E Akateitei Kapiti Tatou i te Ingoa o Iehova

“E akamaata tatou ia Iehova; tatou katoa e akateitei i tona ingoa.”​—SALAMO 34:3.

1. Eaa te akaraanga meitaki ta Iesu i akanoo i roto i tana angaanga orometua i te enua nei?

I TE po o Nisana 14, i te mataiti 33 T.N., kua imene kapiti a Iesu e tana au apotetoro i te au imene kia Iehova i roto i tetai pia i runga o tetai are i Ierusalema. (Mataio 26:30) Ko te taime openga te reira i rave ei te tangata ko Iesu i te reira ma tana au apotetoro. Inara, e mea tau e kua taopenga aia i tana uipaanga kia ratou na roto i te reira tu. Mei te akamataanga mai o tana angaanga orometua i te enua nei ki te openga, kua akapaapaa a Iesu i tona Metua e kua akakitekite maroiroi aia i Tona ingoa. (Mataio 4:10; 6:9; 22:37, 38; Ioane 12:28; 17:6) Ko te tikaanga, kua taiku putuputu aia i te patianga pumaana a te tata taramo: “E akamaata tatou ia Iehova; tatou katoa e akateitei i tona ingoa.” (Salamo 34:3) Mei teaa atura te akaraanga meitaki no tatou kia aru!

2, 3. (a) Eaa tatou i kite ei e e totou puapinga tikai te Salamo 34? (e) Eaa ta tatou ka akamanako i roto i teia atikara e te atikara e aru maira?

² I nga mea ora ua i muri ake i te imene kapiti atu anga kia Iesu, kua kite mai te apotetoro ko Ioane i tetai tupuanga tuke ake rai. Kua kite atu aia i tona Pu e nga tangata kino e rua e tamateia ra i runga i te au rakau tamamae. Kua aati te au vaeau Roma i te nga vaevae o te nga tangata kino e rua kia akavivikiia to raua mate anga. Inara, te ripoti maira a Ioane e kare ratou i aati ana i te nga vaevae o Iesu. I te aere anga mai te nga vaeau kia Iesu, kua mate takere aia. I roto i tana Evangeria, kua akataka mai a Ioane i te reira tupuanga ei akatupu i tetai tuanga akaou mai o Salamo 34: “Kare rava tetai ona ivi e aatiia.”​—Ioane 19:32-36; Salamo 34:20, Septuagint.

³ Ki te au Kerititiano, e maata atu te au manako ke i roto ia Salamo 34. No reira, i roto i teia atikara e te atikara e aru maira, ka uriuri tatou i te au turanga i tata ei a Davida i te taramo e ka akamanako i te au tataanga akamaroiroi a te taramo uaorai.

To Davida Oro Anga mei ia Saula

4. (a) Eaa a Davida i akatainuia ai ei ariki no Iseraela no te tuatau ki mua? (e) Eaa a Saula ‘i akaperepere rava’ atu ei ia Davida?

⁴ Te mapu ra rai a Davida, ko Saula te ariki i Iseraela. Inara, kua akarongo kore a Saula e kua ngere aia i ta Iehova akaperepereanga. No te reira tumu, i karanga ai te peroveta ko Samuela kiaia e: “Kua aeae keia mai e Iehova te basileia o Iseraela ia koe i teianei rā, e kua orongaia e ia ki tetai tangata tupu i o ou ra ko tei meitaki ïa ia koe ra.” (1 Samuela 15:28) I muri mai, kua arataki a Iehova ia Samuela kia akatainu ia Davida, te tamaiti openga a Iese, kia riro mai ei ariki te ka aru mai no Iseraela. I taua taime ra, no tei ngere i te vaerua o te Atua, kua rokoia te Ariki ko Saula e te au manako taitaia. Kua apainaia mai a Davida, e tangata kite karape i te akatangi imene, ki Gibea kia tavini atu i te ariki, e kua apai mai te akatangianga imene a Davida i te pumaana kia Saula, ko tei “akaperepere rava maira aia iaia.”​—1 Samuela 16:11, 13, 21, 23.

