Akapeea Koe e Puapingaia Ai
MEI te au metua e manako ra i ta ratou tamariki e te inangaro ra ia ratou kia puapingaia, te manako katoa maira to tatou Metua i te rangi ia tatou e te inangaro maira ia tatou kia puapingaia. Ei akakite mai i tona manako aroa, e maata ua atu tana au akakiteanga e oronga maira no runga i te turanga puapinga e te ngere i te puapinga. Mei tera te tu, i te tuatua anga no runga i te tangata tei akarongo i te tuatua a te Atua, te akakite tika ua maira te Pipiria i te tuatua e: “Ko tana katoa e rave ra, te meitaki ra ïa.”—Salamo 1:3.
Inara, me ko te tu te reira, eaa ra i kore ei i rauka i te manganui tetai oraanga puapinga, mataora, e te mareka ua? Na te akara vaitata anga i teia taramo e oronga mai i te pauanga kia tatou e te akaari mai kia tatou e akapeea katoa tatou e puapingaia ai.
“Ako a te Akono Kore i te Atua”
Te akamatakite maira te tata taramo no runga i te kino o te aaere anga i roto i “te ako a te akono kore i te Atua.” (Salamo 1:1) Te pu “kino” maata koia oki ko te Tiaporo ko Satani. (Mataio 6:13) Te akakite maira te au Tuatua Tapu e koia “te ariki o teianei ao” e te “vai ua nei rai to te ao ravarai i raro ake i taua vaerua kino ra.” (Ioane 16:11; 1 Ioane 5:19) No reira, kare i te mea poitirere e te akaata maira te manganui o te akoanga e rauka maira, i te aerenga manako o taua vaerua kino ra.
Eaa te tu o te ako ta te aronga kino e oronga maira? Te maataanga, te akavaavaa ra te aronga kino i te Atua. (Salamo 10:13) Ta ratou ako, tei kopae me kore tei akavaavaa i te Atua, tei te au ngai katoatoa. Te turuturu nei te taiate o teia tuatau i “te anoano tika kore o te kopapa nei, e te anoano tika kore o te mata nei, e te akatietie o te ora anga nei.” (1 Ioane 2:16) Te tuku putuputu ua maira te nuti i te manako anoano apinga materia “kia umuumu i te au mea katoatoa ka rauka ia tatou i te oraanga.” I te ao katoa, te pou nei i te au kamupani tere atu i te 500 pirioni tara (Marike) i te mataiti, ki runga i te akakitekiteanga ei tavarenga i te tangata kia oko i ta ratou au apinga—noatu me te anoano ra te aronga okooko i te reira me kare. E maata atu ta teia akakitekiteanga i akatupu, i to te taui ua i te tu e okooko ana te tangata. Kua akatarevake takiri te reira i te manako o teia ao no runga i te turanga puapinga.
Tei tupu mai, noatu kua rauka i te manganui tetai au apinga tei rauka ua mai na roto i te moemoea i te au mataiti akenei, te vai nei rai to ratou kaki pangia kore kia maata atu te apinga. Te manako anga e me kare koe e tu i teia au apinga nei, kare koe e mataora me kore e puapingaia. E pikikaa teia aerenga manako e “kare ïa i to ko mai i te Metua ra, no teianei ao anake ïa.”—1 Ioane 2:16.
Kua kite Tei Anga mai ia tatou e eaa te ka akapuapinga tikai ia tatou. E tuke rai tana ako mei ta “te ako a te akono kore i te Atua.” No reira, ko te timata kia rauka te akameitakianga a te Atua e te aere na te arataa o teia ao kia rauka te turanga puapinga, kua aite rai ki te aere anga na runga i e rua nga mataara tukeke i te taime okotai. Kare takiri e rauka. No reira te Pipiria i akamatakite mai ei e: “Auraka e aru i te au turanga o teia ao”!—Roma 12:2, Today’s English Version.
