Na te Aroa o Iehova i Akaora ia Tatou i te Manakonako Kore

“E aroa mai koe iaku, e te Atua e, i toou ra takinga-meitaki; no te maata o toou ra aroa, e taparapara koe i taku nei au ara.”​—SALAMO 51:1

1, 2. Eaa te akatupu anga ki tetai o to Iehova au tavini me ka rave i te ara kino ra?

KARE e rauka te aati i ta Iehova ra ture ma te kore e akautunga. Ka riro te reira ei mea papu me ka rave tatou i tetai ara kino kia Iehova ra! Noatu rai me kua tavini tiratiratu tatou ia Iehova e manganui te au mataiti, ka akatupu te aatianga i tana ture i te apiapi maata me kare te maromaroa oonu roa. Penei ka manako ngakau tatou e kua akaruke a Iehova ia tatou e kare tatou i tau akaou kia tavini atu iaia ra. Penei ka aite ta tatou ara ki tetai tiao maatamaata te arai atura i te marama o ta te Atua akaperepere anga mai.

² Kua kite te Ariki ko Davida o Iseraela i taito ra iaia uaorai i roto i taua turanga ra. I akapeea teia turanga i tupu mai ei?

Ka Taki Atu te Au Takainga Tarevake ki te Ara Kino

3, 4. Eaa tei tupu ki te Ariki ko Davida i tetai tuatau i tona puapinga angaia ra?

³ E inangaro to Davida i te Atua ra inara kua rave aia i te au takainga tarevake tei taki atura ki te au ara kikino. (Akaaiteia atu kia Galatia 6:1.) Ka rauka ua te reira te tupu ki tetai ua atu tangata apa ua ra, me e maata atu oki tona mana i rungao ia etai ke ra. Ei ariki tei puapingaia ra, kua rekareka a Davida i te rongonui e te mana. Koai tei tau kia akaao atu i tana tuatua ra? Kua papa te au tangata pakari ra i te rave rekareka i tana akauenga, e kua mareka ua te au tangata i te rave i tana i pati atu ia ratou kia rave. Inara, kua apa a Davida i tana raveanga kia tini tana uaorai au vaine e te tatauanga oki i te au tangata ra.​—Deuteronomi 17:14-20; 1 Paraleipomeno 21:1.

⁴ I taua tuatau maata ra te puapinga i te pae kopapa, kua rave a Davida i etai ara kikino ki te Atua e ki te tangata katoa oki. Eaa oki, kua taki atu tetai ara ki tetai ke atura mei tetai kakau e manganui te au taura kairoia na Satani i akanoonoo atu! I te tuatau te tamaki atura tona au tangata Iseraela i to Amona ra, kua akara atura a Davida mei runga i te tapoki o te are i te vaine manea a Uria, koia a Bate-seba, te pai ra iaia uaorai. Ia Uria i te tamaki ra, kua akaue atu te ariki kia apaiia mai taua vaine ra [ko Bate-seba] ki tona are ariki e kua akaturi atura iaia. E tamanako ana i tona poitirere i te kiteanga i muri akera e kua nui taua vaine ra! Kua pati atura a Davida kia oki mai a Uria, ma te manakonakoanga e ka moe kapiti a Uria i taua po ra ma Bate-seba e kia manako e e nana uaorai te tamaiti. Noatu rai e kua rave a Davida kia kona aia, kare ra a Uria i moe kapiti atu i tana vaine. I reira, no te manako taitaia, kua akaue poiri ua atura a Davida i te rangatira vaeau ia Ioaba kia tuku ia Uria ki roto i te pupu mua o te tamaki ra ko te ngai ia i papu ei iaia e ka mate atu ki reira. Kua tamateia a Uria i taua tamaki anga ra, e kua akono tana vaine kua takaua ra i te tuatau matauia no te aueanga, e kua akaipoipo atura a Davida iaia i mua ake ka kite ei te au tangata e kua nui aia.​—2 Samuela 11:1-27.

