Te Ora​—E Apinga Aroa Mei Ko Mai i te Atua

E RUA ngauru ma a ora i te ra, e pamu ana to tatou pukuatu i te toto puapinga ra na roto i to tatou kopapa. Me moe tatou, ka tamou ua atu to tatou au ate mama i te akapuangi e te akameangiti. Me kai tatou i te kai, kua taviri noa uaia te reira. Te tupu pouroa ra teia i te au ra tataki tai ra, ma te tauta anga meangiti me kare ua a tatou tauta anga. Teia au rave anga ngaro e te umere, tei akangaropoina ngoie uaia, e tuanga teia o te apinga aroa tei kapikiia e tatou ko te ora. I tetai tu ra e apinga aroa teia te ka rauka i te kapikiia e e au temeio.

Ka tamanako ana i te rave anga o te to anga e te anauanga mai o te tangata. Noatu e kua matauia e ka kopae te kopapa i tetai ua atu titiu ke, ka ariki te vairanga i tetai ua tei angaiia. Kare te reira e kopae i te tupuanga ua pepe ei titiu ke, ka akono ra e ka paruru i te reira e tae ua atu ki te taime e teateamamao ei te reira no te mama mai ei pepe. Me kare teia ravenga kite o te vairanga no te maani i teia tupu anga puapinga noatu te ture o te kopaeanga i te titiu ke, kare i reira te anau anga tangata e rauka.

Pera katoa, naringa kare tetai tupu anga i roto i te vairanga te a marama ra rai te pepe oti kore, ka poto ua te ora o tetai pepe anau ouia. I te reira taime kua akamata te reira i te ngotengote i tona rima maata, te taangaanga anga i te au uaua te ka rauka a muri ake i te angai iaia uaorai i te nga u o te mama. Ko teia ua tetai o te au mea e manganui te ka riro ei ora me kare ei mate tei akaotiia i mua roa ake i te anau anga o tetai pepe.

Koi vai ei tetai pepe oti kore i roto i te vairanga, te vaira tetai puta i roto i te paruru o tona pukuatu. Teia puta, ka topiri noa ua te reira i te taime anau anga. Pera katoa, ko tetai ara toto maata tei aere ra na te pae i te au ate mama koi vai ei te pepe oti kore i roto i te vairanga ka meangiti noa ua te reira i te taime anau anga; ka aere te toto i teianei ki te au ate mama, te ngai e orongaiaʼi tetai okitene me akamata te pepe i tona akaea anga mua.

E akamata ua anga teia au mea ravarai. I roto i te oraanga, na tetai au rave anga tei maani meitakiia (mei te rave anga a te akaea anga, te aerenga toto, te mana akaaerenga, e te akatakake anga) e rave e te akatere i to ratou taangaanga angaia ma te tu mako tei ngata ra i te tangata no te marama​—e au mea pouroa teia no te akatupu i te ora kia aere ua atu. No reira tetai tata taito i tuatua ei no runga i te Atua e: “Ka akameitaki au ia koe, e mea mataku e te taka ke oki toku anga angaia: e mea vavaria taau au angaanga, kua kite pu tikai oki toku vaerua.”​—Salamo 139:14.

Te papu ra, e kare te tata o teia au tuatua manea i irinaki ana e e mea tupu matapo ua, e mea tupu ua mai me kore ra e mea tumatetenga ua te ora. Me koia te tu ra, kare i reira a tatou au angaanga tikai me kore ra au apainga e akapeea tatou i te taangaanga anga i to tatou au oraanga. Inara, i teia au ravenga angaanga o te ora ra, te akaata papu maira te reira i tetai akapapa anga, e ko tetai akapapa anga te umuumu ra te reira i tetai tei akapapa ra. Kua akanoo te Puka Tapu i teia kaveinga: “E akatu oki to te au are ravarai nei; ko tei akatu ra i te au mea katoa, ko te Atua ïa.” (Ebera 3:4) No reira e mea puapinga i te “kite ko Iehova te Atua. Nana tatou i anga, e kare na tatou uaorai.” (Salamo 100:3, NW) Ae, te riro ra te ora ei mea maata atu i tetai tumatetenga maru ua; e apinga aroa te reira mei ko mai i te Atua uaorai.​—Salamo 36:9.

I te mea ko teia te tu ra, eaa ta tatou au angaanga i mua i Tei Oronga maira i te ora? Akapeea tana tamanako anga ia tatou kia taangaanga i to tatou au oraanga? Ka uriuriia teia e tetai atu au uianga i roto i te atikara te ka aru mai.