Kare a Iehova e Akavaavaa i te Ngakau Paruparu
“Ko ta te Atua atinga ra, ko te ngakau paruparu ïa; ko te ngakau paruparu, e te aue ra, kare ua te Atua e akavaavaa i te reira.”—SALAMO 51:17.
1. Eaa to Iehova manako i te aronga akamori iaia tei rave ra i te ara kino mari ra kua tataraara?
KA RAUKA ia Iehova ‘te tapoki iaia uaorai ki te tumurangi, kia kore te pure e tae atu ki roto ra.’ (Te Aue o Ieremia 3:44) Inara te anoano ra aia i tona au tangata kia tae atu kiaia. E noatu me kua apa kino roa tetai o tona aronga akamori iaia ra mari ra te tataraara ra, te maaraara ra to tatou Metua i te rangi i te au meitaki ta te reira tangata i rave ana. E no reira kua rauka i te apotetoro ko Paulo i te tuatua atu ki te aronga Kerititiano: “Kare te Atua i te Atua tuatua-tika kore, ka akangaro atu ei aia i ta kotou angaanga i rave, e to kotou anoano, i tona ingoa i akakite puia e kotou na.”—Ebera 6:10.
2, 3. Eaa te mea tau na te aronga pakari Kerititiano kia akamanako i te akono anga i to ratou au taeake akarongo tei apa ra?
2 Ka tau katoa oki te aronga pakari Kerititiano kia akamanako i te au mataiti roa i raveiaʼi te angaanga tiratiratu ki te Atua e te au taeake akarongo ra. Te kapiti katoa ra teia i te angaanga tapu i te tuanga a te aronga tataraara tei rave ra i te takainga tarevake me kare kua rave i te ara kino roa. Ka kimi te au tiaki mamoe Kerititiano i te meitaki no te pae vaerua no te aronga katoatoa o te anana a te Atua ra.—Galatia 6:1, 2.
3 Te umuumuia ra to Iehova aroa e tetai tei rave ra i te ara e kua tataraara ia. Inara, e maata atu te umuumuia ra. Te akataka meitakiia maira te reira e te au tuatua a Davida ia Salamo 51:10-19.
E Ngakau Ma te Anoanoia Ra
4. Eaa ra a Davida i pure ei no tetai ngakau e ma tetai vaerua ou?
4 Me te kino ra te tu i te pae vaerua o tetai Kerititiano akatapuia no te ara, penei eaa te anoanoia nona i te pae atu i te aroa no Iehova e te akakore anga ara katoa oki? Kua pati a Davida: “E anga ana koe i te ngakau mā i roto iaku nei, e taku Atua, e akaou ana oki koe i te vaerua tika tikai i roto iaku nei.” (Salamo 51:10) Penei, kua pati a Davida i teia patianga no te mea kua kite aia e ko te tu matauia no te rave kino tikai te vaira i roto i tona ngakau. Penei kare tatou i o ana ki roto i te au tu ara tei ereereia ra a Davida i te kapitianga ma Bate-seba e Uria, inara te umuumu ra tatou i te tauturu a Iehova kia kopae ke i te tuku ua anga ki te timataanga kia rave i etai ua atu tu akono i te ara kino ra. No te reira tu, penei ka umuumu tatou tataki tai i te tauturu no ko mai i te Atua ra ei takore atu mei to tatou ngakau i te au tu ara mei te morimori apinga e te makitakita—te au rave anga kikino te keia e te ta ua.—Kolosa 3:5, 6; 1 Ioane 3:15.
5. (a) Eaa te aite anga e kia rauka mai tetai ngakau ma? (e) Eaa ta Davida i anoano ra i tona pati anga no tetai vaerua ou?
5 Te anoano ra a Iehova kia rauka i tona au tavini “te ngakau mā,” koia oki, kia ma te akakeu anga me kare te akakoroanga. I te kite anga e kare aia i akaari i taua tu ma ra, kua pure a Davida kia tama te Atua i tona ngakau e kia rave mai i te reira kia rotai ki te au turanga tau i te Atua ra. Kua anoano katoa oki te tata taramo i tetai vaerua ou tika tikai, me kare manako anga tau. Kua anoano tikai aia i tetai vaerua te ka tauturu iaia kia kopae ke atu i te timata anga e kia mou ngaueue kore i te au ture e te au kaveinga a Iehova ra.
