E Tika Tikai Ainei te Atua kia Koe?

TE AERE putuputu ra ainei koe ki te Atua na roto i te pure me kite koe i te au manamanata apiapi? Me koia ia, te manako ra ainei koe e te tuatua ra koe ki tetai peretana tika tikai?

Te taikuanga i tona Metua i te rangi, kua tuatua a Iesu Karaiti: “Tei tono mai iaku nei, e tuatua-mou tana.” (Ioane 7:28) Ae, e tika tikai te Atua ko Iehova, e te pureanga kiaia mei te ariu anga rai ki tetai pirianga tangata oa tikai no te tauturu e te ako anga. Inara, kia rongoia mai e te Atua, e kia arikiia te pure ka tika ta tatou au pure kia rave i te au umuumuanga a te Tuatua Tapu. Ei akaraanga, e tika kia aere akaaka tatou ki “tei akarongo i te pure” na roto i tana Tamaiti, koia a Iesu Karaiti.​—Salamo 65:2; 138:6; Ioane 14:6.

Penei te manako ra etai e no te mea e e akara koreia te Atua, kare aia ei peretana. Kia ratou, te akara anga penei e mea kitea koreia te Atua. Pera katoa etai au Kerititiano, tei apii ana i te au tu umere o te Atua, penei e i tetai au taime kua kite e e ngata tikai i te ariki e e tika tikai aia. Ko teia ainei toou manako? Me koia ia, eaa te ka tauturu i te akariro e e tika tikai te Atua ko Iehova kia koe?

E Apii i te Au Tuatua Tapu

Te apii putuputu ra ainei koe i te au Tuatua Tapu? Me putuputu e me maroiroi te au tuatau o taau apii i te Pipiria, e tika tikai te Atua ko Iehova kia koe. Ka akamaroiroiia i reira toou akarongo, ko tera te tu te tauturu ra ia koe kia ‘akara i tei kore e kitea.’ (Ebera 11:6, 27) I tetai tua, me kare e putuputu ana me kore te topatopa ra te apii anga o te Pipiria kare toou akarongo e tupu maata.

Ei akatutu anga: Ka akamanako ana kua akakite mai toou taote kia koe kia parai i tetai vairakau taki rua taime i te ra kia takore i tetai une kua roa. Ka ngaro ainei toou une me parai koe i te vairakau e okotai me kore taki rua ua taime i te marama? Kare roa ia. Mei te reira rai, kua oronga mai te tata taramo i tetai “ako anga tei tataia” kia tatou no te oraanga i te pae vaerua. E tatau i te Tuatua a te Atua “i te po e te ao.” (Salamo 1:1, 2) Kia rekareka i te puapinga tei tere atu, te anoanoia ra tatou kia aru i te “ako anga tei tataia”​—i te au ra na te manako tamou anga i te Tuatua a te Atua ma te tauturu anga o te au puka Kerititiano.​—Iosua 1:8.

Ka inangaro ainei koe kia rave i te au tuatau no taau apii ei mea akamaroiroianga i te akarongo? Teia tetai manako: I muri ake i te tatauanga i tetai pene i roto i te New World Translation of the Holy Scriptures me kare tetai atu Pipiria e irava tetai i te pae mai, e iki i tetai irava reka tikai e e akara i te au tuatua tapu akakiteia tei tataia. Na teia e akapuapinga i taau e apii ra, e kare e ekoko anga e ka umere koe te rotai anga o te Pipiria. Aru mai, ka akariro teia i tona Tata, te Atua ko Iehova ra ei tika tikai kia koe.

Na te taangaanga anga i te irava i te pae mai ka rauka oki te reira i te akamatau ia koe ki te au totou Pipiria e to ratou akatupu anga. Penei paa kua kite koe te maata anga te au totou o te Pipiria, mei tei akakiteia i to Ierusalema akakoreia anga e te au Babulonia. Inara, tei roto i te Pipiria tetai putunga o te au totou te piri ra tetai ki tetai e to ratou akatupu anga. Kare o etai o teia i kitea ia.

