Akaoti Takiri Anga i te Maroanga no te Ao Katoa e Pini ua Ake
“Na Iehova uaorai i to rima katau ra e ta i te au ariki kia pueurikiriki i te ra o tona riri anga.”—SALAMO 110:5, “NW.”
1, 2. I te mataiti 70 T.N., penei na teea tupuanga i akatupu i te ekoko anga no runga i te kapiti anga i te ao katoa e pini ua ake o te ngateitei o te Atua ko Iehova, inara kua akaariuia tona akaperepere anga kiaai i reira?
KO TE ngateitei o te ao katoa e pini ua ake koia Tei Anga i te rangi e te enua ko te reira tikai te maroanga maata tei mua i te au tangata e te au angera. E roa poto akenei, ka akaotiia te reira maroanga no te tuatau mutukore ua atu, inara no te au anere mataiti e manganui kua patoi te au enemi o Iehova i tona turanga ngateitei. Penei, no te akapouanga i te 70 T.N. o te oire o Ierusalema ma tona iero katoa tei akatapuia ra kia Iehova, na te reira i akatupu i te ekoko anga no te kapiti anga te tu ngateitei o Tei Anga i te ao katoa e pini ua ake. Inara, e tumu tau tikai tetai i kore ei a Iehova i iki ei Atua toa aia no te Iseraela kopapa ra.
2 Eaa ra te tumu? I te reira tuatau kua akaariu ke atu te Atua ko Iehova i tana akaperepere anga ki tetai iti tangata ou, koia te Iseraela vaerua, “te Iseraela o te Atua,” mei ta te apotetoro ko Paulo i tapa i te putuputuanga a Iesu Mesia ra. (Galatia 6:16) Inara, mei te reira Tuatau tei karangaia e no te Kerititiano ra, kare a Iehova i tamaki ana no te Iseraela vaerua ei Atua toa mei tana i tamaki no te Iseraela kopapa i raro ake i te Ture koreromotu a Mose ra. Kua tuku aia i te raurau anga a te ngati Iuda e, na te vaeau o Roma, e tamate ia Iesu Mesia ki runga i te rakau tamamae anga i Kalavaria ra. E 37 mataiti te reira i mua ake i te rua o te akapouanga o Ierusalema e to Roma ra, i te 70 T.N.
3, 4. Mei te tuatau ia Mose tae mai ki te Ariki ko Hezekia, i akapeea ta te Atua ra akaari anga iaia uaorai ei toa tamaki, inara i te tuanga o te Iseraela vaerua, eaa te tika ra no tana tamakianga e pera katoa oki ta ratou ra tamakianga?
3 Mei te tuatau o te peroveta ko Mose e tae roa mai ki te tutaraanga o te Ariki ko Hezekia o Ierusalema ra, kua tamaki te Atua ko Iehova na te tu semeio no te iti tangata o Iseraela, e kua tamaki to Iseraela i raro ake iaia ma te au taoonga tamaki ei tamate rava. (Deuteronomi 1:30; 3:22; 20:3, 4; Iosua 10:42) Inara kare te reira i te tu o te Iseraela vaerua! Mei te matenga o Iesu Mesia i vao ia Ierusalema e tae roa mai i to tatou Tuatau Noa nei, kare teia Atua toa i iki kia tamaki i te tamaki anga kopapa no te Iseraela o te Atua. Mei te reira katoa oki, kare aia i akaue ana i te Iseraela vaerua ko ratou ra te putuputuanga Kerititiano, kia tamaki ma te au apinga tamaki a te kopapa nei. E tamaki ke ta te au Kerititiano te ka rave.
4 Kia tau ki teia, kua tata tetai arataki tamaki no te akarongo Kerititiano ki tona au taeake Kerititiano o Korinetia, i Ereni e: “Kare oki ta matou taoonga tamaki i ta te kopapa e mea mana ra i te Atua, i te uri anga i te au punanga ketaketa ki raro: I te uri anga atu i te au eumiumianga ra ki raro, e te au mea teitei katoa ko tei akateitei kia kore e rauka te kite i te Atua, e te akatuikaa angaia atu i te au manako ravarai te akarongo i te Mesia ra; Te vave nei matou i te tutaki atu i te au akarongo kore katoa, kia tika rava to kotou akarongo.” (2 Korinetia 10:4-6) I te tuanga o mua ua ake o taua reta rai, kua tuatua a Paulo i “te taoonga ra, ko te tuatua-tika, i te rima katau e te rima kaui.”—2 Korinetia 6:7; e akara katoa ia Ephesia 6:11-18.