E Puapinga Maata te Vaerua Tapu
6. Eaa a Davida i pati ei kia kore a Iehova e rave ke atu i te vaerua tapu iaia ra?
6 Me ngaro te manakonako anga no te mea kua tarevake tatou me kare no te rave kino, penei ka manako ngakau tatou e te vaitata ra te Atua i te uri ke atu ia tatou ki te pae e ka akakore mai i tona vaerua tapu ia tatou, me kare tona mana angaanga. Mei te reira rai to Davida manako, no te mea kua pati aia ia Iehova: “Auraka koe e tuaru iaku i mua i to aroaro nei, auraka oki e rave ke atu i to Vaerua Tapu iaku nei.” (Salamo 51:11) Kua manako a Davida iaia e mii ra e te taakaaka e kua akariro tana au ara iaia kia tau kore no te tavini atu ia Iehova ra. Ko te tuaruia mei mua i te aroaro o te Atua ka riro te aite anga e kua kore tana akaperepere anga, te akapumaana, e te akameitakianga. Me ka akaoraia mai a Davida i te pae vaerua, ka anoano katoa aia i to Iehova ra vaerua tapu. Kia noo mai te reira ki runga iaia, ka rauka i te ariki ra i te kimi i te arataki anga na roto i te pure kia mareka mai a Iehova, kia rauka oki te kopae ke i te ara, e kia rauka iaia i te tutara ma te pakari. I te matakite anga i tana au ara i Tei Oronga mai i te vaerua tapu ra, kua tau ta Davida ra pati anga e auraka a Iehova e rave ke atu i te reira iaia.
7. Eaa i tau ei kia pure tatou no te vaerua tapu e te matakite ra kia kore e akariri atu i te reira?
7 Akapeea ra tatou? Ka tau tatou kia pure no te vaerua tapu e te matakite ra kia kore e akariri atu i te reira na te kore e aru i tana aratakianga. (Luka 11:13; Ephesia 4:30) Penei, ka ngaro ia tatou te vaerua e kare e rauka ia tatou te akaari i te ua o te reira ta te Atua i o maira koia te inangaro, te rekareka, te au, te akakoromaki, te takinga meitaki, te meitaki, te pikikaa kore, te maru, e te akono meitaki. Ka rave ke atu te Atua ko Iehova i tona vaerua tapu ia tatou me ka rave ua atu tatou i te ara kiaia ma te kore e tataraara.
Rekareka o te Ora
8. Me ka rave tatou i te ara mari ra te anoano ra kia rauka te rekareka anga i te ora, eaa ta tatou ka rave?
8 Ko tetai tangata rave ara tei tataraara e kua kite i te akaora anga i te pae vaerua ka rauka akaou iaia te rekareka i ta Iehova ra apinga no te ora. I te umuumuanga i te reira, kua pati a Davida i te Atua: “E akaoki mai kiaku i te rekareka o te ora naau ra; e kia tauturuia mai au e te ngakau oronga ra.” (Salamo 51:12) Mei teaa ra te mareka anga i te rekareka i te manakonako anga papu no te ora na te Atua ra ko Iehova! (Salamo 3:8) I muri ake i tana ara anga ki te Atua ra, kua tamata a Davida i tetai akaora anga i te rekareka Nana ra. I te tuatau i muri roa mai, kua oronga maira a Iehova i te ora na te atinga oko o tana Tamaiti, koia a Iesu Karaiti ra. Me ka rave tatou te au tavini akatapuia o te Atua ra i te ara kino mari ra ka anoano kia rauka akaou mai te rekareka o te ora ia tatou, e mea tau no tatou kia akono i te tu akono tataraara e auraka roa e rave i ta tatou ara kia tae roa ki te ara anga i te vaerua tapu.—Mataio 12:31, 32; Ebera 6:4-6.
9. Eaa ta Davida i pati ra i tana pati anga i te Atua kia tauturuia mai aia “e te ngakau oronga ra”?
9 Kua pati a Davida ia Iehova kia tauturuia mai aia “e te ngakau oronga ra.” I te akara anga, kare teia i te taiku anga i ta te Atua ra oronga anga i te tauturu me kare i tona vaerua tapu ra, mari ra ki to Davida uaorai manako akakeu iaia ra. Kua anoano a Davida kia tauturu te Atua iaia na te oronga atu anga kiaia i te ngakau oronga ra kia rave i te tika e kia kore aia e topa akaou ki roto i te ara. Te tauturu ua ra te Atua ko Iehova i tona au tavini e te akatu akera ki runga i te aronga tei topa ki raro no etai au timataanga. (Salamo 145:14) E akapumaana anga tikai kia kite i te reira, e maata atu oki me kua apa tatou e te mamae ra te ngakau e kua inangaro kia tavini tiratiratu atu ia Iehova e tuatau ua atu!
