“I Toou ra Mārama e Kite ei Matou i te Mārama”

KO TE marama tetai apinga ta te maata anga ia tatou e manako kore ra kia kore rava ra e uira e kua o atu to tatou ngai ki roto i te poiri. Ma te mataora, to tatou “tumu uira” i te rangi​—te ra​—ka irinaki tikai ia. E mari ua ake te marama mei te ra ra, te kite ra tatou, te kai ra, te akaea ra, e te ora ra.

I te mea e e puapinga te marama no te ora, kare tatou e poitirere i te tatau ia Genese e kua mama mai te marama i te ra mua o te anga anga. “Kua tuatua iora te Atua, Ei mārama; kua mārama iora.” (Genese 1:3) Kua kite rai oki te au tangata akono i te Atua mei te Ariki ko Davida e ko Iehova te tumu o te ora e te marama. “Tei ia koe oki te tumu o te ora,” i tata ei a Davida. “E i toou ra mārama e kite ei matou i te mārama.”​—Salamo 36:9.

Te akapiri ra ta Davida au tuatua ki te tu tika tikai e te akatutu anga. Kua tou mai te Encyclopædia Britannica e: “E tikai, ko te marama te tumu o te kite anga.” Kua kapiti mai i reira e: “E maata te au manako te tae ra ki te roro o te tangata na roto i nga mata i tetai atu au mero.” I te mea e maata atu ta tatou e apii ra i runga i te apinga orongaia o te kite​—te anoanoia ra te marama kia angaanga meitaki​—kua taangaanga katoaia te marama i roto i te au Tuatua Tapu na roto i tetai tu akatutu anga.

No reira, kua akakite a Iesu ki tana au pipi e: “Ko au te mārama o teianei ao: ko te aru mai kiaku nei, kare aia e aere ua i te poiri, e mārama ora tona.” (Ioane 8:12) Te marama akatutuia ta Iesu i taiku maira ko te tuatua o te tuatua mou tana ia i tutu aere, te ka akamarama i te au manako e te au ngakau o tona aronga akarongo ra. I muri ake i etai au mataiti o te tu poiri i te pae vaerua ra, i te openga iora kua marama te au pipi a Iesu i ta te Atua akakoro anga no te au tangata e te manakonako anga o te Patireia. E “mārama ora” tikai teia, i te mea e ka arataki atu te kite ki te ora mutu kore. “Teia oki te ora mutu kore,” ta Iesu i tuatua na roto i te pure ki tona Metua i te rangi ra, “kia kite ratou ia koe i te Atua mou ra, e ia Iesu i te Mesia, i taau i tono maira.” (Ioane 17:3) Auraka rava tatou e manako kore i teia marama pae vaerua!