Ka Tamaki a Iehova ia Aramakito
5. I te kainga i Getesemane ra, eaa te turanga ta Iesu i akono no te taangaanga i te apinga tamaki ei paruru ia koe uaorai, e eaa te mataara ta te au pipi nana i rave?
5 Ia Iesu Mesia i te enua nei kare rava aia i rave i te taoonga tamate tangata ei paruru iaia uaorai. I te po i pikikaaiaʼi aia i te kainga i Getesemane ra, kua unui akera tana pipi koia a Simona Petero i tana koke e kua tipu atura i te taringa o te tavini a te taunga maata ngati Iuda ra. Inara kua akaora atura Iesu i te taringa ki tona ngai e kua karanga atura: “Ko tei rave i te koke ra, ka mate ïa i te koke. Kare aina koe i manako e, e tika iaku kia pure ki taku Metua i teianei; e nana e oronga mai i te angela raungauru ma rua te manotini, e kia maata atu rai? Eaa iora ra e tupu ei te tuatua i tataia ra i reira e, kia pera e tikaʼi?” (Mataio 26:52-54) I roto i teia au tu ravarai, kua tamou te aronga aru mou i te Tamaiti a te Atua tei tuku atinga ra iaia uaorai kia kore e o atu ki te tamaki, na te rave anga tikai me kare na te turu ua anga, me e raveia te tamaki no teianei ao.—Ioane 17:16; 18:36.
6. A te tamaki o te ra maata o te Atua Mana Katoatoa ra ia Aramakito, eaa te turanga te ka raveia e te au Kite o Iehova?
6 Ei konei ra, e akamatakite atu i to te pa enua ravarai e, a te tuatau o “te tamaki o te ra maata o te Atua Mana Katoatoa” i “tetai ngai tei kapikiia i te reo Epera ko Ara Makito,” kare rava te au Kite o Iehova e o atu ki te reira tamakianga. Ka akaruke atu ratou i te reira na te Atua toa, “na Iehova tapaota,” ratou ko tana au angera e manotini ua atu i raro ake i te rangatira koia a Iesu Mesia.—Apokalupo 16:14-16, NW; Apokalupo 19:11-21; Salamo 84:12, NW.
Vaitata a Iehova i te Akamata i Tana au Angaanga Vaeau
7. Ei Atua toa, eaa te ingoa tei tapaia no Iehova, e te vaira ainei aia ei pera?
7 Kua matauia te Atua o Iseraela i taito ra e kua karangaia ko Iehova tseva·’ohthʹ, me kare Iehova tapaota. (1 Samuela 1:3, 11) Ia Roma 9:29 (i te King James Version) kua taiku te apotetoro Kerititiano ko Paulo ia Isaia 1:9 e kua tata: “Auraka te Atu Tapaota ra i vaoo i te uanga no tatou, kua riro tatou mei ia Sodoma, e kua arite tatou ia Gomora ra.” Pera katoa oki, kua tata te pipi Kerititiano ko Iakobo e: “Te au aue a te aronga tei kokoti ra, kua tae rava ia ki roto i te taringa o te Atu tapaota ra.” (Iakobo 5:4, KJ; American Standard Version) No reira a Paulo raua ko Iakobo i akatakaʼi i te Atua e ko Iehova tapaota i te tuatau o te anere mataiti mua o to tatou Tuatau Noa Nei. I te tuatau e 18 anere mataiti i muri maira, kare te Atua i rave i te tamakianga kopapa no te Iseraela vaerua, koia te Iseraela o te Atua, i te mataara tei rave aia no Iseraela i taito ra, inara te vaira aia ko Iehova tapaota.
8-10. (a) Naai i akapapa te tamaki i te rangi ra, e eaa te tupu anga o te reira? (e) I teianei, e tere atu i te 70 mataiti i muri ake i te openga te tamaki i te rangi ra, eaa te roa o te tuatau toe i mua ake i te tamaki o te ra maata a Iehova?
8 I te anauia mai anga te Patireia o te Mesia i te 1914 i te openga “te tuatau o te au Etene ra,” kua akamataia te tamaki i te tuanga o te Atua ko Iehova i te rangi ra. (Luka 21:24, KJ) Naai i akaue kia raveia te reira tamaki? Na te Atua na Iehova uaorai. Nana i tono i tana tamaiti akateronoia ra ki te ngai tamaki i raro ake i tona ingoa ko Mikaela, no te mea ko Ia tei tau rava kia pau i te uianga no tona ingoa, koia oki, “Koai Tei Aite ki te Atua?” Kua aere viviki atura Mikaela i te rave ei komono no te tamakianga a Iehova tapaota ra.
