Eaa te Aiteanga o To Iehova Tu Maru kia Tatou

E TANGATA a Davida tei kite i te tu kinokino. Kua mamae aia i te takinokino anga mei te nga rima o te Ariki ko Saulo, tona metua tane ongai vareae. E toru taime kua tauta a Saulo i te ta ia Davida ma te koke e no te au mataiti kua putuputu i te kimianga iaia, maroanga iaia kia riro mai ei tuitarere. (1 Samuela 18:11; 19:10; 26:20) I na, kua noo a Iehova kia Davida. Kua akaora oki a Iehova iaia kare mei ia Saula ua mari katoa mei te au enemi ke ra. Ka rauka ia tatou, i reira, i te ariki i te au tuatua a Davida, tei akakiteia i roto i te imene: “Ko Iehova taku mato, e taku punanga, e toku nei ora: . . . Kua oronga katoa mai koe [e Iehova] iaku i te paruru ora naau: e na toou maru i maataʼi au.” (2 Samuela 22:2, 36) Kua rauka ia Davida i tetai turanga maata tikai i Iseraela. Akapeea, i reira, to Iehova tu maru i te kapitiia mai anga?

I te tuatua anga te au Tuatua Tapu ia Iehova e e maru oki, kare te aiteanga e kua kotingaia aia i tetai ua atu tu me kore ka kauraro aia ki tetai ke. Mari ra, te akakite maira teia tu manea e e aroa oonu tona no te au tangata te tauta tikai ra kia rauka i tona marekaanga e te oronga ra i te aroa kia ratou. Ia Salamo 113:6, 7, te tatau ra tatou: “Te tuku akaaka nei ra [a Iehova] i te akara anga mai ki raro, ki runga i te au rangi, e ki runga i te enua. Te akateitei nei aia i te akaaka ra no raro mai i te one ra.” Tona “tuku akaaka” te aiteanga te “piko ra aia ki raro kia akara” me kore “te taakaaka ra aia Iaia Uaorai kia akara.” (Today’s English Version; Young’s Literal Translation of the Holy Bible) No reira mei te rangi mai kua ‘piko a Iehova iaia uaorai ki raro,’ me kore kua ‘taakaaka iaia uaorai,’ kia rauka i te akarongo atu kia Davida, e tangata apa ua inara te maru oki tei inangaro maata i te tavini i te Atua. No reira, te akapapu maira a Davida kia tatou: “Teitei ua rai a Iehova, ka akono mairai aia i tei akaaka.” (Salamo 138:6) Ka tau te tu akaaroa, te akakoromaki, e te tu tangi aroa i akono ei a Iehova ia Davida kia akamaroiroi ia tatou katoatoa te kimi ra i te rave i to te Atua anoano.

Noatu e te noo ra a Iehova ko Tei Ngateitei i te ngai teitei maata rava atu i te ao e pini ua ake, te inangaro ra aia kia kapiti mai kia tatou tataki tai. Te oronga maira teia i te akapapuanga e ka rauka ia tatou i te irinaki ki runga i tona tauturu poka kore noatu e tei roto i te au turanga ngata tikai. Kare oki e tumu no te mataku e ka akangaropoina aia ia tatou. No runga i tona iti tangata o Iseraela taito ra, kua tau a Iehova i te tuatuaanga ia e “kua manako mai aia ia [ratou] i to [ratou] akaaka anga: ka tu oki tona aroa e rimua.”​—Salamo 136:23.

Ei au tavini no Iehova i teia tuatau nei, penei ka mamae tatou mei ia Davida rai i te tu kinokino. Penei paa ka aro atu tatou i te avirianga mei te aronga e kare e kite ana i te Atua, me kore penei te putoto ra tatou ma te oraanga apikepike me kore kua rokoia e te tumatetenga. Noatu eaa to tatou turanga, me kua tae tikai to tatou ngakau, ka rauka ia tatou i te aere atu ki te Atua na roto i te pure, pati atu anga i tona tu akaaroa. Ka ‘piko a Iehova ki raro’ kia akara mai ia tatou e kia akarongo mai ki ta tatou au pure. Kua tata te tata taramo e: “Tei te aronga tuatua-tika ra to Iehova mata, e tei ta ratou kapiki tona taringa.” (Salamo 34:15) Kare ainei e kua akakeuia toou ngakau kia akamanako i to Iehova tu akaperepereia no te tu maru?

[Au Tutu i te kapi 30]

Mei iaia i te akarongo mai anga ki te au pure a Davida, te inangaro ra a Iehova i te akarongo i ta tatou au pure i teia tuatau nei