E Apii i te Aronga Rave Ara i Teaa?
10, 11. (a) Eaa ta Davida ka rauka i te apii atu i to Iseraela tei rave ara ra? (e) Ka rauka ia Davida i te apii i te aronga rave ara i muri anake i tana uaorai rave anga i teaa?
10 Me ka akatika te Atua, kua anoano tikai a Davida kia rave i tetai apinga te ka akaari i tona ariki anga i to Iehova ra aroa e ka tauturu atu oki ia etai ke ra. Ma te au manako pure anga tei tukuia kia Iehova, kua akakite maira taua ariki tataraara ra: “Ei reira au e akakite ei ki te aronga tatipake i toou au arataa, e e akaariuia mai te rave ara ra kia koe.” (Salamo 51:13) Akapeea a Davida te rave ara ra me apii i te aronga tatipake i te Ture a te Atua ra? Eaa tana ka tuatua kia ratou? E eaa te meitaki te ka rauka i te reira?
11 I te akakite anga ki to Iseraela rave ara ra i to Iehova arataa i te manakonako anga kia akaariu mai ia ratou mei te arataa o te kino, kua rauka ia Davida i te tou atu i te kino tikai o te ara, e eaa te au aite anga o te tataraara, e akapeea e raukai to te Atua ra aroa. I te mea kua kite aia i te mamae no te kore ta te Atua akaperepere e te akava ngakau apa oki, kua riro a Davida ei puapii aroa no te tataraara, te aronga rave ara te aue ra te ngakau. Inara, ka rauka anake iaia i te apii atu ia etai ke ra i muri ake i tona uaorai ariki anga i ta Iehova ra au apiianga e te rauka anga Tana akakore anga ara, ko te aronga kare e kauraro i te au akauenga a te Atua ra kare o ratou tika ‘kia tuatua i ta te Atua ra au akonoanga.’—Salamo 50:16, 17.
12. Akapeea a Davida i puapingaiaʼi i te kite anga e kua akaora te Atua iaia mei te ara i te toto ra?
12 I te akakite akaou anga i tona manako na roto i tetai atu tu, kua tuatua a Davida: “Kia ora au ia koe i te ara toto ra, e te Atua e, te Atua e oraʼi au nei; e na toku vaa e imene nui i taau ra tuatua-tika.” (Salamo 51:14) Kua apai mai te ara toto i te akaapa anga no te mate. (Genese 9:5, 6) E no reira na te kite e na te Atua tona ora i akaora mai iaia i te ara toto o Uria ra kua akatupu i te au i te ngakau e te manako o Davida. Kua rauka i tona vaa i te imene rekareka i to te Atua ra tuatua tika, kare ra i tona uaorai. (Koheleta 7:20; Roma 3:10) Kare ra e rauka ia Davida i te akakore atu i tana akaturi anga me kare i te akaoki mai ia Uria mei te tanumanga ra, mei te tangata katoa oki o teia tuatau nei kare e rauka iaia i te akaoki akaou mai i te tu ma o tetai nana ra i akavare me kare i te akatuakaou i tetai nana ra i ta. Kare ainei tatou e tau kia tamanako i te reira me ka timataia mai tatou? Mei teaa katoa oki te tau no tatou kia ariki i to Iehova ra aroa i akaariia mai kia tatou i te tuatua tika! Ko te tika, ka tau te ariki anga kia akakeu ia tatou i te arataki ia etai ke ra ki teia Puna Tumu no te tuatua tika e te akakore anga ara.
13. I raro anake i teea au turanga e raukai i tetai tei rave ra i te ara te akatuera anga tika i tona vaa kia akapaapaa ia Iehova ra?