Auraka e Tuku na Teia Ao e Akaaere ia Koe
Te tauta nei te ao i raro i te akatereanga a Satani kia akara anga e te manako maira te reira ia tatou. Inara, ka anoanoia tatou kia matakite. E akamaara e kua rauka ia Satani i te akavare i te vaine mua ia Eva, kia rave i tona uaorai anoano tika kore. I reira kua taangaanga aia iaia kia akanauru ia Adamu kia ara. Teia tuatau, te taangaanga katoa nei a Satani i te tangata ei akatotoa i tana tuatua kino.
Ei akaraanga, ko David, tei taikuia mai i te atikara i mua ake, kua inangaroia aia kia akamaata atu i tona au ora ka angaanga e kia aere putuputu ki tetai au tere pitiniti. “Ka akaruke vave ua au i te popongi Monite e ka oki mai i te aiai Paraparau,” i akakite ei a David. I te mea kua marama ua ratou e ka anoanoia taua au akaatingaanga ra e rauka mai ei te turanga puapinga o teia ao, kua akamaroiroi roa atu te au taeake, te au mema o te pamiri, e te au oa angaanga ia David kia: “Rave i te reira no toou pamiri.” Kua karanga ratou e ka inangaroia aia kia rave i teia no etai nga mataiti ua e kia tinamou meitaki tikai aia. Kua akamarama mai a David e: “Kua manako ratou e e meitaki atu teia no toku pamiri no te mea e maata atu taku moni ka apai mai ki te kainga—ka meitaki roa atu i reira toku turanga puapinga. Noatu kare au i ko i toku pamiri, kua akapapu mai ra toku au taeake e e maata tikai taku e oronga ra na toku pamiri.” Mei ia David, e maata ua atu te angaanga pakari ra kia rauka te au mea ravarai e manako ra ratou e te anoanoia ra e to ratou au akaperepere. Inara ka taki atu ainei te aru anga i teia tu manako ki te turanga puapinga? Eaa tikai ta te pamiri e anoano ra?
Kua kite a David i te reira i tona aerenga ki tetai tere pitiniti. “Te tuatua ra au i runga i te terepaoni ki taku tamaine ko Angelica, tei karanga mai e: ‘Tati, eaa koe i kore ei e inangaro i te noo mai ki te kainga nei ia matou?’ E mea taitaia tikai,” i akakite ei a David. Kua riro te tuatua a tana tamaine ei akapakari atu i tona inangaro kia tuku i tana reta kia akamutu i te angaanga. Kua iki a David kia oronga i ta tona pamiri tikai e anoano ra—iaia.
Ka Akatupu te Akono i te Ako a te Atua i te Turanga Puapinga
Ka akapeea koe me patoi atu i te tuatua pikikaa e totoa ua nei i teia ao? Te akakite maira te tata taramo kia tatou e ko te tangata puapingaia e te mataora koia te tangata “tei inangaro ra i te ture a Iehova; e tei tana ture tona manako anga i te po e te ao.”—Salamo 1:2.
I te iki anga te Atua ia Iosua ei arataki no te iti tangata o Iseraela, kua akakiteia kiaia e: “Kia akamaara tikai ra koe i te reira [te Tuatua a te Atua] i te po e te ao.” Ae, e mea puapinga te tatau e te manakonako no runga i te Tuatua a te Atua, inara ka anoano katoaia a Iosua “kia rave i tei tata katoaia i roto ra.” E tika, e kare te tatau anga uaorai i te Pipiria e akariro ngoie ua ia koe kia puapingaia. Ka anoanoia koe kia taangaanga i taau e tatau ra. Kua akakiteia kia Iosua: “Ei reira e meitaki ei toou aerenga, e ei reira koe e manuia ai.”—Iosua 1:8.
