Kare te Au Vaerua i Ora Ana e i Mate ki te Enua Nei

Te vaira te au vaerua! I te ngai akara koreia o te vaerua ra, e au vaerua memeitaki e te au vaerua kikino katoa etai. E au peretana ainei ratou tei noo ki te enua nei e kua mate atu i konei?

Kare, kare ko ratou. Me mate tetai tangata kare aia e aere atu ki te ao vaerua, mei ta te aronga e manganui i manako ra. Akapeea i papu ei ia tatou teia? No te mea te akakite maira te Puka Tapu. E puka tuatua mou te Puka Tapu no ko mai i te Atua mou anake ra, ko Iehova tona ingoa. Na Iehova i anga mai i te au tangata; te kite meitaki ra aia eaa te tupu ra kia ratou me mate ratou.—Salamo 83:18; 2 Timoteo 3:16.

Te akakite maira te Puka Tapu e na te Atua i anga ia Adamu, koia te tangata mua ra, “i te one-pueu o te enua nei.” (Genese 2:7) Kua tuku iora te Atua iaia ki Parataito, koia te kainga i Edene ra. Naringa a Adamu i akarongo i te ture a te Atua, kare aia e mate; ka vai mai rai aia kia ora ki runga i te enua i teia tuatau nei. Inara i ta Adamu aati akakoroanga i te ture a te Atua, kua tuatua atura te Atua kiaia: “E [ka] oki ua atu koe ki raro i te one; no reira mai oki koe: e one-pueu.”—Genese 3:19.

Eaa te aite anga o teia? I ea ra, a Adamu i mua ake i ta Iehova anga mai anga iaia i te one pueu? Kare ua aia. Kare aia i te vaerua, kare ra i anauia mai i te rangi. Kare aia i vai ana. No reira i ta Iehova tuatua anga no Adamu e ka “oki ua atu koe ki raro i te one,” te tuatua ra aia e ka mate a Adamu. Kare aia i tapae atu ki te ngai no te vaerua. I tona matenga, kua riro akaou a Adamu kia ora kore, kua vai kore ua. Ko te matenga ko te kore anga ia o te ora.

Inara akapeea etai atu tei mate ra? Kua vai kore katoa ainei ratou? Te pau ra te Puka Tapu:

• “Te aere nei ratou katoa [te tangata e te puaka] ki te ngai okotai; no te one-pueu anake nei ratou, e te oki anake nei ratou ki te one-pueu ra.”—Koheleta 3:20.

• “Kare ra a te aronga i mate ra e tuatua i kitea.”—Koheleta 9:5.

• “To ratou aroa, e to ratou riri, e to ratou vareae, kua kore anake ïa.”—Koheleta 9:6.

• “Kare oki e angaanga, kare e kimianga, kare oki e kite, kare oki e pakari, i roto i te vaarua taau e aere na.”—Koheleta 9:10.

• “Te oki nei aia ki tona ra one; kore rava atura tana i akakoro i taua rā ra.”—Salamo 146:4.

Te kite nei ainei koe i te ngata kia ariki i teia au tuatua tapu? Me koia ia, ka tamanako ana i teia: I roto i te au ngutuare e manganui, ko te tane te rave maira i te moni ei tauturu i tona ngutuare tangata. Me mate ra taua tangata ra, ko te mea matauia ka mamae to te ngutuare i te rave anga ngata te oraanga. I etai tuatau kare e rava te moni a te vaine e te tamariki no te oko i te manga. Penei ka akakino atu te au enemi o taua tangata ra ia ratou. I teianei e ui kia koe uaorai: ‘Me te ora ra tera tangata i te ao vaerua, eaa ra aia ka kore ei e rave ua atu i te tauturu i tona ngutuare? Eaa aia ka kore ei e paruru i tona ngutuare tangata i taua au tangata kikino ra?’ No te mea e, te tika ra ta te au tuatua tapu. Kare e ora o taua tangata ra, kare e rauka iaia i te rave i tetai apinga.—Salamo 115:17.

Kua riro ainei te aite anga o te reira e kare tei mate e ora akaou mai? Kare, kare i te reira. Ka tuatua tatou no te tuakaouanga a muri akenei. Inara ko tona aite anga e kare tei mate i kite e eaa taau e rave ana. Kare ratou e kite mai ia koe, kare e akarongo mai ia koe, e kare e tuatua mai kia koe. Auraka koe e mataku ia ratou. Kare e rauka ia ratou te tauturu ia koe, e kare katoa koe e kino ia ratou.—Koheleta 9:4; Isaia 26:14.