5. Eaa te tu o Saula i taui ei kia Davida, e eaa ta Davida i maroia kia rave?

⁵ I te aerenga o te tuatau, tei a Davida a Iehova. Kua tauturu a Iehova ia Davida i te autu atu i te tuputupua Philiseti ko Golia e kua turuturu aia ia Davida e akangateiteiia ra i Iseraela no tona kite karape i te tamaki. Inara, kua vareae a Saula i ta Iehova akameitakianga ia Davida, e kua akamata aia i te riri ia Davida. E rua taime ia Davida e akatangi ra i tana kinura i mua ia Saula, kua peiia atu aia e te ariki ki tana korare. I nga taime roa ai, kua rauka ia Davida i te kape i te korare. I te toru o te taime i te tautaanga a Saula i te ta iaia, kua kite mai te ariki o Iseraela no te tuatau ki mua e ka oro aia no tona oraanga. I te openga iora, no ta Saula tauta ua anga i te opu e kia tamate atu iaia, kua aruaru a Davida i te kimi i tetai akapuanga i vao ake i te enua o Iseraela.​—1 Samuela 18:11; 19:9, 10.

6. Eaa a Saula i akaue ei i te tamateanga i te iti tangata o Noba?

⁶ I tona aere atu anga ki te ope o Iseraela, kua tapu atu a Davida ki te oire maata o Noba, tei reira oki te tapenakara o Iehova. I te akaraanga, e pupu aronga mapu tei aru atu ia Davida i tona oroanga, e kua kimi atu a Davida i tetai apinga katikati na ratou e nana katoa. Kua kite mai a Saula e kua oronga te kau taunga maata i tetai kai na Davida e tona au tangata e te koke katoa ta Davida i rave mai mei ia Golia tei mate. I tona riri, kua tamate katoatoa a Saula i te au tangata o te reira oire, kapitiia atu e 85 kau taunga.​—1 Samuela 21:1, 2; 22:12, 13, 18, 19; Mataio 12:3, 4.

Tetai Atu Ora Anga mei te Mate

7. Eaa a Gata i kare i te ngai pipini anga meitaki no Davida?

⁷ Mei Noba mai, kua oro atu a Davida mei tetai 40 kiro mita ki te opunga i roto i te enua o te Philiseti e kua kimi i te akapuanga ma te Ariki ko Akisa i roto i te oire o Golia, ko Gata. Penei kua manako mai a Davida ia Gata e ko te ngai openga rava ia ka kimi atu ei a Saula iaia. Inara, kare i roa ana, kua kite mai te au tavini o te ariki o Gata ia Davida. I to Davida akarongo anga e kua kitenaia aia, “e mataku rava akera aia i te ariki o Gata ra ia Akisa.”​—1 Samuela 21:10-12.

8. (a) Eaa ta Salamo 56 e akakite maira kia tatou i te tupuanga kia Davida i Gata? (e) Akapeea a Davida i te ora atu anga mei te mate?

⁸ E oti kua opu atu te Philiseti ia Davida. Penei ko te taime teia i atu ei a Davida i te taramo ngakau tae, e kua pati atu aia kia Iehova e: “Ka tuku ana koe i toku nei roi-mata ki roto i taau ra āriki.” (Salamo 56:8 e te tataanga i runga ake) Kua akakite aia i reira i tona irinaki e kare a Iehova e akangaropoina i tona mii mari ra ka akono takinga meitaki iaia e ka paruru iaia. Kua parani katoa a Davida i tetai ravenga no te akavareanga i te ariki o Philiseti. Kua akatutu aia iaia mei tetai tangata neneva rai. I te kite anga i teia, kua ako atu te Ariki ko Akisa i tona au tavini no te apai anga mai ki mua iaia i tetai tangata “nenevaia.” Te taka meitaki ua ra, e kua akameitaki a Iehova i te ravenga a Davida. Kua arumakiia a Davida mei te oire maata, i te kite akaou anga i tetai akaoraanga mei te mate.​—1 Samuela 21:13-15.

9, 10. Eaa te tumu i tata ei a Davida ia Salamo 34, e koai paa ta Davida e akamanako ra i te atu anga i te taramo?

⁹ Kare te Pipiria e akakite mai ana me kua aru katoa te aronga turuturu o Davida iaia ki Gata me kore kua akarakara ua mai iaia mei roto i te au oire i te pae ua mai ia Iseraela. Noatu eaa te turanga, kua tupu tetai taokotaianga mataora i to Davida ripoti atu anga kia ratou i to Iehova akaora akaou mai anga iaia. Ko te tumu anga te reira o Salamo 34, mei tei akaariia mai e te tataanga i runga ake. I te au irava mua e itu o taramo, kua akapaapaa a Davida i te Atua no te akaora mai anga iaia e kua pati atu aia ki tona aronga turuturu kia piri mai kiaia i te akangateiteianga ia Iehova e ko te Akaora Maata o Tona iti tangata.​—Salamo 34:3, 4, 7.

