Akatapuia​—Kiaai?

“Te au mea ravarai ta Iehova i tuatua maira, na matou ïa e rave, e na matou e akarongo.”​—EXODO 24:7.

1, 2. (a) Eaa ta tetai papaki tangata e akamori ra? (e) Te kotingaia ra ainei te akatapu anga ki te aronga anake e akonoanga ta ratou?

IA Peperuare 1945, kua akaputuia ki roto i tetai ngai akarakara anga tarekareka te aronga vaeau akarere pai rere Zero-fighter o te pupu Yatabe Flying Corps o Tiapani ra. Kua orongaia kia ratou tataki tai tetai aenga pepa ei tata anga me ka akatika aia kia riro ei mema no te nuku tamaki kamikaze. “Kua manako au e ko toku kapikianga ia kia tuku atinga iaku uaorai i te tuatau pekapeka o toku enua,” ta tetai opita i tuatua, i reira ra aia i taua taime ra. “Kua akakeuia toku manako ngakau kia tuku iaku uaorai i te rave i te reira, kua oronga au iaku uaorai no taua angaanga ra.” Kua tereniia aia i te akono e i te akarere i tetai Ohka (e pai rere rokete kia mate atu aia ki runga) e kia akatika atu kia u ki runga i tetai manua enemi ra. Inara, kua akaopeia te tamaki i mua ake i tona papa anga kia rave i te reira e kia mate no tona enua e no tona emepera oki. I te ruti anga a Tiapani i te tamaki, kua pueurikiriki tona akarongo i te emepera ra.

² I tetai tuatau, e manganui to Tiapani tei akamori i te emepera ra, ta ratou i irinaki e atua ora ia. I etai atu au enua, i vai ana etai atu au apinga no te akamori anga e te vai nei rai. E au mirioni ua atu tei akamori ia Maria, ia Buda, me kore etai atu au tu-atua​—e putuputu te akatutuia na te au itoro. I te tapaepae anga te manako na te tuatua manako ke ra, kua tuku tetai papaki i ta ratou moni rave anga ngata i raukai ki roto i te au pute o te aronga tuatua evangeria tivi ma te turu anga ngakau katoa te aiteite ra ki te akamori anga. I muri mai i te tamaki ra, kua kimi te au Tiapani tei reka kore ra i tetai apinga ou ta ratou ka akatapu atu i to ratou au oraanga. No tetai papaki, kua riro ko te angaanga taua apinga ra. I te Itinga me kare te Opunga ra, e manganui kua akatapu ia ratou uaorai ki te akaputuanga au apinganui. Kua tuku te aronga ou i to ratou au oraanga ki runga i te aronga akatangi imene, kua aru ratou i to tera aronga tu oraanga. E maata te numero o ratou i teia tuatau kua riro ei akamori ia ratou uaorai, i te akariro anga i to ratou uaorai au anoano ei apinga no ta ratou akamori anga. (Philipi 3:19; 2 Timoteo 3:2) Inara e mea tau tikai ainei taua au apinga ra me kare au tangata ei akamori anga na tetai ma te meta katoa ra?

3. I akapeea i papu ei e puapinga kore etai apinga akamoriia ra?

³ Me aro atu i te tu tika tikai, e putuputu te aronga akamori itoro i te riro kia kore e akavareia. Ka akatupu te akamori itoro i te manako pekapeka me ka kite te aronga akamori ra e ko ta ratou au itoro ra “e angaanga ïa na te rima tangata nei.” (Salamo 115:4) Me ka akakite ateaia taua aronga rave tau kore ra te o atura te aronga tuatua evangeria rongonui, kua manako ngakau te aronga ngakau tae e kua pikikaaia ratou. Me aruru te “puku” o te puapinga maata ra, kua kite te aronga angaanga i te au manako kikino i to ratou kite anga ia ratou uaorai i runga i te papaanga o te aronga kare ra a ratou angaanga. Kua akatupu mai te au topa anga te au angaanga i mua ua akenei i tetai mamae kino ki te aronga akamori i te Mamona. Ko te au kaiou tei akaputuia no te manakonako anga kia rauka mai kia maata te moni kua riro ei apainga teiaa ma te meangiti ua te manako anga no te tutaki atu. (Mataio 6:24) Me mate te aronga akamoriia ei itoro ra koia te rock stars e etai atu aronga tamataora oki me kare ka kore ua, kua akarukeia mai te aronga akamori ia ratou ra. E ko te aronga tei aaere na te arataa o te akamanako ia ratou uaorai e putuputu i te kokoti i te au ua kikino.​—Galatia 6:7.

