Au Uianga a te Aronga Tatau
Eaa ra a Noa i tuku atu ei mei te araka tetai orepi e i muri mai tetai kukupa?
Kare te Puka Tapu i oronga mai ana i tetai akatakaanga maata. Inara, e tumu puapinga tetai i roto i ta Noa rave anga.
No tetai a ngauru ra e te a ngauru po, kua kite te enua i te ua akaki e mea umere tikai, te akatupuanga i tetai tiruvi tei tapokiia ra te take o te au maunga no te rima marama. E kua “iri iora taua araka ra ki runga i te au maunga ra i Ararata.” (Genese 7:6–8:4) I tetai marama i muri mai kua “kitea iora te take maunga” kua “tuku [a Noa] i tetai orebi, ko tei rere atu e kua rere mai.”—Genese 8:5, 7.
Eaa ra te orepi? E ririnui to teia manu rererere anga, e ka rauka te ora i te au kai tukeke, e kapiti katoa ra te au kiko mate. Penei kua tuku atu a Noa i te orepi no te kite me ka oki mai me kare e noo takake mei te araka, penei te kaikaianga no te au potonga kiko manu tei akaariia mai mei te topa anga o te vai e te kitea anga te enua. Inara, kare te orepi i noo atu ana. Kua karanga te Puka Tapu e kua oki mai, tera ra kare i karanga ana e kua akaoki kia Noa. Penei kua akaoki ki te araka no te akaangaroi i rotopu i te au rererere anga ma te kimi tetai kai i runga ake i te vai.
Kua iki a Noa ma te tuku atu i tetai kukupa, i muri mai. Ka tatau tatou e: “Kare ra o te kukupa toanga tapuae i kitea, kua oki maira aia ki te araka kia Noa ra.” (Genese 8:9) Kua akakite mai teia e i roto i tona uaorai mataara, ka riro te kukupa ei akakiteanga e me kua topa te vaipuke ki raro. Kua akaari atu te kukupa i tetai irinaki anga i te tangata. E kua kite tikai a Noa e ka oki akaou mai te kukupa, kare no te akaangaroi ua i runga i te araka, tera ra kia Noa uaorai.
Kua tuatuaia ana e ka noo anake ua te kukupa ki runga i te enua maro, e ka rererere ki roto i te au o, e te kaikai anga te au raurau. (Ezekiela 7:16) Kua akakite mai te Grzimek’s Animal Life Encyclopedia e: “E mea tika tikai i te au rupe e te au kukupa ravarai i te kaianga i te au ua e te au nati, e ngata tikai i te kaikaianga me tapoki te kiona [me kare te vai] e maata atu i te ra okotai, i te mea e te maata anga o ta ratou kai tei runga te reira i te enua.” No reira penei kua apai mai te kukupa i tetai apinga tei kiteia ra i te enua maro me kare tetai rakau tei tupu ra. Te taime mua te tuku anga atu a Noa i teia kukupa, kua oki ua maira te kukupa kiaia i roto i te araka. Te rua taime, kua oki mai te kukupa ma tetai rau orive. Te toru o te taime, kare ia i oki mai, te akakite anga mai e ka rauka ia Noa i te aere ki vao mei roto i te araka.—Genese 8:8-12.
Koi manako ei etai pae e e kiteanga puapinga kore teia, ko te tika ra e te tau tikai ra te papaanga, ma te kore tetai ua atu oparaanga no te oronga i te au akataka anga katoa tikai, te akaata ra te reira i te tikaanga o te Puka Tapu. Te oronga maira teia i te tumu anga maata atu no te ariki i te papaanga, kare ei mea pikikaa me kare maani ua, mari ra ei mea tika tikai. Ma te kore anga te au kite anga ngata e te au akatakaanga te akakite katoa maira te reira kia tatou e eaa te au mea reka ta te au Kerititiano akarongo ka tapapa atu no te ui kia Noa i tona tuakaouanga e ka akakite iora aia ma te kite te au apinga i tupu ana e tona au rave anga.—Ebera 11:7, 39.