13 Kare e tangata ara te ka rauka iaia i te akatuera anga i tona vaa kia akapaapaa ia Iehova me kare na te Atua e akatuera aroa mai i te reira, kia tuatua i Tana au tuatua mou ra. E no reira kua imene a Davida: ‘E vevete ana koe, e te Atu e Iehova, i toku vaa, e na toku vaa e akapaapaa ia koe.’ (Salamo 51:15) I te meitaki anga tona akava ngakau no te akakore anga te Atua i tana ara, kua akakeuia a Davida kia apii i te aronga rave ara i te au mataara o Iehova, e kua rauka ua iaia i te akapaapaa Iaia. Pouroa te aronga kua akakoreia ta ratou ara mei ia Davida rai ka tau katoa kia ariki i to Iehova aroa ua ia ratou ra, e ka tika oki ratou kia rave i te au tuatau atea kia akakitekite i te tuatua mou a te Atua e ‘kia akapaapaa te vaa iaia ra.’—Salamo 43:3.
Au Atinga Arikiia e te Atua
14. (a) Eaa te au atinga tei umuumuia ra kia tau ei ki ta te Ture koreromotu? (e) Eaa i tarevake ei kia manako e ka rauka ia tatou i te rave ua atu i te tarevake ra me ka monoia te reira i te au ravenga meitaki?
14 Kua rauka ia Davida te kite oonu tei akakeu ra iaia kia tuatua: “Kare oki te atinga taau [e Iehova] i anoano, naringa ko te reira, kua orongaia ïa e au; kare oki koe e taurekareka i te atinga karakaratio.” (Salamo 51:16) Te akauenga o te Ture koreromotu kia orongaia te au atinga manu ki te Atua. Inara ko ta Davida au ara akaturi e te ta tangata, tei tau ra kia akautungaia i te mate, kare e rauka kia tapokiia e taua au atinga ra. Naringa i tau ia, kare aia e tapupu i te oronga anga i te au atinga manu kia Iehova. Me kare ra e tataraara no te ngakau mai, e puapinga kore ua te au atinga. E no reira e tarevake kia manakoia e ka rauka ia tatou te rave ua atu i te tarevake me ka monoia te reira ki etai au raveanga apinga meitaki ra.
15. Eaa te tu akono o tetai tangata akatapuia ra me e ngakau paruparu?
15 Kua tuatua katoa a Davida: “Ko ta te Atua atinga ra, ko te ngakau paruparu ïa, ko te ngakau paruparu, e te aue ra, kare ua te Atua e akavaavaa i te reira.” (Salamo 51:17) I te tuanga no tetai tangata ara tei tataraara, ko te mea arikiia “ko ta te Atua atinga ra, ko te ngakau paruparu ïa.” Ko te reira tangata kare ona tu akono no te maro anga. Ko te ngakau o te tangata akatapuia e e ngakau paruparu tona e te aue oonu ra no tana ara, ka taakaaka aia no te kiteanga i to te Atua ra mareka kore, e ka puareinga roa aia i te rave i tetai ua atu apinga kia rauka akaou mai ei ta te Atua ra akaperepere anga. Kare e apinga puapinga te ka rauka ia tatou te oronga ki te Atua kia oti roa ia tatou te tatara anga i ta tatou ara e ka oronga atu kiaia i to tatou ngakau na roto i te akamori anga iaia anake ua ra.—Nahuma 1:2.
16. Eaa ta te Atua ra akara anga ki rungao i tetai tangata tei mamae ra tona ngakau no tana ara i rave?
16 Kare te Atua e kopae ke i tetai atinga mei te ngakau paruparu, e te aue ra. Noatu rai eaa tetai ua atu tu ngata te ka rokoia kia tatou ei au tangata nona ra, e no reira, eiaa tatou e tukuia ki te manakonako anga kore. Me kua turoriia tatou i runga i te arataa o te oraanga na roto i tetai tu te ka akariro i to tatou ngakau kia kapiki no te aroa o te atua ra, kare ra i kore ake te manakonako anga i reira. Noatu rai me kua ara kino roa tatou mari ra kua tataraara, kare roa a Iehova e kopae ke i te ngakau paruparu. Ka akakore mai aia i ta tatou ara na te tumu anga ki runga i te atinga oko o Karaiti e ka akaoki mai aia ia tatou ki Tana akaperepere anga. (Isaia 57:15; Ebera 4:16; 1 Ioane 2:1) Inara mei ia Davida rai, ka tau ta tatou pure anga no te akaora anga i ta te atua akaperepere anga e kare e kia kore e akoia me kare e akatikatikaia. Kua akakore te Atua i ta Davida ara, inara kua papa katoa oki iaia.—2 Samuela 12:11-14.