E akamanako ana i tetai tamaiti mata katakata e noo ra ki runga i tetai metua akaperepere ia raua e tatau kapiti ra i tetai tua inangaro maataia. Noatu e ia taime i tatau ana raua i te reira, e mea rekareka roa na raua taua au atianga akaperepereia ra. Mei te reira katoa, te tangata akaperepere i te Atua ka riro te tatau anga Pipiria i te au ra ravarai ei mea mareka roaia—e tuatau tau tikai kia akapou aia ki tona Metua i te rangi. Na te aru anga i ta Iehova akoanga e te aratakianga, ka aite ia taua tangata ra “ki te rakau i tanumia ki te pae kauvai ra, ko tei ua i tona ra tuatau tikai, e ko tei kore roa i mae tona rau; ko tana katoa e rave ra, te meitaki ra ïa.”—Salamo 1:3.
Kare i te mea tupu poitirere ua mai te tumu rakau e akatakaia maira e te tata taramo. E mea tuku meitakiia te reira ki te pae vai tae marie e e mea akono meitakiia e te tangata tanutanu. Na roto katoa i taua mataara ra, to tatou Metua i te rangi i te akatanotano anga e te akatikatika anga i to tatou aerenga manako na roto i te ako ka kiteaia i roto i te au Tuatua Tapu. I te openga, kua tupu mai tatou e kua akaua mai i te au ua tei tau ki te tu akono Atua.
Inara, “kare mei te reira te akono kore i te Atua.” E tika, penei i te akaraanga te puapinga ra ratou no tetai taime, inara i te openga e tupuanga kino to ratou. Kare ratou ‘e mou i te akavaanga.’ Kareka, “te aerenga o te akono kore i te Atua ra, ko te mate ïa.”—Salamo 1:4-6.
No reira auraka e tuku na teia ao e akaaere i toou au akakoroanga e toou au tu puapinga. Noatu e e tangata kite koe e ka rauka tetai turanga puapinga i roto i teia ao, kia matakite e akapeea koe i te taangaanga anga i toou kite me kore akapeea koe i te tuku anga i teia ao kia taangaanga i te reira. Ka riro te au aruaruanga materia, puapinga kore ua i te akariro i tetai tangata kia “mae.” I tetai tua, ka akatupu te pirianga vaitata ki te Atua i te turanga puapinga mou e te mataora.
Akapeea Koe e Puapingaia Ai
Eaa ra te tumu e, me aru tetai tangata i te ako a te Atua, ka puapingaia te au mea ravarai tana ka rave? Kare te tata taramo e tuatua ra no runga i te turanga puapinga i roto i teia ao. E pirianga to te turanga puapinga o te tangata akono Atua ki te rave anga aia i te anoano o te Atua—e e puapinga ua ana rai to te Atua anoano. Ka akara ana tatou e akapeea te taangaanga anga i te au kaveinga a te Pipiria i te akariro anga ia koe kia puapingaia.
Pamiri: Te ako maira te au Tuatua Tapu i te au tane kia ‘aroa i ta ratou uaorai au vaine e tikaʼi, mei to ratou uaorai kopapa,’ e te akakiteia maira ki te vaine Kerititiano kia “kauraro, aia i tana tane.” (Ephesia 5:28, 33) Te akamaroiroiia maira te au metua kia akapou i te taime ki ta ratou tamariki, te kata kapiti anga e ratou, e te apii ia ratou no runga i te au mea puapinga i roto i te oraanga. (Deuteronomi 6:6, 7; Koheleta 3:4) Te ako katoa maira te Tuatua a te Atua i te au metua e: “Auraka e akariri atu i ta kotou au tamariki.” Me taangaangaia teia ako, ka ngoie atu i te tamariki kia “akarongo atu i to [ratou] au metua” e kia “akangateitei i to [ratou] metua tane e to [ratou] metua vaine.” (Ephesia 6:1-4) Ka taopenga mai te aru anga i teia ako tu-Atua ki tetai oraanga pamiri puapingaia.