5. Eaa tei tupu i muri ake i to Davida ara anga ma Bate-seba ra, e eaa te akatupu anga a tana au ara kiaia?

⁵ Na roto atu i te peroveta ia Natana ta te Atua ra akakite atu anga i ta Davida au ara e kua na ko atura: “E akatupu au i te kino ia koe i roto i toou ra are.” Kia tau ki te reira, kua mate atura te tamaiti i anauia maira e Bate-seba. (2 Samuela 12:1-23) Kua kukumi atura te tamaiti mataiapo a Davida, koia a Amanona, i tona uaorai apa tuaine ra ko Tamara e kua taia a Amanona e tona tungane. (2 Samuela 13:1-33) Kua tamata te tamaiti a te ariki ra koia a Abasaloma kia riro iaia te terono e kua akakino atura i tona metua na te piri anga akaturi ma te au vaine tavini o Davida ra. (2 Samuela 15:1–​16:22) Kua akaopeia te tamaki anga i to Abasaloma mate anga e kua tere atu oki to Davida ra aue. (2 Samuela 18:1-33) Inara, na te au ara a Davida i taakaaka iaia e kua akariro iaia kia matakite te umuumuia ra kia vai piri vaitata ki tona Atua aroa ra. Me rave tatou i te kino, e tataraara taakaaka tatou ma te akavaitata atu kia Iehova.​—Akaaiteia atu kia Iakobo 4:8.

6. Eaa tikai te tumu i maataʼi te apa a te Ariki ko Davida ra?

⁶ E apa tikai to Davida no te mea e tutara aia no to Iseraela e kua kite tikai i te Ture a Iehova ra. (Deuteronomi 17:18-20) Kare aia i tetai pharao no Aiphiti me kare ariki no Babulonia tei ngere ra i te reira kite e penei ka rave ua i te au mea mareka koreia e te Atua ra. (Akaaiteia atu kia Ephesia 2:12; 4:18.) Ei mema no tetai iti tangata akatapuia ra kia Iehova, kua kite a Davida e ko te akaturi e te ta ua e nga ara kino ia. (Exodo 20:13, 14) Kua kite katoa oki te au Kerititiano i te ture a te Atua ra. Inara, mei ia Davida ra, te aati ra tetai papaki o ratou i te reira no te akatuangaia i te ara, te tu apikepike ei tangata, e te au timata anga kare i rauka te kopae anga. Me ka tupu te reira ki tetai o tatou nei, kare e tau kia noo tatou ki roto i tetai turanga akapoiriia te ka arai i to tatou akara anga i te pae vaerua e ka tapoki ei ia tatou ki roto i te tu manakonako kore oonu ra.

Na te Aaki Anga e Apai Mai te Pumaana

7, 8. (a) Eaa tei tupu kia Davida i tana tamata anga i te uuna i tana au ara? (e) Eaa i tau ei kia aaki e kia akaruke takiri i ta tetai ara?

⁷ Me kua apa no te au apa kikino i te ture a te Atua ra, penei ka kite tatou i te tu ngata te aaki i ta tatou au ara, noatu rai kia Iehova ra. Eaa te ka tupu i raro ake i te reira au turanga katoa ra? Ia Salamo 32, kua akakite maira a Davida e: “I toku muteki ua anga kua kino roa oku ivi i toku ngunguru anga i te ra roa katoa ra. No te mea i te ao e te po kua teimaa maira to rima ki runga iaku. Kua tauiia te mauu o toku oraanga mei te vera o te raumati ra.” (Nga Salamo 32 irava 3, e te 4, NW) I te tamataanga kia uuna i tana ara e te tapoki i te akava ngakau apa ra kua kino roa a Davida tei rave ra i te apa. Na te taitaia i akameangiti mai i tona maroiroi e kua aite aia ki tetai pu rakau tei maroia ra e kare e mauu i te oronga mai i te ora. Ko te aite anga, penei kua kite aia i te tu kino o te manako e te kopapa katoa oki. E mea papu, kua ngaro iaia tona rekareka anga. Me ka kite tetai o tatou ia tatou uaorai i roto i tetai turanga mei te reira rai, eaa ta tatou ka tau kia rave?