4. Eaa te akakeu ra kia akatapu te au tangata i to ratou au oraanga ki te au apinga puapinga kore ua?

⁴ Eaa te akakeu ra i te au tangata kia akatapu ia ratou uaorai ki taua tu puapinga kore ra? Ko te maata anga, ko te vaerua o teianei ao ia i raro ake ia Satani te Tiaporo ra. (Ephesia 2:2, 3) Te kitea nei te mana o teia vaerua i te au tu tuke tuke. Penei te akatereia ra tetai tangata e te au ikuiku anga na te ngutuare tangata tei tukuia mai mei tona ai tupuna ra. Penei no te apii anga e te akonoanga tei mana ki runga i tona manakoanga. Penei na te reva o te ngai angaanga e opara i “te au tumu toa pitiniti” kia rave maata i te angaanga penei ka riro ei akakino i te oraanga. Ko te anoano kia maata atu e rauka mai te akatupuia ra na te tu manako noinoi apinga o teianei ao. Kua taeroia te au ngakau o te aronga e manganui, i te akakeuanga ia ratou kia rave i to ratou uaorai au anoano noinoi ra. Kare ratou i akara matatio me i tau teia au aruaru anga ei akamori anga na ratou.

E Iti Tangata Akatapuia

5. Eaa te akatapu anga kia Iehova tei raveia e tere atu i te 3,500 mataiti i topa?

⁵ E tere atu i te 3,500 mataiti i topa, kua kiteia e tetai iti tangata tetai apinga maata roa atu te tau ra no te akamori anga. Kua akatapu ratou ia ratou uaorai ki te Atua ngateitei, kia Iehova ra. Ei pupu, kua akatika te iti tangata o Iseraela i tana akatapu anga ki te Atua i te metepara i Sinai ra.

6. Eaa te puapinga maata o te ingoa o te Atua ra ki to Iseraela?

⁶ Na teaa i akakeu i to Iseraela kia rave i teia mataara? Ia ratou i roto i te tuikaa i Aiphiti, kua akaue a Iehova ia Mose kia arataki ia ratou ki te tu rangatira. Kua ui a Mose e akapeea aia i te akataka anga i te Atua i tonokiaʼi aia, e kua akakite atura te Atua iaia uaorai ei “te vai nei au, ko au rai e vai nei.” Kua akaue atura aia ia Mose kia tuatua atu ki te tamariki a Iseraela: “Na te vai nei au au i tono mai kia kotou nei.” (Exodo 3:13, 14) Na teia tuatua anga i akakite e ka riro a Iehova ei tei anoanoia kia raukai i te akatupu i tana au akakoro anga. Ka akakite aia iaia uaorai ei tei Akatupu i te au taputou na roto i tetai mataara kare ra i kiteia e te ai metua o to Iseraela i mua ana.​—Exodo 6:2, 3.

7, 8. Eaa te au akapapu anga a to Iseraela e ko Iehova te Atua tau no ta ratou akamori anga?

⁷ Kua kite to Iseraela i te mamae anga o te enua o Aiphiti e tona au tangata na nga Mate Taingauru ra. (Salamo 78:44-51) I reira, penei e tere atu i te toru mirioni ratou, kapiti katoa te au vaine e te au tamariki, tei akateateamamao e kua akaruke i te enua o Gosena i te po okotai, ko tetai ravenga umere tikai te reira. (Exodo 12:37, 38) I muri iora, i te Tai Muramura, kua akakite a Iehova iaia uaorai e ‘e toa i te tamaki’ i tana akaora anga i tona au tangata mei te nuku vaeau o Pharao ra na te vaianga i te tai kia aere atu to Iseraela na roto e i muri akera na te tapokianga i te reira kia maremo to Aiphiti tei aru atura. Ko tei tupu, “kite akera to Iseraela i te mana maata o Iehova i te rave anga i to Aiphiti ra: mataku iora te au tangata ia Iehova, e kua akarongo ia Iehova.”​—Exodo 14:31; 15:3; Salamo 136:10-15.