Au Oa: Te maataanga i te tangata te inangaro ra i tetai au oa. Kua rauka ia tatou te kite pae manako e te pae ngakau kia aroa e kia aroaia mai. Kua akakite a Iesu ki tana au pipi e e mea tau kia “aroa kotou ia kotou uaorai.” (Ioane 13:34, 35) I rotopu ia ratou, ka kite tatou i te au oa ka rauka ia tatou kia aroa e kia irinaki—e kia akakite katoa i te oonuanga o to tatou au manako e te manako ngakau. (Maseli 18:24) Tei puapinga roa atu, na te taangaanga anga i te au kaveinga Pipiria, ka rauka ia tatou i te “akavaitata atu ki te Atua” e, kia kapiki katoaia ei “oa no te Atua” mei ia Aberahama rai.—Iakobo 2:23; 4:8.
Akakoroanga i Roto i te Oraanga: Kare i noo i tetai oraanga puapinga kore ua i te au ra, kua rauka ra i te aronga tei puapingaia tikai, te aiteanga e te akakoroanga tikai o te oraanga. Kare to ratou oraanga i akanooia ki runga i te au turanga tinamou kore o teia akatereanga. Te taki atura to ratou au akakoroanga ki te turanga merengo mou tikai, no te mea te akamouia ra te reira ki runga i te akakoroanga tikai o te oraanga. Eaa ra te oronga maira i te akakoroanga tikai o te oraanga no te tangata? “Ko te Atua te mataku atu, e akono oki i tana au akauenga: ko ta te tangata katoa ïa e pini ua ake.”—Koheleta 12:13.
Manakonakoanga: Ka riro katoa te akariro anga i te Atua ei Oa no tatou i te oronga mai i tetai manakonakoanga no tatou no te tuatau ki mua. Kua raurau te apotetoro ko Paulo i te au Kerititiano “eiaa oki e irinaki i te apinga maata mou kore, ei te Atua ora ra.” Na teia mataara ratou i “te akaputu marie anga i te meitaki tumu no ratou uaorai a muri atu, kia rave ratou i te ora mutu kore.” (1 Timoteo 6:17-19) Kare e roa atu ka tupu teia oraanga tika tikai me akaoki akaou mai te Patireia o te Atua i te rangi i te Parataito ki te enua nei.—Luka 23:43.
Me taangaanga koe i te au kaveinga Pipiria, kare mei te mea e kare tatou e rokoia e te manamanata, inara ka rauka ia koe i te kopae i te mamae ngakau e te mii ta te aronga kino e apai maira ki rungao ia ratou uaorai. Kua kite a David, tei taikuia i mua akenei, e te au mirioni ua atu mei iaia, i te puapinga tikai o te taangaanga anga i te au kaveinga Pipiria i roto i to ratou oraanga. I muri ake i te rauka anga mai tetai ngai angaanga tei tau meitaki te papaanga, kua akakite a David: “Te rekareka nei au no toku pirianga ki taku vaine e te tamariki e no te akameitakianga katoa kia tavini i te Atua ko Iehova ei tangata pakari i roto i te putuputuanga.” No reira rai te taramo i karanga ai no runga i te tangata tei akarongo i te ako a te Atua e: “Ko tana katoa e rave ra, te meitaki ra ïa”!
[Tutu i te kapi 6]
E RIMA AU TAKAINGA E PUAPINGAIA AI
1 Patoi kia kore e akaaereia e te au tu puapinga o teia ao.
2 Tatau e te manakonako no runga i te Tuatua a te Atua i te au ra ravarai.
3 Taangaanga i te ako a te Pipiria i roto i toou oraanga.
4 Akariro i te Atua ei oa noou.
5 E mataku i te Atua mou, e akono i tana au akauenga.
[Au Tutu i te kapi 7]
Te aru ra ainei koe i te au takainga e puapingaia ai?