⁸ Ka rauka i te aaki anga ki te Atua i te apai mai i te akakoreanga ara e te maru tikai. “I te openga kua aaki atura au i taku ara kia koe, e kare au i tapoki i taku apa,” ta Davida ia i imene. “Kua tuatua au e: ‘Ka aaki au i taku au ara kia Iehova.’ E kua akakore mai koe uaorai i te kino o te au ara naku ra.” (Salamo 32:5, NW) Te taitaia ra ainei koe no etai ara uunaia ra? Kare ainei e ka meitaki atu te aaki i te reira e ka akaruke atu kia rauka mai ei to te Atua ra aroa? Eaa koe ka kore ei e kapiki atu i te aronga pakari o te putuputuanga e ka kimi ei i te akaoraanga i te pae vaerua? (Maseli 28:13; Iakobo 5:13-20) Ka arikiia toou vaerua tataraara, e a muri akera ka akaoraia toou tu rekareka ei Kerititiano. “E ao to tei akakoreia ra tana apa, tei tapokiia ra tana ara,” ta Davida ia i tuatua. “E ao to te tangata kare ra a Iehova i tuku i te kino ki runga i te tuatua nona ra, e kare e pikikaa i roto i tona vaerua ra.”​—Salamo 32:1, 2, NW.

9. I naea i akapapaiaʼi te Salamo 51, e no teaa ra?

⁹ E tuatua pauanga ra ta Davida raua ko Bate-seba ki te Atua ra ko Iehova no ta raua raveanga tarevake. Noatu rai e kua tika ua raua kia tamateia no ta raua ara i rave ra, kua aroa ra te Atua ia raua. E maata oki tona aroa ia Davida no te koreromotu Patireia ra. (2 Samuela 7:11-16) Kua kitea to Davida ra tu manako tataraara no tana ara tei kapiti katoa ra ia Bate-seba ia Salamo 51. Kua akapapaia teia taramo akatuki atura i te ngakau na te ariki mii ra no tana ara i muri ake i ta te peroveta ko Natana akaaraara anga i tona akava ngakau kia kite i te maata o tana apa i te ture a te atua ra. Na te maroiroi i rauka ia Natana i te akakite atu kia manako a Davida i tana ara i rave ra, pera katoa oki te aronga pakari Kerititiano ka tau kia maroiroi ratou kia raukai te rave i taua tu apinga ra i teia tuatau nei. Kare aia i patoi atu i taua akaapaanga ra e ka akaue atu ei kia tamateia a Natana, kua aaki taakaaka atura te ariki. (2 Samuela 12:1-14) Te akakite maira a Salamo 51 eaa tana i tuatua atu ki te Atua na roto i te pure no taua ravenga viivii nana ra e te tau meitaki ra oki no te manako pure anga, e tika rava oki me kua rave tatou i te apa e te umuumu ra kia rauka mai to Iehova aroa ua.

Ka Tau Tatou kia Pau ki te Atua

10. Akapeea e kite ei a Davida i te ora mai anga i te pae vaerua ra?

¹⁰ Kare a Davida i kimi i te kotoe anga no tana ara mari ra kua pati aia: “E aroa mai koe iaku, e te Atua e, i toou ra takinga-meitaki; no te maata o toou ra aroa, e taparapara koe i taku nei au ara.” (Salamo 51:1) Na tana raveanga ara, kua takai atura a Davida ki vao i te kotinga o te Ture a te Atua. Inara, e manakonako anga tetai nona kia akaoraia mai i te pae vaerua, me ka akaari mai te Atua i tana akaperepere anga kia tau ki Tona aroa takinga meitaki, me kare aroa tiratiratu ra. No te maata o to te Atua ra aroa i te tuatau kua topa kua akatupu mai te reira i tetai tumu anga no te akarongo ki te ariki tataraara ra e ka takore atu Tei Anga mai iaia ra i tana au ara katoa.

11. Eaa tei akakiteia maira e te au atinga o te Ra Tapoki Anga ra, e eaa te umuumuia ra no te ora i teia tuatau nei?

¹¹ Na roto i te au atinga akatutuia maira i te Ra Tapoki Anga ara ra, kua akakite maira a Iehova e e mataara tana no te tama anga i te ara a te aronga tataraara. Kua kite ra tatou i teianei e ko tona aroa e tana akakore anga ara te orongaia maira kia tatou na runga i te tumu anga o to tatou akarongo ki roto i te atinga oko o Iesu Karaiti. Me kua irinaki a Davida i to Iehova ra aroa takinga meitaki e tona aroa ua, ma taua au akatutu anga e te au ata ua no teia atinga nei i roto i tona manako, mei teaa ra te maata atu te akono anga te au tavini o te Atua i teia tuatau nei i te akarongo i te oko tei orongaia maira no to ratou ora!​—Roma 5:8; Ebera 10:1.