¹⁰ Kua kite mai a Davida e tona au tangata i te akapuanga i roto i te ana o Adulama i roto i tetai ngai maunga o Iseraela, mei tetai 15 kiro mita i te tua itinga o Gata. I reira, kua akamata te au Iseraela tei mareka kore i te au turanga i raro ake i te tutaraanga a te Ariki ko Saula, i te aere mai e te akapiri mai kia ratou. (1 Samuela 22:1, 2) I te atu anga a Davida i te au tuatua o Salamo 34:8-22, penei te manako ra aia i te reira au tangata. Te au akamaaraanga i roto i te reira au irava e puapinga katoa te reira no tatou i teia tuatau nei, e ka puapinga tikaiia tatou mei tetai akamanako oonuanga o teia taramo manea nei.

Te Ariki ra Ainei Koe i to Davida Tumu Manako?

11, 12. Eaa te au tumu ka tau kia akapaapaa ua atu rai tatou ia Iehova?

¹¹ “Ka akameitaki rai au ia Iehova, kare e tivata; kia vai tamou rai te akameitaki iaia i roto i toku nei vaa.” (Salamo 34:1) I te nooanga ei tuitarere, e manganui te au apiapi o Davida no te au apinga materia, inara te akaari maira teia au tuatua, e kare tona au inangaro i te au ra tataki tai i apai ke i tona inangaro i te akapaapaa ia Iehova. E akaraanga meitaki tikai te reira no tatou me aro atu tatou i te au akaaoanga! Me tei te apii tatou, tei te angaanga, tei ko i te au taeake Kerititiano, me kore tei roto i te angaanga orometua, to tatou inangaro maata koia oki kia akapaapaa ia Iehova. E akamanako ua ana i ta tatou au tumu tare koreia i te raveanga i te reira! Ei akaraanga, kare roa e openga i ta tatou ka kite mai e ka rekareka mai i roto i ta Iehova au angaanga umere o te au mea i angaia. E akamanako ana i tana i akatupu mai na roto i te tuanga i te enua nei o tana akaaerenga! Noatu e e aronga apa ua ratou, kua taangaanga maata a Iehova i te au tangata tiratiratu i roto i teia au tuatau nei. Akapeea te au angaanga a te Atua i te akaaiteia atu anga ki te au tangata e akapaapaaia nei e te ao? Kare ainei koe e ariki ki ta Davida, tei tata katoa e: “Kare oou e aite, e te Atu, i roto i te au atua ra, kare oki e angaanga e arite ki taau ra angaanga”?​—Salamo 86:8.

¹² Mei ia Davida rai, e akakeuia ana tatou i te akapaapaa putuputu ia Iehova no tana au angaanga aite koreia. Tei runga ravao, te rekareka nei tatou i te kiteanga e tei roto te Patireia o te Atua i teianei i te rima o te Uanga tinamou o Davida, ko Iesu Karaiti. (Apokalupo 11:15) Te aiteanga o teia e te vaitata maira te openga o te akatereanga o te au mea nei. Te tuatau mutu kore ki mua o te au tangata e tere atu i te ono pirioni te o ra ki roto i te kino. E maata atu te inangaro i teia nei i te akakitekite ki etai ke no runga i te Patireia o te Atua e eaa ta te reira ka rave no te au tangata ravarai e te tauturu ia ratou kia kapiti mai kia tatou i te akapaapaa ia Iehova. Papu e ko te apinga mua i roto i to tatou oraanga koia oki kia taangaanga i te au atianga ravarai kia akamaroiroi i tetai ke kia ariki i teia “evangelia” i mua ake ka tureiti ei.​—Mataio 24:14.

13. (a) Koai ta Davida i akapaapaa e eaa te tu o te tangata tei ariki atu? (e) Akapeea te aronga akaaka i te akavaitata atu anga ki te putuputuanga Kerititiano i teia tuatau?