⁸ Mei te mea rai e te vaira te ngereanga i te akapapu anga no te aite anga o te ingoa o te Atua ra, kua urutoe to Iseraela ia Iehova e tona tavini ko Mose no te ngere i te kai e te vai. Kua tuku maira Iehova i te au manu, e kua akatopa maira i te mana, e kua akatae maira i te vai mei roto mai i tetai toka i Meriba. (Exodo 16:2-5, 12-15, 31; 17:2-7) Kua akaora katoa mai a Iehova i to Iseraela mei te tamaki anga a to Amaleka. (Exodo 17:8-13) Kare e ravenga e raukai i to Iseraela i te akakore i ta Iehova i tuatua atu kia Mose i muri iora: “Ko Iehova, Ko Iehova, e Atua takinga-meitaki, e te aroa ua, e te akakoromaki maata, e te meitaki maata, e te tuatua-mou, E te vaoo marie i te aroa e tausani ua atu, e te akakore i te tuatua-tika kore, e te ara, e te kino.” (Exodo 34:6, 7) E tika rava, kua akapapu a Iehova iaia uaorai e ei tetai tei tau ra no ta ratou akamori anga.

9. Eaa ra a Iehova i orongaʼi ki to Iseraela i te tika kia akakite i to ratou akatapuanga kia tavini iaia, e i akapeea ta ratou pau anga?

⁹ Noatu rai ia Iehova te tika e nona to Iseraela ra no te mea nana i oko akaou mai ia ratou mei Aiphiti mai, ei Atua takinga meitaki e te aroa ua, kua oronga atu aia i te tika kia akakite ua i to ratou anoano kia tavini atu iaia. (Deuteronomi 7:7, 8; 30:15-20) Kua akanoo katoa aia i te au turanga no te koreromotu i rotopu iaia e to Iseraela ra. (Exodo 19:3-8; 20:1–​23:33) I te akakite angaia e Mose teia au turanga, kua na ko maira te tangata ravarai o Iseraela ra: “Te au mea ravarai ta Iehova i tuatua maira, na matou ïa e rave, e na matou e akarongo.” (Exodo 24:3-7) No to ratou uaorai anoano rangatira, kua riro ratou ei iti tangata tei akatapuia ki te Atu Ngateitei ko Iehova.

Taki Atu te Ariki Anga ki te Akatapu Anga

10. Ka tau kia akatumuia to tatou akatapu anga kia Iehova ki runga i teaa?

¹⁰ Te vai nei ra e te tau ra a Iehova, Tei Anga maira, no to tatou akamori anga ma te meta katoa. (Malaki 3:6; Mataio 22:37; Apokalupo 4:11) Inara, kare e tau kia akatumuia to tatou akatapu anga ki runga i te irinaki papa ua, te au manako ngakau viviki ua te kore anga, me kare manono anga na etai ke ra​—noatu rai me na nga metua ra. Ka tau anake ia kia akatumuia ki runga i te kite tikai i te tuatua mou no Iehova e te ariki anga i ta Iehova ra i rave no tatou. (Roma 10:2; Kolosa 1:9, 10; 1 Timoteo 2:4) Mei ta Iehova i oronga ki to Iseraela ra i te tika kia akakite ua i to ratou akatapu anga, te oronga katoa nei aia i te tika kia akatapu ia tatou uaorai e kia rave i taua akatapu anga ra ki mua i te au tangata.​—1 Petero 3:21.

