Akapeea Koe Riro ei ei oa no te Atua?

1, 2. Koai ma tetai au oa o Iehova?

KOAI taau ka inangaro ei oa noou? Tetai tangata e mareka ana koe. Kua matau koe iaia e kua matau aia ia koe. E tangata takinga meitaki, reka koe i tona au tu.

² Iki a Iehova i tetai au tangata ei oa nona. Ko Aberahama tetai oa o Iehova. (Isaia 41:8; Iakobo 2:23) Mareka katoa a Iehova ia Davida. Karanga aia ia Davida e ‘e tangata tau i toku ngakau.’ (Angaanga 13:22) Pera te peroveta a Daniela, “akaperepere maataia” aia e Iehova.​—Daniela 9:23.

3. Akapeea a Aberahama, Davida, e Daniela i riro ei ei au oa no Iehova?

³ Akapeea a Aberahama, Davida, e Daniela i riro ei ei au oa no Iehova? Karanga a Iehova kia Aberahama: “Ko koe i akarongo mai i toku reo.” (Genese 22:18) Kua riro a Iehova ei oa no te aronga i akarongo kiaia e ka riro katoa aia ei oa no tetai iti tangata. Ki te iti tangata Iseraela, akakite Aia: “Ka akarongo mai kotou i toku nei reo, ka riro ei au ei Atua no kotou, e ka riro ïa kotou ei iti-tangata noku.” (Ieremia 7:23) Me inangaro koe kia riro ei oa no Iehova, akarongo kiaia.

PARURU A IEHOVA I TONA AU OA

4, 5. No teaa a Iehova i paruru ei i tona au oa?

⁴ Karanga te Pipiria e i “oronga mai aia [Iehova] i te maroiroi ki te aronga i tika te ngakau iaia.” (2 Paraleipomeno 16:9) Roto ia Salamo 32:8, taputou mai a Iehova: “E apii atu au ia koe, e akakite atu ei kia koe i taau arataa kia aere ra; e ako atu au ia koe; ei runga ia koe toku mata vaoo ei.”

⁵ Te vai nei tetai enemi kare e inangaro kia riro tatou ei oa no Iehova. Inara inangaro a Iehova i te paruru ia tatou. (E tatau ia Salamo 55:22.) E au oa tatou no Iehova, ka tavini tatou iaia ma te ngakau katoa. Tiratiratu tatou kiaia noatu eaa te tu. Aite to tatou irinakianga mei to te tata Salamo tei na ko e: “Tei toku rima katau aia [Iehova] kare au e ngaueue.” (Salamo 16:8; 63:8) Akapeea a Satani me arai ia tatou kia kore e riro ei oa no Iehova?

AKAAPAANGA A SATANI

6. Eaa ta Satani i karanga no runga i te tangata?

⁶ I te Pene 11, kua apii tatou e kua akaapa a Satani ia Iehova i te pikikaa e te akavaavaa, e no te kare e akatika ia Adamu e Eva kia iki eaa te mea tika e eaa te mea tarevake no raua uaorai. Apii mai te puka o Iobu e kua akaapa rai a Satani i te aronga tei inangaro kia riro ei oa no Iehova. Karanga aia e te tavini ua ra ratou ia Iehova no ta ratou ka rauka, e kare no to ratou inangaro Iaia. Tuatua katoa a Satani e ka rauka iaia te akauri ke i tetai ua atu mei te Atua. Ka akara ana tatou eaa ta tatou ka mou mai mei ia Iobu, e ka akapeea a Iehova me paruru iaia.

7, 8. (a) Eaa to Iehova manako no runga ia Iobu? (e) Eaa ta Satani i tuatua no runga ia Iobu?

⁷ Koai a Iobu? Kua noo ana a Iobu e 3,600 mataiti akenei e e tangata meitaki aia. Akakite a Iehova e i taua tuatau ra kare e tangata i aite mei ia Iobu i te enua nei. Akangateitei aia i te Atua, mea rikarika nana te kino. (Iobu 1:8) Ae, e oa tikai a Iobu no Iehova.

⁸ Karanga a Satani e te tavini ua ra a Iobu i te Atua no tana ka rauka. Karanga aia kia Iehova e: “Kare ainei tei koropiniia aia e koe, e tona ra are, e tana katoa ra au mea ravarai e pini ua ake? kua akameitaki koe i ta tona rima i rave ra, e kua maata tana apinga i te enua nei. Ka akatika ua atura koe i to rima i tenana, ka rave atu ei i tana e kia ope rava, kare aia e kore i te akakino ia koe ki mua i to mata.”​—Iobu 1:10, 11.

9. Eaa ta Iehova i akatika ia Satani kia rave?

⁹ Akaapa a Satani ia Iobu e te tavini ra aia ia Iehova no tana ua ka rauka. Karanga katoa a Satani e ka rauka iaia te māro ia Iobu kia akamutu i te tavini ia Iehova. I reira kua tuku a Iehova ia Satani kia timata ia Iobu ei akapapu e me e inangaro tikai to Iobu ia Iehova i riro ei aia ei oa Nona.