Ei akatauanga, e tatau i te totou no runga i te utunga no te patu akaou anga ia Ieriko e i reira e akamanako i tona akatupu anga. Te tuatua ra a Iosua 6:26: “Kua akataputou aturā Iosua ia ratou i reira, karanga atura, Kia taumaaia te tangata ki mua i te aroaro o Iehova, ko te tu ki runga e patu i teianei oire ia Ieriko nei; e akamou aia i te tango ma te mate o te tama mua nana, e ma tana tamaiti openga ra e akatu ei aia i te au ngutupa.” Kua tae mai te akatupu anga i etai 500 mataiti i muri mai, ka tatau tatou ia 1 Ariki 16:34: “Tei tona [te Ariki ko Ahaba] ra tuatau to Hiela i Betela akatu anga ia Ieriko: kua akamou aia i te tango o taua oire ra i te matenga o tana tama mua ra ia Abirama, e tei te matenga o tana tama openga ra ia Seguba, i akatu ei aia i te au ngutupa; mei te tuatua a Iehova, i tuatuaia mai e Iosua te tamaiti a Nuna ra.”a Na te Atua tika tikai anake ua i akauru i taua au totou e te akapapu i to ratou tupu anga.

Te tatauanga i te Pipiria, penei ka kimikimi manako koe no runga i tetai tumu. Ei akaraanga, penei ka akamanako koe eia mataiti i pou i rotopu i tetai totou e tona akatupu anga. I te mea e ka ui ua atu ki etai tangata, eaa i kore ei i reira e tauta pakari kia kimi uaorai koe i te reira? Ma te taangaanga anga i te au tiati e te au puka tauturu apii Pipiria, e kimi i te au pau anga ma te rave meitaki anga mei ia koe rai e tauta ra kia akataka i te mapu no tetai apinganui. (Maseli 2:4, 5) Ka tupu meitaki ia toou akarongo me kitea ia te au pau anga e ka riro te Atua ko Iehova ei tika tikai kia koe.

E Pure Akatenga e kia Putuputu

Auraka e ngaropoina te puapinga o te pure e te akarongo. Kua tuatua te au pipi a Iesu i teia pati anga tika: “E akamaata mai i to matou akarongo.” (Luka 17:5) Me kare a Iehova e akara anga tika tikai kia koe, kore oki e pure atu kiaia no toou anoano kia akamaataia mai te akarongo? E pati papu tikai i toou Metua i te rangi no tana tauturu i te akariroanga iaia uaorai ei tika tikai kia koe.

Me e manamanata tei runga i toou manako, e rave i te tuatau tei anoanoia kia tuatua uaorai koe ki to Oa i te rangi na roto i te mataara ngakau tae. I te vaitata anga to Iesu matenga, kua pure maroiroi tikai aia. Noatu e kua akaapa aia i te ravenga akonoanga o te au pure roangarere no te akaariari i te ngai tangata, kua pou iaia e tai po katoa i te pure anga i te ngai muna i mua ake te ikianga i tana 12 apotetoro ra. (Mareko 12:38-40; Luka 6:12-16) Penei te maara katoa ra rai ia tatou a Hana, tei riro mai ko te metua vaine o te peroveta ko Samuela ra. Te anoanoanga i tetai tamaiti tamaroa, kua “pure [aia] ki mua i te aroaro o Iehova.”​—1 Samuela 1:12.

Eaa ainei te apii anga tumu i roto katoatoa i teia? Me te manakonako ra koe kia oronga ia mai te pau anga ki taau au pure, e mea tau ia koe kia viviki, ma te akatenga, te tukutuku kore i te pure​—e e tika oki kia rotai ma to te Atua ra anoano. (Luka 22:44; Roma 12:12; 1 Tesalonia 5:17; 1 Ioane 5:13-15) Te raveanga i teia ka tauturu i te akariro i te Atua ei tika tikai kia koe.

E Akara i te Au Mea Angaia

Ka akaariia mai te tu o etai tangata ati ra na roto i tana au penianga. Mei te reira rai, te kitea puia ra i roto i te au mea angaia te “au mea” o Iehova, Tei Akapapa e Tei Anga i teianei ao e pini ua ake. (Roma 1:20) Me akara meitaki tatou i ta Iehova apinga angaanga, ka rauka ia tatou i te kite meitaki i tona tu, e ka riro i reira aia ei tika tikai kia tatou.

Me ka akara matatio koe i te au mea tei angaia e te Atua, penei ka mareka oonu tikai koe i te tu tika tikai o tona au tu. Ei akatau anga, te akakite anga no runga i te tu o te au manu rere penei ka ariki maata koe i to Iehova ra pakari. Te tatauanga no runga i teianei ao e pini ua ake, penei ka kite koe e ko te Tarava, e 100,000 mataiti marama tikoti anga, e okotai ua rai o tetai au tare anga e pirioni ua atu te au vananga etu i roto i te mareva. Kare ainei te reira e akamareka ia koe i te tu tika tikai o te pakari o Tei Anga ra?

