaanga no te Akaipoipo (11:53)

Akara eaa tetai taeake i manako ei e mea puapinga maata ta Iehova i oronga kiaia.

Manako Au e ka Apii Aia i te Tuatua Mou (1:56)

Eaa te au mea ka akamanako tetai i mua ake ka tatara ei me kore ka akatakake ei i te tokorua?

“Akangateitei i ‘ta te Atua i Topiri Ra’” (Te Punanga Tiaki, Titema 2018)