11. Eaa ta tatou apii i te Puka Tapu i akakite mai no Iehova?

¹¹ Na te apii anga i te Puka Tapu, ka kite tatou i te Atua ei tetai peretana. Te tauturu ra tana Tuatua ia tatou kia kite i tona au tu te akaataia maira i te au mea i angaia. (Salamo 19:1-4) Ka kite tatou mei tana Tuatua e kare aia i tetai Toru Tai ngaro tei kore ra e kiteia kia manakoia. Kare rava aia e ruti i te au tamaki e no reira kare e akakore i tona Atua anga. (Exodo 15:11; 1 Korinetia 8:5, 6; Apokalupo 11:17, 18) No te mea kua akatupu aia i tana au taputou, te akamaaraia ra tatou e eaa te aite anga o tona ra ingoa manea, koia a Iehova. Ko ia te Akakoro Mekameka ra. (Genese 2:4, NW, tataanga i raro ake; Salamo 83:18; Isaia 46:9-11) Na te apiianga i te Puka Tapu, ka kite meitaki tatou i tona tiratiratu e te tau kia irinakiia.​—Deuteronomi 7:9; Salamo 19:7, 9; 111:7.

12. (a) Eaa te akapiri vaitata atura ia tatou kia Iehova? (e) Akapeea te au tupu anga ki te oraanga tikai tei tataia i te Puka Tapu i te akakeu anga i tetai kia anoano i te tavini ia Iehova? (ng) Akapeea toou manako ngakau no te tavinianga ia Iehova?

¹² Te apinga te akaariu atura ia tatou kia akavaitata kia Iehova ko tona tu aroa ia. Te akakite maira te Puka Tapu i akapeea tona tu aroa, te akakoreanga ara, e te aroa ua o tana akonoanga i te au tangata. E tamanako ana i akapeea tana akapuapinga anga ia Iobu i muri ake i to Iobu ra vai akono meitaki anga i tona tu tiratiratu. Kua akakite maata maira tei tupu kia Iobu e “kua ki te Atu i te aroa e te takinga-meitaki maata.” (Iakobo 5:11; Iobu 42:12-17) E tamanako ana i akapeea ta Iehova akono anga ia Davida i tana rave anga i te akaturi e te ta anga. Ae, kua papa a Iehova i te akakore noatu i te au ara kikino me ka aere atu te tangata ara kiaia ma “te ngakau paruparu, e te aue ra.” (Salamo 51:3-11, 17) E tamanako ana i te tu o ta Iehova akono anga ia Saula o Tareso, tei rave ra ei tangata takinga kino i te au tangata o te Atua i mua akera. Te akakite maata maira teia au akatauanga i to te Atua aroa ua e te rekareka maoraora i te taangaanga i te aronga tataraara ra. (1 Korinetia 15:9; 1 Timoteo 1:15, 16) Kua manako a Paulo e ka rauka iaia i te tuku irinaki i tona oraanga tikai ki runga i te tavinianga i teia Atua aroa. (Roma 14:8) Te manako ngakau ra ainei koe na taua mataara ra?

13. Eaa te akakite anga aroa maata i ta Iehova tuanga te akakeu ra i te aronga ngakau tika kia akatapu ia ratou uaorai kiaia?

¹³ No to Iseraela, kua orongaia e Iehova te ora mei te tuikaanga i Aiphiti maira, e kua teateamamaoia e ia te ravenga ei akaora ia tatou mei te tuikaanga ki te ara e te mate​—koia te atinga oko o Iesu Karaiti. (Ioane 3:16) Kua tuatua a Paulo: “Kua akamaata ua maira te Atua i tona aroa ia tatou nei, i te mea te vai tangata ara ua nei rai tatou, i mate ei te Mesia no tatou nei.” (Roma 5:8) Te akakeu nei teia akanoo anga aroa i te aronga ngakau tika kia akatapu ia ratou uaorai kia Iehova na roto ia Iesu Karaiti. “Te riro nei oki matou i te aroa o te Mesia ra, no te mea te karanga nei matou e, i mate te tangata okotai no te tangata ravarai, e mate to te tangata katoa nei i reira; E i mate oki aia no te tangata ravarai, kia kore te aronga e ora ra e akono akaou ia ratou uaorai i te ora anga nei, kia akono ra iaia i tei mate e tei tu akaou no ratou ra.”​—2 Korinetia 5:14, 15; Roma 8:35-39.

14. Ka rava ainei te kite ua i ta Iehova au ravenga i te akakeu ia tatou kia akatapu i to tatou oraanga kiaia? Akataka mai.

