E Puapinga te Akara Matatio i te Au Pure i Roto i te Puka Tapu

KUA pure tetai vaine taitaia, tetai ariki, e ta te Atua uaorai Tamaiti i te au pure ta tatou ka akara matatio i teia taime nei. Na te pure tataki tai ra i akakeu viviki i te au turanga tukeke. Inara, penei e na taua au turanga ra e pa ia tatou i teia tuatau nei. Eaa ta tatou ka kite mei ko mai i teia au akaraanga?

“Akara Mai i te Mate o to Tavini Vaine”

Te putoto ra ainei koe i tetai manamanata te tupu putuputu ra? Me kare kua akateiaaia ainei koe e te tu taitaia? No reira te aite maata ra koe kia Hana i mua ake ka anau ei aia i tana tama mua, ko Samuela. Kare ana tamariki e te akakinoia ra e tetai vaine. E tika tikai, te akakoko ra to Hana turanga iaia kare akera aia i kaikai. (1 Samuela 1:2-8, 15, 16) Kua pati aia kia Iehova e kua oronga atu i te pure tei aru mai:

“E Iehova Sabaota e, kia tika ia koe i te akara mai i te mate o to tavini vaine nei, e kia manako mai koe iaku, kia kore koe e akapoina i to tavini vaine nei, kia oronga maira koe i tetai tamaiti tamaroa na to tavini vaine nei, ei reira au e orongaʼi iaia kia Iehova, e ope rava ake ona puke rā i te ao nei, e kare e reta e tae ki runga i tona upoko.”​—1 Samuela 1:11.

Ka akara ana e kare a Hana i tuatua i te au mea noa nei. Kua pure atu aia kia Iehova ma te pati anga taka tikai (no tetai tamaiti tamaroa) e kapiti atu teia ki tetai manako anga papu (kia tuku iaia i roto i te angaanga a te Atua). Eaa ta teia nei e akakite maira kia tatou?

Me tei roto i te kino, kia taka tikai te pure. Noatu e eaa toou manamanata​—me ko to turanga i te kainga, te maromaroa, me kore te maki i te pae kopapa—​e pure kia Iehova no runga i te reira. E akataka atu kiaia te tu tikai o toou manamanata e eaa toou manako. “I te aiai ravarai kua tuku au i toku au manamanata kia Iehova,” karangaʼi tetai takaua ko Louise. “I tetai taime te vaira te au manamanata e manganui, inara ka taiku marama au ia ratou tataki tai.”

Te tuatuaanga kia Iehova i te au manako tikai ka orongaia mai te au akameitaki anga. Na te raveanga i te reira e tauturu ia tatou kia kite i to tatou manamanata, penei ake e kare e akara anga ngata ana. Te akakiteanga i te au pure taka tikai e akamama mai i to tatou tu taitaia. Noatu i mua ake ka pauia mai tana pure, kua papu tikai ia Hana, e e “kare atura tona mata i kinokino.” (1 Samuela 1:18) Tei maata atu, no te taka anga tikai oki i akamatakite ei ia tatou kia kite i te pau anga i ta tatou pure. “I te tuatua taka meitaki anga au i taku au pure,” i na Bernhard ei, e Kerititiano i Tiamani, “ko te marama anga ia te au pau anga.”

“E Tamaiti Ua Oki Au”

Inara, penei e ka manako tetai tangata i tetai tu manako tukeke me kua orongaia mai kiaia tetai tukuanga angaanga te manako ra e kare aia e tau ana. Te manamanata ra ainei koe i tetai taime no te apainga tei orongaia mai kia koe e Iehova ra? Me kare te manako ra ainei tetai au tangata ia koe e kare e tano ana ki taau tukuanga angaanga? Mei tei reira rai te turanga o Solomona i tona akatainuia anga ei ariki no Iseraela. Te inangaro ra tetai au tangata rongoia i tetai tangata ke ki runga i te terono. (1 Ariki 1:5-7, 41-46; 2:13-22) I te akamataanga tona tutara anga, kua rave a Solomona i tetai pati anga na roto i te pure:

“E taku Atua, e Iehova, kua akariro mai koe i to tavini nei ei ariki . . . e tamaiti ua oki au: kare au i kite i te aere ki vao, e i te oki mai ki roto. . . . Ei ngakau kite taau e o mai no to tavini nei; kia tika kia tuatua ki toou nei iti-tangata, kia kite au i te meitaki e te kino.”​—1 Ariki 3:7-9.