Manako no te Akamori Ma
17. I te pae atu i te patianga i ta te Atua ra akakore anga ara, eaa ta te aronga ara ka tau kia rave?
17 Me kua rave tatou i tetai ara kino, kare e ekoko anga e ka riro te reira ei akateiaa i to tatou manako, e na te ngakau mii e akakeu ia tatou kia pati no ta te Atua ra akakore anga ara. Inara, e pure katoa oki tatou no etai ke ra. Noatu e kua akara mua atu a Davida ki te akamori ariki akaouia mai ki te Atua ra, kare tana taramo i akaruke noinoi ua ia etai ke ra ki vao i tana au patianga. Kua kapiti katoa i teia pati anga ia Iehova: “Ei takinga-meitaki toou ia Ziona, i te aroa noou ra; e patu oki koe i te au patu i Ierusalema nei.”—Salamo 51:18.
18. Eaa a Davida tei tataraara ra i pure ei no Ziona?
18 Ae, kua akara mua atu a Davida ki tona akaora akaouia mai anga ki ta te atua ra akaperepere anga. Inara, no te tu taakaaka katoa oki o ta te tata taramo pure e ‘i to te Atua ra takinga meitaki kua akono meitaki mai aia ia Ziona’ koia te oire maata o Iseraela, ko Ierusalema ra, te ngai ta Davida i manakonako ra kia patu i te iero o te Atua. Kua akakoko ta Davida ra au ara kikino i te iti tangata katoa ra, no te mea ka rauka kia akamamaeia te au tangata katoa ra no te raveanga tarevake a te ariki ra. (Akaaiteia atu kia 2 Samuela, pene 24.) Ko te tika, kua akaparuparuia e tona au ara “te au patu i Ierusalema,” ra e kua anoanoia kia patu akaouia i reira.
19. Me kua rave tatou i te ara e kua akakoreia taua ara ra, eaa te mea tau no te pure i reira?
19 Me kua rave tatou i te ara akamamae ngakau e kua rauka mai ta te Atua ra akakore anga ara, e mea tau kia pure kiaia kia akaora mai i te ngai i kino no ta tatou tu akono i rave ra. Penei kua apaiia mai e tatou te akakino anga i tona ingoa tapu, penei kua akaparuparu mai i te putuputuanga, e penei kua apai mai i te mii ki to tatou ngutuare tangata. Ka rauka ua i to tatou Metua i te rangi ra i te takore atu i tetai ua atu akakino anga tei apaiia mai ki runga i tona ingoa, ka rauka iaia i te akamaroiroi i te putuputuanga na roto i tona vaerua tapu, e ka rauka katoa oki iaia i te akapumaana i te au ngakau o ta tatou aronga akaperepere ra tei inangaro e tei tavini atu iaia. Inara, noatu me e ara tei raveia e me kare, ko te manako tau no tatou ko te akatapu anga i to Iehova ra ingoa e te meitaki no tona au tangata oki kia akono tamouia.—Mataio 6:9.
20. I raro ake i teea au turanga e marekaʼi a Iehova i te au atinga e te au oronga anga a to Iseraela ra?
20 Me patu akaou a Iehova i te au patu o Ziona ra, eaa atu tetai apinga te ka tupu? Kua imene a Davida: “Ei reira koe [e Iehova] e marekaʼi i te atinga tuatua-tika, e te atinga karakaratio katoatoa ra: ei reira te au puakatoro e apaiiaʼi ki runga i taau ra atarau.” (Salamo 51:19) Kua anoano tikai a Davida kia rekareka aia e te iti tangata katoa oki i te akaperepere anga a Iehova kia raukai ia ratou i te akamori arikiia mai e Ia ra. Ei reira te Atua ka marekai i ta ratou au atinga karakaratio katoatoa ra. Ka tupu teia no te mea e au atinga tuatua tika anake teia tei orongaia e te au tangata akatapuia, ngakau tae, e kua tataraara te rekareka ra i ta te Atua akaperepere anga. No te ngakau akameitaki no to Iehova ra aroa, ka oronga ratou i ta ratou au puakatoro ki runga i tana atarau—ko te au atinga memeitaki anake ra e te oko maata oki. I teia tuatau nei, te akangateitei nei tatou ia Iehova na te apai anga i ta tatou au mea memeitaki roa kiaia ra. E te kapiti katoa ra ta tatou au oronga anga i “te au toa puakatoro ou o to tatou vaa ra,” e au atinga akapaapaa anga i to tatou Atua aroa ia Iehova.—Hosea 14:2, NW; Ebera 13:15.