E papu e, e tika tikai to Iehova pakari! Inara eaa ra te aite anga o te reira kia koe? I na, kare roa aia e akaoripuia i te au manamanata ta etai o tatou e apai ra kiaia na roto i te pure. Ae, noatu e te meangiti ra te kite no te au mea angaia ka rauka i te reira i te akariro ia Iehova ei tika tikai kia koe.

E Aaere ma Iehova

Kua rauka ainei ia koe uaorai i te kite e e tika tikai a Iehova? Ae, me kua aite rai koe kia Noa pateriareka tiratiratu. Kua akarongo ua aia kia Iehova, no te reira i tuatuaiai e: “Kua aaere a Noa raua ko te Atua.” (Genese 6:9) Kua ora ua atu a Noa mei te mea e tei te pae tikai a Iehova iaia. Ka riro te Atua ei tika tikai kia koe.

Me te aaere ra koe ma te Atua, ka irinaki koe i roto i te au taputou Tuatua Tapu e ka angaanga rotai ma ratou. Ei akara anga, kua irinaki koe i te au tuatua a Iesu: “E na mua . . . i te kimi i te basileia o te Atua, e te tuatua-tika nana ra; e kapiti katoaia mai taua au mea katoa [au mea anoano apinga] ra ia kotou.” (Mataio 6:25-33) E tika, penei kare oki a Iehova i oronga mai i ta tatou i anoano i roto i te mataara taau e tapapa ra. Inara, me pure ra koe e ka kite i to te Atua tauturu, ka riro aia ei tika tikai kia koe mei tetai tangata rai i te pae mai ia koe.

Ka tupu taua piri anga vaitata ma ia Iehova me aruaru tetai i te aaereanga ma te Atua. E akamanako ana ia Manuela, ko tetai Kite reo Paniora, tei akakoromaki i te au timata anga e manganui. Kua karanga aia: “Me manamanata au me kore te anoano ra i te tauturu, ka taangaanga au i te kaveinga tei kitea ia Maseli 18:10. Ka oro au kia Iehova no te tauturu. Koia ua rai toku ‘punanga ketaketa.’” Kua rauka ia Manuela te tuatua i teia i muri ake i te 36 mataiti i te irinakianga ia Iehova e te kiteanga i tona tauturu.

Te akamata ra ainei koe i te akariro ia Iehova ei tu akapapu anga noou? Auraka e taitaia me kare toou piri anga kiaia i riro ake me ko taau ia e inangaro ra. Kia vai i te au ra ei tangata tei aaere ma te Atua. Ia koe e patu ra i tetai oraanga aru anga i te tu tiratiratu, ka rekareka koe i te piri anga vaitata ma Iehova.​—Salamo 25:14; Maseli 3:26, 32.

Ko tetai mataara kia aaere ma te Atua koia oki kia o atu i roto i tana angaanga. Me piri koe i roto i te angaanga tutu aere anga o te Patireia, e tangata angaanga taeake koe ma Iehova. (1 Korinetia 3:9) Te kite anga i teia te tauturu ra i te akariro anga i te Atua ei tika tikai kia koe.

Te raurau maira te tata taramo: “E uri atu i to aerenga ki runga ia Iehova; e irinaki iaia, e nana e akatupu i te reira.” (Salamo 37:5) Auraka kia kore e uri atu ki te Atua noatu eaa te au apainga me kore toou au manako. E akara kiaia no te tauturu e te arataki anga. Me pure koe ma te irinaki i te Atua ko Iehova e te irinaki papu tikai iaia, ka tinamouia koe no te mea kua kite koe e kare e kore iaia i te rave atu i taau tuanga. Kua papu ainei ia koe ma te aere atu kia Iehova ma toou uaorai au manamanata? Ka pera koe​—me tika tikai te Atua kia koe.

[Au Tataanga Rikiriki i Raro]

[Tutu i te kapi 21]

E rave i te au tuatau o taau apii ei akamaroiroianga no te akarongo

[Tutu i te kapi 22]

E rave i te tuatau no te pure akatenga e kia putuputu

[Au Tutu i te kapi 23]

Akara e akapeea to te Atua ra au tu i te akaari angaia i roto i te au mea tei angaia

[Au Akameitakianga]

Hummingbird: U.S. Fish and Wildlife Service, Washington, D.C./Dean Biggins; stars: Photo: Copyright IAC/RGO 1991, Dr. D. Malin et al, Isaac Newton Telescope, Roque de los Muchachos Observatory, La Palma, Canary Islands