TAKINOKINO A SATANI IA IOBU

10. Akapeea a Satani te takinokino anga ia Iobu, e i akapeea ra a Iobu?

¹⁰ Mea mua, kua keia a Satani e kua ta i te au manu a Iobu. E oti tamate aia i te au tavini o Iobu. Pou ta Iobu au apinga ravarai. I te openga, tamate a Satani i te tai ngauru tamariki a Iobu. Kua vai tiratiratu rai a Iobu kia Iehova. “Kare a Iobu i araia i taua au mea katoa nei, e kare oki i akaapa i te Atua.”​—Iobu 1:12-19, 22.

11. (a) Eaa atu ta Satani au mea i rave kia Iobu? (e) I akapeea ra a Iobu?

¹¹ Kare a Satani i tuku ana i te au. Kua akakoko aia i te Atua i te na ko anga: “Ka rave atu ei i tona ivi e tona kiko, kare aia e kore i te akakino ia koe ki mua i to mata.” Tamamae aia ia Iobu ki te maki ee inara kua vai tiratiratu rai a Iobu. (Iobu 2:5, 7) Akakite aia: “E mate ua atu au, kare rai au e pa i te tuatua-tika naku.”​—Iobu 27:5.

12. Akapeea a Iobu i te akapapuanga e e pikikaa ua rai a Satani?

¹² Kare roa a Iobu i kite ana i teia au akaapaanga a Satani e te tumu i rokoia ai aia e te taitaia. Manako aia e na Iehova i akatupu i tona au manamanata. (Iobu 6:4; 16:11-14) Noatu rai kua vai tiratiratu ua a Iobu kia Iehova. Papu tikai i teianei e kare a Iobu e manako ana iaia uaorai. Inangaro aia i te Atua no te mea e oa aia nona. E pikikaa ua rai ta Satani au akaapaanga!

13. Eaa tei tupu no to Iobu tu tiratiratu?

¹³ Noatu kare a Iobu i kite eaa te tupu ra i runga i te rangi, kua vai tiratiratu rai aia ki te Atua e kua akapapu mai e e tiaporo tikai a Satani. Kua akameitaki a Iehova ia Iobu no te mea e oa tiratiratu tikai aia.​—Iobu 42:12-17.

AKAAPA A SATANI IA KOE

14, 15 Eaa ta Satani akaapaanga i te au tane e te au vaine pouroa?

¹⁴ Apiianga puapinga taau ka mou mai mei tei tupu kia Iobu. Teia tuatau kua akaapa a Satani e te tavini ua nei tatou ia Iehova no ta tatou ka rauka mai mei Iaia. Roto ia Iobu 2:4, karanga a Satani: “E riro oki ta te tangata katoa ra ei oko i tona ora.” Akaapa a Satani i te au tane e te au vaine pouroa, kare ko Iobu ua. Anere ua atu mataiti i muri ake te mate o Iobu, te akakino nei rai a Satani ia Iehova e te akaapa nei i tona au tavini. Roto ia Maseli 27:11, ka tatau tatou: “E taku tamaiti, kia pakari koe, kia rekareka toku ngakau, kia tika iaku kia patoi atu i tei akakino mai iaku nei.”

¹⁵ Ka rauka ia koe te iki kia akarongo kia Iehova e kia riro ei oa tiratiratu nona i te akapapu e ko Satani te pikikaa. Me ka anoanoia te au tauianga maata i roto i toou oraanga kia riro ei oa no Iehova, ko te ikianga meitaki rava atu ïa! E mea puapinga tikai teia ikianga. Karanga a Satani e kare koe e vai tiratiratu me rokoia e te manamanata. Titau aia i te akavare ia tatou kia tiratiratu kore ki te Atua. Akapeea ra?

16. (a) Eaa te au ravenga e taangaanga ana a Satani ei arai te tangata kia kore e tavini ia Iehova? (e) Eaa tetai ravenga ke a te Tiaporo ei arai ia koe uaorai kia kore e tavini ia Iehova?

¹⁶ Tuke tuke ta Satani au ravenga ei arai ia tatou kia kore e riro ei au oa no Iehova. “Mei te liona ngunguru” rai aia “i te kimi anga i te tangata e pou iaia.” (1 Petero 5:8) No reira eiaa e poitirere me tamanamanata toou au oa, kopu tangata e etai atu i taau apii Pipiria. Penei ka manako koe e te ririia nei koe.a (Ioane 15:19, 20) E akatutu katoa ana a Satani iaia ei ‘angera no te mārama.’ Penei e ka akavare aia ia tatou kia akarongo kore ia Iehova. (2 Korinetia 11:14) Tetai ravenga e taangaanga ana a Satani koia oki, kia akavare ia tatou kia manako e kare tatou e tau kia tavini ia Iehova.​—Maseli 24:10.