Te Akarongo Ra a Iehova i ta Tatou Aue
21, 22. Eaa te au apiianga te vaira ia Salamo 51 ei puapinga no tatou nei?
21 Te akaariia maira kia tatou ta Davida pure no tona ngakau tei tataia ia Salamo 51 e ka tau tatou kia manako tikai i ta tatou ara ma te vaerua tataraara. Te vai katoa ra i teia taramo te au apiianga tau ei puapinga no tatou. Ei akatauanga, me ka ara tatou mari ra te tataraara ra, ka rauka ia tatou te irinaki i to te Atua ra aroa. Inara, kia manako katoa tatou na mua i tetai ua atu akakino anga penei kua apaiia mai e tatou ki runga i to Iehova ra ingoa. (Nga irava 1-4) Mei ia Davida rai, ka rauka ia tatou i te pati ki to tatou Metua i te rangi ra no te aroa tei akatumuia ki runga i to tatou akatuanga angaia i te ara. (Irava 5) Ka tau tatou kia akakite i te tika, e mea tau katoa oki no tatou kia kimi i te pakari no te Atua mai. (Irava 6) Me kua rave tatou i te ara, e mea tika kia pati tatou ia Iehova i tana tamaanga, i te ngakau ma, e te vaerua tika tikai.—Nga irava 7-10.
22 Ka kite katoa oki tatou ia Salamo 51 e auraka rava tatou e tuku ia tatou uaorai kia akaketaketaia ki roto i te ara. Me ka pera tatou, ka akakore atu a Iehova i tona vaerua tapu ia tatou, me kare i tona mana ririnui. Inara, ma to te Atua ra vaerua tapu i runga ia tatou, ka rauka kia puapingaia ta tatou apiianga ia etai ke ra i tona au arataa. (Nga irava 11-13) Me kua tarevake tatou inara kua tataraara, ka akatika i reira a Iehova ia tatou kia tamou ua atu i te akapaapaaanga iaia no te mea kare rava aia e akavaavaa i te ngakau paruparu e te aue ra. (Nga irava 14-17) Te akakite katoa maira teia taramo e kare e tau ta tatou au pure kia raveia no tatou anake ua. Mari ra, ka tau tatou kia pure no te akameitakianga e te meitaki i te pae vaerua no te aronga katoatoa te rave ra i te akamori anga ma ia Iehova.—Nga irava 18, 19.
23. Eaa i tau ei kia akakeuia tatou e te Salamo 51 kia maroiroi e kia manako papu oki?
23 E mea tau kia akakeu teia taramo akatuki ngakau na Davida kia akamaroiroi mai ia tatou e kia akamou i te manako. Te tauturu maira ia tatou kia kite e auraka tatou e manako e kua ngaro te manakonako anga noatu rai e me ka turori atu tatou ki roto i te ara. No teaa ra? No te mea e ngakau tataraara to tatou, ka rauka i te aroa o Iehova i te akaora mai ia tatou mei roto i te tu manakonako kore. Me e ngakau mii to tatou e te akamori tika ra i to tatou Metua aroa i te rangi, te akarongo maira aia i ta tatou aue no te aroa. E mei teaa ra te pumaana i te kite anga e kare a Iehova e akavaavaa i te ngakau paruparu ra!
Akapeea Koe Me Pau?
◻ Eaa te au Kerititiano i umuumu ei i te ngakau ma e te vaerua tapu o te Atua ra?
◻ Eaa ta tetai tangata tataraara te ka rauka kia apii atu i te aronga apa i ta Iehova ra ture?
◻ Eaa to Iehova manako i te ngakau paruparu e te aue ra?
◻ Eaa te au apiianga te kitea ra ia Salamo 51?
[Tutu i te kapi 15]
Te pure ra ainei koe no te vaerua tapu e te matakite ra kia kore e akariri atu i te reira?
[Tutu i te kapi 17]
E akaari i te arikianga i to Iehova ra aroa ua na te akakitekiteanga i tana tuatua mou