“Mei te Tere Anga Rai na te Moana i te Uriia”

KARE ainei koe e akamanako ana i tetai rave anga mei te reira rai te tu e mea tau kore, e neneva, e te kino oki? Inara, kua tuku tetai aronga ia ratou uaorai ki roto i taua turanga i tetai tu tutu ua. Akapeea ra? Kua tuatua te tangata tata Engarani ko Thomas Fuller i te 17 anere mataiti e: “Auraka e rave i tetai apinga ma te ngakau riri. Mei te tere anga rai na te moana i te uriia.”

Te aruanga i tetai angaanga ma te tu riri kotinga koreia kua rauka te au tupu anga kino tikai. Te akatutuia maira teia e tetai tupu anga tei tataia i roto i te Pipiria. Kua akariririri tikai a Simeona raua ko Levi, e nga tamaroa na te pateriareka taito ko Iakoba, ki te takinokinoia anga to raua tuaine ko Dina e kua tomo atura raua ma te tu riri akaoko tikai. Te openga ra ko te mate maata e te akakino anga. No reira a Iakoba i akautunga ei i ta raua angaanga kino tikai, i te tuatuaanga e: “Kua tumatetenga roa au ia korua, i te akariro anga iaku ei mea viivii i te au tangata o te enua nei.”​—Genese 34:25-30.

Ma te tu kite pakari, kua akamaroiroi mai te Tuatua a te Atua, te Pipiria, i te mataara ke. Te na ko maira: “Akapakia te makitakita, e akaruke i te riri otooto: auraka toou ra kinokino kia tae roa ki te rave i te mea kino.” (Salamo 37:8) Te aruanga i te reira akoanga ka akakore atu i te au ara maata.​—Koheleta 10:4; akara katoa ia Maseli 22:24, 25.