AKONO I TA IEHOVA AU AKAUENGA

17. Eaa te tumu i akarongo ei tatou ia Iehova?

¹⁷ Me akarongo tatou ia Iehova, te akapapu maira tera e e pikikaa a Satani. Eaa te ka tauturu ia tatou kia akarongo? Akakite te Pipiria: “E inangaro atu koe i to Atua ia Iehova ma to ngakau katoa, e ma to vaerua katoa, e ma to maroiroi katoa.” (Deuteronomi 6:5) Akarongo tatou ia Iehova no to tatou inangaro iaia e ka rave tatou i te au mea ravarai tana i pati mai ia tatou kia rave. Tata a Ioane: “Teia oki te inangaro i te Atua, ko te akono i tana au akauenga; kare oki tana au akauenga i te mea teiaa.”​—1 Ioane 5:3.

18, 19 (a) Eaa tetai au mea e akakite maira a Iehova e e tarevake? (e) Peea tatou i kite ei e kare a Iehova e pati maira kia rave tatou i tetai mea kare e rauka ia tatou?

¹⁸ Eaa tetai au mea e akakite maira a Iehova e e tarevake? Tetai au akaraanga tei roto i te pia, “Rikarika i ta Iehova e Rikarika Ra.” I te akamataanga penei ka manako koe e kare ua e kino ana teia au mea. Inara me tatau koe i te au irava e me akamanako meitaki i te reira, ka mārama i reira koe i te puapinga o te akarongo i te ture a Iehova. Penei ka anoanoia tetai au tauianga i roto i toou oraanga noatu ka ngatā i tetai au taime. Me rave koe i te reira ka rauka ia koe te au e te mataora no toou tiratiratu kia Iehova ei oa nona. (Isaia 48:17, 18) Akapeea tatou i kite ei e ka rauka i te rave i teia au tauianga?

¹⁹ Kare roa a Iehova e pati mai kia rave tatou i tetai mea kare e rauka ia tatou. (Deuteronomi 30:11-14) Ei Oa mou, kua kite a Iehova i to tatou tu, to tatou au tu meitaki e to tatou au tu paruparu. (Salamo 103:14) Akamaroiroi maira a Paulo ia tatou: “E tuatua-mou ra ta te Atua, e kare aia e vaoo ia kotou kia timataia, mari ra ko te tika ia kotou kia akakoromaki ra; e akatupu katoa aia i te akapuanga i taua timataanga ra, kia tika ia kotou kia akakoromaki.” (1 Korinetia 10:13) Kia papu ia tatou e ka oronga ua mai rai a Iehova i te maroiroi kia rave tatou i te mea tau. Ka oronga mai aia i “te mana maata meitaki” ei tauturu ia koe kia akakoromaki i te au turanga ngatā. (2 Korinetia 4:7) Muri ake i te kite anga i ta Iehova tauturu, karanga a Paulo: “E tika iaku te au mea ravarai nei i te Mesia, ko tei akamaroiroi mai iaku nei.”​—Philipi 4:13.

INANGARO I TA IEHOVA E INANGARO RA

20. Eaa te au tu ka tau koe kia aru, eaa te tumu?

²⁰ Me ka inangaro tatou kia riro ei oa no Iehova, auraka tatou e rave i ta Iehova e karanga maira e e tarevake. (Roma 12:9) Inangaro to Iehova au oa i tana e inangaro ra. Te akamārama maira a Salamo 15:1-5 no runga ia ratou. (E tatau.) Ka aru to Iehova au oa i tona au tu e ka akaari i ‘te inangaro, te rekareka, te au, te akakoromaki, te takinga-meitaki, te meitaki, te pikikaa kore, te maru, te akono meitaki.’​—Galatia 5:22, 23.

21. Peea koe kite ei ka akapeea me akaari i te au tu ta Iehova e inangaro ra?

²¹ Peea koe e kite ei ka akapeea me akaari i tera au tu manea? Tatau e te apii putuputu i te Pipiria kia kite koe eaa ta Iehova e inangaro ra. (Isaia 30:20, 21) Me akapera koe ka ketaketa atu toou inangaro no Iehova e ka inangaro koe i te akarongo iaia.

22. Eaa te ka tupu me akarongo koe ia Iehova?

²² Te au tauianga ka anoanoia koe kia rave i roto i toou oraanga, ka tau kia akaaiteia ki te kiritianga i te kakau taito e te aao anga i te mea ou. Karanga te Pipiria e ka anoanoia kia ‘kopae kotou i te tangata taito’ e kia “akatangata ou” ia kotou. (Kolosa 3:9, 10) Noatu kare i te mea māmā, me rave tatou e me akarongo ia Iehova, ka oronga mai aia i te “tutaki maata.” (Salamo 19:11) E akarongo ia Iehova ei akapapu e ko Satani te pikikaa. Tavini ia Iehova ma te inangaro pikikaa kore. Ka riro ïa koe ei oa mou tikai no Iehova!