¹³ “E akapaapaa toku vaerua ia Iehova; ka kite te aronga akaaka i te reira, e ka rekareka.” (Salamo 34:2) Kare a Davida i akapaapaa ana i konei i tetai o tana au akatupuanga. Ei akaraanga, kare aia i akapaapaa ana i te tu i akavare ei aia i te ariki o Gata. Kua kite mai aia e na Iehova i paruru iaia i tona taime i Gata e kua ora mai aia no to Iehova tauturu. (Maseli 21:1) No reira, kare a Davida i akapaapaa ana i roto iaia uaorai, mari ra i roto ia Iehova. No teia tu nei, kua akapiri atu te aronga akaaka kia Iehova. Kua akangateitei katoa rai a Iesu i to Iehova ingoa, e kua akapiri atu teia i te au tangata akaaka, ma te tu ngoie ua i te apii Kiaia. I teia tuatau, te akapiriia ra te au tangata akaaka katoatoa mei te au pa enua ravarai ki te putuputuanga pa enua o te au Kerititiano akatainuia, e ko Iesu te Upoko o te reira. (Kolosa 1:18) Kua akakeuia te ngakau o te aronga akaaka i to ratou akarongo anga i to te Atua ingoa akangateiteiia e tona au tavini akaaka e to ratou akarongo anga i te karere a te Pipiria, ta te vaerua o te Atua e tauturu ra ia ratou kia marama.​—Ioane 6:44; Angaanga 16:14.

E Akaketaketa Anga te Au Uipaanga i to Tatou Akarongo

14. (a) Kua merengo ainei a Davida i te akapaapaa ia Iehova i roto i te ngai muna ua? (e) Eaa te akaraanga ta Iesu i akanoo mai no runga i te au uipaanga no te akamorianga?

¹⁴ “E akamaata tatou ia Iehova; tatou katoa e akateitei i tona ingoa.” (Salamo 34:3) Kare a Davida i merengo ana i te akapaapaa ia Iehova i te ngai muna ua. Kua pati pumaana atu aia i tona au taeake kia piri atu kiaia i te akangateitei anga i te ingoa o te Atua. Mei te reira katoa, kua rekareka a Iesu Karaiti, te Davida Maata, i te akapaapaa ia Iehova i te ngai tangata​—i te tunako o te reira ngai, i te au oroa i te iero o te Atua i Ierusalema, e i te piri atu anga ki tana au pipi. (Luka 2:49; 4:16-19; 10:21; Ioane 18:20) E arikianga rekareka tikai te aruanga i te akaraanga o Iesu i te akapaapaa kapiti atu anga ia Iehova i te au atianga ravarai ma te au taeake irinaki, i teia taime nei tikai ia tatou e ‘akara na i taua rā ra i te vaitata anga mai’!​—Ebera 10:24, 25.

15. (a) Akapeea te tupuanga o Davida i te akakeuanga i tona au tangata? (e) Akapeea tatou i te puapinga anga i te aere mai anga ki ta tatou au uipaanga?

¹⁵ “Kua kimi au ia Iehova, e kua tuatua maira aia kiaku, e kua akaora iaku i te au mea katoa taku i mataku ra.” (Salamo 34:4) E puapinga tikai teia tupuanga kia Davida. No reira, kua karanga atu aia e: “Kua kapiki atura taua tangata i mate nei, e kua akarongo mairā Iehova, e kua akaora atura iaia i tona katoa ra au tumatetenga.” (Salamo 34:6) I te akapiri atu anga ki te au taeake irinaki, tei ia tatou te au atianga e manganui i te akakite atu i te au tupuanga akamaroiroi e akapeea a Iehova i te tauturu mai anga ia tatou i te akakoromaki i te au turanga ngata. E akamaroiroi ana teia i te akarongo o to tatou au taeake irinaki, mei te au tuatua rai a Davida i te akamaroiroianga i te akarongo o tona aronga turuturu. No runga ia Davida, ‘kua akara tona au taeake ia Iehova, e kua akamāramaia mai kare oki to ratou au mata i akama.’ (Salamo 34:5) Noatu e te oro ra ratou mei te Ariki ko Saula, kare ratou i akama ana. Kua irinaki ratou e te turuturu ra te Atua ia Davida, e kua katakata to ratou au mata. Mei te reira tu katoa rai, te akara atura te aronga ou e pera katoa te au Kerititiano mou no tetai tuatau roa, kia Iehova no te turuturu. No te mea kua kite mai ratou uaorai i tana tauturu, te akatutu ra to ratou mata katakata i to ratou inangaro kia vai tiratiratu ua atu rai.

