NO TETAI tangata tanutanu mapu ko Elisaia tona ingoa, tei akamata ei angaanga matauia o te ra o te aroteanga kua riro mai ei ra puapinga roa atu i tona oraanga. Iaia e angaanga ra i roto i te one kai, kua rauka ia Elisaia tetai atoro anga manako koreia mei ia Elia, to Iseraela peroveta mua tikai. ‘Eaa tana ka inangaro mei iaku nei?’ Penei i manako ei a Elisaia. Kare aia i anoanoia ana kia tiaki roa no tetai pau anga. Kua titiri a Elia i tona kakau opita ki rungao ia Elisaia, te akakiteanga e a tetai ra ka riro mai a Elisaia ei komono iaia. Kare a Elisaia i manako mama ua ana i teia kapiki anga. I te reira taime rai, kua akaruke aia i tana one kai kia riro mai ei tauturu no Elia.​—1 Ariki 19:19-21.

I te oronga angaia te pati anga kia angaanga takake kia Elia, kua akaruke viviki ua a Elisaia i tana one kai no te tavini i to Iseraela peroveta mua. E tikai, etai o tana e rave ra e au angaanga kainga, no te mea kua kiteaia mai aia e ko “tei riringi i te vai ki runga i te rima o Elia ra.”c (2 Ariki 3:11) Noatu ra, kua akara a Elisaia i tana angaanga ei akameitaki anga, e kua noo tiratiratu aia i to Elia pae.

E manganui te au tavini o te Atua i teia tuatau te akaari ra i tetai tu oronga atinga uaorai mei teia te tu. Kua akaruke tetai pae i ta ratou “au one kai,” ta ratou ngai angaanga, no te tutu aere i te tuatua meitaki i te au ngai mamao me kore no te tavini ei au mema o te ngutuare Betela. Kua aere tetai pae ki te au enua ke no te angaanga i runga i te au angaanga akatu anga a te Taiate. E manganui tei ariki i te au angaanga penei ka manakoia e au angaanga akaaka. Inara, kare e tangata tei angaanga ra na Iehova e rave ra i tetai angaanga puapinga kore. Te ariki ra Iehova i te aronga katoatoa te tavini puareinga ua ra iaia, e ka akameitaki aia i to ratou tu oronga atinga uaorai.​—Mareko 10:29, 30.