9 Kia tau ki te reira, ka tatau tatou ia Apokalupo 12:7-10: “E e tamaki tei runga i te rangi: ko Mikaela e tana au angela, tamaki atura i te taae; e kua tamaki maira te taae e tana au angela, Kare ra i riro te re ia ratou; e kare rava atura o ratou e nooanga i runga i te rangi. Uriia atura oki te taae maata ki vao, ko taua ovi taito ra ïa, ko tei karangaia i te diabolo ra, e ko Satani oki, ko tei pikikaa i to te ao katoatoa nei, i uriia aia ki vao ki runga i te enua nei, e tana au angela katoa, kua uri katoaia ki vao. E akarongo atura au i tetai reo maata i runga i te rangi, i te na ko anga e, Teia mai nei te ora, e te maroiroi, e te basileia, o to tatou Atua, e te mana o tana Mesia: kua uriia oki te akaapa i to tatou au taeake ki raro.”
10 I teianei, e tere atu i te 70 mataiti i muri ake i te reira tamaki i te au rangi ra, “e tuatau poto ua” te toe nei i mua ake ka akamataʼi te tamaki o taua ra maata o Iehova ra e akakite papu mai ei te Atua iaia uaorai ki teianei uki tangata ei ia Iehova tapaota.—Apokalupo 12:12; Zekaria 14:3.
Te Toa Tamaki no te Akatika Anga ia Iehova
11. Eaa te tuatau akatakaia te tapapa atura te toenga o te anana iti ma te urupu maata katoa, e eaa ta ratou ka maeva ma te rekareka i reira?
11 I raro ake i te akauru anga a te vaerua, kua tata te Ariki pakari ko Solomona o Iseraela i taito ra e: “E atianga to te au mea katoa nei, e e tuatau to te au akakoroanga katoa i raro ake i te rangi nei: . . . e tuatau to te tamaki, e e tuatau to te akamoeau.” (Koheleta 3:1-8) I te enua nei te au pipi a te Ariki te tutara ra koia “tei maata ia Solomona” te tapapa nei i te tuatau Nona kia arataki atu i te au angera ki te tamaki anga ia Ara Makito. (Mataio 12:42; Apokalupo 19:11-16) Ei reira aia “ka tiaki [i te au enua] ma te papa auri,” te atiatianga ia ratou “ki tetai tepeta auri.” (Apokalupo 19:15, NW; Salamo 2:9, NW) Ka maeva maata tana au pipi akamoeau, tei paruruia ra, no tana akaora anga umere tikai ia ratou! Ka kapiti katoa teia i te toenga o te “anana iti” o tona au oa tuanga no te Patireia e te “urupu maata” o tana “mamoe ke atu” te manakonako ra kia noo ki te enua Parataito i raro ake i tona tutaraanga tau no te tai tauatini mataiti. (Luka 12:32; Apokalupo 7:9-17; Ioane 10:16) Ka maeva rekareka ratou “i raro ake i te ata o Tei Mana Katoatoa,” ma te tangitangi anga autu o te Ariki Tiaki, koia a Iesu Mesia, i te akatikaanga i te ngateitei o te Atua ko Iehova i te ao katoa e pini ua ake.—Salamo 91:1, NW.
12. Te aere maira te tamaki noea mai no te pa enua ravarai, e eaa te ka tupu kia tau ki ta te Salamo 68:1, 2?
12 Kare i te akamaata ua, e mea tau kia tuatuaia i teianei e te aere maira te tamaki no te ngai mamao rava atu i to te tangata nei te ka taangaanga i te au apinga tamaki tano tikai te tuku anga mai ei akapuapinga kore i ta te tangata pomu nukiria tei mua ia i ta te pa enua ravarai, to roto e to vao i te akaaerenga a te Taokotaianga Enua. E akarongo ana: “Kia tu mai te Atua, kia akapueurikiriki keia tona au enemi! e te aronga i makitakita iaia ra, kia rere ke atu ïa i mua i tona mata! Mei te auai e peke ra, kia peke katoa ratou: mei te tapou e taʼe i te ai ra, kia pera to te aronga kino mate i mua i te aroaro o te Atua.”—Salamo 68:1, 2.
