‘I Mua Ake i te Au Maunga’

“I RIRO ana koe ei ngai nooanga no matou i te au uki katoatoa i aereia mai. I mua ake ka anauia mai ei te au maunga me kore ka apai mai ei koe i te enua e teianei ao, mei te mutu koreanga ki te mutu koreanga ko koe rai te Atua.” (Salamo 90:1, 2, New International Version) Taua au tuatua ra kua tuatuaia ki to tatou Anga ra, e mei teaa atura te pumaana i te reira​—no teia tuatau tikai, i te mea e kare okotai mea mako!

I roto i tetai turanga puapinga te kino atura, e meangiti ua te manako papu ra no runga i te tuatau ki mua. Kua taui tetai tupu anga maata o te kino e te takino anga apinga akakona i etai au oire ei au ngai tamaki anga. Pera katoa taua taokotai anga taito, koia te kopu tangata, te pururu atura. Te rongo ra tatou no runga i te au mea ou mei te au kopu tangata totoma. Te tupu atura te numero o te au kopu tangata metua takaua, ma te metua okotai i te maata anga o te taime te autu anga atu i te au manamanata maata. Kua takinoia te tu au o te au kopu tangata e manganui na te reira au kino, mei te papaanga i te tokorua e te papa anga tamariki.

Koai te ka arataki ia tatou na roto i teia au tuatau kino? Kare te au ako anga e ngere ana mei te au taote manako, te au tangata apiipii, e tetai atu, inara te maata anga i te reira e au akatarevake anga. No tetai uki katoa i te Opunga, ko te Taote ko Benjamin Spock te tangata ako puapinga tikai i roto i te mea o te apiianga i te tamariki. I reira kua akatika aia e kua tarevake tana ako anga!

Mei teaa atura te pakari kia riro ei te Atua ei “ngai nooanga” no tatou! I teia au tuatau kikino, koia te mato o te tu mako, te vaianga “mei te mutu koreanga ki te mutu koreanga.” Kua karanga aia nona uaorai na roto i te peroveta ko Malaki: “Ko Iehova au, kare au e tu ke ke.” (Malaki 3:6) Ta te Atua au turanga, mei tei papaia i roto i te Puka Tapu, te irinaki takiriia ra te reira. Kua vai ana aia ‘i mua ake i te au maunga,’ e ko tana ako anga, te rauka ra ia i roto i te au Tuatua Tapu, tei akatumuia ki runga i tona pakari ope kore. Ko te reira tikai ta tatou e anoano ra no te mataora e te manuia.

No reira e mea pakari kia rauka te akapapu anga ki roto i te Tuatua na te Atua, koia te Puka Tapu. E apii i te reira kia puapinga mei te pakari o te Atua. E irinaki i taau e apii ra, e e tuku i te reira ei marama no te arataki ia koe ki roto i te arataa o te ora. (Salamo 119:105) Ko te aronga anake ua tei rave ra e tumu ta ratou kia tuku i to ratou akapapu anga ki roto i te tuatau ki mua e te au tikai o te manako.