E Rekareka i te Tauturu a te Angera

16. Akapeea te au angera a Iehova i te taangaanga angaia kia akaora ia tatou?

¹⁶ “Te patia nei te Angela a Iehova i te puakapa, e pini ua ake te aronga i mataku iaia, e kua akaora ia ratou.” (Salamo 34:7) Kare a Davida i manako ana i to Iehova akaora mai anga iaia ei apinga te ka tupu ua kiaia. E tika, ko Davida ta Iehova tangata akatainuia, ei ariki no Iseraela i te tuatau ki mua; inara kua kite mai aia e e taangaanga ana a Iehova i tana au angera kia akara mai i tona aronga akamori tiratiratu katoatoa, noatu me e aronga ngateitei me kore e aronga akaaka ratou. I roto i to tatou tuatau nei, kua kite katoa mai te aronga akamori mou i te paruruanga ta Iehova e oronga maira. I Nazi Tiamani​—e pera katoa i Angakora, Maraui, Motamapiki, e te au enua ke atu e manganui​—kua tauta te au mana akaaere i te au ravenga kia takore atu i te Au Kite o Iehova. Kua puapinga kore ua ta ratou au tautaanga. Mari ra, kua ruperupe te tupuanga o te iti tangata o Iehova i roto i te reira au enua ia ratou e akangateitei kapiti ra i te ingoa o te Atua. Eaa te tumu? No te mea te taangaanga ra a Iehova i tana au angera tapu i te paruru e te arataki i tona iti tangata.​—Ebera 1:14.

17. Eaa te au mataara e tauturu ana te au angera o te Atua ia tatou?

¹⁷ Kapiti katoa mai, ka rauka i te au angera a Iehova i te akakeu i te au mea e tetai tangata uatu te akaturori ke ra i tetai ke, kia akaateaia mei rotopu i te iti tangata o Iehova. (Mataio 13:41; 18:6, 10) E noatu e kare tatou i kite mai ana i te reira taime ra, e akaatea ana te au angera i te au arairaianga te ka tapupu i ta tatou tavinianga ki te Atua, e te paruru ra ratou ia tatou mei te au apinga te ka akakino i to tatou pirianga kia Iehova. Tei puapinga maata rava atu, te arataki ra ratou ia tatou i roto i te angaanga no te akakiteanga i te “evangelia mutu kore” ki te au tangata ravarai, kapiti mai i roto i te au ngai e raveia ra te angaanga tutu anga i raro i te au turanga kino pakari. (Apokalupo 14:6) E akakite putuputuia mai ana te akapapuanga e te tauturu maira te angera, i roto i te au puka Pipiria tei neneiia e te Au Kite o Iehova.a E maata roa teia au tupuanga i te karanga uaia e ei mea manako ua.

18. (a) Eaa te ka umuumuia ia tatou kia puapinga mei te tauturuanga a te angera? (e) Eaa te ka uriuriia i roto i te atikara e aru maira?

¹⁸ Kia puapinga ua atu rai mei te aratakianga e te paruruanga a te angera, kia akangateitei ua atu rai tatou i te ingoa o Iehova noatu te takinga kino anga. E akamaara, e koropini ua ana te angera a te Atua “e pini ua ake te aronga i mataku [ia Iehova ra].” Eaa te aiteanga o te reira? Eaa te mataku i te Atua, e akapeea tatou i te tatanuanga i te reira? Eaa ra tetai Atua takinga meitaki e inangaro ra ia tatou kia mataku iaia? Ka uriuriia teia au uianga i roto i te atikara e aru maira.

[Tataanga Rikiriki i Raro]

Akapeea Koe me Pau?

• Eaa te au timataanga ta Davida i akakoromaki i tona mapu anga?

• Mei ia Davida rai, eaa te tumu manako ta tatou ka akamanako?

• Eaa to tatou manako i te au uipaanga Kerititiano?

• Akapeea a Iehova i te taangaanga anga i tana au angera i te tauturu ia tatou?

[Mapu i te kapi 21]

(No runga i teia, akara i te puka)

Rama

Gata

Zikelaga

Gibea

Noba

Ierusalema

Betelehema

Adulama

Keila

Heberona

Zipha

“Horesh”

Karamela

Maona

Eni-gedi

Tai Mate

[Akameitakianga]

Map: Based on maps copyrighted by Pictorial Archive (Near Eastern History) Est. and Survey of Israel

[Tutu i te kapi 21]

Noatu ei tuitarere, kua akangateitei a Davida i te ingoa o Iehova

[Tutu i te kapi 23]

E akamaroiroiia ana to tatou akarongo ia tatou e akarongo atura i te au tupuanga akamaroiroi te akakiteia maira i ko i ta tatou akaputuputuanga Kerititiano