Kua akanoo a Solomona i tana pure ki runga i tona pirianga ma ia Iehova, ki runga i te akameitaki anga tei orongaia kiaia, e ki runga i tona kite i te apai i te tukuanga angaanga. Na te reira tu katoa oki, me orongaia mai tetai apainga kia tatou e te manako ra tatou e kare e rauka ia tatou, ka tau tatou kia pati ki te Atua kia tauturu mai kia rave tatou i te angaanga. E tamanako ana i te au kite anga tei aru mai:

“I te patiia anga kia akono i te apainga maata i te opati manga o te Totaiete Punanga Tiaki,” akatakaʼi a Eugene, “kare au i papa. Te vaira tetai aronga tei meitaki atu e e maata roa atu te kite. E meangiti ua taku moe i te nga po e rua tei aru mai, te akapou maata anga i te taime i roto i te pure, tei oronga mai te maroiroi kiaku e te akapapu anga tau.”

Kua patiia a Roy kia rave i te tuatuaanga no te tanumanga i muri ake te mate viviki kino anga tetai oa mapu tei matau meitakiia. Papu e e anere te ka tae mai. Eaa ta Roy ka rave? “Kare rava au i pure putuputu maata ana no te maroiroi e no te kite kia kiteaia mai te au tuatua meitaki, kia akakite i te au manako akamaroiroianga e kia oronga i te pumaana.”

I Tei Anga ra e ‘akarapurapu ra i te au mea’ e te totoa atura tona akaaerenga, ko te tupuanga tei matauia ra ko te oronga anga i te apainga ki te maata anga o tona au tavini. (Isaia 60:22) Me patiia mai koe kia akamaata i te tua anga, kia papu e ka rauka ia Iehova i te tutaki i te ngere o te kite, te terenianga, me kore toou tuanga i te kite. E akapiri vaitata atu ki te Atua na roto i te tu aiteite mei ta Solomona i rave ana, e Nana e tauturu ia koe kia apai i te tukuanga angaanga.

“Kia Riro Ratou Katoa Ei Okotai”

Ko te toru o te tuanga te tupu ra i teia tuatau koia oki te umuumuia ra kia komono i tetai pupu i roto i te pure. Me patiia mai kia pure i tetai pure no tetai pae atu, eaa ta tatou ka pure? E tamanako ana i ta Iesu pure tei rekotiia i roto ia Ioane pene 17. Kua pure aia i teia pure ki mua i tana au pipi i te aiai openga iaia e tangata ra. Eaa ra te tu o te au pati anga tana i akatika ki tona Metua i te rangi ra?

Kua akakite tika atu a Iesu i te au akakoroanga noa ua e te manakonako anga tei mouia ra e te aronga tei tae mai. Kua taiku aia i te akakaka anga i te ingoa o te Atua ra ko Iehova e te akakite anga i te Patireia. Kua akakite a Iesu i te puapinga o te pirianga uaorai ma te Metua e te Tamaiti, tei akatumuia ki runga i te kite o te au Tuatua Tapu ra. Kua tuatua aia no te akaatea anga mai mei teianei ao, te akapapa ra i tana au pipi no te patoi anga. Kua pati katoa a Karaiti i tona Metua kia paruru i te au pipi e kia taokotai ia ratou i roto i te akamori anga tika.

Ae, kua akakite a Iesu i te taokotai anga. (Ioane 17:20, 21) I mua atu i taua aiai ra, kua piri atu te au pipi ki roto i tetai taumaroanga. (Luka 22:24-27) Inara, i roto i te pure, kare a Karaiti i kimi kia akaapa mari ra kia taokotai. Na te reira mataara rai, ka tau te au pure a te ngutuare tangata e te putuputuanga kia akamaata i te aroa e kia kimi kia autuia te pekapeka i rotopu i te au tangata tataki tai. Ko ratou tei komonoia ra e tau kia akapiri vaitataia i roto i te taokotai anga.​—Salamo 133:1-3.

Te akaariia ra teia taokotai anga e te aronga te akarongo ra i te karanga anga, “Amene,” me kare “E tau i reira te reira,” i te openga anga. E raukaʼi teia, kia marama ratou e kia akatikaia te au mea katoatoa te tuatuaia ra. No reira, kare e tau kia taikuia i roto i te pure tetai tumu manako kare tetai tei tae maira i kite. Ei akatauanga, penei e ka kimi tetai tangata pakari tei komono ra i tetai putuputuanga na roto i te pure i ta Iehova akameitakianga no runga i te taeake me kare tuaine pae vaerua ra tei maki kino tikaiia. Inara e mea meitaki kia rave aia i te reira me kua kite te maata anga o te aronga tana e komono ra iaia e kua rongo ana i te maki.

Akara katoa ana, kare a Iesu i akataka ana i te au anoano uaorai o te mema tataki tai o te pupu. Te raveanga i te reira ka o mai te taikuanga o te au tumu manako tei kitea anake uaia e tetai au tangata tataki tai ra. Ka tau te au manako uaorai ei tumu manako no te pure i te ngai takake, te ka rauka i te akaroaia e ei pirianga vaitata tei anoanoia.