12. Eaa te aite anga o te rave ara, e i akapeea to Davida manako ngakau no tana raveanga tarevake?

¹² I te pati akatenga anga i te Atua, kua taiku kapiti atura a Davida: “E orei takiri mai koe iaku i toku nei kino; e tamā mai iaku i taku nei ara. Te aaki nei oki au i taku nei ara, e te vai ua nei rai toku kino i mua iaku.” (Salamo 51:2, 3) Ko te rave ara e aere ke anga ia i te akairo no runga i ta Iehova ra au turanga. Kua rave rai a Davida i te reira. Inara, kare aia i aite ki tetai tangata ta tangata ra me kare rave akaturi tei kore ua ra e manako no tana apa i rave, kua taitaia ua ra i te akautunga nona me kare penei ka tu aia i tetai maki piri. Ei tangata inangaro ia Iehova, kua rikarika a Davida i te kino. (Salamo 97:10) E rikarika tona i tana uaorai ara i rave e kua anoano aia kia tama takiri te Atua i te reira i runga iaia. Kua kite papu a Davida i tana apa i rave e kua oonu tona mii e i tuku aia i tona anoano apa ua kia mana ki rungao iaia. Kua vai rai tana ara ki mua iaia ra, e ko tetai akava ngakau apa ra no te tangata mataku i te Atua kare ia e maru mai kia oti roa te tataraara, te aaki anga, e pera katoa te akakore anga ara na Iehova ra.

13. Eaa ra a Davida i tuatuaʼi e kua ara aia i te Atua anake ra?

¹³ I te akakite anga i tona pau anga kia Iehova ra, kua tuatua a Davida e: “I mua i to aroaro, toou anake ra, i ara ai au nei, e i mua i to mata i rave ei au i teianei kino; kia tika taau me tuatua koe, kia apa kore taau me akava koe.” (Salamo 51:4) Kua aatiia e Davida ta te Atua ra au ture, kua akangateitei koreia te taoonga ariki ra, e “kua akono tikai i te akangateitei kore ia Iehova ra,” ma te tuku anga Iaia kia akakinoia. (2 Samuela 12:14, NW; Exodo 20:13, 14, 17) E apa katoa oki ta Davida au ara i rave ra ki te totaiete Iseraela e te au mema o tona ngutuare oki, mei tetai kua papetitoia ra me rave i te tarevake i teia tuatau nei ka akatupu katoa oki i te mii e te taitaia ki roto i te putuputuanga Kerititiano e ki roto oki i te aronga akaperepereia ra. Noatu rai e kua kite te ariki tataraara ra i tana ara ki te au oa tangata mei ia Uria ra, kua kite aia e e teitei atu tana apainga kia Iehova ra. (Akaaiteia atu kia Genese 39:7-9.) Kua akatika a Davida e e tuatua tika ta Iehova ra akavaanga. (Roma 3:4) Ka tau katoa te au Kerititiano tei rave i te ara kia tamanako katoa oki kia aite ki te reira.

Au Turanga Kare i Akara Anga Kino Roa

14. Eaa te au turanga ta Davida ra i taiku mai ei akamama anga i tana apa ra?

¹⁴ Noatu rai e kare a Davida i tamata i te akatika iaia uaorai, kua tuatua aia: “I na, i anau mai au ma te ara! e i toia au e taku metua vaine ma te kino.” (Salamo 51:5) I anauia mai a Davida ma te ara, e kua kite tona metua vaine i te mamae anau anga no te akatuangaia i te ara. (Genese 3:16; Roma 5:12) Kare te aite anga o tana au tuatua e e kino te pirianga tau no te akaipoipo anga, te toanga, e te anau anga ma te mamae, i te mea e na te Atua i akapapa mai te akaipoipo anga e te anau anga tamariki oki; e kare katoa oki a Davida i taiku ana no tetai ua atu ara tikai a tona metua vaine ra. I toia mai aia ma te ara no te mea kua tu tona nga metua i te ara mei etai katoa au tangata apa ua ra.​—Iobu 14:4.