13. I te teateamamao anga no te tamaki, te tuatuaia ra te au tuatua ia Salamo 45:1-6 kiaai, na te tu tau tikai?
13 Te raveia nei i teianei te teateamamao anga no te tamaki o te au tamaki ravarai. Ei Toa Tamaki maata rava, te tuatuaia ra Tei Tamaki no te akatikaanga ia Iehova i te au tuatua akapapaia e tetai mema o te iti tangata Iseraela tei akauruia ra: “E meitaki maata toou i to te tamariki a te tangata nei: kua maringi te meitaki ki runga i to vaa na; i tamou ei to te Atua akameitaki ia koe ra. E tatua ana to koke ki to ūā, e tei ririnui ra, toou ra kakā e toou ra mana; E ma toou ra mana, ka akaoro ei ma te manuia, ei akatupu i te tuatua-mou, e te maru, e te tuatua-tika; e na to rima katau e apii ia koe i te au mea rikarika. Ka topa te au tangata i raro ia koe! ka kokoi te au kakao noou ra, i te ngakau o te au enemi o te ariki. To terono, e te Atua, e vai rai e tuatau ua atu: e sepeta tuatua-tika te sepeta o toou ra basileia.”—Salamo 45:1-6.
Te Kapiti Katoa ra te au Enua e Patoi ia Iehova
14, 15. I muri ake i te tukuia anga mei te tapeka anga, eaa te au tuatua no te Salamo 2 tei taikuia e te au apotetoro e kua akatupuia i reira, e eaa ta ratou i pati ki te Atua ra?
14 I muri poto mai i te akanoo anga o te putuputuanga Kerititiano i te ra o Penetekote 33 T.N., kua kite marama te au Kerititiano akatainuia ra i tetai aiteanga o te Salamo 2:1, 2. Te tatau ra teia tuatua i tataia: “Eaa te au etene i oripu uaʼi, e te au tangata nei i manako ei i te mea puapinga kore? Te tu ra te ui ariki o te enua nei ki runga, e te kapiti katoa ra te ui rangatira e māro ia Iehova, e tana i akatainu ra.” I muri ake i te tamamae anga te au apotetoro a Tei Akatainuia a Iehova ra i to ratou tapekaanga mua e te takinokino anga e te au enemi ngati Iuda ra, kua kapiti akaou atura ratou i to ratou au taeake Kerititiano e kua taiku atura i teia au tuatua i runga akenei no te Salamo 2 tei akapapaia e te Ariki ko Davida ra. Kua akakite mai te Angaanga 4:23-30 (NW) i te reira, i te na ko anga:
15 “E kia tukuia atura raua kua aere atura ki to raua uaorai au tangata e kua akakite atura i te au tuatua ravarai ta te kau taunga nunui e te aronga pakari i tuatua mai kia raua ra. I te akarongo anga i te reira kua akateitei atura i to ratou reo ki te Atua e kua taokotai i te na ko anga atu: ‘E te Atu Ngateitei, ko koe Tei anga i te rangi e te enua e te tai e te au apinga ravarai i reira, e na to vaerua tapu i tuatua mai na roto i te vaa o to matou tupuna o Davida, koia taau tavini, “Eaa te au etene i oripu uaʼi e i manako puapinga kore ei te au tangata nei? Te tu maira te ui ariki o te enua nei e kua kapiti katoa mai te aronga tutara e maro ia Iehova e tei akatainuia e ia ra.” Mei te reira katoa, a Heroda raua ko Ponotio Pilato ma te au etene e te au tangata o Iseraela i uipa katoa ki teia oire e maro i taau tavini tapu ia Iesu, taau i akatainu ra, ei rave i ta to rima e taau ako i akapapa kia akatupu mei muatangana ra. I teianei, e Iehova, e tamanako i ta ratou akamataku anga, e e akamaroiroi i toou au tavini kia tuatua ua i taau tuatua ma te mataku kore, ia koe e akatika atura i to rima ei akaora kia tika te akairo e te au angaanga tuke te tupu na roto i te ingoa o to tavini tapu o Iesu.’”
16, 17. (a) I te tuatua enua katoa o te tangata nei, i tupu ana ainei tetai apinga tei tau kia akaaiteia atu ki tei akamataia i te 1914 ra? E akataka mai. (e) Eaa te angaanga ta te au pa enua e rave ua atu nei, e te akakeu ra ia Iehova kia tata i teaa, i tona aiteanga?
16 Inara, me manako tatou i te oripu ua anga te au etene, te tu taokotai anga te ui ariki, te kapiti katoa anga te aronga tutara e maro atu ia Iehova raua ko Tei Akatainuia e ia ra, koia a Iesu Mesia, eaa te ka tau kia akaaiteia atu i te tuatua enua tei akamataia e 76 mataiti mei te 1914. Kare e ko te mataiti ua te reira i aruru ei te tamaki mua o te ao o te oraanga tangata nei, mari katoa ra ko te mataiti te reira i akaopeiaʼi te tuatau o te au Etene ra, “te tuatau akatakaia no te au enua!” (Luka 21:24, NW) Kua akamata te tupuanga maata o te Salamo 2 i te reira mataiti.