Akapeea ra tetai tangata me akapapa iaia uaorai ei komono i tetai putuputu anga maata o te aronga akamori na roto i te pure? Kua akataka mai tetai Kerititiano kite e: “Kua manako takere ana au e eaa te au akameitaki anga ka orongaia, eaa ta te au taeake pati anga, e eaa te au pati anga taku ka rauka i te taiku no ratou uaorai. Kua akanoo meitaki au i toku au manako, pera katoa te au tuatua akapaapaa anga. I mua ake ka pure ei i te pure ki te tangata, ka pure au i tetai manga pure, patianga i te tauturu kia komono i te au taeake na roto i te tu ngateitei.”

Noatu e eaa toou au turanga, ka kite koe i tetai pure i roto i te Puka Tapu tei tuatuaia ana e tetai tangata ke te aiteite ra ki toou turanga. Te au pure tukeke i roto i te au Tuatua Tapu te akapapu ra i te aroa takinga meitaki o te Atua. Te tatauanga i teia au pure e te manakonakoanga ia ratou ra ka rauka i te tauturu ia koe kia akapuapinga i taau au pure.

[Pia i te kapi 5]

TE AU PURE KITEA UAIA I ROTO I TE PUKA TAPU

Kua oronga te au tavini o Iehova i te au pure i raro ake i te au turanga tini rava. Ka rauka ainei ia koe te ariu atu ki tetai me kare e maata atu o te au turanga te ka aru mai?

Te anoano ra ainei koe i te arataki anga mei ko mai i te Atua, mei ia Eliezera rai?​—Genese 24:12-14.

Tei roto ainei koe i te kino te vaitata maira, mei ia Iakoba rai?​—Genese 32:9-12.

Te inangaro ra ainei koe i te kite meitaki atu i te Atua, mei ia Mose rai?​—Exodo 33:12-17.

Te aro ra ainei koe i te au tangata patoi, mei ia Elia rai?​—1 Ariki 18:36, 37.

Te ngata ra ainei te tutu aereanga kia koe, mei tei tupu kia Ieremia ra?​—Ieremia 20:7-12.

Te anoano ra ainei koe i te aaki i te au ara e te kimi i te tu akakore anga, mei ia Daniela rai?​—Daniela 9:3-19.

Te aro ra ainei koe i te takinokino anga, mei te au pipi rai a Iesu?​—Angaanga 4:24-31.

Akara katoa ia Mataio 6:9-13; Ioane 17:1-26; Philipi 4:6, 7; Iakobo 5:16.

[Pia i te kapi 6]

EAA TE KA PUREIA ME TAMAKI ATU I TETAI TU OONU RAVA

Te putoto ra ainei koe i te patoi atu i te tu apikepike tupu ua? Akapeea te au pure tei tataia i roto i te Puka Tapu e riro ei ei mea puapinga? E apii mei ko mai ia Davida ra, tei pure i te au taime tukeke no tona uaorai au tu apikepike.

Kua imene a Davida e: “E unuunumou mai koe iaku, e te Atua, kia kite oki koe i toku ngakau; e timata mai iaku, e kia kite koe i toku manako.” (Salamo 139:23) Kua inangaro a Davida e kia kimi tikai te Atua ko Iehova i te au inangaro tau kore, te au manako ngakau tau kore, me kare te au manako tau kore. I tetai atu au tuatua, kua anoano a Davida i ta Iehova tauturu i te kopaeanga i te ara.

Inara kua autu atu to Davida tu apikepike iaia, e kua ara pakari atu aia. I konei rai, kua tauturu te pure iaia​—teia taime i te akaoki akaou mai i tona pirianga ma te Atua. I ta Salamo 51:2, kua pati akatenga a Davida e: “E orei takiri mai koe iaku i toku nei kino; e tamā mai iaku i taku nei ara.”

Ka rauka katoa ia tatou i te pure taakaaka no ta Iehova tauturu i te akakore anga atu i te au manako tarevake. Ka akamaroiroi teia ia tatou kia autu ua atu i tetai au tu apikepike oonu rava e ka tauturu ia tatou kia kopae i te ara. Me tupu akaou mai, ka tau tatou kia tuatua akaou atu kia Iehova ma te pati akatenga anga kia tauturu mai aia ia tatou kia rave ua atu i te tamaki anga.

[Au Tutu i te kapi 7]

Ka tau te au pure tei tuatuaia no tetai ke atu o tetai pupu ra kia akakite i te au manakonako anga Tuatua Tapu e te au akakoro anga vaerua noa ua