15. Noatu rai e penei ka manako te Atua i te au turanga akamama anga i ta tatou apa, eaa ta tatou kare e tau kia rave?

¹⁵ Me kua rave tatou i te ara, ka rauka ia tatou i te taiku na roto i te pure ki te Atua ra etai ua atu turanga kia kore e akara anga kino roa penei na te reira i turu i ta tatou raveanga tarevake. Inara auraka tatou e akariro i te aroa ua o te Atua ra ei kotoe anga no te tu akono viivii me kare kia akariro i te ara akatuangaia maira ei auai no te pipini anga ki muri ra kia kore te apainga no ta tatou ara. (Iuda 3, 4) Kua ariki a Davida i tana apainga no te akonoanga i te au manako viivii e te tuku ua anga ki te timata anga ra. E pure tatou kia kore tatou e akarukeia ki te timata anga e ka rave ei kia tau ma te reira pure anga.​—Mataio 6:13.

Pati Akatenga no te Tamaanga

16. Eaa te tu ta te Atua e mareka ra, e akapeea ta te reira ka tau kia akatupu ki to tatou tu akono ra?

¹⁶ Penei ka akara anga meitaki ua etai au tangata akamori i te Atua ra, inara te akara ra aia ki raro ake i to runga ua e kua kite eaa to ratou tu i roto ra. Kua tuatua maira a Davida: “I na, ko te tuatua-mou no roto ra taau [e Iehova] e inangaro! e akakite mai koe iaku i te pakari i te ngai ngaro ra.” (Salamo 51:6) Kua apa a Davida no te tu pikikaa e te kikite i te akapapaanga i te mate no Uria e te tauta anga kia uuna i te au tika no to Bate-seba nui anga ra. Inara, kua kite aia e te mareka ra te Atua i te tika e te tapu. Ka tau kia akatupu te reira i te tu akono meitaki ia tatou, no te mea ka akaapa a Iehova ia tatou me e tu akavare ua to tatou. (Maseli 3:32) Kua kite katoa oki a Davida e me ‘ka akakite te Atua iaia i te pakari,’ ei tetai ariki tataraara, ka rauka iaia i te akono i te au turanga tau i te atua ra no te toenga o tona oraanga.

17. Eaa te tumu maata no te pureanga kia tamaia e te isopa ra?

¹⁷ No te kite anga te tata taramo ra i tona anoano i te tauturu no ko mai i te Atua ra i te akakore anga i te au tu rave ara, kua pati katoa aia e: “E tamā mai koe iaku i te isopa, ei reira au e mā ai; e orei koe iaku, e maataʼi toku teatea i to te kiona.” (Salamo 51:7) I roto i etai atu au apinga, ko te rakau rikiriki isopa tei akonoia i te oroa tama anga no te aronga i makiia ana i mua ana i te maki repera. (Levitiku 14:2-7) E no reira e mea tau no Davida kia pure e kia tamaia aia i tana ara ki te isopa. Te kapiti katoaia ra te manako no te tu ma i tana pati anga kia orei a Iehova iaia kia riro kia ma takiri aia, kia teatea atu i to te kiona kare ra i kapitiia atu tetai pueu reu me kare etai atu tu repo. (Isaia 1:18) Me te mamae nei etai o tatou i te mamae anga akava ngakau no tetai raveanga tarevake, e akamaroiroi tatou i te akarongo e me ka kimi tatou i te akakore anga ara a te Atua na te tataraara, ka rauka iaia i te tiama e te tama takiri ia tatou na runga i te tumu anga o te atinga oko o Iesu ra.

Pati Anga no te Akaora Anga

18. Eaa to Davida tu i mua ake i te tataraara anga e te aaki anga i tana ara, e akapeea te kite anga i te reira te tauturu anga ia tatou i teia tuatau nei?