¹⁴ Inara, kare i rava ei te kite anake i to Iehova tu e tana au akonoanga ma te au tangata nei. Ka tau katoa kia tatanuia te ariki anga tataki tai no Iehova ra. Akapeea te rave anga i te reira? Na te akono anga i te Tuatua a te Atua i to tatou oraanga e te kiteanga no tatou uaorai e ko te au kaveinga te kiteia ra i roto i te reira te angaanga tikai ra. (Isaia 48:17) Ka tau tatou kia manako ngakau e na Iehova i akaora ia tatou mei te vari mai o teianei ao kino i raro ake i ta Satani tutara. (Akaaite ia 1 Korinetia 6:11.) I ta tatou tautaanga kia rave i te tika, kua kite tatou e kia irinaki ia Iehova, e kua kite tatou uaorai e ko Iehova te Atua ora, ko “tei akarongo i te pure.” (Salamo 62:8; 65:2) Kare e roa atu kua kite tatou i te piri anga vaitata kiaia e ka rauka kia irinaki ma to tatou au manako ngakau i roto roa kiaia ra. Ka tupu ki roto ia tatou te manako ngakau pumaana no te aroa o Iehova ra. Kare e ekoko anga e na te reira e taki atu ia tatou kia akatapu i to tatou au oraanga kiaia.

15. Na teaa i akakeu i tetai tangata, tei akatapu ra ki tetai angaanga i mua ana, kia tavini atu ia Iehova?

¹⁵ E manganui te aronga kua kite i teia Atua aroa, ko Iehova, e kua akatapu i to ratou oraanga kia tavini atu iaia. Ei akatauanga e akamanako ana i tetai tangata angaanga apinga uira tei rave ra i tana pitiniti maata te puapinga. I etai taime kua akamata aia i tana angaanga i te popongi e kua rave i te angaanga i te ra roa e te po katoa, kua oki mai ki te kainga i te ora rima i tetai popongi mai. I muri ake i te akangaroi anga no tetai ora, kua aere atu aia ki tetai atu angaanga. “Kua akatapuia au ki taku angaanga,” tana i karanga. I te akamata anga tana vaine i te apii Puka Tapu, kua kapiti atu aia kiaia. Kua na ko aia: “Pouroa te au atua taku i kite tae roa mai ki tera taime te tatari maira kia taviniia atu ratou, ma te kore e rave mai i tetai apinga e puapingaiaʼi tatou. Inara kua rave ua a Iehova e kua tono mai i tana Tamaiti anau-tai ki te enua nei ei atinga maata nana uaorai.” (1 Ioane 4:10, 19) I roto i te tai ngauru marama, kua akatapuia teia tangata kia Iehova. I muri ake i te reira, kua rave tamou aia i te tavinianga i te Atua ora ra. Kua rave aia i te angaanga orometua tamou e kua aere atu kia tavini i te ngai te maata ra te anoanoia. Ko ia, mei te au apotetoro rai, ‘kua akaruke i te au mea katoa, e kua aru ia Iesu.’ (Mataio 19:27) Pou ake e rua marama, kua kapikiia raua ko tana vaine kia tavini i te manga o te Totaiete Punanga Tiaki Puka Tapu e te Pepa i te enua i noo ra raua, no reira kua rauka iaia i te tauturu i te angaanga apinga uira i reira. No te tere atu i te 20 mataiti, te rave ra aia i te angaanga i taua manga ra, i te raveanga i te angaanga tana i inangaro​—kare nona uaorai mari ra no Iehova.

Rave i Toou Akatapu Anga kia Kiteaia

16. Eaa etai takainga te ka raveia e tetai i te akatapu anga i tona oraanga kia Iehova?

¹⁶ I muri ake i te apiianga Puka Tapu no tetai tuatau, aiteite katoa te aronga ou e te aronga ruaine ka ariki ia Iehova e tana i rave no ratou. Ka tau teia kia akakeu ia ratou kia oronga ia ratou uaorai ki te Atua. Penei ko koe tetai o teia aronga. Akapeea koe me akatapu ia koe uaorai kia Iehova? I muri ake i te apiianga i te kite tika no te Puka Tapu, ka tau koe kia rave i taua kite ra e kia akono i te akarongo ia Iehova e ia Iesu Karaiti. (Ioane 17:3) E tataraara e ka ariu ke mai ei mei tetai ua atu ravenga ara kua topa. (Angaanga 3:19) Ei reira koe e tae mai ei ki te takainga no te akatapu anga, ma te akakiteanga i te reira na te au tuatua ngakau tae tikai kia Iehova i te pure. Kare e ekoko anga ka vairai te maara tamouanga ki toou manako, no te mea ko te akamataanga ia o tetai piri anga ou ma Iehova ra.