17 I te openga o te tuatau o te au Etene i te 1914, kare to te au etene—kare katoa oki to tei karangaia ko Kerititome, e manganui to ratou ra tei manako ia ratou uaorai e e Iseraela vaerua—kare i turou i Tei Akatainuia e Iehova ra, koia a Iesu Mesia, ki te terono no te tutaraanga i te enua nei. I teianei, e 71 mataiti i muri ake i te akamataanga “te tutu aereia te nuti meitaki o te patireia ki te au enua katoatoa ei kite no te pa enua ravarai,” mei te 1919 maira, kare rava te au enua Kerititome e te au enua i vao mai e maeva i te Ariki a Iehova kua roa ra te akakiteanga mai, e kare katoa e tia i te kauraro kiaia e kia akakore i to ratou uaorai tutara anga ki rungao i te enua nei. (Mataio 24:14, NW) Kareka ra, kua tae ratou i teianei ki te tuatau e te maani ra ratou ia Iehova, mei te mea atura kia tata i te akaoti anga meitaki i “te buka Tamaki a Iehova ra.”—Numero 21:14.
Autu Anga Kaka o te Atua Toa
18. Eaa ta Iehova ka rave te tau ra tatou kia akaperepere, e koai te ka vai ki te pae iaia ra, ei akatupu anga ia Salamo 110?
18 E aere ki mua, i reira, e tamaki atu, e Iehova tapaota, ma to Tamaiti ariki, koia a Iesu Mesia, i te pae ia koe! Kua tuatuaia te au tuatua totou ra kiaia: “E akavi koe i rotopu i to au enemi. Na Iehova uaorai i to rima katau ra, e ta i te au ariki kia pueurikiriki i te ra o tona riri anga. Nana e rave te akautunga i rotopu i te au iti tangata; e ka akariro aia kia ki te enua i te au tangata mate. Ka ta oki aia i tei maata i te enua rai te tangata kia pueurikiriki rava.”—Salamo 110:2, 5, 6, NW.
19. No runga i te tamaki o te ra maata o te Atua Mana Katoatoa a mua ua akenei, eaa ta tatou ka pure kiaia no te urupu maata o te au mamoe ke atu ra?
19 E Iehova tapaota e, e tuku koe i to au tavini tiratiratu i te enua nei kia riro ei au kite rekareka i toou autu anga aite koreia na roto i to Ariki toa, koia a Iesu Mesia, i te tuatau o te tamaki o te ra maata o te Atua Mana Katoatoa i te ngai tei tapaia i te reo Epera ko Ara Makito! (Apokalupo 16:14) I te pae o te toenga o te Iseraela vaerua mou ra, e tuku i te urupu maata o te aronga mei te mamoe rai te tu tei “orei i to ratou kakau, e kua akateatea i te toto o te Punua-mamoe ra” kia “aere mai mei roto i te mate maata” ma te rekareka, kia riro ei kite noou i te enua nei e tuatau ua atu! (Apokalupo 7:14) Na taau utuutu anga aroa, e tuku ia ratou kia ora atu e auraka kia mate, kia tae ki roto i te ngai tamaki kore na to Tamaiti autu ra, koia te ka tutara ki rungao i te enua tamaia te ka akariroia ei parataito manea, kia tau ki taau akakoroanga mua ra. E tuku ia ratou ei akakite anga akara mataia ki te aronga katoa te ka akatuakaouia mei te mate mai ei akatikaanga i te turanga ngateitei tei tau ra noou anake i rungao i te ao katoa e pini ua ake! Te akameitaki nei matou ia koe no te mea ka akaoti takiri koe i te maro anga i te ao katoa e pini ua ake, ae, e tuatau ua atu!
Maara Ainei ia Koe?
◻ Eaa te maro anga maata rava i mua i te tangata e te au angera katoa oki?
◻ Eaa te tuke anga te vaira i rotopu i ta Iehova tamaki anga no to Iseraela i taito ra e no te Iseraela vaerua?
◻ Ia Aramakito, eaa te turanga ta te au Kite o Iehova te ka rave, e no teaa ra?
◻ I naea te akatupu anga maata ia Salamo 2:1, 2 ra?
◻ Akapeea te akaoti takiri anga i te maro anga no te ao katoa e pini ua ake?
[Tutu i te kapi 24, 25]
Ka maeva te “urupu maata” i te Ariki Tiaki a te Atua tei autu ra