¹⁸ Ko tetai ua atu Kerititiano tei mamae ana i te akava ngakau apa ka kite ratou i te aite anga o ta Davida au tuatua: “E akakite mai koe [e Iehova] kiaku i te navenave e te rekareka, kia mareka te au ivi i aatiia e koe ra.” (Salamo 51:8) I mua ake i to Davida tataraara anga e te aaki anga i tana au ara, kua akariro tona akava ngakau taitaia iaia kia maromaroa. Kare aia i kite i te navenave e te rekareka tei orongaia e te au imene akamareka maira tei orongaia mai e te aronga imene meitaki e te aronga akatangi imene karape ra. No te maata i to Davida mamae anga i te ara i kore ei te Atua e mareka iaia ra kua aite aia ki tetai tangata tei aati mamaeia ra tona au ivi. Kua umuumu aia i te akakore anga ara, te akaora anga i te pae vaerua, e te akaora mai anga i te rekareka tana i kite i mua ana. Te anoano katoaia ra te akakore anga ara a Iehova e tetai tei rave i te tarevake i teia tuatau nei kia rauka akaou te rekareka tana i matau ana i mua ake i tona raveanga i tetai apinga i akakinoiaʼi tona pirianga ma te Atua ra. Na te akaora anga i te “rekareka a te vaerua tapu” ki tetai tangata tei tataraara e akakite e kua akakore a Iehova i tana ara e te aroa maira iaia. (1 Tesalonia 1:6) Mei teaa ra te akapumaana ta te reira ka apai mai!

19. Ka akapeea i reira to Davida manako ngakau me ka takore takiriia e te Atua tana au kino ravarai?

¹⁹ Kua pure katoa a Davida: “E uuna ke atu koe i to mata i taku nei au ara, e taparapara i toku nei au kino ravarai.” (Salamo 51:9) Kare e tau kia manakonakoia a Iehova kia akara mareka mai i te ara. E no reira, kua patiia aia kia uuna i tona mata i ta Davida au ara. Kua pati katoa oki te ariki ra kia taparapara atu te Atua i tona au kino ravarai, kia takore atu i tona au tu tuatua tika kore ravarai. Me ka rave anake a Iehova i te reira! Ka taakiia to Davida vaerua ki runga, ka takoreia te apainga no te akava ngakau taitaia, e ka kite taua ariki kua tataraara ra e kua akakoreia tana ara e tona Atua aroa ra.

Ka Peea me Kua Rave Koe i te Ara?

20. Eaa te akamaroiroiia maira no tetai ua atu Kerititiano tei rave ra i te ara kino?

²⁰ Te akakite maira te Salamo 51 e ko tetai ua atu tavini akatapuia o Iehova tei rave ra i te ara kino mari ra kua tataraara ka rauka iaia te pati anga papu kiaia kia akakite mai i te akaperepere anga kia ratou e kia tama ia ratou i ta ratou ara. Me ko koe tetai e Kerititiano tei apa na roto i te reira mataara, eaa koe ka kore ei e kimi i te akakore anga ara a to tatou Metua i te rangi ra na roto i te pure taakaaka? E akakite i toou anoano i ta te Atua tauturu kia marekaiaʼi to turanga ki mua iaia, e ka pati atu kia akaora mai aia i toou rekareka mua ra. Ka rauka i te au Kerititiano tataraara i te aere atu kia Iehova ma te pure irinaki anga e te reira pati anga, no te mea “te maata ra oki iaia te akakore i te ara.” (Isaia 55:7; Salamo 103:10-14) Pera katoa oki, ka tau kia tiki i te aronga pakari kia rauka ia ratou te oronga mai i te tauturu anga i te pae vaerua te anoanoia ra.​—Iakobo 5:13-15.

21. Eaa ta tatou ka akara matatio i muri akenei?

²¹ Te akaora ra to Iehova aroa i tona au tangata kia kore e ngaro te manakonako anga. Inara ka akara matatio tatou i etai atu au pati anga no te ngakau tataraara ra o Davida ia Salamo 51. Ka akaari mai ta tatou apii anga e kare a Iehova e akavaavaa i te ngakau paruparu.

Akapeea Koe me Pau?

◻ Eaa te akatupu anga a te ara kino ki rungao i tetai o te au tavini o Iehova ra?

◻ Eaa tei tupu kia Davida i tona tamata anga i te uuna i tana ara?

◻ Eaa ra a Davida i tuatuaʼi e kua ara aia i te Atua anake ra?

◻ Noatu rai e ka akamanako te Atua i te au turanga akamama mai i ta tatou ara, eaa ta tatou kare e tau kia rave?

◻ Eaa ta te Kerititiano ka tau kia rave me kua rave aia i te ara akamamae ngakau ra?