17. (a) Eaa ra te aronga pakari ka uiui ei i etai au uianga teateamamaoia ma te aronga akatapu ouia ra? (e) Eaa te takainga puapinga maata ka tau kia raveia i muri ua ake i te akatapu anga tetai, e eaa te akakoro anga?

¹⁷ Mei ta Mose akataka anga ki to Iseraela ra i te turanga no te tomoanga ki tetai piri anga koreromotu ma Iehova, ka tauturu te aronga pakari o te au putuputuanga o te Au Kite o Iehova i te aronga tei akatapu ua akera ia ratou kia akara matatio eaa tikai te o atura i te reira. Ka taangaanga ratou i etai au uianga teateamamaoia ei akapapu e kua kite meitaki te aronga tataki tai i te au apiianga tumu no te Puka Tapu e te matakite ra eaa te umuumuia ra i te riroanga ei Kite no Iehova. Ei reira, kua tau kia raveia tetai ako anga ei akakite anga ki te au tangata i taua akatapu anga ra. E mea matauia, ka inangaro tetai tei akatapu ouia ra kia akakite atu kia etai ke ra e kua aere mai aia ki roto i teia piri anga meitaki ma Iehova. (Akaaite ia Ieremia 9:24.) Ka rave tikaia teia na te papetito anga i te vai ei akatutu anga i te akatapu anga. Ko te taruku anga ki raro i te vai e te akatu ake anga mei reira te akatutu ra i tona mateanga ki tona ora anga kimianga nona uaorai i mua ana e ko te akatu ake anga ki tetai aerenga ou no te oraanga, koia te raveanga i to te Atua anoano. Kare te reira i tetai tia anga, kare katoa oki ia i tetai peu ravenga aiteite ki te ravenga Tinitau o misogi i manakoia ra e kia tamaia tetai tangata ki te vai.a Mari ra, ko te papetito anga ko te akakite anga ki te au tangata i tetai akatapu anga kua oti ke ana i te raveia na roto i te pure.

18. Eaa ra ka papu ei ia tatou kia irinaki e kare e puapinga kore ua to tatou akatapu anga?

¹⁸ Ko teia atianga manako maataia, ko tetai tupu anga kare e ngaropoinaia, i te akamaaraanga i te tavini ou o te Atua ra i te piri anga mutu kore nona i teianei ma Iehova. Kare i aite ki te akatapu anga ta te tangata akarere kamikaze i rave ki tona enua e tona emepera ra, ko teia akatapu anga kia Iehova kare ia e puapinga kore, no te mea ko ia te Atua mana katoatoa e mutu kore ua atu tei akaoti takiri i tana au apinga ravarai i akakoro kia rave. Ko ia, e ko ia anake ua, tei tau no to tatou akamori anga ma te meta katoa ra.​—Isaia 55:9-11.

19. Eaa te ka uriuri manakoia i te atikara ka aru mai?

¹⁹ Inara, e maata atu te o maira ki te akatapu anga. Ei akaraanga, eaa te tupuanga no te akatapu anga ki to tatou oraanga i te au ra tataki tai? Ka uriuri manakoia teia i te atikara te aru mai nei.

[Au Tataanga Rikiriki i Raro]

Maara Ainei ia Koe?

◻ Eaa ra te akatapu anga te kiteia nei i teianei ao i akaopeiaʼi i roto i te reka kore?

◻ Na teaa i akakeu i to Iseraela kia akatapu ia ratou uaorai kia Iehova?

◻ Na teaa i akakeu ia tatou kia akatapu ia tatou uaorai kia Iehova i teia tuatau nei?

◻ Akapeea tatou me akatapu ia tatou uaorai ki te Atua ra?

◻ Eaa te aite anga tikai o te papetito anga i te vai?

[Tutu i te kapi 10]

I Sinai kua akatapu a Iseraela iaia uaorai kia Iehova